Wantuku Masiya xTachuwin Dios

¿Lichuwinan Biblia tuku nala?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿Putum kgantaxtu tuku wan Biblia?

Kajwatiya Dios tiku kgalhi xliputum litliwakga liwana lichuwinan tuku aku nala (Amós 3:7). Akgtum liʼakxilhtit, akxni aku xkamalakatsukikanit latamanin Dios wa pi xʼama min Mesías o Cristo. Nachuna, lichuwinalh pi kxfamilia Abrahán xʼama min chu mapakgsina xʼama wan. Chu nakamaxki latamat niku nialh katitatatlakgolh latamanin tiku nakgalhakgaxmatkgo Dios (Génesis 22:18; Isaías 53:4, 5). Dios na wa pi Mesías xʼama lakachin kBelén. (Kalikgalhtawakga Miqueas 5:2.)

Max akgtujun ciento kata akxni nina xlakachin Jesús, Biblia xlichuwinanita pi Mesías xtse xʼama wan chatum tsumat, nitu xʼamaka liʼakxilhkan, xʼama makamasta xlatamat xpalakata xtalakgalhin lhuwa latamanin chu xʼamaka maknukan, o akgtapukan niku kawilikan tiku kgalhikgo tumin (Isaías 7:14; 53:3, 9, 12). Liwaka akgkitsis ciento kata xlichuwinankanita pi xʼama kgetawila tantum burro akxni xtanulh kJerusalén chu xʼamaka listakan 30 monedas xaplata. Putum kgantaxtulh chuna la xlichuwinankanit. (Kalikgalhtawakga Zacarías 9:9 chu 11:12.)

2. ¿Liwana wan Dios akxni nakgantaxtu?

Liwaka akgkitsis ciento kata Biblia lichuwinalh tukuya kata xʼama tasiya Mesías. Kilhtamaku nema xʼama titaxtu asta akxni xkatsika tiku Mesías liputlakgetilhaka tuku talilakgapasa semanas xla kata, chu akgatunu «semana» litaxtu akgtujun kata. Tuku lichuwinanka pulaktiy tlawa: pulana 7 semanas chu apulaktu 62. Akxni putlakgekan uma pulaktiy kitaxtu 69 semanas xla kata, uma wamputun 483 kata. ¿Tukuya kata tsukuka putlakgekan? Chuna la wan Biblia, akxni chatum kskujni Dios xwanikan Nehemías chalh Jerusalén chu tsukulh kaxtlawa kachikin. Tuku lichuwinankan xlakata Persia limasiya pi tsukulh kata 455 akxni nina xmin Jesús (Nehemías 2:1-5). Jesús tamunulh akxni takgatsilh 483 kata, kata 29 nema lilakgapaskan akxni xminita Jesús. ¡Chuna la xwankanit! (Kalikgalhtawakga Daniel 9:25.)

 3. ¿Kgantaxtuma uku tuku lichuwinanit Biblia?

Jesús wa tuku lu xlakaskinka xʼama la kkinkilhtamakujkan. Lichuwinalh pi xʼamaka lichuwinankan xalakwan xalaksasti xlakata xTamapakgsin Dios, uma xʼama kamakgtaya tiku xpaxkikgolh Malakatsukina. Uma Tamapakgsin namasputu uma lixkajni kakilhtamaku. (Kalikgalhtawakga Mateo 24:14, 21, 22.)

Biblia liwana lichuwinan tuku xʼama la kxaʼawatiya kilhtamaku. Na lichuwinalh pi maski lhuwa xʼanalh tuku tlan, latamanin lixkajni xʼama tlawakgo Katiyatni. Tlakg lhuwa xʼanalh tapatin xlakata guerra, xʼama sputa liwat, tachiki tiyat chu xʼama anan lhuwa tajatat (Lucas 21:11; Apocalipsis [Revelación] 11:18). Xʼama sputa lakwan tayat. Chu kxakatuwa kilhtamaku kstalaninanin Cristo xʼamakgo lichuwinankgo xalakwan xalaksasti xla Tamapakgsin xlikalanka katiyatni. (Kalikgalhtawakga Mateo 24:3, 7, 8; 2 Timoteo 3:1-5.)

4. ¿Tuku nakamaxkikan latamanin?

Tiku kgalhi xliputum litliwakga nasikulunatlawa tiku nakgalhakgaxmatkgo. Tamapakgsin xalak akgapun, pulalin Jesucristo, tiku Mesías, chu tiku kalaksakkanit, namapakgsinankgo Katiyatni akgtum mil kata. Tiku nikgonit nalakastakwanamparakgo chu tlan namakgamakglhtinankgo lataman nema ni kgalhi xlisputni. Putum tlan natawilakgo xlakata nialh naʼanan tajatat chu masputukanit nawan linin. (Kalikgalhtawakga Apocalipsis 5:10; 20:6, 12; 21:4, 5.)

Komo tlakg katsiputuna xlakata uma, kaʼakxilhti páginas 23 asta 25 chu 197 asta 201 xla uma libro, ¿Tuku xlikana masiyay Biblia?