I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. E parau tohu taa maitai anei ta te Bibilia?

O te Atua Mana hope anaˈe te nehenehe e tohu i te tau no a muri aˈe ma te taa maitai. (Amosa 3:7) Ei hiˈoraa, i te omuaraa iho â to ˈna tohuraa i te taeraa mai o te hoê taata, tei parauhia te Mesia. E huaai te Mesia no Aberahama taiva ore. E faatere mai oia e e haamaitai oia i te taata faaroo ia fanaˈo faahou ratou i te hoê oraraa aita e maˈi. (Genese 22:18; Isaia 53:4, 5) No roto mai te Mesia fafauhia ia Betelehema.—A taio i te Mika 5:2.

Ua haapapu o Iesu e o ˈna te Mesia. E 700 tiahapa matahiti na mua ˈˈe, ua tohu te Bibilia e e fanauhia te Mesia e te hoê paretenia e e vahavahahia oia. E horoa oia i to ˈna ora no te hara o te taata e rave rahi, e e hunahia oia i rotopu i te taata taoˈa. (Isaia 7:14; 53:3, 9, 12) Ua faaite atoa te Bibilia, e 500 tiahapa matahiti na mua ˈˈe, e e tomo oia i roto ia Ierusalema i nia i te hoê asini e e hoohia o ˈna no e 30 moni ario. Ua tupu te mau parau rii atoa i tohuhia.—A taio i te Zekaria 9:9; 11:12.

2. Te tohu ra anei te Atua i te mau taio mahana?

Ua tohu te Bibilia i te matahiti e fa mai ai te Mesia e 500 tiahapa matahiti na mua ˈˈe. No te faaite mai afea, ua faaohipa te Bibilia i te mau hebedoma matahiti, oia hoi hoê “hebedoma,” e hitu ïa matahiti. E itehia na mua e 69 hebedoma matahiti ia amuihia e 7 e e 62 hebedoma. Te hoê roaraa ïa e 483 matahiti. Afea te reira i te haamataraa? Ia au i te Bibilia, ua haamata te reira a tae ai Nehemia i Ierusalema no te patu faahou i te oire. Ia au i te tuatapaparaa Peresia, i te matahiti 455 ïa hou o Iesu. (Nehemia 2:1-5) Ua bapetizohia Iesu ei Mesia e 483 matahiti iho â i muri aˈe, i te matahiti 29.—A taio i te Daniela 9:25.

  3. Te tupu ra anei te mau parau tohu Bibilia?

Ua tohu Iesu i te mau tupuraa faufaa roa e itehia i to tatou tau. Ua faahiti oia i te evanelia o te Basileia o te Atua o te faaora i te taata na te ao atoa e here ra i te Atua. E e haamou te Basileia i teie ao ino.—A taio i te Mataio 24:14, 21, 22.

Te faataa maitai ra te mau parau tohu Bibilia i te anotau hopea o teie nei ao. Ia au i te mau Papai, e ino roa ˈtu â te fenua i te taata i te hoê tau e haere ai te ite i mua. E rahi atu â te ahoaho no te tamaˈi, te oˈe, te aueueraa fenua e te maˈi pee. (Luka 21:11; Apokalupo 11:18) Eita te taata e tâuˈa faahou i te mau ture aveia morare teitei. I tera tau arepurepu, e poro te mau pǐpǐ a Iesu i te evanelia o te Basileia o te Atua i te mau fenua atoa.—A taio i te Mataio 24:3, 7, 8; Timoteo 2, 3:1-5.

4. Eaha te ananahi o te huitaata?

E haamaitai â te Atua Mana hope i te huitaata taiva ore. Apitihia e te feia ta ˈna i maiti, e faatere Iesu Mesia i te fenua mai te raˈi mai. To roto ratou i te Basileia o te faatere hoê tausani matahiti. E faatiahia mai te feia pohe e e haavahia te taata e au ia ratou te ora mure ore. Hau atu â, e faaore roa te Basileia i te maˈi e te pohe ia oraora maitai te feia i reira.—A taio i te Apokalupo 5:10; 20:6, 12; 21:4, 5.

No te faahohonu atu â, a hiˈo i te mau api 23-25 e 197-201 o teie buka, Eaha ta te Bibilia e haapii mau ra?