“HAWID sa akong kamot,” miingon ang amahan sa iyang anak sa dihang motabok na sila sa dalan nga daghag sakyanan. Kay gikuptan pag-ayo sa amahan ang kamot sa iyang anak, kini mibating luwas ug walay kahadlok. Nangandoy ka ba usab nga may mohawid sa imong kamot ug mogiya nimo latas sa mga problema sa kinabuhi? Kon mao, mahupayan ka sa giingon ni Isaias.—Basaha ang Isaias 41:10, 13.

Kana gisulti ni Isaias sa Israel. Bisag giisip sa Diyos ang maong nasod ingong iyang “linaing katigayonan,” kini gilibotag mga kaaway. (Exodo 19:5) Angay bang mahadlok ang Israel? Gigamit ni Jehova si Isaias sa pagsulti nianang makapadasig nga mensahe. Samtang ato kanang susihon, atong hinumdoman nga mapadapat usab kana sa mga magsisimba sa Diyos karon.—Roma 15:4.

“Ayaw kahadlok,” nag-ingon si Jehova. (Bersikulo 10) Kasaligan kining mga pulonga. Gipatin-aw ni Jehova kon nganong dili angayng mahadlok ang iyang katawhan: “Kay ako uban kanimo.” Siya dili halayo sa iyang katawhan, nga motabang lang sa panahong may nanginahanglag tabang. Buot niyang mahibalo sila nga siya nagauban kanila—nga daw anaa sa ilang kiliran—kanunayng andam motabang kanila. Dili ba kana makapahupay?

Si Jehova dugang nagpasalig sa iyang mga magsisimba, nga nag-ingon: “Ayaw iliraw ang imong panan-aw.” (Bersikulo 10) Ang Hebreohanong berbo nga gigamit dinhi mahimong magtumong niadtong “nagtan-aw sa palibot sa pagbantay kon duna bay moatake nila.” Gipatin-aw ni Jehova kon nganong ang iyang katawhan dili angayng magpanglingi sa kahadlok: “Kay ako imong Diyos.” May molabaw pa ba niana nga pasalig? Si Jehova ang “Labing Hataas,” ang “Usa nga Labing Gamhanan.” (Salmo 91:1) Sanglit ang ilang Diyos mao man ang labing gamhanan nga si Jehova, nganong mahadlok man sila?

Nan, unsay angayng dahomon sa mga alagad ni Jehova gikan kaniya? Siya misaad: “Ako sa pagkatinuod magahawid kanimo sa akong tuong kamot sa pagkamatarong.” (Bersikulo 10) Siya midugang: “Ako, si Jehova nga imong Diyos, nagahawid sa imong tuong kamot.” (Bersikulo 13) Unsay mosantop sa imong hunahuna sa dihang madungog nimo kana? “Gipakita niining duha ka teksto ang makapatandog nga larawan sa usa ka ginikanan ug anak,” matod sa usa ka reperensiya. “[Ang amahan] dili lang kay andam manalipod, kondili siya kauban mismo sa iyang anak; dili niya tugotang mahimulag niya ang iyang anak.” Hunahunaa lang—dili tugotan ni Jehova nga ang iyang katawhan mahimulag kaniya, bisan sa daw kinalisorang gutlo sa ilang kinabuhi.—Hebreohanon 13:5, 6.

Ang mga magsisimba ni Jehova karon mahupayan gayod sa gisulat ni Isaias. Niining “makuyaw nga mga panahong lisod sagubangon,” kita mabug-atan usahay sa mga kapit-os sa kinabuhi. (2 Timoteo 3:1) Apan dili kinahanglang mag-inusara ta sa pag-atubang niana. Si Jehova andam mohawid kanato. Samag masaligong mga anak, kita makahawid sa iyang gamhanang kamot, nga masaligong siya mogiya nato sa hustong dalan ug motabang panahon sa atong panginahanglan.—Salmo 63:7, 8.

Sugyot nga pagbasa sa Bibliya sa Enero:

▪ Isaias 24-42