“KAPOT ha akon kamot,” siring han tatay ha iya gutiay pa nga anak samtang titabok hira ha kalsada nga may damu nga sarakyan. Tungod han makusog nga kamot nga nakakapot ha bata, para ha bata talwas hiya ngan diri sadang mahadlok. Naghandom ka na ba nga may kumapot ha imo kamot ngan talwas nga giyahan ka tipagawas ha mga problema han kinabuhi? Kon oo, maliliaw ka ha igin-asoy ni Isaias.—Basaha an Isaias 41:10, 13.

Ito nga mga pulong ni Isaias para ha nasud han Israel. Bisan kon gintagad han Dios ito nga nasud sugad nga iya “kalugaringon” nga panag-iya, napalibotan ito hin mga kaaway. (Eksodo 19:5) Sadang ba mahadlok an Israel? Gin-gamit ni Jehova hi Isaias ha paghatag hin nakakaliaw nga mensahe. Samtang gin-uusisa ito nga mga pulong, aton hinumdoman nga aplikado liwat ito ha mga magsiringba han Dios yana.—Roma 15:4.

“Diri ka mahadlok,” siring ni Jehova. (Bersikulo 10) Kasarigan ito nga mga pulong. Iginpatin-aw ni Jehova kon kay ano nga an iya katawohan diri sadang mahadlok: “Kay ako upod ha imo.” Diri hiya hirayo nga maabot la ha pagbulig kon kinahanglan. Karuyag niya hibaroan nira nga hiya upod ha ira—nga sugad hin aada ha ira sapit—andam ha pagbulig. Diri ba nakakaliaw ito?

Dugang nga ginpasarig ni Jehova an iya mga magsiringba: “Ayaw paglingi-lingi.” (Bersikulo 10, NW) An Hebreo nga berbo nga gin-gamit dinhi mahimo magtudlok hadton “nagkikinita ha iya palibot ha pagbantay kon may-ada ba makakadaot ha ira.” Ginsaysay ni Jehova kon kay ano nga an iya katawohan diri sadang maglingi-lingi tungod ha kahadlok: “Kay ako an imo Dios.” May-ada pa ba labaw hito nga pasarig? Hi Jehova an “Gihitaasi,” an “Makagarahum.” (Salmo 91:1) Kon aada an ira gamhanan-ha-ngatanan nga Dios nga hi Jehova, waray gud hira sadang kahadlokan.

Kon sugad, ano an malalaoman han mga magsiringba ni Jehova? Hiya nagsaad: “Akon ka aagang-agangon pinaagi han too nga kamot han akon pagkamatadong.” (Bersikulo 10) Hiya nagdugang: “Ako, hi Jehova an imo Dios, makapot han imo too nga kamot.” (Bersikulo 13) Ano an imo nahuhunahuna hito nga mga pulong? “Iginpapakita hinin duha nga bersikulo an makapabantad nga hulagway hin kag-anak ngan han iya anak,” siring han usa nga reperensya. “[An amay] diri la andam ha pagpanalipod, kondi kaupod mismo hiya han anak; diri niya tutugotan nga mahibulag an iya anak.” Hunahunaa la, diri tutugotan ni Jehova nga mahibulag ha iya an iya katawohan bisan durante han pinakamakuri nga panahon ha ira kinabuhi.—Hebreo 13:5, 6.

An mga magsiringba ni Jehova yana mahimo gud maliaw ha iginsurat ni Isaias. Hinin “magpakalilisang nga mga panahon,” bangin mabug-atan kita usahay han mga problema. (2 Timoteo 3:1) Pero diri kita sadang mag-usahan ha pag-atubang hito. Hi Jehova andam ha pagkapot han aton mga kamot. Pariho hin nasarig nga bata, makakakapot kita han iya gamhanan nga kamot, nasarig nga gigiyahan niya ha husto nga direksyon ngan bubuligan ha panahon han aton panginahanglan.—Salmo 63:7, 8.