EDENA DALA AI ia maragi neganai hekwakwanai momo ia davaria kekeni matamata ese ena mauri ia moalelaia? Dahaka ese gwau-edeede politikol tauna ia durua sivarai namona harorolaia tauna ai ia lao totona? Mani edia sivarai umui duahia.

“Lau Ura Bada Lalokau Bona Kara Namodia Lau Mamia.”​—INNA LEZHNINA

IA VARA LAGANINA: 1981

TANO: RUSSIA

GUNA: MARAGI NEGANAI HEKWAKWANAI MOMO IA DAVARIA

EGU MAURI GUNANA: Egu tama sina be taia kudima taudia. Egu mauri lagani ginigunadia siks lau moalelaia. Bena egu tama sina idia divos. Ena be lau maragi, to divos ena anina lau lalopararalaia bona unai ese lau ia hahisia bada. Idia divos murinai, egu tamana bona kakana be Troitsk dekenai idia noho, bona egu sinana ese Chelya­binsk dekenai lau ia hakaua lao. Gabeai, egu sinana ia headava lou. Ena adavana matamata be inuinu kekero tauna, bona nega momo lau bona egu sinana ia dadabaia.

Lagani 1993 ai, egu lalokau kakana ia maloa mase. Unai ese emai famili dekenai lalohisihisi bada ia havaraia. Egu sinana be alkahol ia inua matamaia bona ena adavana ida lau idia kara auka henia. Mauri namona lau tahua matamaia. Lau ura bada lalokau bona kara namodia lau mamia. Heduru abia totona dubu idauidau dekenai lau lao matamaia, to ta lau davaria lasi.

BAIBEL ESE EGU MAURI IA HAIDAUA DALANA: Egu mauri lagani be 13 neganai, egu klas turana, ia be Iehova ena Witnes kekenina ta ese Baibel sivarai haida ia gwauraia. Baibel ai haheitalai namodia hegeregere Noa bona Iobu edia sivarai lau moalelaia. Ena be nega aukadia idia davaria, to Dirava idia hesiai henia noho. Daudau lasi, Witnes taudia ida Baibel lau stadilaia bona edia hebou dekenai lau lao.

Baibel stadilaia karana ese lau ia durua hereva momokani namodia momo lau dibaia. Dirava ena ladana lau diba neganai, lau moale bada. (Salamo 83:18) Baibel ese “dina gabedia ai” do idia vara gaudia ia gwauraia maoromaoro dalana dekenai lau hoa. (2 Timoteo 3:1-5) Bona toreisi lou helarona lau dibaia neganai lau moale, badina egu kakana do lau itaia lou!​—Ioane 5:28, 29.

To, egu sinana bona ena adavana idia moale lasi. Iehova ena Witnes taudia idia ura henia lasi. Egu Baibel stadi lau hadokoa totona lau idia dagedage henia. To, lau dibaia noho gaudia lau ura henia, bona lau ura lasi egu stadi lau hadokoa.

Famili amo dagedage karana lau haheaukalaia be ia auka. Metau ma ta ia vara. Egu tadina, Iehova ena Witnes edia hebou dekenai lau ia bamoa merona ia maloa mase. To, Witnes taudia be hanaihanai idia noho hegaegae lau idia durua totona. Idia huanai, lalokau bona kara namodia lau mamia, unai be egu mauri ibounai lalonai lau ura henia karana. Lau diba inai be tomadiho momokanina. Lagani 1996 ai, lau bapatiso bona Iehova ena Witnes ta ai lau lao.

NAMO LAU DAVARIA DALANA: Idia hanaia lagani siks lalonai, tau namona ladana Dmitry lau adavaia. St. Petersburg ai, Iehova ena Witnes edia brens ofesi ai, ai gaukara hebou. Hari, egu tama sina be lau abia dae gaudia dekenai idia laloparara.

Iehova lau diba dainai lau moale bada! Iehova hesiai henia karana amo lau mamia egu mauri be mai anina bada.

“Henanadai Momo Lau Lalohekwarahilaia.”​—RAUDEL RODRÍGUEZ RODRÍGUEZ

IA VARA LAGANINA: 1951

TANO: CUBA

GUNA: GWAU-EDEEDE POLITIKOL TAUNA

EGU MAURI GUNANA: Lau be Havana, Cuba ai lau vara, bona ogogami gabuna ta ai lau tubu daekau. Unuseni ai nega momo strit ai idia heai. Lau tubu daekau lalonai Judo bona heai spot gadara lau ura henia.

Lau be stiuden namona dainai egu tama sina ese lau idia hagoadaia iunivesiti lau lao totona. Iunivesiti lau noho lalonai lau laloa egu tano ena politikol heau dalana ia senisi be namo. Unai dainai lau gwau-edeede. Egu klas turana ta bona lau ese pulisi ofesa ai dadabaia, ai ura ena ipidi ai abia. Pulisi ofesa ena kwarana ai haberoa bada. Unai dainai egu klas turana bona lau be dibura ruma ai idia atoa bona firing squad ese ai do idia hamasea. Egu mauri lagani be 20 sibona, to lau do idia hamasea.

Sibona lau noho dibura ruma ai, firing squad vairanai edena bamona do lau kara lau praktis. Lau ura lasi gari toana lau hahedinaraia. Unai nega lalonai, henanadai momo lau lalohekwarahilaia. Lau laloa: ‘Dahaka dainai tanobada dekenai kara gageva be ia bada? Mauri be inai sibona, a?’

BAIBEL ESE EGU MAURI IA HAIDAUA DALANA: Ai idia hamasea lasi to lagani 30 lalonai dibura ai do ai noho. Unai nega ai Iehova ena Witnes taudia haida lau hedavari henia. Idia be edia abidadama dainai dibura ai idia atodia. Witnes taudia edia gari lasi bona maino karana lau ura henia. Ena be kerere idia karaia lasi bona dibura ai idia atoa, to idia badu lasi.

Witnes taudia ese lau idia hadibaia, taunimanima totona Dirava be mai ena ura. Baibel amo idia hahedinaraia Dirava ese tanobada be paradaiso ai do ia halaoa, bona kara dika bona kara gageva do idia ore. Lau idia hadibaia tanobada be taunimanima namodia ese do idia hahonua bona mauri goevadae do idia moalelaia hanaihanai.​—Salamo 37:29.

Witnes taudia amo lau dibaia gaudia lau moalelaia, to edia kara lau badinaia be ia auka. Lau laloa politikol karadia amo lau gini siri be ia auka. Unai dainai lau sibona ese Baibel lau duahia. Lau duahia haorea neganai, lau laloparara Iehova ena Witnes taudia sibona be Keristani ginigunadia edia kara idia badinaia.

Baibel lau stadilaia karana amo lau diba egu mauri ai namona be senisi badadia haida lau karaia. Hegeregere, egu hereva dalana lau hanamoa be namo, badina hanaihanai hereva dikadia lau gwauraia. Danu kuku ania karana lau dadaraia, bona politikol karadia amo lau gini siri be namo. Inai senisi lau karaia totona lau hekwarahi to Iehova ena heduru dainai lau kwalimu.

Senisi badana ta be egu badu lau biagua karana. Lau guriguri noho sibona lau biagua totona. Baibel siri haida ese lau idia durua bada, hegeregere, Aonega Herevadia 16:32 “Badu haraga lasi tauna be tau goadana ia hereaia, bona ena badu ia biagua tauna ese tuari ai siti ta ia halusia tauna ia hereaia.”

Lagani 1991 ai, lau bapatiso bona Iehova ena Witnes ai lau lao. Dibura ruma ai ranu ena daramu ta lalonai lau bapatiso. Lagani ta murinai, dibura ruma dekenai ai noho taudia haida idia ruhaia bona Spain dekenai ai idia siaia, badina emai varavara be unuseniai idia noho. Spain ai lau ginidae neganai, maoromaoro Iehova ena Witnes taudia edia hebou dekenai lau lao. Witnes taudia ese lau idia welkam henia toana be lagani momo idia lau bamoa, bona lau idia durua unuseniai egu mauri lau hamatamaia totona.

NAMO LAU DAVARIA DALANA: Lau be lau moale, egu adavana bona natudia kekeni ida Dirava ai hesiai henia. Egu nega bada lau gaukaralaia haida lau durua Baibel ena hereva idia diba totona be hahenamo badana. Nega haida egu matamata negana ai kahirakahira lau idia hamasea negana lau laloa, bona unai nega ai lau itaia bona dibaia gaudia ese lau idia durua bada. Hari lau mauri noho bona lau be mai egu helaro. Dirava ese ia gwauhamatalaia Paradaiso lau naria, unai nega ai kara maoromaoro do ia noho bona ‘mase be do ia ore.’​—Apokalupo 21:3, 4.

[Blurb on page 19]

“Dirava ena ladana lau dibaia neganai lau moale bada”

 [Rau 20 ena laulau]

Lau bona egu adavana be mai moale ida saini gado pablikeisen be taia kudima taudia dekenai ai hariharilaia