Kporom Hen Aôndo

“Mo, TER, Aôndo Wou, M Kôr Uwegh Ough Ku Yanegh”

ER TER ugen lu peren godobi vea wan na, ape akaahendan a ngee kpishi yô, a kaa a wan na ér, “va uwegh m kôr u.” Er ter ne kôr wan na uwegh gbang gbang yô, mciem bee wanakiriki ne iyol, á nenge ér kwagh u eren un ngu ga. I lu nahan sar u u or ma nan kôr u sha uwe, ma nan hemen we sha gbenda u uma u or fe kwagh u kper ga ne vee? Aluer ashighe agen ka i sar u nahan yô, mkaanem ma Yesaia yange nger ne, ma a sur u ishima.—Ôr Yesaia 41:10, 13.

Yesaia yange ôr mkaanem man a Mbaiserael. Er Aôndo nenge ikyuior la ér ngi ‘kwagh Na iyol Na’ nahan kpa, mbaihyomov vev kase ve wa atô. (Ekesodu 19:5) Yange gba u Mbaiserael vea ciaa? Yehova yange tindi Yesaia za ôr ve mkaanem ma taver ve ishima. Er se ngure timen sha mkaanem man yô, fa wer ma sha ci u mbacivir Aôndo mba sha ayange ne kpaa.—Mbaromanu 15:4.

Yehova yange taver ve ishima, kaa ér: “De cie ga.” (Ivur 10) Yehova gba ôron mkaanem man tsô ga. Yange pase ityôkyaa i í ne ve i gbe u ior nav vea cia ga la, ér: “Gadia M ngu a we.” Yehova ka or u tilen ken ica nan iwasen, u ka nan tôndo zwa ér nan ngu va nan ior iwasen sha shighe u kwagh a ze ve iyol la ga. A soo ér ior nav ve fa ér un ngu a ve, inja er un tile ve hen ikyooso nahan, un kegh a kegh iyol u wasen ve. Kwagh ne ka kwagh u surun se ishima je gande.

Yehova shi yange kaa a mba civir un nahan ér: “De enger kenger [nen] sha mcie ga.” (Ivur 10) Ishember i ken zwa Heberu i i gem ken ivur ne ér “enger kenger” la ngi ôron kwagh u mba ka ve “yengen kera fele fele ér, vea nenge aluer ma kwagh ngu van u bulan ve” la. Yehova yange pase ityôkyaa i í na ve gba u ior nav vea enger kenger sha mcie ga yô, ér: “Gadia Mo M ngu Aôndo wou.” Mkaanem man lu ma taver ve ishima kpen kpen. Yehova ka “Uhembansha,” man “Uhembanagee” kpaa. (Pasalmi 91:1) Er Yehova, u a hembe agee cii la lu Aôndo ve yô, ityôkyaa kera lu i vea cia ga.

Kpa ka nyi mbacivir Yehova ve keren her ana? Yehova tôndo zwa ér: ‘Me taver we, shi me wase u, man me tuur we sha uwegh Agh ku yanegh ku yiman a yima la.’ (Ivur 10) Shi a kaa ér: “Mo, TER, Aôndo wou, M kôr uwegh ough ku yanegh.” (Ivur 13) U ungwa mkaanem man nahan, ka nyi i ve u ken ishima? Takerada ugen kaa ér: “Avur a ahar ne wase se u nengen a mlu u kôôsôô u ka a lu hen atô u Ter vea wan u nan la . . . [Ter] la ka nan gba tilen tsô ér nan ngu kuran wan u nan ga, kpa ka nan lu vea wan la kpôô kpôô; nan den ér kwagh môm tsô a pav nan a wan u nan la ga.” Hen sha kwagh ne tsô u nenge, Yehova una lumun ér kwagh môm a pav un a ior nav ga, sha ashighe a ve tagher a mbamzeyol mba ve lu inja er ve hemba taver cii la je kpaa.—Mbaheberu 13:5, 6.

Mbacivir Yehova nyian kpa, vea fatyô u zuan a msurshima ken mkaanem ma Yesaia yange nger mara kpishi je. Ken “ashighe a ican” ne, alaghga mbamtaver mba uma vea na yô, uma una due se ishima. (2  Timoteu 3:1) Kpa, gba u se nôngo a mbamtaver mban se tseegh ga. Yehova kegh iyol u kôron se sha uwegh, wasen se. Se fatyô u kôron uwegh nagh ku ageegh kura, er mbayev mba suur sha a na nahan, shi lun a vangertiôr ser una hemen se sha gbenda u vough shi una wase se ken ashighe ase a ican kpaa.—Pasalmi 63:7, 8.