Baibolo Upimpula Bwikalo bwa Bantu

Nsongwakazhi wajinga na binyenge ku bwanyike waikele byepi na lusekelo? Ñanyi kintu kyalengejile muntu wasatukijile kafulumende kwikala wa mutende ne kutendeka kwingijila Lesa? Tangai ano mashimikila pa kuba’mba muyuke byo kyajinga.

“Nakebeshanga bingi kutaana bantu baji na kifyele bakonsha kuntemwa.”—BYASHIMIKIZHA BA INNA LEZHNINA

MWAKA YE BASEMEKELWE: 1981

KYALO: RUSSIA

MWAPITA BWIKALO BWABO: BAJINGA BINGI NA BINYENGE KU BWANYIKE

BWIKALO BWA KALA: Bansemi bami bajinga bakamaama. Ne amiwa nasemekelwetu kamaama. Mu myaka itanu na umo ya bwanyike bwami, twaikelenga bingi bulongo. Kepo masongola a batata ne bamama apwile. Nangwa kya kuba nakijinga mwanyike, kyankolele bingi ku muchima mambo nayukile byo kikala inge masongola apwa. Masongola byo apwile batata ne kolojami wamulume bayile na kwikala ku troitsk. Amiwa ne bamama twayile na kwikala ku Chelyabinsk. Palutwe kacheche, bamama basongwelwe jikwabo. Batata bakushinda bajinga ba kitomi. Javula bapumanga bingi bamama ne amiwatu pamo.

Mu 1993 kolojami ye natemenwe wafwile pa mema. Kino kyalengejile kisemi kyetu kwikala na binyenge bingi. Pa kuba’mba bapwishe binyenge, bamama batatwile kutoma maalwa. Kino kyalengejile bamama nabo kutendeka kumpuma byonka byampumanga batata bakushinda. Na mambo a kino nafuukwilepo kukeba ko nafwainwa kwikalanga bulongo. Natendekele kuya mu machechi apusana pusana pa kuba’mba ntaanemotu muntu wa kuntekenesha, bino kechi namutaaine ne. Mambo nakebeshanga bingi kutaana bantu baji na kifyele bakonsha kuntemwa.

BAIBOLO BYO APIMPWILE BWIKALO BWAMI: Byo nafikizhe myaka 13, mukwetu umo ye nafundanga nanji wajinga Kamonyi wa kwa Yehoba, wambuujilepo mashimikila amo a mu Baibolo. Mashimikila a mu Baibolo o nafunjile aamba pe Nowa ne Yoba baingijilenga Lesa nangwa kya kuba bapichilenga mu makatazho, antekeneshe bingi. Kabiji natendekele kufunda Baibolo na Bakamonyi ba kwa Yehoba ne kutaanwanga ku kupwila.

Kufunda Baibolo kwandengejile kuyuka bintu byawama byavula bingi. Nafunjile kishinka kimo kyamfikile bingi pa muchima kya kuba’mba Lesa uji na jizhina. (Salamo 83:18) Natemenwe bingi kuyuka kuba’mba bintu bibena kumweka ano moba bebyambijile jimo kuba’mba bikamwekanga “mu moba a kupelako” (2 Timoti 3:1-5) Kabiji kyantekeneshe bingi kuyuka kuba’mba bafwa bakasangulwa. Nasangalele bingi kuyuka kuba’mba nkamonañana na kolojami wamulume jikwabo.​—Yoano 5:28, 29.

Nangwa byonkabyo, kechi bonse batemenwe byo nafunjilenga ne. Bamama ne batata bakushinda bashikilwe bingi Bakamonyi ba kwa Yehoba. Baesekele bingi kunkanya kuba’mba ndeke kufunda Baibolo. Pano bino, natemenwe bingi bintu byo nafunjilenga kabiji kechi nakebelenga kuleka ne.

Kechi kyampeelejile kuchinchika luno lukatazho ne. Kikwabo kyatama kitumwekejile ke lufu lwa nkasami wafwile pa mema, ye nayanga nanji ku kupwila kwa Bakamonyi ba kwa Yehoba. Nangwa byonkabyo, Bakamonyi ba kwa Yehoba bantekeneshe bingi. Bakamonyi ba kwa Yehoba bo bo nataaine kuba’mba batemwa bingi bantu kabiji baji bingi na kifyele. Abino byo byo nakebelenga mu bwikalo bwami. Mu 1996, nabatizhiwe kwikala Kamonyi wa kwa Yehoba.

BINTU BYO NAMWENAMO: Nasongolwa ku ba Dmitry. Bawama bingi muchima kabiji twaikala mu masongola myaka itanu na umo. Amiwa ne bamwatawami twingijila pa ofweshi wa musampi wa Bakamonyi ba kwa Yehoba mu St. Petersburg. Mu kuya kwa moba, bansemi bami balekele kuñendeleka pa byo naitabilamo.

Namusanchila bingi Yehoba pa kumuyuka. Kabiji kumwingijila kwandetela bingi lusekelo mu bwikalo bwami.

“Najinga na mepuzho o nalangulukilengapo avula bingi.”—BYASHIMIKIZHA BA RAUDEL RODRÍGUEZ RODRÍGUEZ

MWAKA YE BASEMEKELWE: 1959

KYALO: CUBA

MWAPITA BWIKALO BWABO: BASATUKIJILE KAFULUMENDE

BWIKALO BWAMI BWA KALA: Nasemekejilwe mu Havana mu kyalo kya Cuba kabiji nakomejile mu kimasamasa mwajinga bantu bayanji. Kabiji mu uno muzhi mwajinga bantu bavula bingi baubilenga bintu byatama. Byo nakomenenga, natemenwe kisela kya kwifina tukono ne makayo akwabo a kanwa.

Najinga bingi na maana ku sukulu kabiji bansemi bami bantundaikile kuya ku univesiti. Byo najinga pa univesiti, natendekele kulanguluka’mba kafulumende wa mu kyalo kyetu wafwainwa kupimpulwa. Onkao mambo, nafuukwilepo kusatukila kafulumende. Amiwa ne mukwetu mo twafunjilanga twalukukile kapokola kuba’mba tumwangate buta. Twamupumine ne kumukozha bingi ku mutwe. Betukwachile ne kwitutaya pa kazhima kabiji betuzhachishe’mba baketwipaya na buta. Najinga na myaka ya kusemwa 20, bino nafwile na mambo kabiji banchibijile’mba nafwainwa kufwa.

Byo najinga bunke mu kaleya, nalanguIukilenga byo nkooba ku bashilikale inge kimye kya kundoza kyafika. Kechi nakebelenga kumweka’mba najinga na moyo ne. Pa kimye kimotu, najinga na mepuzho o nalangulukilengapo avula. Nalangulukilenga’mba: ‘Mambo ka pano pa ntanda o pavujila nshiji bibye? Nanchi atweba bantu tukatwajijilatu na kuyanda nyi?’

BAIBOLO BYO APIMPWILE BWIKALO BWAMI: Mu kuya kwa moba, betubuujile kuba’mba kechi baketwipaya ne, bino tukekala myaka 30 mu kaleya. Pa kyonkakye kimye po po namonañene na Bakamonyi ba kwa Yehoba bo bakashile na mambo a lwitabilo lwabo. Natemenwe bingi pa kumona Bakamonyi byo bachinchikiIe ne byo bamwesheshenga byubilo bya mutende. Nangwa kya kuba bebakashile pa kubula mambo, kechi bazhingijile ne.

Bakamonyi bamfunjishe’mba Lesa ukeba bantu kukekala myaka ne myaka kulutwe na lwendo. Bammwesheshe mu Baibolo kuba’mba Lesa ukapimpula ino ntanda kwikala paladisa mukabula bantu boba bintu byatama ne nshiji. Kabiji bamfunjishe’mba mu ntanda ipya mukekalatu bantu baji na byubilo byawama kabiji bakekala myaka ne myaka.​—Salamo 37:29.

Byamfunjishenga Bakamonyi byandengejile kwikala na lusekelo. Pano bino, byubilo byami byapusene bingi na byubilo byabo. Nalangulukilenga’mba kechi nakonsha kuIeka kwivwanga mu bya bumulwila ntanda nangwa kushinkanya ne. Onkao mambo, nafuukwilepo kutanga Baibolo yense. Byo napwishishe kumutanga, nayukile kuba’mba Bakamonyi ba kwa Yehoba bo bonkatu baji na byubilo byajingapo na bena Kilishitu batanshi.

Kwesakana na byo nafunjilenga mu Baibolo, nayukile kuba’mba nafwainwa kupimpula byubilo byami kabiji nafwainwa kuleka ñambilo ya mwenga. Nafwainwa kwikileka kupeepa fwanka ne kwivwanga mu bya bumulwila ntanda. Kino kechi kyampeelejile ne, bino Yehoba wankwashishe. Kabiji pa kupitapo kimye nalekele.

Kyankatezhe bingi kwikileka kuzhingilazhingila. Nkilombapo ne luno kuba’mba mbulenga kuzhingilazhingila. Kinembelo kya Byambo bya Maana 16:32, kyankwasha bingi. Kino kinembelo kyamba’mba: “Awa ubanda kuzhingila wawama kukila kitonzhi, kabiji awa ubula kuzhingilazhingila wakila muntu ushinda muzhi.”

Mu 1991, nabatizhiwe kwikala Kamonyi wa kwa Yehoba. Nabatizhiwe mu shomeka mukatampe wajinga mu kaleya. Mwaka walondejilepo, atweba bamo bo bakashile betukasulwile ne kwitutwala ku Spain mambo ko kwajinga balongo betu. Byo nafikile ku Spain, ponkapotu nataainwe ku kupwila kwa Bakamonyi ba kwa Yehoba. Kabiji bantambwijile bingi bulongo nobe twiyukile kala. Kinetu bankwashishe kutaana bwikalo bwawama jikwabo.

BINTU BYO NAMWENAMO: Nji bingi na lusekelo kabiji mbena kwingijila Lesa pamo na bakazhi bami ne baana betu babiji babakazhi. Mbena kwingila kimye kyabaya mu mwingilo wa kukwasha bantu kufunda biji mu Baibolo. Kimye kimo ndanguluka pa byo nashinkafwe saka nkijitu mwanyike kabiji natemwa bingi kuba’mba nji na bintu byavula bingi byawama. Nkiji na bumi kabiji nji na luketekelo lwa bintu bya kulutwe. Nkebesha bingi kukekala mu paladisa mukabula nshiji ne “lufu.”​—Lumwekesho 21:3, 4.

[Mabulañano]

“Nafunjile kishinka kimo kyamfikile bingi pa muchima kya kuba’mba Lesa uji na jizhina”

[Kipikichila]

Amiwa ne bakazhi bami twisamba bingi na bakamaama Mambo a Lesa mu mulaka wabo wa kwingijisha maboko