“HOLIM han bilong mi,” em tok papa i mekim long liklik pikinini man bilong em taim tupela i redi long brukim rot. Strongpela han bilong papa i holim gut liklik han bilong pikinini, na pikinini i pilim seif na em i no pret. Olsem wanem? I gat sampela taim we yu bin pilim olsem yu laik bai wanpela i ken holim han bilong yu na stiaim yu gut bambai ol hevi i no ken daunim yu? Sapos olsem, orait tok bilong Aisaia bai mekim gut bel bilong yu.—Ritim Aisaia 41:10, 13.

Aisaia i mekim dispela tok long lain Israel. Maski God i tingim lain Israel olsem “lain manmeri bilong [em] stret,” i gat ol birua i stap raunim dispela lain. (Kisim Bek 19:5) Yu ting lain Israel i mas pret? Jehova i yusim Aisaia bilong givim gutpela tok bilong strongim bel bilong ol. Taim yumi skelim gut ol dispela tok, yumi mas tingim olsem ol dispela tok i stret tu long ol manmeri i lotuim God long nau.—Rom 15:4.

Jehova i tok: “Yupela i no ken pret.” (Ves 10) I gat as na Jehova i mekim dispela tok. Jehova i tokaut klia long as na lain bilong em i no ken pret, em i tok: “Mi stap wantaim yupela.” I no olsem em i stap longwe na long taim bilong hevi tasol em bai kam bilong helpim lain bilong em, nogat. Em i laik bai lain bilong em i save olsem em i stap wantaim ol na oltaim em i redi long helpim ol. Dispela tingting i mekim gut tru bel bilong yumi, a?

Jehova i tok moa long ol manmeri i lotuim em olsem: “Yupela i no ken lukluk nabaut.” (Ves 10, NW) Dispela hap tok i kam long wanpela tok Hibru we inap makim pasin bilong ol man husat i “lukluk nabaut long olgeta hap bilong save i gat sampela samting bilong bagarapim ol o nogat.” Jehova i kamapim klia as na lain bilong em i no ken pret, em i tok: “Mi God bilong yupela.” Dispela tok i mekim gut tru bel bilong ol, a? Jehova em i “God Antap Tru,” na “God I Gat Olgeta Strong.” (Song 91:1) God bilong ol, Jehova, em i gat olgeta strong, olsem na ol i no ken pret long wanpela samting!

Orait, lain bilong Jehova inap bilip long em bai mekim wanem? Em i tok promis olsem: “Bai mi was gut long yupela na long bikpela strong bilong mi bai mi daunim ol birua bilong yupela.” (Ves 10) Em i tok moa olsem: “Mi God, Bikpela bilong yupela. Mi save sambai long yupela.” (Ves 13) Yu tingim wanem samting taim yu harim ol dispela tok? Wanpela buk i tok: “Taim yumi bungim dispela tupela ves wantaim, ol tok bilong en i helpim yumi long tingim pasin namel long papa na pikinini. [Papa] i no sanap nating bilong helpim pikinini, nogat, em i holim han bilong pikinini bambai i no gat wanpela samting i seperetim pikinini long em.” Tingim, Jehova i no inap larim wanpela samting i seperetim em na lain bilong em, na maski bikpela hevi tru i painim lain bilong em, dispela tu i no inap seperetim ol long em.—Hibru 13:5, 6.

Long nau tu, tok bilong Aisaia inap mekim gut bel bilong ol manmeri i lotuim Jehova. Nau long dispela ‘taim nogut i gat hatwok long en,’ sampela taim yumi inap pilim olsem ol presa bilong laip i daunim yumi tru. (2 Timoti 3:1) Tasol i no olsem yumi mas karim ol dispela hevi long strong bilong yumi yet, nogat. Jehova i redi long holim han bilong yumi na helpim yumi. Olsem liklik pikinini i trastim papa, yumi ken holim strongpela han bilong Jehova na bilip tru olsem em bai stiaim yumi long stretpela rot na helpim yumi taim yumi gat hevi.—Song 63:7, 8.

Baibel ritim bilong Janueri:

◼ Aisaia 24-42