Кʹьтеба Пироз Жийина Мәрьва Дьгӧһезә

КӘЧʹЬКӘКЕ, кʹижане кӧ зарʹотийа хԝәда ләзәт нәдитьбу, чь щурʹәйи нета жийине дит? Ԛачахәки политики жь бо чь һелан бу, кӧ бьбә хьзмәткʹаре Хԝәде? Дәрһәԛа ԝана һун дькарьн жь ван сәрһатийа пебьһʹәсьн.

«Әз Һʹәԝще Һʹьзкьрьн у Дьлгәрмийе Бум». ИННА ЛЕЖНИНА

САЛА БУЙИНЕ: 1981

ԜӘЛАТ: РУСЙА

БӘРЕ: ЗАРʹОТИЙА ГЬРАН ДӘРБАЗ КЬРИЙӘ

ЖИЙИНА МЬНӘ БӘРЕ: Де-баве мьн кәрʹ-лал бун у әз жи ӧса һатьмә буйине. Һʹәта шәш сала зарʹотийа мьн баш бу. Паше де-баве мьн һәв ԛәтийан. Рʹаст ә әз гәләк бьчʹук бум, ле мьн фәʹм дькьр һәвԛәтандьн чь йә, у әве йәке гәләк дьле мьн дешанд. Баве мьн тʹәви бьре мьни мәзьн Троитскеда ман, ле дийа мьн әз һьлдам у әм чунә Челәбинске. Ԝәʹдә шунда әԝе диса мер кьр. Зьрʹбаве мьн гәләк ичʹкә вәдьхԝар у тʹьме әз у дийа мьн дькʹӧта.

Сала 1993-да бьре мьни мәзьн, кʹижан кӧ мьн зәʹф ле һʹьз дькьр, аведа хәньԛи. Бона малбәта мә әв дәрдәки гьран бу. Жь бо ве йәке дийа мьн дәстпекьр ичʹке вәхԝә у мина зьрʹбаве мьн, әз дькʹӧтам. Әз дьфькьрим ча жийина хԝә баш кьм. Әз һʹәԝще һʹьзкьрьн у дьлгәрмийе бум. Мьн дәстпекьр һәрʹьм щурʹә-щурʹә дера кӧ дьлбинийе бьстиньм, ле мьн тʹӧ щийа әв йәк нәдит.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Чахе әз 13 сали бум, һәваләкә мьнә мәкʹтәбе, йа кӧ Шәʹде Йаһоԝа бу, һьнә сәрһатийед Кʹьтеба Пироз мьнрʹа гьли кьр. Мьн хԝәш дьһат пебьһʹәсьм дәрһәԛа ԝан мәрийа, ча Нӧһ у Ибо, йед кӧ нава чәтьнайада жи Хԝәдерʹа хьзмәт дькьрьн. Зутьрәке мьн дәстпекьр тʹәви Шәʹдед Йаһоԝа Кʹьтеба Пироз һин бьм у һәрʹьмә щьвата.

Әз бь сайа һинбуна Кʹьтеба Пироз гәләк рʹастийед һʹәԝас педьһʹәсийам. Чахе әз дәрһәԛа наве Хԝәде пеһʹәсийам, әве йәке гәләк дьле мьн гьрт (Зәбур 83:18). Әз әʹщебмайи мам, кӧ Кʹьтеба Пироз чьԛас рʹаст пʹехәмбәртийе дькә дәрһәԛа ԝе йәке, кӧ «рʹожед ахьрийеда» һʹале дьнйайе ԝе чь щурʹәйи бә (2 Тимотʹейо 3:1-5). Ле чахе әз пеһʹәсийам, ԝәки мьри ԝе жь мьрьне рʹабьн, гӧрʹзи мьнрʹа чун. Шабуна, ньге мьн әʹрд нәдьгьрт, кӧ әзе диса бьре хԝә бьвиньм! (Йуһʹәнна 5:28, 29)

Ле сәд һʹәйф, гьшк тʹәви мьн ша нәдьбун. Де у зьрʹбаве мьн Шәʹдед Йаһоԝа нәфрʹәт дькьрьн. Ләма жи ԝана һәр тьшт дькьр, ԝәки әз тʹәрка һинбуна Кʹьтеба Пироз бьдьм. Ле мьн хԝәш дьһат чь кӧ әз педьһʹәсийам, у мьн нәдьхԝәст тʹәрка ве йәке бьдьм.

Мьнрʹа һеса нибу бәр мьԛабьлибуна малбәта хԝә тәйах кьм. Зутьрәке мьн диса дәрдәки гьран дит. Бьре мьни бьчʹук жи, йе кӧ тʹәви мьн дьһатә щьватед Шәʹдед Йаһоԝа, хәньԛи. Ԝи һʹале мьни гьранда Шәʹдед Йаһоԝа тʹьме кʹеләка мьн бун. Нав ԝанда мьн һʹьзкьрьн у дьлгәрми дит, кʹижан кӧ мьн тʹәмамийа жийина хԝәда дьгәрʹийа. Мьн фәʹм кьр, ԝәки әв ә религийа рʹаст. Сала 1996-да әз һатьмә ньхӧмандьне у бумә Шәʹде Йаһоԝа.

ЧЬ КʹАР МЬН СТАНД: Шәш сал ә кӧ әз тʹәви мәрьвәки гәләк баш зәԝащеда ньм, наве кʹижани Дмитри йә. Әм тʹәвайи филиала Шәʹдед Йаһоԝада хьзмәт дькьн, кʹижан кӧ Санкт Пәтәрсбӧргеда йә. Хенщи ԝе йәке де-баве мьн һьндава религийа мьн һʹәвәки нәрм бунә.

Әз гәләк бәхтәԝар ьм кӧ Йаһоԝа нас дькьм у ԝирʹа хьзмәт дькьм! Ньһа мьн нета жийине дитийә.

«Гәләк Пьрсед Мьн Һәбун». РАУДЕЛ РОДРИГЕС РОДРИГЕС

САЛА БУЙИНЕ: 1959

ԜӘЛАТ: КУБА

БӘРЕ: МЬԚАБЬЛИ ПОЛИТИКАЙЕ БУ

ЖИЙИНА МЬНӘ БӘРЕ: Әз Кубайеда, бажаре Һаванайеда һатьмә буйине у мьһаләкә кʹәсибда мәзьн бумә, кʹидәре кӧ ԛачахти бәлабуйи бу. Әз чьԛас мәзьн дьбум, мьн хԝәш дьһат спортед ӧса ча дзйудо у спортед дьнә зорбәтийева гьредайи.

Әз рʹьнд һин дьбум, ләма жи де-баве мьн әз һелан кьрьм һәрʹьмә университете. Ԝедәре әз һатьмә сәр ве нете, ԝәки система политики йа ԝәлате мьн гәрәке бе гӧһастьне. Ләма жи мьн сафи кьр мьԛабьли политике дәркʹәвьм. Мьн тʹәви һәваләки хԝәйи жь университете һʹьщуми сәр полисәки кьр, сәва кӧ ԛьрме же бьстиньн. Мә сәре ԝи полиси зәʹф бьриндар кьр. Әм гьртьн, кьрьнә кәле у диԝане сафи кьр, ԝәки әм бенә гӧләкьрьне. Һьнге әз 20 сали бум у гәрәке бьһатама кӧштьне!

Чахе әз кәледа тʹәне рʹуньштьбум, мьн дьда бәр чʹәʹве хԝә, ԝәки әз ча хԝә бьгьрьм ԝәʹде гӧләкьрьне. Мьн нәдьхԝәст кәсәк бьвинә кӧ әз дьтьрсьм. Һьм жи гәләк пьрс щәм мьн пешда дьһатьн. Мәсәлә: «Чьма дьнйайеда һаԛас нәһәԛи һәйә? Паши мьрьне жийин һәйә?»

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Щәзакьрьна мә гӧһастьн. Дәԝса гӧләкьрьне 30 сал гӧнә данә мә. Ԝи ԝәʹдәйида әз рʹасти Шәʹдед Йаһоԝа һатьм, йед кӧ бона баԝәрийа хԝә гьрти бун. Әз әʹщебмайи бум кӧ әԝана чьԛас мерхас у һьм жи әʹдьлайиһʹьз бун. Рʹаст ә әԝана бь нәһәԛийе һатьбун гьртьне, ле диса жи ԝана хԝә сәрт нәдьда кʹьфше у нәбьбун мәрьвнә зӧлм.

Шәʹдед Йаһоԝа мьнрʹа дәрһәԛа ԛьрара Хԝәдейә бона инсанәте гьли кьрьн. Ԝана жь Кʹьтеба Пироз нишани мьн кьрьн, кӧ Хԝәде ԝе әʹрде бькә щьнәт, кʹидәре кӧ зӧлми у нәһәԛи тʹӧнә бә. Ԝана ӧса жи шьровәкьр, кӧ дьнйа ԝе бь мәрьвед ԛәнщ тʹьжә бә у ԝе һʹәта-һʹәтайе сәр әʹрде щьнәтеда бьжин (Зәбур 37:29).

Чь кӧ Шәʹдед Йаһоԝа мьнрʹа гьли дькьрьн, мьн хԝәш дьһат, ле әз жь ԝана щӧдә дьбум. Мьн тʹьре әзе нькарьбьм нәкʹәвьмә нава политикайе у һәрге йәк шәмаԛәке ль рʹуйе мьни рʹасте хә, ԝе мьнрʹа чәтьн бә йе дьн жи бьдьмә бәр. Мьн сафи кьр хԝәха Кʹьтеба Пироз бьхуньм. Чахе мьн хԝәндьна хԝә тʹәмам кьр, мьн фәʹм кьр кӧ тʹәне Шәʹдед Йаһоԝа чʹәʹв дьдьнә Мәсиһийед ԛьрʹна йәке.

Ԝәʹде һинбуна Кʹьтеба Пироз мьн фәʹм кьр, кӧ гәрәке гәләк тьшт жийина хԝәда бьгӧһезьм. Мәсәлә, мьнрʹа лазьм бу хәбәрдана хԝә тʹәмьз кьм, чьмки мьнрʹа бьбу хәйсәт гьлийе нәщайиз бьдьмә хәбате. Һьм жи мьн гәрәке тʹәрка щьхаре бьда. Хенщи ԝе йәке алийе политикайеда мьн гәрәке тʹәвнәбуйин хԝәй кьра. Мьнрʹа һеса нибу ԝан гӧһастьна нав хԝәда бькьм, ле бь аликʹарийа Йаһоԝа щәм мьн һатә стандьн.

Әз зәʹф зу һерс дькʹәтьм, ләма жи йа лапә чәтьн бона мьн әԝ бу, кӧ хԝә контрол кьм. Әз диса жи дәрһәԛа хԝәгьртьне Хԝәдерʹа дӧа дькьм. Рʹезед Кʹьтеба Пироз гәләк али мьн дькьн, мәсәлә йед ӧса ча Мәтʹәлок 16:32, кʹидәре те готьне: «Мәрьве хԝәйисәбьр жь мерхас четьр ә у йе хԝәгьрти жь йе бажар-һьлдайи».

Сала 1991-да әз һатьмә ньхӧмандьне у бумә Шәʹде Йаһоԝа. Әз бочкеда һатьмә ньхӧмандьне. Сала дьн әз тʹәви һьнә гьртийа аза кьрьм у шандьн Испанйайе, чьмки ԝедәре пьсмамед мә дьжитьн. Ча әз гьһиштьмә ԝедәре, мьн дәрберʹа дәстпекьр һәрʹьм сәр щьватед Шәʹдед Йаһоԝа. Әԝана бь дьл у щан әз ԛәбул кьрьм у али мьн кьрьн, кӧ жийина тʹәзә дәстпекьм.

ЧЬ КʹАР МЬН СТАНД: Әз бәхтәԝар ьм, кӧ тʹәви жьна хԝә у ԛизед хԝә Хԝәдерʹа хьзмәт дькьм. Бона мьн ԛәдьрәки мәзьн ә, кӧ әз дькарьм али мәрьва бькьм Кʹьтеба Пироз һин бьн. Щарна әз тиньм бира хԝә ԝи ԝәʹдәйи, чахе һьндьк мабу мьн дәст жь жийина хԝә бәрʹда. Әз гәләк бәхтәԝар ьм кӧ әʹмьре мьнда гәләк тьшт һатә гӧһастьн. Әз нә кӧ тʹәне сах мам, ле ӧса жи мьн һевийа әʹмьре һʹәта-һʹәтайе станд. Әз һивийа Щьнәта создайи мә, кʹидәре ԝе һәԛи бә у «иди мьрьне тʹӧнәбә» (Әʹйанти 21:3, 4).

[Ньвисар]

«Чахе әз дәрһәԛа наве Хԝәде пеһʹәсийам, әве йәке гәләк дьле мьн гьрт»

[Шькьл]

Әз тʹәви мере хԝә әʹдәбйәтед бона кәрʹ-лала бәла дькьм