Tsi Obɛŋkɛ Nyɔŋmɔ

“Mi, Yehowa, o-Nyɔŋmɔ lɛ, Mihiɛ Oninejurɔ Mli”

TSƐ ko ni kɛ ebi nuu fioo yaafo lɔle gbɛ wulu ko mli lɛ kɛɛ ebi lɛ akɛ: “Mɔ minine mli.” Beni gbekɛ lɛ nine bibioo lɛ hɔ etsɛ kɔkɔŋ lɛ, enu he akɛ eyɛ shweshweeshwe, ni esheee gbeyei. Ani be ko eba pɛŋ yɛ oshihilɛ mli ní oná kulɛ mɔ ko mɔ onine mli kɛtsɔmɔ shihilɛi ni mli wawai amli shweshweeshwe? Kɛ́ nakai ni lɛ, Yesaia wiemɔi nɛɛ baanyɛ ashɛje omii.—Kanemɔ Yesaia 41:10, 13.

No mli lɛ Yesaia kɛ Israelbii lɛ miiwie. Eyɛ mli akɛ Nyɔŋmɔ bu nakai maŋ lɛ akɛ ‘lɛ diɛŋtsɛ enɔ̃’ moŋ, shi henyɛlɔi ebɔle amɛ. (2 Mose 19:5) Ani esa akɛ Israel ashe gbeyei? Yehowa tsɔ Yesaia nɔ ekɛ miishɛjemɔ wiemɔ ha amɛ. Beni wɔsusuɔ nakai wiemɔi lɛ ahe lɛ, nyɛhaa ehia wɔjwɛŋmɔŋ akɛ ekɔɔ Nyɔŋmɔ jálɔi ni yɔɔ ŋmɛnɛ lɛ hu ahe.—Romabii 15:4.

Yehowa kɛɛ: “Kaashe gbeyei.” (Kuku 10) Enɛ jeee wiemɔ folo kɛkɛ. Yehowa tsɔɔ nɔ hewɔ ni esaaa akɛ ewebii lɛ sheɔ gbeyei lɛ, ekɛɛ akɛ: “Shi mi, mikɛo yɔɔ!” Ejeee mɔ ko ni hɔ he ko shɔŋŋ ni woɔ shi akɛ kɛ́ hiamɔ ko ba lɛ ebaaba oya ni ebaye ebua. Eesumɔ ni ewebii lɛ ale akɛ ekɛ amɛ yɔɔ—oookɛɛ eyɛ amɛmasɛi—ni efee klalo akɛ ebaaye ebua amɛ be fɛɛ be. Sane nɛɛ shɛjeɔ mɔ mii waa, aloo jeee nakai?

Yehowa tee nɔ ekɛ naashiwoo wiemɔi nɛɛ ha ejálɔi lɛ akɛ: “Kaakwɛkwɛɛ ohe.” (Kuku 10) Hebri wiemɔ ni akɛtsu nii yɛ biɛ nɛɛ baanyɛ atsɔɔ mɛi ni “folɔɔ amɛhe amɛkwɛɔ kɛji nɔ ko baanyɛ aye amɛ awui.” Yehowa tsɔɔ nɔ hewɔ ni esaaa akɛ ewebii lɛ kwɛkwɛɔ amɛhe, loo amɛsheɔ gbeyei lɛ. Ekɛɛ akɛ: “Mi ji o-Nyɔŋmɔ lɛ!” Mɛni po baanyɛ aha mɔ tsui anyɔ emli fe enɛ? Yehowa ji “Ŋwɛinyo lɛ,” “Ofe lɛ.” (Lala 91:1) Kɛ́ Yehowa, mɔ ni he wa fe fɛɛ lɛ ji amɛ-Nyɔŋmɔ lɛ, mɛni hewɔ esa akɛ amɛshe gbeyei?

Belɛ, mɛni Yehowa jálɔi baanyɛ akpa gbɛ kɛjɛ edɛŋ mɔ? Ewoɔ shi akɛ: “Mahiɛ omli kɛ mijalɛ ninejurɔ lɛ.” (Kuku 10) Ekɛfataa he akɛ: “Mi, Yehowa, o-Nyɔŋmɔ lɛ, mihiɛ oninejurɔ mli.” (Kuku 13) Kɛ́ onu wiemɔi nɛɛ, mɛni baa ojwɛŋmɔŋ? Wolo ko tsɔɔ mli akɛ, “Wiemɔi ni yɔɔ kukuji enyɔ nɛɛ amli lɛ feɔ fɔlɔ ko kɛ ebi he mfoniri ni sa jogbaŋŋ.” Wolo lɛ kɛfata he akɛ: “[Tsɛ lɛ] damɔɔɔ afã koni kɛ́ sane ko ba lɛ, efã ebi lɛ he, shi ehiɔ gbekɛ lɛ masɛi diɛŋtsɛ; eshiŋ gbekɛ lɛ masɛi kɔkɔɔkɔ.” Bo lɛ susumɔ he okwɛ—Yehowa shiŋ ewebii lɛ kɔkɔɔkɔ, kɛ́ amɛkɛ jaramɔ shihilɛi ni etamɔ nɔ ni amɛnyɛŋ he nɔ ko amɛfee miikpe po.—Hebribii 13:5, 6.

Yesaia wiemɔi nɛɛ baanyɛ ashɛje Yehowa jálɔi amii waa ŋmɛnɛ. Yɛ “jaramɔ bei” nɛɛ amli lɛ, bei komɛi lɛ shihilɛ lɛ mli naagbai lɛ baanyɛ aha wɔhao waa. (2 Timoteo 3:1) Shi ashiii wɔ kome too yɛ bei ni tamɔ nɛkɛ mli. Yehowa efee klalo akɛ ebaamɔ wɔnine mli. Taakɛ gbekɛ ko ni yɔɔ hekɛnɔfɔɔ yɛ etsɛ mli lɛ baafee lɛ, wɔbaanyɛ wɔmɔ enine ní wa lɛ mli, kɛ hekɛnɔfɔɔ lɛ akɛ ebaatsɔɔ wɔ jalɛ gbɛ lɛ, ni ebaaye ebua wɔ yɛ hiamɔ bei amli.—Lala 63:8, 9.—w12-E 01/1.