Sud Machiegni gi Nyasaye

“An Jehova Nyasachi Namak Lueti Marachwich”

WUORO kalo ndara ma mtokni ng’enyie ka en gi wuode matin kendo onyiso wuodeno niya, “mak lueta.” Wuowino chunye okuwe kendo ok owinj ka oluor nikech wuon mare omako lwete motegno. Be isega gombo ni ng’ato omak lweti kendo otayi maber e ngima ma kore tekni? Ka en kamano, inyalo yudo hoch kuom weche ma ne ondik gi Isaya.​​—⁠Som Isaiah 41:⁠10, 13.

Isaya ne ondiko ne Jo-Israel. Kata obedo ni Nyasaye ne neno ogandano kaka ‘libambane moyiero,’ ogandano ne olwor gi wasigu. (Wuok 19:5) Be ne onego Jo-Israel obed maluor? Jehova ne ooro Isaya gi ote ma ne dhi jiwogi. Sama wanono wechego, we waket e paro ni gitiyo kata kuom jogo malamo Nyasaye e kindegi.​​—⁠Jo Rumi 15:4.

Jehova jiwowa ni ‘kik waluor.’ (Kwan matindo 10) Magi ok gin weche manono. Jehova nyiso gimomiyo joge ok onego obed maluor. Owacho niya: “An kodi.” Nyasaye ok en jakony man mabor, masingo ni obiro konyowa mana sama wakalo e chandruok. Odwaro ni joge ong’e ni en kodgi​​—⁠mana ka ng’at manie bathgi​​—⁠oikore kinde duto mar sirogi. Donge mano hoyo chunywa?

Jehova dhi nyime jiwo jogo malame kowacho niya: “We ng’eng’.” (Kwan matindo 10) Wachni e dho Hibrania tiende en “ng’iyo koni gi koni mondo ng’ato one ka nitie gima nyalo hinye.” Jehova lero gimomiyo joge ok onego oluor. Owacho niya: “An Nyasachi.” Donge mano jiwowa ahinya? Jehova e ng’at “Ma Malo Chutho,” “Ng’a Manyalo Duto.” (Zaburi 91:1) Be onego wabed maluor to Jehova ma wuon teko duto e Nyasachwa?

Omiyo jogo malamo Jehova nyalo geno ni Jehova biro timonegi ang’o? Osingo niya: “Ee, nasiri gi lueta marachwich, an matimo kare.” (Kwan matindo 10) Bende owacho niya: “An Jehova Nyasachi namak lueti marachwich.” (Kwan matindo 13) Ang’o mabiro e pachi seche ma iwinjo wechego? Buk moro wacho niya; “Kwan matindo ariyogi miyowa picha maber ahinya mar janyuol koda nyathine. [Wuon nyathino] ok ochung’ achung’a mondo orit nyathino, to en kaachiel gi nyathino, ok owe gimoro amora opoge gi nyathine.” Parie niya​​—⁠Jehova ok bi weyo mondo gimoro amora opoge gi joge kata bed ni gikalo e chandruoge machalo nade.​​—⁠Jo Hibrania 13:​5, 6.

Jogo malamo Jehova e kindegi nyalo yudo hoch mang’eny kuom weche ma ne Isaya ondikogi. Seche moko, e ‘kinde mag chandruokgi,’ wanyalo winjo ni pek mwakaloe ohewowa. (2 Timotheo 3:1) Kata kamano, ok ochuno ni wakal e pekgo kendwa. Jehova oikore mar mako lwetwa. Mana kaka nyathi mogeno wuon mare, wanyalo mako lwet Nyasaye ka wan gadier chuth ni obiro tayowa e yo makare kendo obiro konyowa sama wan e chandruok.​​—⁠Zaburi 63:​7, 8.