Mbivilia Nĩalyũlaa Andũ

We mũndũ mũka ũmwe wa mũika wakomanie na mathĩna maito e kana eekie ata nĩ kenda ekale e mũtanu thayũnĩ wake? Nĩ kyaũ kyatumie mũndũ ũmwe wavĩngaa silikalĩ, na waĩ ngũlũ na mũng’endu, atw’ĩka mũtavany’a wa ũvoo mũseo, na mũndũ wendete mũuo? Soma ngewa sya andũ asu nĩ kenda ũkwate ũsũngĩo.

“Nĩnakw’ĩte ngoo nũndũ vai mũndũ noonaa ambendete”—INNA LEZHNINA

ASYAIWE MWAKA WA: 1981

NTHĨ ĨLA WUMĨTE: RUSSIA

ĨVINDA ĨVĨTU: E KANA NĨWAKOMANIE NA MATHĨNA MAITO

KWĨANA KWAKWA: Nasyaiwe ndatonya kwĩw’a, o namo asyai makwa mayaĩ matonya kwĩw’a. Myaka yakwa ya mbee thanthatũ yaĩ ya kwendeesya. Ĩndĩ ĩtina wa vau asyai makwa nĩmathaisye mũtwaano. O na kũtw’ĩka naĩ mũnini, nĩneesĩ kana kũthasya mũtwaano nĩ ũndũ mũito, na kwoou nĩnaũmĩie mũno. Ĩtina wa kũthasya mũtwaano, ĩthe wakwa na mwana-a-mwaitũ ũla mũkũũ nĩmambĩĩie kwĩkala vandũ vetawa Troitsk, nake inyia-akwa ambosa na twathamĩĩa Chelyabinsk. Ĩtina wa ĩvinda nĩwatwaiwe ĩngĩ. Ĩthe-akwa ũsu wa kelĩ aĩ mũnywi na mavinda maingĩ nĩwatũvũaa nĩ na inyia-akwa.

Twĩ mwaka wa 1993, mwana-a-mwaitũ ũla mũkũũ namwendete nĩwakw’ĩĩe kĩw’ũnĩ ũsĩnĩ. Ũndũ ũsu nĩwatelemilye mũsyĩ witũ mũno. Inyia-akwa nĩwambĩĩie kũnyw’a, na ambĩĩa kũngua naĩ e na ĩthe-akwa wa kelĩ. Kwondũ wa ũu nĩnambĩĩe kũmantha ũndũ ndonya kwĩka nĩkale na ũtanu. Nĩnakwie ngoo nũndũ vai mũndũ noonaa ambendete. Nĩnambĩĩie kũthi makanisanĩ me kĩvathũkany’o ndimantha ũkiakisyo, ĩndĩ ndyaaũkwata.

ŨNDŨ MBIVILIA YAALYŨLILE MWĨKALĨLE WAKWA: Ĩla naĩ na myaka 13 kelĩtu kamwe twasomaa nako, kala kaĩ Ngũsĩ ya Yeova, nĩkandavasya maũndũ mana maumĩte Mbivilianĩ. Nĩnatanĩaa kwĩmanyĩsya ĩũlũ wa andũ amwe mawetetwe Mbivilianĩ ta Noa na Yovu, ala mamũthũkũmie Ngai o na kũtw’ĩka nĩmakomanie na mathĩna. Ĩtina wa kavinda kakuvĩ, nĩnambĩĩie kwĩmanyĩsya Mbivilia na Ngũsĩ na nambĩĩa kũthi maũmbanonĩ.

Kwĩmanyĩsya Mbivilia nĩkwatumie nĩmanya maũndũ maingĩ ma kwendeesya. Nĩnatanie kũmanya kana Ngai e ĩsyĩtwa. (Savuli 83:18) O na nĩnendeeiw’e kwona ũndũ Mbivilia yathanie ĩteũvĩtya ĩũlũ wa maũndũ ala makekĩka “mĩthenyanĩ ya mũminũkĩlyo.” (2 Timotheo 3:1-5) O na nĩnatanie mũno kwĩmanyĩsya ĩũlũ wa wĩkwatyo wa ũthayũũkyo. Kwasũanĩa ndyonana ĩngĩ na mwana-a-mwaitũ!—Yoana 5:28, 29.

O na vailyĩ ũu, ti kĩla mũndũ watanĩthaw’a nĩ maũndũ asu neemanyĩisye. Inyia-akwa na ĩthe-akwa wa kelĩ nĩmamenete Ngũsĩ sya Yeova. Nĩmatatie kũnthing’ĩĩsya nĩ kenda nĩeke kwĩmanyĩsya Mbivilia. Ĩndĩ nĩnendete maũndũ ala neemanyĩasya, na ndyeeyũmbanĩtye kũeka.

Ũyaĩ ũndũ wĩ laisi kũmĩĩsya kũvĩngwa nĩ andũ ma mũsyĩ. Nĩnasyokie nakũnĩka ĩngĩ ĩla mwana-a-mwaitũ ũla mũnini, twaendanasya nake maũmbanonĩ ma Ngũsĩ sya Yeova, o nake wakw’ĩĩie kĩw’ũnĩ. Ngũsĩ nĩsyandw’ĩĩkie mũno. Vau nĩvo nakwatie wendo ũla neethĩĩtwe nĩmanthĩte thayũnĩ wakwa w’onthe. Kwoou nĩnamanyie kana ĩsu no nginya yĩthĩwe noyo ndĩni ĩla ya w’o. Mwaka wa 1996, nĩnavatisiwe na natw’ĩka Ngũsĩ ya Yeova.

MOATHIMO ALA NĨKWATĨTE: Kwa ĩvinda ya myaka thanthatũ yu, nĩnĩthĩĩtwe ndwaĩtwe nĩ mũndũũme mũseo wĩtawa Dmitry. Ithyonthe tũthũkũmaa ovisinĩ wa ũvonge wa Ngũsĩ sya Yeova ũla wĩ St. Petersburg. Ĩtina wa ĩvinda, asyai makwa nĩmaleelangilye mũũngamo woo ĩũlũ wa maũndũ ala nĩĩkĩĩte.

Nĩngũtũnga mũvea mũno nũndũ wa kũmũmanya Yeova! Kũmũthũkũma nĩkũtumĩte nĩthĩwa na ũtanu wa w’o thayũnĩ wakwa.

“Nĩnathĩnĩkaa na kwĩkũlya makũlyo maingĩ.”​—RAUDEL RODRÍGUEZ RODRÍGUEZ

ASYAIWE MWAKA WA: 1959

NTHĨ ĨLA WUMĨTE: CUBA

ĨVINDA ĨVĨTU: NĨWALEANAA NA SIASA SYA NTHĨ YAKE

KWĨANA KWAKWA: Nasyaĩwe Havana, Cuba, na naeewa ũtũinĩ andũ maĩ ngya na mendete kũkita. O nĩendeee na kwĩana, nĩnambĩĩie kwendeew’a nĩ ĩthaũ ya kaũ yĩtawa judo na mathaũ angĩ makonetye kaũ.

Neekaa nesa nĩ sukulu, na kwoou asyai makwa mambĩkĩa vinya nĩende yunivasĩtĩ. Nĩ yunivasĩtĩ, nĩnambĩĩe kwona ne ũndũ wa vata siasa sya nthĩ yakwa syĩkwe moalyũku. Kwoou nĩnambĩĩe kũvĩngana na silikalĩ. Ĩvinda yĩmwe nĩ na mũmanyĩw’a twasomaa ĩmwe nĩtwavithũkĩie mũsikalĩ nĩ kenda tũmũvene ĩvuti. Ũndũ ũsu nĩwatumie mũsikalĩ ũsu aũmĩa mũno mũtwenĩ wake. Kwondũ wa ũu nĩtwatwaiwe yela na twatw’ĩĩwa kĩkw’ũ nĩ kĩkundi kya asikalĩ kĩtawa firing squad. Kwasũanĩa naĩ na myaka 20 na neeteelete kũawa!

Ĩla naĩ yela nĩ nyioka, nĩneekaa masoesi ma ũndũ ngwĩka nĩ mbee wa kĩkundi kĩu. Ndyendaa noneke nĩ na wia. Kavindanĩ o kau, nĩnathĩnĩkaa na ngekũlya makũlyo maingĩ. Nĩneekũlasya, “Nĩkĩ ĩũlũ wa nthĩ kwĩ ũsili mwingĩ ũte wa katĩ? We mũndũ oombiwe akomanae na maũndũ ta aa?’

ŨNDŨ MBIVILIA YAALYŨLILE MWĨKALĨLE WAKWA: Sila wa kĩkw’ũ ũla twatw’ĩĩwe nĩwavetangiwe na twatw’ĩĩwa kwovwa myaka 30. Ĩvindanĩ yĩu nĩw’o nakomanie na Ngũsĩ imwe sya Yeova ila syoovetwe nũndũ wa mũĩkĩĩo wasyo. Nĩnendeeiw’e mũno nĩmo nũndũ o na kau maĩ na ũkũmbaũ, nĩmendete mũuo. O na kũtw’ĩka moovetwe mate na mavĩtyo, mayeethĩawa na ũthilĩku kana woo.

Ngũsĩ nĩsyamanyĩisye kana Ngai e na mũvango mũseo kwondũ wa mũndũ. Nĩmanzomeie Maandĩko ma Mbivilia mekwonany’a kana Ngai akaalyũla nthĩ ĩno yĩthĩwe valatiso vala kũkethĩwa kũte na mothũku na ũsili ũte wa katĩ. O na nĩmamanyĩisye kana nthĩ ĩkausũwa nĩ andũ aseo, ala makakwata mwanya wa kwĩkala tene na tene vandũ vaseo.—Savuli 37:29.

O na kũtw’ĩka nĩnatanĩaa maũndũ ala neemanyĩisye kuma kwa Ngũsĩ, mwĩkalĩle wakwa waĩ kĩvathũkany’o vyũ na woo. Nasũanĩaa kana kwĩthĩwa ndeũkwata mbau ngalĩko o na yĩva ya siasa, kana kũlea kwĩyĩĩvanĩsya nĩ maũndũ ndatonya kwĩanĩsya. Kwoou nĩnatwie kwĩsomea Mbivilia. Ĩla naminie kũmĩsoma nĩnamanyie kana Ngũsĩ sya Yeova nosyo syĩ syoka syĩthĩawa na mwĩkalĩle ũilyĩ wa Aklĩsto ma mbee.

O na ĩngĩ, neemanyĩsya Mbivilia nĩnamanyie kana nĩnaaĩlĩte kwĩka moalyũku manene thayũnĩ wakwa. Kwa ngelekany’o, nĩnaaĩlĩte kwĩvathana na ũneeni ũte mũseo, nũndũ nĩnendete mũno kwĩvĩta. O na nĩnaaĩlĩte kũeka kũnyw’a sikala. Na yaĩ no nginya nĩeke kũkwata mbau maũndũ o na meva makonetye siasa. Ndwaĩ ũndũ wĩ laisi kwĩka moalyũku asu, ĩndĩ Yeova nĩwandetheeisye nameka kavola kwa kavola.

Ũalyũku ũmwe waĩ vinya mũno kwĩka nĩ kwĩmanyĩsya kũsiĩĩa ũthilĩku wakwa. O na ũmũnthĩ nĩnĩvoyaa nĩ kenda nĩthĩwe ndonya kwĩsiĩĩa. Nĩndetheetw’e mũno nĩ mĩsoa ya Mbivilia ta Nthimo 16:32, ũla waĩtye atĩĩ: “Mũmĩĩsya wa kũthata e kavaa kwĩ ũla wĩ na ũtonyi; Na ũla ũsumbĩkaa veva wake, e kavaa kwĩ ũla ũkwataa ndũa.”

Mwaka wa 1991 nĩnavatisiwe natw’ĩka Ngũsĩ ya Yeova. Navatisĩwe mũtũnginĩ ũmwe wa kĩw’ũ ũla waĩ yelanĩ yĩla noovewe. Mwaka ũla waatĩĩe, nyie, na ovwa amwe nĩtwathaiw’e na twatwawa Spain. Ĩla navikie Spain nĩnaendie ĩmwe kwa ĩmwe maũmbanonĩ ma Ngũsĩ sya Yeova. Ngũsĩ nĩsyanthokisye nesa weethĩa no ta neethĩĩtwe nasyo kwa ĩvinda ya myaka ĩkũmi, na nĩmandetheeisye neethĩwa nĩ na ũndũ ndonya kwĩka.

MOATHIMO ALA NĨKWATĨTE: Yu nĩ na ũtanu ngĩmũthũkũma Ngai nĩ na kĩveti kyakwa na eĩtu makwa. Nĩ na kĩanda kya kũtũmĩa ĩvinda yingĩ ngĩtetheesya andũ angĩ memanyĩsye Mbivilia. Mavinda amwe nĩnĩlilikanaa ĩvinda yĩla naĩ wa mũika neteelete kũawa, na kĩu kĩindetheesya kũtũnga mũvea nũndũ wa moathimo maingĩ ala ngwatĩte. Nĩndũngaa mũvea nũndũ wa kwĩthĩwa thayũ na kwĩthĩwa na wĩkwatyo. Nĩnĩthĩawa na mea ma kwona Valatiso ĩla twathĩtwe, ĩvinda yĩla kũkethĩwa na ũsili wa katĩ kĩla vandũ na “kĩkw’ũ kĩikethĩwa vo ĩngĩ.”—Ũvuany’o 21:3, 4.

[Maelesyo Makuvĩ]

“Nĩnatanie kũmanya kana Ngai e ĩsyĩtwa”

[Visa]

Nĩ na mũemewa nĩtũtanĩaa kũnengane mavuku ma ala matew’aa