Mu Fil Ban’en ko Thin Rok Got

Ma Yog e Bible e N’en Nra Buch Nga M’on, Fa?

Re article ney e be weliy boch e deer ni sana ka am fith ba ngiyal’ nge gin nrayog ni ngam pirieg e fulweg riy u Bible. Rra felfelan’ e Pi Mich Rok Jehovah ni ngam weliyed e pi fulweg ney u taabang.

1. Ba tamilang e pi yiiy u Bible, fa?

Kemus ni goo Got ni Gubin ma Rayog Rok e rayog ni nge nang e n’en ni bay nga m’on. (Amos 3:7) Bod ni boor e duw u m’on riy, me yog ni bay be’ nra yib ni nge mang fare Messiah, ara Kristus. Fare Messiah e ra yib ko tabinaw rok Abraham ni be’ nib yul’yul’. Ra mang pilung ma ra ayuweg e girdi’ ni ngar flontgad ma dab kur m’argad. (Genesis 22:18; Isaiah 53:4, 5) Cha’nem ni kan Micheg e yira gargeleg u Bethlehem.​—Mu beeg e Mikah 5:2.

Jesus e ir fare Messiah. Ba pag 700 e duw u m’on riy, min yiiynag u Bible ni be’ nib pin ndawori nang e pumoon e ra gargeleg. Ku nog ni yira darifannag. Ra pi’ e yafas rok ni nge biyuliy boor e girdi’ ngay, ma yira chibgiliy nga ba low ni tagil’ be’ ni boor ban’en rok. (Isaiah 7:14; 53:3, 9, 12) Ma ba pag lal e chibog u m’on riy, me yiiynag e Bible nra yan nga Jerusalem u daken e donkey ma yira yognag nga 30 yang i silber. Gubin ban’en nni yiiynag u murung’agen ni riyul’.​— Zekariah 9:9; 11:12.

2. Rayog ni nge yog Got e ngiyal’ nra buch ban’en riy, fa?

Ba pag lal e chibog u m’on riy, me yiiynag e Bible e re duw nra m’ug fare Messiah riy. Kan sumarnag e re ngiyal’ i n’em ni yibe fanay e wik ni duw, ni pi “wik” nem e ra reb ma medlip e duw n’umngin nap’an. Ka nog ni bay 7 e wik nge ku 62 e wik ni yira puthuy nga taabang ma 69 e wik ni be yip’ fan e duw. Ma yira puthuy e re 69 i wik nem ni 7 yay ma 483 e duw. Wuin e nni tabab i theeg e pi duw ney riy? Rogon ni be yog e Bible e tabab e re ngiyal’ i n’em u nap’an ni taw Nehemiah nga Jerusalem ni nge fulweg yu Jerusalem nga rogon. Rogon ni bay ko chep rok yu Persia e re duw nem e 455 B.C.E. (Nehemiah 2:1-5) Nap’an e duw ni 29 C.E. ni aram e 483 e duw nga tomuren e re ngiyal’ i n’em, min taufenag Jesus me mang fare Messiah ni bod rogon ni kan yiiynag.​—Mu beeg e Daniel 9:25.

 3. Be lebug e pi yiiy nu Bible, fa?

Ke yiiynag Jesus boch ban’en nra buch e ngiyal’ ney. I yiiynag ni yira machibnag fare thin nib fel’ ni murung’agen Gil’ilungun Got u ga’ngin yang e fayleng ni ir e ra fal’eg laniyan’ e piin nib t’uf Got rorad. Re Gil’ilungun nem e ra thang e re m’ag nib kireb ney ni gad be par riy.​—Mu beeg e Matthew 24:14, 21, 22.

Pi yiiy u Bible e be tamilangnag murung’agen e pi n’en nra buch ko ngiyal’ ni ke chugur nga tungun e re m’ag ney. Ke yog e Bible nra kirebnag e girdi’ e re fayleng ney nib thil nga rogon ni yad be lemnag. Ra yoor e magawon ni bochan e mahl ni yibe tay, nge ggan ni be lich, nge durru’, nge m’ar nib machreg ni ma af. (Luke 21:11; Revelation 11:18) Ra gel e kireb ko ngongol ko girdi’. Ma nap’an ni be buch e pi n’ey, ma ra machibnag pi gachalpen Jesus fare thin nib fel’ ni murung’agen Gil’ilungun Got u ga’ngin yang e fayleng.​—Mu beeg e Matthew 24:3, 7, 8; 2 Timothy 3:1-5.

4. Mang e athap ko girdi’ boch nga m’on?

Boor ban’en nib fel’ ni ke tay Got ni Gubin ma Rayog Rok ni fan ngak e piin ni yad ba yul’yul’ boch nga m’on. Jesus Kristus, ni ir fare Messiah nge piin ni kan dugliyrad e yad ra gagiyegnag e re fayleng ney. Re Am nem ni yad ra gagiyeg riy e ra gagiyeg u lan bbiyu’ i duw. Yira faseg e piin ni kar m’ad min ayuwegrad ni nge yog e yafas ni manemus ngorad. Maku reb e ra chuweg Gil’ilungun Got e m’ar rok urngin e girdi’, ma aram e dab ku un m’ar ma dab ku unim’.​—Mu beeg e Revelation 5:10; 20:6, 12; 21:4, 5.

Mu guy e page 25-28 nge 228-231 ko re ke babyor ney ni ku be weliy boch ban’en u murung’agen e re n’ey.