Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Yu ting ol tok profet bilong Baibel i kolim stret ol samting bai kamap?

God i Gat Olgeta Strong em wanpela tasol inap save long ol samting bai kamap bihain. (Amos 3:7) Olsem, long bipo yet, em i tok profet long wanpela man bai kamap na ol bai kolim em Mesaia, olsem Krais. Dispela Mesaia bai kamap long lain bilong bilipman Abraham. Em bai kamap King, na long rot bilong em, ol man husat i bihainim tok bilong God ol bai kisim gen laip oltaim na bai i no gat moa hevi bilong sik. (Stat 22:18; Aisaia 53:4, 5) Dispela Man em God i Promis long salim i kam, em bai kamap long Betlehem.—Ritim Maika 5:2.

Dispela Mesaia em Jisas. Winim 700 yia paslain long em i kamap, Baibel i tok profet olsem wanpela meri i no bin slip wantaim man bai karim dispela Mesaia na ol man bai rabisim em. Em bai givim laip bilong em long baim bek planti man long sin, na ol bai planim em wantaim ol man i gat planti mani samting. (Aisaia 7:14; 53:3, 9, 12) Inap 500 yia paslain, Baibel i tok profet tu olsem em bai sindaun long donki na i go insait long Jerusalem, na wanpela bai kamapim em long ol birua bilong kisim 30 mani silva. Olgeta dispela tok profet i bin kamap tru.—Ritim Sekaraia 9:9; 11:12.

2. Yu ting God i tokaut stret long ol det?

Winim 500 yia paslain long Mesaia i kamap, Baibel i tok profet long yia stret em bai kamap. Baibel i kolim ol wik bilong makim ol yia, olsem olgeta wan wan wik i makim 7-pela yia. Orait 7-pela wik na 62 wik em inap olsem 69 wik o yia. Olsem na 69 yia taims 7-pela yia, em 483 yia. Dispela haptaim i kirap long wanem taim? Baibel i tok dispela haptaim i kirap long taim Nehemia, em wokman bilong God, i go kamap long Jerusalem na i kirap long wokim gen banis bilong dispela taun. Ol rait bilong Persia long bipo i tok dispela samting i kamap long yia 455 B.C.E. (Nehemia 2:1-5) Inap 483 yia bihain, Jisas i kisim baptais olsem Mesaia long yia 29 C.E., em yia stret tok profet i makim.—Ritim Daniel 9:25.

  3. Yu ting ol tok profet bilong Baibel i wok long kamap tru long nau?

Jisas i tok profet long ol bikpela samting bai kamap long taim bilong yumi. Tok profet bilong em i kolim gutnius bilong Kingdom Bilong God, em rot bilong helpim tru ol manmeri long olgeta hap husat i laikim tru God. Dispela Kingdom bai pinisim tru pasin nogut bilong dispela haptaim nau yumi stap long en.—Ritim Matyu 24:14, 21, 22.

Ol tok profet bilong Baibel i stori gut long ol samting bai kamap long dispela taim. Ol man i ting wok bilong ol i wok long kamap gutpela moa, tasol Baibel i tokaut olsem ol man bai wok long bagarapim graun. Ol hevi i kamap long rot bilong ol woa, hangre, guria, na ol bikpela sik bai go nogut moa yet. (Luk 21:11; Revelesen 11:18) Ol manmeri bai i no bihainim moa stretpela pasin. Long dispela taim bilong hevi, ol disaipel bilong Jisas bai autim gutnius bilong Kingdom Bilong God long olgeta hap bilong graun.—Ritim Matyu 24:3, 7, 8; 2 Timoti 3:1-5.

4. Wanem samting bai painim ol man long bihain?

God i Gat Olgeta Strong bai givim ol gutpela samting long ol man i stap gut long em. Jisas Krais, em dispela Mesaia, wantaim ol manmeri God i makim, ol bai stap king long heven na bosim graun. Ol i insait long dispela Kingdom gavman we bai mekim wok bos inap wan tausen yia. Ol man i dai pinis bai kirap bek na God bai givim laip oltaim long ol. Na tu, Kingdom bai pinisim tru sik bilong olgeta man i stap laip. Bai i no gat moa sik na dai.—Ritim Revelesen 5:10; 20:6, 12; 21:4, 5.

Bilong kisim sampela save moa, lukim pes 23-25 na 197-201 bilong buk, Tru Tru Baibel i Tok Wanem?, em piksa bilong en i stap hia.