TATE o botša morwa wa gagwe yo monyenyane ge ba itokišeletša go tshela setarata sa leemaema, o re: “Ntshware ka seatla.” Mošemanyana o ikwa a šireletšegile e bile a sa boife ge menwananyana ya gagwe e feletše ke seatleng sa tatagwe se se tiilego. Na o kile wa ikwa o duma gore motho yo mongwe a ka go swara ka seatla gomme a go hlahla ka tšhireletšego maemong a bophelo a sa tsepamago? Ge e ba go le bjalo, o ka homotšwa ke mantšu ao a begilwego ke Jesaya.—Bala Jesaya 41:10, 13.

Jesaya o be a lebišitše mantšu a gagwe go Baisiraele. Gaešita le ge Modimo a be a lebelela setšhaba seo e le ‘thoto ya gagwe e kgethegilego,’ se be se dikologilwe ke manaba. (Ekisodo 19:5) Na Baisiraele ba be ba swanetše go boifa? Jehofa o ile a diriša Jesaya gore a fetiše molaetša wo o kgothatšago. Ge re dutše re hlahloba mantšu ao, anke re gopoleng gore a šoma le go barapedi ba Modimo lehono.—Baroma 15:4.

Jehofa o kgothatša ka gore: “O se ke wa boifa.” (Temana 10) Mantšu a ga se a lefeela. Jehofa o hlalosa lebaka leo ka lona batho ba gagwe ba sa swanelago go boifa, ge a re: “Gobane ke na le wena.” Ga a nee thušo a le kgole, a holofetša gore o tla fihla ka nako bakeng sa go tlo thuša mohlang wa tlalelo. O nyaka gore batho ba gagwe ba tsebe gore o na le bona—bjalo ka ge e eka o hleng ga bona—gomme o dula a itokišeditše go ba thuša. Na yeo ga se kgopolo e kgothatšago?

Jehofa o kgothatša barapedi ba gagwe ka mo go tšwelago pele, o re: “O se ke wa lealea.” (Temana 10) Lediri la Seheberu leo le dirišitšwego mo le ka šupa bathong bao ba “lebelelago mathokong ka moka go bona ge e ba go na le selo seo se ka ba gobatšago.” Jehofa o hlalosa lebaka leo ka lona batho ba gagwe ba sa swanelago go lealea ba tšhogile, ge a re: “Gobane ke Modimo wa gago.” Ke’ng seo se ka homotšago go feta seo? Jehofa ke “Yo Godimodimo” le “Ramatlaohle.” (Psalme 91:1) Go re’ng ba swanetše go boifa mola Jehofa Ramatlaohle e le Modimo wa bona?

Ka gona, barapedi ba Jehofa ba ka letela eng go yena? O holofetša gore: “Ruri ke tla go swara ka go tia ka seatla sa ka sa le letona sa toko.” (Temana 10) E bile o re: “Nna Jehofa Modimo wa gago ke go swere ka seatla sa ka sa le letona.” (Temana 13) O nagana’ng ge o ekwa mantšu ao? Puku e nngwe ya ditšhupetšo e hlalosa gore: “Ge ditemana tše tše pedi di hlahlobja ka moka, di nea seswantšho se matla sa motswadi le ngwana. [Tate] ga a fo ema gore a šireletše ngwana, eupša o eme hleng ga gagwe; a ka se dumele gore a kgaoganywe le ngwana wa gagwe.” Akanya ka se—Jehofa a ka se dumele gore batho ba gagwe ba kgaoganywe le yena, gaešita le dinakong tšeo go bonagalago e le tša leswiswi bophelong bja bona.—Baheberu 13:5, 6.

Barapedi ba Jehofa lehono ba ka homotšwa kudu ke mantšu ao a begilwego ke Jesaya. Ka dinako tše dingwe re ka ikwa re imetšwe kudu ke dikgateletšo tša bophelo ‘dinakong tše tše di hlobaetšago tšeo go lego thata go lebeletšana le tšona.’ (2 Timotheo 3:1) Eupša ga se ra swanela go lebeletšana le ditlhohlo tšeo re nnoši. Jehofa o ikemišeditše go otlolla seatla sa gagwe e le gore a re sware. Go swana le bana bao ba botago botatago bona, re ka kakatlela seatla sa gagwe se matla, re kgodišegile gore o tla re lebiša thokong e nepagetšego gomme a re thuša nakong ya ge re tlaletšwe.—Psalme 63:7, 8.

Mmalo wa Beibele o šišintšwego bakeng sa January:

▪ Jesaya 24–42