APO dada na mwana wake msepuka ŵali pafupi kujumpha msewu uwo mukwenda magalimoto ghanandi, dada wakuphalira mwana kuti: “Nikora ku woko.” Msepuka uyu wakuwona kuti ngwakuvikilirika ndiposo wakucita wofi yayi cifukwa cakuti adada ŵake ŵamukora pa woko. Kasi nyengo yinyake mukakhumbapo kuti munthu munyake wamovwirani pa nyengo ya masuzgo? Usange ni nthena, mungapembuzgika na mazgu agho ghakalembeka na Yesaya.—Ŵazgani Yesaya 41:10, 13.

Yesaya wakaphaliranga Ŵaisrayeli mazgu agha. Ciuta wakawonanga Ŵaisrayeli kuŵa ‘usambazi wake wapadera.’ Kweni mtundu uwu ukazingilizgika na ŵalwani. (Exodus 19:5) Kasi Ŵaisrayeli ŵakeneranga kucita wofi? Yehova wakatuma Yesaya kuti waŵaphalire uthenga wakukhozga. Apo tikusanda uthenga uwu, tikwenera kukumbuka kuti ukukhwaskaso awo ŵakusopa Ciuta mazuŵa ghano.—Ŵaroma 15:4.

Yehova wakuti: ‘Mungopanga.’ (Vesi 10) Pakaŵa cifukwa ico mazgu agha ghakayowoyekera. Yehova wakalongosora cifukwa ico ŵanthu ŵake ŵakeneranga yayi kopa. Wakati: ‘Ine nili namwe.’ Iyo wali kutali yayi na ŵanthu ŵake, ndipo wakuŵalayizga kuti wacitenge kwiza pa nyengo ya masuzgo pera yayi. Wakukhumba kuti ŵanthu ŵake ŵamanyenge kuti iyo wali nawo pafupi comene ndipo ngwakunozgeka kuŵawovwira. Kasi fundo iyi njakupembuzga yayi?

Yehova wakusimikizgira awo ŵakumusopa kuti: ‘Mungofiwanga.’ (Vesi 10) Lizgu la Cihebere ilo lili kulembeka pa vesi ili lingayowoyaso za awo “ŵakulaŵiska uku na uku kuti ŵawone usange pali cinthu cinyake ico cingaŵapweteka.” Yehova wakulongosora cifukwa ico ŵanthu ŵake ŵakwenera yayi kuŵira na wofi. Wakuti: ‘Cifukwa Ine ndine Ciuta winu.’ Palije cinthu cinyake ico cingaŵakhozga kuluska mazgu agha. Yehova ‘Ngwapacanyapose,’ ndiposo ni “Mwenenkhongonozose.” (Salmo 91:1) Pakuti Ciuta wawo Yehova ngwankhongono comene, palije cifukwa cakuti ŵacitire wofi.

Kasi awo ŵakusopa Yehova ŵakwenera kukhazga vici kwa iyo? Iyo wakuŵalayizga kuti: “Tindikufighilire na woko lane la malyero ilo ndakutonda vyose.” (Vesi 10) Iyo wakutiso: “Ine Yehova Ciuta wako, ndakukora ku woko lako la malyero.” (Vesi 13) Para mwapulika mazgu agha, kasi nchivici cikwiza mu maghanoghano ghinu? Buku linyake likuti: “Pakuwona mavesi ghaŵiri agha, tikughanaghanira za mupapi na mwana. [Dada] wakwimilira waka capatali kuti wavikilire mwana wake yayi, kweni wakuŵa nayo pafupi, ndipo wakukhumba yayi kulekana nayo.” Ghanaghanirani waka. Yehova wazomerezgenge yayi kuti ŵanthu ŵake ŵatalikirane nayo, nanga mpha nyengo iyo ŵakusuzgika comene.—Ŵahebere 13:5, 6.

Mazuŵa ghano, awo ŵakusopa Yehova ŵakupembuzgika na mazgu agho Yesaya wakalemba. Mu “nyengo zinonono na zakusuzga” izi, nyengo zinyake tingataya mtima cifukwa ca masuzgo agho tikukumana nagho. (2 Timote 3:1) Kweni tileke kulimbana nagho tekha. Yehova wakukhumba comene kuti waŵe nase pafupi na kutikora pa woko. Nga umo ŵana ŵakugomezgera ŵapapi ŵawo, nase tingakora ku woko lake lankhongono, uku tikugomezga kuti watilongozgerenge ku malo ghakwenelera, na kutovwira para tasuzgika.—Salmo 63:7, 8.

Vipaturo Ivyo Mungaŵazga mu Janyuwale:

◼ Yesaya 24-42