Ang Bibliya Makabag-o sa Kinabuhi

SA UNSANG paagi nakaplagan sa usa ka batan-ong babaye ang tinuod nga kahulogan sa kinabuhi bisan pa sa iyang miserableng kaagi? Unsay nagtukmod sa usa ka bangis nga aktibista nga mahimong makigdaitong magsasangyaw? Basaha kining mga asoya aron masayran ang tubag.

“Ako Nangandoy nga Higugmaon.”—INNA LEZHNINA

NATAWO: 1981

NASOD: RUSSIA

KANIADTO: MISERABLEG KINABUHI

KAAGI: Ako gipanganak nga amang sa amang pod nga ginikanan. Malipayon ang unang 6 ka tuig sa akong kinabuhi. Dayon, nagbulag ang akong ginikanan. Bisag bata pa ko kaayo, nahibalo na ko kon unsay diborsiyo, ug nasakitan kaayo ko niini. Human sa diborsiyo, ang akong amahan ug magulang nga lalaki nagpabilin sa Troitsk, samtang kami sa akong inahan mibalhin sa Chelyabinsk. Sa ngadtongadto, naminyo pag-usab si Mama. Ang akong ama-ama palainom, ug sagad mangulata siya namo ni Mama.

Sa 1993, nalumos ang akong minahal nga magulang nga lalaki. Nakalitan kaayo ang among pamilya niana. Si Mama nagsugod pag-inom-inom, ug sila nang duha sa akong ama-ama ang mangulata nako. Nagsugod ko pagpangitag mas maayong kinabuhi. Ako nangandoy nga higugmaon. Misulay ko pag-adtog lainlaing simbahan, nga nangitag kahupayan, apan napakyas ko.

GIBAG-O SA BIBLIYA ANG AKONG KINABUHI: Sa dihang nag-edad kog 13, ang akong klasmet nga usa sa mga Saksi ni Jehova, nag-asoy nakog mga estorya sa Bibliya. Giganahan kong naminaw bahin sa mga karakter sa Bibliya sama kang Noe ug Job, nga nag-alagad sa Diyos bisan sa lisod nga kahimtang. Sa wala madugay, nagtuon kog Bibliya uban sa mga Saksi ug mitambong sa ilang mga tigom.

Tungod sa akong pagtuon sa Bibliya, nasabtan nako ang daghang kamatuoran. Natandog ko sa pagkahibalo nga ang Diyos may ngalan. (Salmo 83:18) Nainteres ko nga ang Bibliya tukmang nagtagna sa mga kahimtang “sa kataposang mga adlaw.” (2 Timoteo 3:1-5) Ug nalipay ko sa pagkahibalo bahin sa paglaom sa pagkabanhaw. Tiaw mo na—makita nako pag-usab ang akong igsoon!—Juan 5:28, 29.

Apan ako ray nalipay niini. Si Mama ug ang akong ama-ama wala makaangay sa mga Saksi ni Jehova. Ila kong gipit-os nga mohunong  pagtuon sa Bibliya. Apan nagustoan nako ang akong nakat-onan, ug determinado kong mopadayon.

Dili sayon sagubangon ang paglutos gikan sa akong pamilya. Unya diha na poy nahitabo nga trahedya. Nalumos pod ang akong manghod nga lalaki kinsa nakauban na nako sa mga tigom sa mga Saksi. Sa gihapon wala ko pasagdi sa mga Saksi. Nakita nako kanila ang gugma nga akong gipangandoy sa tibuok nakong kinabuhi. Nahibalo ko nga kini gayod ang matuod nga relihiyon. Pagka-1996, ako nabawtismohan ingong Saksi ni Jehova.

MGA KAAYOHAN NGA AKONG NABATONAN: Sa milabayng 6 ka tuig, naminyo ko sa usa ka buotang lalaki nga si Dmitry. Nag-alagad mi sa sangang buhatan sa mga Saksi ni Jehova sa St. Petersburg. Sa kadugayan, ang akong ginikanan dili na mosupak sa akong pagtuo.

Mapasalamaton kaayo ko sa pagkaila kang Jehova! Ang pag-alagad kaniya nakahatag ug tinuod nga kahulogan sa akong kinabuhi.

“Daghang Pangutana ang Naghasol sa Akong Hunahuna.”—RAUDEL RODRÍGUEZ RODRÍGUEZ

NATAWO: 1959

NASOD: CUBA

KANIADTO: AKTIBISTA

KAAGI: Natawo ko sa Havana, Cuba, ug nagdako sa kabos nga dapit diin sagad may magrambol sa kadalanan. Samtang nagdako ko, nainteres ko sa judo ug sa ubang esport nga pangkombate.

Brayt ko nga estudyante, ug gidasig ko sa akong ginikanan nga moeskuyla sa unibersidad. Samtang nag-eskuyla, gibati nakong kinahanglang bag-ohon ang sistema sa politika sa among nasod. Busa nag-aktibista ko. Giatake namo sa  akong klasmet ang usa ka polis, kay ilogon unta namo ang iyang pusil. Tungod sa among pagkarambola, ang polis grabeng nasamdan sa ulo. Kami sa akong klasmet gipriso ug gisentensiyahag kamatayon pinaagig firing squad. Ako 20 anyos pa lang, apan patyonon na!

Sa pag-inusara nako sa selda, akong gipraktis kon unsay akong himoon atubangan sa firing squad. Dili nako ipakita nga nahadlok ko. Sa samang higayon, daghang pangutana ang naghasol sa akong hunahuna. Pananglitan: ‘Nganong daghan kaayo ang inhustisya sa kalibotan? Mao ba lamang kini ang kinabuhi?’

GIBAG-O SA BIBLIYA ANG AKONG KINABUHI: Sa kadugayan, ang among sentensiya nga kamatayon gihimo na lang 30 ka tuig nga pagkabilanggo. Niining panahona nga akong nahimamat ang pipila ka Saksi ni Jehova nga napriso tungod sa ilang relihiyosong pagtuo. Nakadayeg ko sa kaisog apan pagkamadaiton sa mga Saksi. Bisag dili angayng prisohon, sila wala masuko o mayugot.

Gitudloan ko sa mga Saksi nga ang Diyos may katuyoan sa katawhan. Gipakita nila sa Bibliya nga iyang himoong paraiso ang yuta diin wala nay krimen ug inhustisya. Gitudloan ko nila nga ang yuta mapuno sa maayong mga tawo, kinsa may kahigayonang mabuhi sa walay kataposan sa hingpit nga kahimtang.—Salmo 37:29.

Nagustoan nako ang akong nakat-onan sa mga Saksi, apan morag dili ko kasundog nila. Naghunahuna ko nga imposibleng magneyutral ko sa politika o itahan nako ang pikas aping. Busa nakadesidir ko nga ako na lay magbasag Bibliya. Sa dihang ako kining nahuman, nakita nako nga mga Saksi ni Jehova lang ang migawi sama sa unang mga Kristohanon.

Sa akong pagtuon sa Bibliya, akong nahibal-an nga kinahanglan kong mohimog dakong kausaban sa akong kinabuhi. Pananglitan, kinahanglang bag-ohon nako ang akong sinultihan kay himalikas ko. Kinahanglan sab kong moundang pagpanigarilyo. Ug kinahanglang magneyutral na ko sa politika. Dili kini sayon, apan sa tabang ni Jehova, milampos ra ko.

Ang usa sa kinalisdang kausaban mao ang pagpugong sa akong kasuko. Bisan karon mag-ampo gihapon ko nga makapugong sa kaugalingon. Natabangan kaayo ko sa mga teksto sama sa Proverbio 16:32, nga nag-ingon: “Siya nga mahinay sa kasuko mas maayo pa kay sa tawong gamhanan, ug siya nga nagapugong sa iyang espiritu kay niadtong nagbihag sa usa ka siyudad.”

Niadtong 1991, nabawtismohan ko ingong Saksi ni Jehova. Gibawtismohan ko diha sa usa ka baril sa prisohan. Pagkasunod tuig, ang pipila kanamong mga piniriso gibuhian ug gipadala sa Spain kay may mga paryente mi didto. Pag-abot sa Spain, mitambong dayon kog tigom sa mga Saksi ni Jehova. Giabiabi ko sa mga Saksi nga morag dugay na ming magkaila, ug gitabangan ko nilang magsugod ug bag-ong kinabuhi.

MGA KAAYOHAN NGA AKONG NABATONAN: Malipayon ko karon nga nag-alagad sa Diyos uban sa akong asawa ug mga anak nga babaye. Nakapribilehiyo ko sa paggugol ug mas dakong panahon sa pagtabang sa uban nga makakat-on sa Bibliya. Usahay akong mahinumdoman ang batan-ong lalaki nga patyonon na unta, ug akong maapresyar ang kadaghan sa panalangin nga akong nabatonan sukad niadto. Gawas nga buhi ko, may paglaom sab ko. Naglaom ko sa gisaad nga Paraiso—diin ang hustisya maoy maghari ug “ang kamatayon mawala na.”—Pinadayag 21:3, 4.

[Blurb sa panid 19]

“Natandog ko sa pagkahibalo nga ang Diyos may ngalan”

[Hulagway sa panid 20]

Malipayon mi sa akong bana nga nagpaambit sa sign language nga publikasyon sa usa ka amang