Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi maucimi gha mu Baibolo ghakuyowoya ndendende umo vinthu vizamucitikira?

Ni Ciuta Wankhongonozose pera uyo wangayowoyerathu ivyo vizamucitika munthazi. (Amosi 3:7) Mwaciyelezgero, wakayowoyerathu kale kuti kunthazi kuzamwiza munthu munyake uyo wazamucemeka Mesiya panji Khristu. Wakati Mesiya uyu wazamufuma mu mphapu ya munthu wakugomezgeka zina lake Abrahamu. Wazamuŵa muwusi ndipo wazamovwira kuti ŵanthu ŵakupulikira ŵazakaŵeso na umoyo uwemi wambura kulwara. (Genesis 22:18; Yesaya 53:4, 5) Munthu Wakulayizgika uyu wakeneranga kubabikira mu Betelehemu.—Ŵazgani Mika 5:2.

Yesu ndiyo wakazakaŵa Mesiya. Vilimika vyakujumpha 700 pambere wandaŵeko, Baibolo likayowoyerathu kuti Mesiya wazamubabika mwa mwali uyo wandagonanepo na mwanalume. Likayowoyaso kuti wazamutinkhika. Wazamupeleka umoyo wake kuti zakwananga za ŵanandi zigowokereke, ndipo para wazakafwa, wazamusungika pamoza na ŵasambazi. (Yesaya 7:14; 53:3, 9, 12) Vilimika vyakujumpha 500 pambere wandaŵeko, Baibolo likayowoyaso kuti Mesiya wazamunjira mu Yerusalemu uku wakwera pa mbunda, ŵazamumwendera mphiska, ndiposo kuti ŵazamumuguliska na ndalama 30 za siliva. Vyose vikafiskika.—Ŵazgani Zekariya 9:9; 11:12.

2. Kasi Ciuta wakuyowoyerathu nyengo iyo vinthu vizamucitikira?

Vilimika vyakujumpha 500 pambere Mesiya wandaŵeko, Baibolo likayowoyerathu cilimika ico Mesiya wazamuwonekera. Nyengo ya kwiza kwake ŵakayipendesera mu masabata gha vilimika, kung’anamura kuti “sabata” yiliyose yikaŵa vilimika vinkhondi na viŵiri. Ucimi uwu ukati pazamuŵa masabata 7 kusazgapo masabata 62. Masabata ghose gha vilimika ghakukwana 69. Masabata agha ghakupanga vilimika 483. Kasi ŵakamba pawuli kupendesera nyengo ya vilimika ivi? Mwakuyana na ivyo Baibolo likuyowoya, nyengo iyi yikamba apo muteŵeti wa Ciuta Nehemiya wakafika ku Yerusalemu na kwamba kuzengaso msumba. Mdauko wa Peresiya ukulongora kuti ivi vikacitika mu 455 B.C.E. (Nehemiya 2:1-5) Yesu wakabapatizika kuŵa Mesiya pakati pajumpha vilimika 483, mu cilimika ca 29 C.E. Nyengo iyi yikukolerana ndendende na iyo Baibolo likayowoyerathu.—Ŵazgani Daniel 9:25.

  3. Kasi panyengo yasono maucimi gha mu Baibolo ghakufiskika?

Yesu wakacima kuti vinthu vinyake vyakuzirwa vizamucitika mu nyengo yithu yino. Ucimi wake ukuyowoya za makani ghawemi gha Ufumu wa Ciuta, uwo uzamuwombora ŵanthu awo ŵakutemwa Ciuta. Ufumu uzamuwuskapo mgonezi uheni uwo ulipo sono.—Ŵazgani Mateyu 24:14, 21, 22.

Maucimi gha mu Baibolo ghakulongosora makora ivyo vizamucitika kuumaliro wa mgonezi. Nangauli ŵanji ŵakughanaghana kuti caru cikutukuka, kweni Baibolo likayowoyerathu kuti ŵanthu ŵazamunanga comene caru. Likati masuzgo agho ghakuŵapo cifukwa ca nkhondo, njara, vindindindi, na nthenda zakwambukira ghazamusazgikira. (Luka 21:11; Uvumbuzi 11:18) Ŵanthu ŵazamuleka kuŵa na nkharo yiwemi. Likatiso mu nyengo zamasuzgo izi, ŵalondezgi ŵa Yesu ŵazamupharazga makani ghawemi gha Ufumu wa Ciuta ku ŵanthu ŵa mitundu yose.—Ŵazgani Mateyu 24:3, 7, 8; 2 Timote 3:1-5.

4. Kasi nchivici cizamucitikira ŵanthu munthazi?

Ciuta Wankhongonozose wanozgera ŵanthu ŵakugomezgeka vinthu vinandi viwemi. Yesu Khristu, uyo ni Mesiya, pamoza na ŵakusankhika ŵake, ŵazamuwusa caru capasi kufumira kucanya. Ufumu uwu uzamuwusa kwa vilimika cikwi. Ŵakufwa ŵazamuwuskika ndipo ŵazamupika mwaŵi wakuti ŵazakakhale kwamuyirayira. Kweniso Ufumu uwu uzamucizga waliyose uyo wazamuŵako. Matenda na nyifwa vizamuŵakoso yayi.—Ŵazgani Uvumbuzi 5:10; 20:6, 12; 21:4, 5.

Kuti mumanye vinandi wonani peji 23-25 na 197-201 mu buku ilo, Kasi Baibolo Likusambizgaci Comenecomene? lalongoreka apa.