Tólmiyatchik kʼal an biblia abal kin jakʼuy in ejatal

¿Jantʼiniʼ in elchiy in jalbil in ejatal jun i chidhan axi ma tin tsakamtal in yajchiknaʼ? ¿Jantʼiniʼ ti jalkʼunchat in ejatal jun i eyal axiʼ lej pojkax? Ki jilaʼ abal jajachik kin tʼilaʼ jawaʼ in watʼaʼ.

«U leak kin tʼajan ti kwentaj ani kin kʼanidha» (INNA LEZHNINA)

JAYKʼIJ TI WAʼTSIN: 1981

BICHOW: RUSIA

KʼEʼAT JANTʼOJ TIN KWENTAJ AN EPCHAL: MA TU TSAKAMTAL U LEJ YAJCHIKNAMAL

JAWAʼ U WATʼAMAL: U tátajchik yabak u otsʼox, ani nanáʼ in waʼtsin jayetsekʼij. An kʼaʼál akak i támub in kʼwajiy lej kulbél, talbél u papá ani u mamá jilaxinchik. Belits abal in kʼwajatak lej tsipíl, u exbay jawaʼ kʼwajatak ti watʼel, ani u lej yajnaʼ talbel ti jilaxin, u papá ani u epchal jilkʼonchik ti Troitsk, ani u mamá tin neʼdhaʼ kʼal jajáʼ ti Cheliabinsk. Talbél tomkin junilekʼij. Kʼal jitaʼ ti tomkin u lej utsʼalak ani wilkʼidh tu kwadhalak tu tsablom.

Ti 1993, u okʼox epchal axi u lej kʼanidhalak ukʼtsin. Jawaʼ watʼey i lej yajnaʼ ti yaném. U mamá in tujchiy ti utsʼál ani tin lej kwadhalak. U leʼak ku koʼoy jun i alwaʼ ejataláb. U yejenchalak kin tʼajan ti kwentaj ani kin kʼanidhaʼ. Al yantom i iglesias u aliy an tolmixtaláb pero yab u elaʼ.

TÓLMIYAT KʼAL AN BIBLIA ABAL KIN JALKʼUY IN EJATAL: Tam tu kwaʼalak 13 i támub, jun i at juntal ti escuela axi pelak i ólchix kʼal a Jehová tin tʼilchiy jawaʼ in ulal an libro historias bíblicas. U lej kulbetnalak jawaʼ in watʼaʼ a Noé ani a Job, kom jajáʼ in tʼojonchij a Dios belits abal in kwaʼalakchik i kʼibataláb. Jaxtám ti weʼ i kʼij in kʼwajatakits tin exóbal kʼal an ólchixchik kʼal a Jehová ani in kʼalelakits ti tamkuntaláb.

Tam u exobnaʼ an Biblia u exlaʼ yab i chubaxtaláb axi u lej kulbetnaʼ. U lej kʼijidhnaʼ ku exlaʼ abal a Dios in kwaʼalak in bij (Salmo 83:18). U lej jikʼpaʼ an kʼej kaw axi kʼwajat ti Biblia, axi kwaʼal kin tsuʼuw kʼal in taltal «axeʼ xi xeʼetsintalab» (2 Timoteo 3:​1-5). U lej kulbetnaʼ an exobchixtaláb kʼal an tsʼakbantaláb kom u exlaʼ abal neʼets ku tsab tsuʼuw u epchal (Juan 5:​28, 29.)

Pero yab patal in kulbetnaʼ nixeʼ xi olchixtaláb. U mamá ani in tomkil yab in kulbetnalak jawaʼ tu exobchalak an ólchixchik kʼal a Jehová. Ani tin nixoknalakchik abal ku jilaʼ tin exóbal kʼal an Biblia. Pero nanáʼ u kulbetnalak jawaʼ kʼwajatak u exobnál ani yab neʼetsak ku jilaʼ tin exobal.

Lej kʼibatak an odhnaxtaláb axi tin tʼajchal u yanel abal ku jilaʼ tin exóbal. Ani talbél watʼey jantʼoj axi yab i aychalak: U epchal axi talbél, axi tin junalak ti tamkuntalab kʼal an ólchixchik kʼal a Jehová, jayej ukʼtsin ani tsémets. Pero an ólchixchik yab jaykʼij tin jilaʼ kwetém. Kʼal jajáʼchik u elaʼ kʼanidhomtaláb axi etsʼey u aliyamalak tu ejatal. U lej belaʼ abal pelak an kʼakʼnaxtalab axi chubax, ani ti 1996 in pujan jantʼiniʼ i ólchix kʼal a Jehová.

JANTʼOJ TAM LABLIXTALAB U BATSʼUWAMAL: U neʼdhalits akak i támub in tomkidh kʼal i inik axi lej alwaʼ inik, in bij Dmitry. Tsablom u tʼojnal ti sucursal kʼal an ólchix kʼal a Jehová ti San Petersburgo. Kʼal an kʼij u tátajchik yabáts jantʼoj in ulumal tin kwéntaj kʼal u belomtal.

¡U lej binal i kʼakʼnamal kom u exlaʼ a Jehová! Ku tʼojonchij tin pidhal i kulbetalab tu ejatal!

«U kwaʼalak yan i konowixtalab axi in tʼajalak kin tsalapaxin» (RAUDEL RODRÍGUEZ RODRÍGUEZ)

JAYKʼIJ TI WAʼTSIN: 1959

BICHOW: CUBA

KʼEʼAT JANTʼOJ TIN KWENTAJ AN EPCHAL: JUN I EYAL AXI LEJ POJKAX

JAWAʼ U WATʼAMAL: In waʼatsin ti bichow Cuba ani in yejey kʼal jun i kwenchal juʼtáj etsʼey waʼatsak i pejextaláb. Tam ti in kwitolej u lej kulbetnalak an pejextaláb ani jats jawaʼ u exobnalak.

Kom in lej witʼadh tin exóbal u papá tin uchaʼ abal kin kʼalej ti universidad. Tanaʼ u belalak abal jantʼiniʼ tu tʼojnal an eyalchik kwaʼalak ka jalkʼun, jaxtám u tomolnaʼchik. Jun u at juntal ani nanáʼ i lej kwadhaʼ jun i policía abal ki kweʼechij an tsoj ani i lej kwajchiy in okʼ. Jaxtám, u neʼdhaʼ ti wikʼaxteʼ ani neʼetsak ku tsemdhaʼ. ¡U kwaʼalak 20 i támub, ani neʼetsak kin tsemdháj!

Tam ti kʼwajatak ti wikʼaxteʼ u exobnalak jantʼiniʼ neʼets ku tejwamédhaʼ i iniktaláb, kʼal jitaʼchik neʼetsak ti kin tsemdhaʼ. Pero jayej u kwaʼalak yan i konowixtaláb axi tin tʼeʼpindhalak, ejtíl, ¿jaleʼ ti waʼats yan i kʼibataláb al axéʼ xi xeʼtsintaláb.

TÓLMIYAT KʼAL AN BIBLIA ABAL KIN JALKʼUY IN EJATAL: Talbél u uchan abal yabáts neʼets ku tsemdháj pero neʼetsak ku jilkʼon wikʼat 30 i támub. Tanáʼ u exlaʼ junchik i ólchix kʼal a Jehová axi kʼwajatakchik wikʼat tin kwéntaj kʼal in belomtal. U lej jikʼpaʼ an iniktaláb axi in tejwamedhalak, ani ejtíl max yab u tʼeʼpinalak. Belits abal yab in tomnalak ka kʼwajay wikʼadh, yab in tejwamedhalakchik max kʼwajatak tsakul.

An Ólchixchik kʼal a Jehová tin exóbchij abal a Dios in kwaʼalak tsalpadh jantʼoj abal patal an atiklábchik. Tin tejwamédhanchij kʼal an Biblia abal a Dios neʼets kin alubelmedhaʼ an tsabál, ani abal yabáts neʼets ka waʼtsin i odhnaxtalab, juʼtáj ti neʼets ka waʼtsin yan i atiklábchik axi alwaʼ inik ani neʼets ka kʼwajay abal etsʼey (Salmo 37:29).

U lej kulbetnalak jawaʼ tin exobchalakchik, pero u ey lej junits jantʼiniʼ jajáʼchik. U tsalpayalak abal nanáʼ yab neʼets ku ejtow ku jilaʼ an política ani ku walbaʼ kin kwadhan, jaxtám u tsalpay ku ajiy an Biblia tu kwetemtal. Tam tu taʼpaʼ ku ajay, u exbay abal expidh an ólchixchik kʼal a Jehová jats an atiklabchik axi in jumbiyal an kʼaʼál aykolchik axi ti kʼaʼál siglo.

An exobintaláb kʼal an Biblia tin tólmiy abal ku tsuʼuw abal kwaʼalak ku tʼajaʼ yan i jalkʼuxtaláb tu ejatal. U kwaʼalak ku jalkʼuy jantʼiniʼ in kaw, kom u ulalak yan i atʼax kaw. Jayej kwaʼalak ku jilaʼ an may ani yabáts ku tolmiy an éyalchik. Pero kʼal in tólmixtal a Jehová, u ejtow ku tʼajaʼ.

Axi lej tʼojláb u atsʼalak ku jalkʼuy pel an tsakultaláb. Xowéʼ bel u konchal a Dios abal ti kin tólmiy kʼal nixéʼ. Axi tin tolmiyamal jats jawaʼ in ulal Proverbios 16:32, in ulal: «Más tsapik an inik axi in tejwamedhál i kʼayataláb ani axi yab dhubat u tsakúl, ejtíl jun axi in atál jun i pulik bichow».

Ani ti 1991 in pujan jantʼiniʼ i ólchix kʼal a Jehová tanáʼ ti wikʼaxteʼ al jun i tanque. Jun i támub talbél, junchik axi u kʼwajatak wikʼadh u walkáj ani u aban ti España, kom tanáʼ i kwaʼalak i yanél. Tam ti in ulits, in kʼalej dhubatkʼij ti tamkuntaláb kʼal an ólchixchik kʼal a Jehová, ani tin batsʼuwchik jantʼiniʼ max lej biyálits tin exlál.

JANTʼOJ TAM LABLIXTALÁB U BATSʼUWAMAL: Xowéʼ in lej kulbél ani u tʼojonchal a Dios kʼal u tomkíl ani an tsakamchik. Xowéʼ u jilchal yan i kʼij abal ku exóbchij kʼal an Biblia an atiklábchik. Junchikil u tsalpayal abal tam ti in kwitolej weʼits ku kʼibaʼ u ejatal. Xowéʼ u binál i kʼakʼnamal ani in lej kulbél kʼal patal an lablixtalaáb axi i batsʼwamal. Yab expidh in kʼwajat ejat, jayej u kwaʼal jun i aychixtaláb. U lej aychalits ka ulits an ít alabel tsabál, juʼtáj neʼets ka waʼtsin i bolidhtaláb «ani neʼets ka tixkʼáj an tsemláj» (Revelación [Apocalipsis] 21:​3, 4).

[Comentario]

«U lej jikpaʼ ku exlaʼ abal a Dios in kwaʼal in bij»

[An foto]

U tomkil ani nanaʼ i lej kulbetnal ki exobchij an alwaʼ kaw axi ti Biblia an atiklabchik axi yab u otsʼox