Bible Okpụhọde Mme Owo

DIDIE ke eyenan̄wan emi ọkọbọde ufen etieti ke ini eyenọwọn̄ ekedikop inem uwem? Nso ikanam owo afai emi ekesisọn̄de ibuot ye ukara akabade ọkwọrọikọ? Kot mbụk emi ke oyokụt ibọrọ.

“Mma nyom ebiet emi n̄kpokụtde ata ima.”—INNA LEZHNINA

N̄KAMANA KE 1981

NTO RUSSIA

MMA MBỌ UFEN ETIETI KE INI EYENỌWỌN̄

NTE UWEM MI EKETIEDE: Ndi imụm toto ke emana; ete mi ye eka mi n̄ko ẹdi imụm. Ke ini n̄kedide isua itiokiet ke mfịna ọkọtọn̄ọ ndidu ke ufọk nnyịn. Ete mi ye eka mi ẹma ẹdian̄ade ndọ. Ndien kpa ye emi n̄kedide eyenọwọn̄, mma mfiọk se owo ndidian̄ade ndọ ọwọrọde; n̄kpọ emi ama enen̄ede abiak mi. Ke emi ama eketịbe, akpaneka mi ama aka iso odụn̄ ye ete mi ke Troitsk, edi eka mi ama emen mi ọnyọn̄ Chelyabinsk. Nte ini akakade, eka mi ama ọdọ ebe en̄wen. Ebe eka mi ama esin̄wọn̄ mmịn etieti. Enye ama esitịm mi ye eka mi.

Mmọn̄ ama emen akpaneka mi ke 1993. N̄kpọ emi ama anam nnyịn inen̄ede ifụhọ. Eka mi ama ọtọn̄ọ nditiene n̄n̄wọn̄ mmịn man efre uwa. Enye ama ọtọn̄ọ ndisitiene ebe esie mfiomo mi. Mma ntọn̄ọ ndiyom ebiet emi n̄kpokopde inem uwem. Mma nyom ebiet emi n̄kpokụtde ata ima. Ntre, mma ntọn̄ọ ndika nsio nsio ufọkabasi n̄koyom ndọn̄esịt, edi n̄kekwe.

NTE BIBLE OKOKPỤHỌREDE UWEM MI: Ke ini n̄kedide isua 13, eyen ufọkn̄wed nnyịn emi ekedide kiet ke otu Mme Ntiense Jehovah ama obụk ndusụk mbụk Bible ọnọ mi. Mma nnen̄ede mma mbụk Noah ye eke Job, koro mmọ ẹma ẹka iso ẹnam n̄kpọ Abasi kpa ye afanikọn̄. Ikebịghike, mma ntọn̄ọ ndikpep Bible ye Mme Ntiense nsinyụn̄ ntiene ndụk mbono esop mmọ.

Ndikpep Bible ama atat mi enyịn onyụn̄ anam ata ediwak n̄kpọ an̄wan̄a mi. Ama enen̄ede enem mi ndikop ke Abasi enyene enyịn̄. (Psalm 83:18) Ama onyụn̄ enem mi ndikụt nte Bible etịn̄de ata nnennen nnennen se iditịbede “ke mme akpatre usen.” (2 Timothy 3:1-5) Mmenen̄ede n̄kop inemesịt ndifiọk ke mme owo ẹyeset ke n̄kpa.  Ọwọrọ nyosụk mfiak n̄kụt akpaneka mi!—John 5:28, 29.

Edi idịghe kpukpru owo ẹkema se n̄kekpepde. Eka mi ye ebe esie ẹma ẹsua Mme Ntiense Jehovah etieti. Mmọ ẹma ẹn̄wana ndinam mi ntre ndikpep Bible, edi mma nnen̄ede mma se n̄kekpepde tutu mbiere ke nditreke.

Ikememke utom ndiyọ ukọbọ ufọk nnyịn. N̄kpọ mmọn̄eyet ama afiak etịbe ke ini mmọn̄ ekemende ekpri eyeneka mi erenowo emi ekesitienede mi odụk mbono esop Mme Ntiense Jehovah. Mme Ntiense emi ẹma ẹdọn̄ mi esịt. Mi ke n̄kokụt ata ima emi n̄koyomde ke ofụri uwem mi. Mma ndikụt ke mmọ ẹkpono ata Abasi. Ntre, mma nna baptism nte kiet ke otu Mme Ntiense Jehovah ke 1996.

UFỌN ORO MBỌDE: Ami ye Dmitry ebe mi imokop inem ndọ nnyịn ke ofụri isua itiokiet idahaemi. Nnyịn mbiba inam utom ke n̄kọk itieutom Mme Ntiense Jehovah ke St. Petersburg. Eka mi ye ebe esie ifịnake mi aba ndidi Ntiense.

Mmenen̄ede n̄kop inemesịt ndifiọk Jehovah. Ndinam n̄kpọ esie anam n̄kop inem uwem.

“Enyene mme n̄kpọ emi ẹkesụk ẹfịnade mi.”—RAUDEL RODRÍGUEZ RODRÍGUEZ

N̄KAMANA KE 1959

NTO CUBA

MMA NSISỌN̄ IBUOT YE UKARA

NTE UWEM MI EKETIEDE: N̄kamana ke Havana ke Cuba. Mme owo mi ikenyeneke n̄kpọ, edi ẹkediọn̄ọ en̄wan. Ntre n̄kọtọn̄ọ ke ekpri mma en̄wan.

Mma nnen̄ede mfiọk n̄wed tutu ete mi ye eka mi ẹdọn̄ mi ufọkn̄wed ntaifiọk. Ke ini n̄kosụk ndude ke ufọkn̄wed ntaifiọk, mma ntọn̄ọ ndikere ke ukara idụt nnyịn ọdiọk ekem se ẹkpụhọrede. Mma ntọn̄ọ nsọn̄ibuot. Ami  ye eyen ufọkn̄wed nnyịn kiet ima ikan̄wana ye akwaowo bodisi; ikoyom ndibọ enye ikan̄ esie. Ima inọ ete oro ata idiọk unan ke ibuot. Ẹma ẹmụm nnyịn mbiba ẹkedọn̄ ke ufọk-n̄kpọkọbi ẹnyụn̄ ẹbiere ẹte ẹtop nnyịn ẹwot. N̄kedi isua 20 kpọt, edi n̄kada ke mben udi.

Mma nsịne ke ufọk-n̄kpọkọbi mbiere nte ndinamde n̄kpọ mbemiso ẹtopde mi ẹwot. N̄koyom ndinam nte idem inyekke mi. Edi enyene mme n̄kpọ emi ẹkesụk ẹfịnade mi. Mma nsikere ntak emi ufịk ye utụk ẹkponde ntem ke ererimbot, nnyụn̄ n̄kere m̀mê uwem okụre ke owo ndimana, n̄kpon, nsọn̄, nnyụn̄ n̄kpa.

NTE BIBLE OKOKPỤHỌREDE UWEM MI: Ẹma ẹkabade ẹbiere n̄kpọkọbi isua 30 ẹnọ nnyịn utu ke ndiwowot nnyịn. Ini emi ke n̄kosobo ye ndusụk Mme Ntiense Jehovah emi ẹkesịnde ke ufọk-n̄kpọkọbi ke ntak ido ukpono mmọ. Ama enen̄ede enem ndikụt nte mmọ ẹnyenede uko edi ẹtie emem emem. Mmọ ikayatke esịt, ikonyụn̄ isịnke ntịme kpa ye emi ẹkekọbide mmọ ke ata unana ntak.

Mme Ntiense Jehovah ẹma ẹkpep mi ke enyene se Abasi aduakde ọnọ ubonowo. Mmọ ẹma ẹda Bible ẹwụt mi ke Abasi aduak ndinam isọn̄ emi akabade paradise, ndien ke ubiatibet ye ufịk ididụhe aba. Mmọ ẹma ẹdọhọ n̄ko ke nti owo ikpọn̄ ẹdidu ke isọn̄ emi, ndien ke mmọ ẹyenyene ifet ndidu uwem ke nsinsi.—Psalm 37:29.

Mma mma se Mme Ntiense Jehovah ẹkekpepde mi, edi mma n̄kere ke ndikemeke nditie emem emem nte mmọ. N̄ko ke ndikemeke nditre ndisịn idem ke mbubehe ukara m̀mê ndiyak owo anam mi n̄kpọ atak. Ntre, mma mbiere nditie ke idemmi n̄kot Bible. Ke mma n̄kokot Bible mma, mma ndikụt ke Mme Ntiense Jehovah ikpọn̄ ẹdu uwem nte akpa mme Christian.

Nte n̄kosụk n̄kpepde Bible, mma ndikụt ke oyom nnam ata ikpọ ukpụhọde ke uwem mi. Ke uwụtn̄kpọ, ama oyom nnam ukpụhọde ke ikọ inua sia mma nsidiọk inua etieti. Ama oyom ntre sika ye edisịn idem ke mbubehe ukara. Ikememke ndinam mme ukpụhọde emi, edi Jehovah ama an̄wam mi nnam emi sụn̄sụn̄.

N̄kpọ emi akakam ọsọn̄de mi akan ndinam ekedi ndisimụm idem n̄kama ke ini esịt ayatde mi. Nsụk mbeben̄e Abasi mfara ke idem tutu emi. Utọ itien̄wed nte Mme N̄ke 16:32 enen̄ede an̄wam mi. Enye ọdọhọ ete: “Owo eke mîsọpke iyatesịt ọfọn akan ọkpọsọn̄ owo, owo eke akarade spirit esie onyụn̄ ọfọn akan owo emi akande obio.”

Mma nna baptism nnyụn̄ n̄kabade kiet ke otu Mme Ntiense Jehovah ke 1991. Ẹkenịm mi baptism ke ufọk-n̄kpọkọbi emi. Ẹma ẹsion̄o ndusụk nnyịn ke ufọk-n̄kpọkọbi ke isua oro eketienede, ẹnyụn̄ ẹnọ nnyịn ika Spain sia do ke iman nnyịn ẹkedu. Mma ntọn̄ọ ndika Ufọkmbono Mme Ntiense Jehovah ke ndondo oro n̄kesịmde Spain. Mme Ntiense do ẹma ẹnen̄ede ẹdara mi nte n̄kpọ eke ẹdọhọde ke mmọ ẹma ẹdọdiọn̄ọ mi. Mmọ ẹma ẹn̄wam mi mfiak ntọn̄ọ uwem.

UFỌN ORO MBỌDE: Nnyeneke mfịna ke uwem. Ke n̄kop inem ndidiana ye n̄wan mi ye nditọ mi nnam n̄kpọ Abasi. Edi akwa ifet ndida ini mi n̄kpep mme owo Bible. Mma nti nte akayakde nsịn̄ ami ndikpa, mmesikọm Abasi etieti ke adan̄a nte enye okpụhọrede mi. Mmodu uwem mfiak nnyene idotenyịn. Ntie mbet ini emi isọn̄ edidide Paradise—kpa ini emi unenikpe edidude, emi “n̄kpa [mîdinyụn̄] idụhe aba.”—Ediyarade 21:3, 4.

[Se ẹwetde ke ikpọ abisi ke page 19]

“Ama enen̄ede enem mi ndikop ke Abasi enyene enyịn̄”

[Ndise ke page 20]

Esinem mi ye ebe mi ndida DVD usem idiọn̄ọ n̄kwọrọ ikọ nnọ mme inan