Ja ba mbøsʼꞹji ne Biblia
Ja ba mbøsʼꞹji ne Biblia
¿JA BA chøtrʼꞹ sentido kja o vida dʼa nrrinxu ke me go supjre ma go tee? ¿Pje go mbøsʼꞹ dʼa rebelde político ngekʼua o jiɇzi ro chu̱u̱ ñe ro tsjaa dʼa ministro religioso? Ra nuji pje pɇzhebi.
“ Mi nee ro pɇskʼø amor ñe afecto” (E INNA LEZHNINA)
NU KJɆɆ MA O MUSꞸJI: 1981
NU JA MENZUMꞸ: A RUSIA
KʼO XI RI PA̱RA̱: ME GO SUPJRE MA MI TSʼIKʼE
KʼO O KJOGꞸZꞸ: Mi tata mi ngoʼobi, nrreze ma o muxkꞹgøji xo mi ngoʼogø. Me rmi mⱥkjø jesta ma rmi ɇnkʼø ñanto kjɇɇ, pe in tatagø ñe in nanagø o jyambꞹbikʼua. Zø me mi tsʼikʼegø, ro tendio pje bi kjogꞹ, ñe me go zichʼi i mꞹbʼꞹyo. Ma go divorciaobi, in tarazgø ñe i ninzhomꞹgø kʼꞹ ma nojo o ngejmebi a Troick, i nangø ñezgø ro mebʼe a Cheliabinsk. Ma o kjogꞹ kʼo paa mi nanagø nrro go chjꞹntꞹ. Mi jɇtata mi alcohólico ñe mi ɇzgøbʼe.
Kʼe kjɇɇ 1993, mi ninzhomꞹgø kʼꞹ ma nojo go tsjꞹntrʼꞹ kja nrreje. Me go supjre texe nu pjamilia. Mi nanagø o mbꞹrꞹ o zii na punkjꞹ alcohol xo o mbꞹrꞹ o dyɇzgø. Mi nee ro minkʼø na joo. Me mi negø, amor ñe afecto. Ro magø nrre nʼaño nitsjimi ngekʼua ro pɇskʼø consuelo, pe dya pje ro tøtrʼkʼønu.
JA BA MBØXKꞸGØ NE BIBLIA: Ma mi ɇnkʼø 13 kjɇɇ, nʼaja in dyojui kja colegio ke mi nge testigo e Jehová go mbɇchke janzi historias kʼo tʼøpjꞹ kja Biblia. Mi gustazꞹ yo historia e Noé ñe e Job, ke o sido o pɇpibi e Diosi zø me ma sʼɇzhi kʼo nrrumꞹ ke mi kjogꞹbi. Dya go mezhe ma ro pjꞹrꞹ ro xørꞹ ne Biblia ko yo Testigo ñe xo ro magø kja o reuniones.
Me na zøø texe kʼo ro pjechigø kja nu Jñaa e Diosi. Me go zichʼi i mꞹbʼꞹ ro pa̱rgø ke e Diosi pɇsʼi o trju̱u̱ (Salmo 83:18). Me ro kjentrogø ma ro pjechi ke ne Biblia go nⱥdʼⱥ na joo ja rgua minkʼøji kja “yo paa yo ya ri nguarꞹ” (2 Timoteo 3:1-5). Ñe me ro mⱥkjø ma ro pa̱rgø ke ra bʼꞹbʼꞹ dʼa resurrección kja ne xoñijomꞹ. Me na jokʼo, ¡søø ra janrragø na yeje in ninzhomꞹgø! (Juan 5:28, 29.)
Pe, yo dyaja dya mi mⱥji nzikjazgø. Mi nanagø ñe mi jɇtata mi ꞹmbꞹbi yo testigo e Jehová ñe pje nrre mi kjakøbi ngekʼo ro jɇzi ro xørꞹ ne Biblia. Pe me mi gustazgø kʼo rmi pjechigø ngekʼua dya mi kjapkʼø nguendayo.
Me ma sʼɇzhi ro sɇchʼigø kʼe oposición kja i pjamiliagø. Nukʼua xi bo kjogꞹ dʼa nrrumꞹ: mi ninzhomꞹgø kʼꞹ sʼɇbʼi, nu kʼꞹ mi pebʼɇ kja yo reunión yo mi kjaji yo testigo e Jehová, xo go tsjꞹntrʼꞹ kja nrreje. Pe yo Testigo dya go jiɇzgiji. Ko angezeji ro tøtrʼkʼø nu sʼiya ñe nu afecto ke me rmi jonkʼø. Ro unkʼø nguenda ke ngeji nu religión kꞹ na kjuana, ngekʼua kja kʼe kjɇɇ 1996 ro kjibʼi kja nrreje ñe ro kjagø testigo e Jehová.
JA BA MBØXKꞸGØ TEXEYO: Ya kjogꞹ ñanto kjɇɇ nrreze ma go chjꞹntrkʼø ko dʼa kjuarma ke ni chju̱u̱ Dmitry. Nzayebʼe ri pɇkjøbʼe kja nu sucursal ke pɇsʼiji yo testigo e Jehová a San Petersburgo. Yo padya, in jyotregø dya nrra nubi na ꞹꞹ yo ri creo.
¡Me ri mⱥjⱥgødya ke a ri pa̱rgø e Jehová! I vidagø pɇsʼi nʼa propósito kꞹ na kjuana na ngeje ri pɇpigø e Jehová.
“Mi kjatsjɇgø na punkjꞹ trʼønꞹ” (E RAUDEL RODRÍGUEZ RODRÍGUEZ)
NU KJɆɆ MA O MUSʼꞸJI: 1959
NU JA MENZUMꞸ: A CUBA
KʼO XI RI PA̱RA̱: MI NGEZGØ DʼA REBELDE POLÍTICO
KʼO O KJOGꞸZꞸ: O muxkꞹgøji a La Habana (Cuba) ñe ro tegø kja dʼa barrio pobre ja nkʼo me mi tsʼaji chu̱u̱. Ma mi trʼatrʼigø ro pjechigø yudo ñe nʼaño deportes de combate.
Me mi trjumbeñegø, ngekʼua in tatagø o animaozꞹbi ro magø kja universidad. Ma mi bʼꞹnkʼønu ro pjꞹrꞹ ro mbeñe ke ne sistema político kja in país pɇskʼi ro pøtꞹ ñe dyakja mi tʼekjañomꞹgø yo autoridades. Nʼa in dyojui ñezgø ro dyabʼꞹbʼe dʼa policía pa ro jꞹmbʼꞹbʼe o arma ngekʼua me ro kjapkʼøbʼe daño o ñiʼi. Nuʼma, ro øgøbʼe a pjørꞹ jesta ma ro zⱥsʼⱥ kʼe sentencia: ro fusilaozꞹbʼe. ¡A ro bʼɇzhi i zakꞹ ma kja mi ɇnkʼø 20 kjɇɇ!
Kja i celda kua mi bʼꞹntsjɇgo mi mbeñegø ja rgua kjapkʼø ma ro bʼꞹnkʼø a jmii kʼe pelotón de fusilamiento, na ngeje axi mi nee ke ro manji ke mi su̱gø. Pe xo mi kjatsjɇgø na punkjꞹ trʼønꞹ, nzakja pjenga bʼꞹbʼꞹ na punkjꞹ injusticia kja ne xoñijomꞹ o ma kjuarꞹ texe ma ri tu̱ji.
JA BA MBØXKꞸGØ NE BIBLIA: Ma o kjogꞹ yo paa o pøtꞹji nu sentencia, nudya ngextrjo ro øgøbʼe treinta kjɇɇ a pjørꞹ. Nukʼua ro pa̱rgø janzi testigo e Jehová ke bi ngotrʼꞹji a pjørꞹ na nge yo creencias religiosas ke mi pɇsʼiji. Me mi kjentrogø ma mi janrra ke dya mi su̱ji, ñe dya mi bʼɇzhiji nu calma. Mi injusto ke ro bʼꞹnjinu, pe dya mi mbekuɇji ni mi sjɇyaji.
Yo Testigo o jitsiji ke dʼa nu paa ra minji nzi ga nee e Diosi. Go jitsʼkøji kja ne Biblia ke ne Xoñijomꞹ ra mbɇzhi dʼa paraíso ja nkʼo dya ra bʼꞹbʼꞹ delitos ni injusticias, yo ntee ra ngeji perfectas ñe ra mbɇsʼiji kʼa oportunidad ra minjitexe yo paa (Salmo 37:29).
Mi gustazgø kʼo mi jitsiji, pe ja ma kjazgø dya mi jyɇkʼo nzikja angezeji. Mi kjijñigø ke dya mi søø ro pɇsʼigø neutralidad kja política o ro jɇzi ro nzhopkʼø kʼo na sʼoo kʼo ro tsjakøji, ngekʼua ro mbeñe xenrra na joo kꞹ ro xørꞹtsjɇ ne Biblia. Ma ro kjuarꞹ, ro tendio ke ngextrjo yo testigo e Jehová minji nzi ma mimiji yo otrʼꞹ cristiano.
Kʼo ro pjechi kja ne Biblia o mbøxkꞹgø ro tendio ke mi ñʼeje ro pøtꞹ na punkjꞹ. Mi jyodꞹ ro pøtꞹ ja ma ñagø, na ngeje mi mangø sʼojñaa. Xo pɇskʼi ro jɇzgø ne tabaco ñe dya ro kjichkʼø kja política. Me ma sʼɇzhi, pe e Jehová o mbøxkꞹgø, tsʼe tsʼe ro jɇzgøkʼo.
Ri kjꞹbʼꞹ i kuɇ pa dya tsʼi rga ꞹdʼꞹ. Nu padya, xi ri øtꞹgø e Diosi ke ra mbøxkꞹgø ngekʼua dya ra nrronkꞹgø ne nzhumꞹ. Nrre pjøxkꞹgøji yo versículos nzakja Proverbios 16:32, ke mama: “Nu bʼɇzo nu na joo ga nrrebʼe nrra na joo ke ri nge kʼꞹ na zɇzhi; nu kʼꞹ dya tsʼi ni ꞹdʼꞹ, nrra na joo ke na nge kʼꞹ ri to̱pꞹ nʼa jñiñi”.
Kja kʼe kjɇɇ 1991 zø xe mi bʼꞹnkʼø a pjørꞹ ro kjibʼigø a nrreje nzakja dʼa testigo e Jehová kja nʼa barril ke mi nizhi nrreje. Ma o kjogꞹ dʼa kjɇɇ, janzijme ro ñʼepkøjme libre ñe go nrrⱥkøjme a España, na ngeje mi pɇskʼøjme janzi parientenu. Nrreze ma ro sⱥtrkʼønu, ro pjꞹrꞹ ro magø kja yo reuniones ke mi kjaji yo testigo e Jehová, angezeji o recibiozꞹji nzakja ke a mi pa̱ka̱gøji por na punkjꞹ kjɇɇ ñe o mbøxkꞹgøji ngekʼua søø ro minkʼø na joo.
JA BA MBØXKꞸGØ TEXEYO: Me ri mⱥkjødya ñe ri pɇpkʼø e Diosi ko in sugø ñe yo yee in chʼijuegø. Ri usagø na punkjꞹ tiempo ngekʼua ra jichkʼø yo tee yo mama ne Biblia, ngeje dʼa privilegio. Bʼꞹbʼꞹ ma ri mbeñegø, kʼo ro kjøgꞹ mi jingua, ma ri mbekʼø ke a ro tu̱gø ma mi trʼatrʼi ri ungø pøjø e Diosi ke dya o kjogꞹkʼo ñe o mbøxkꞹgø ro pøtꞹ i zakꞹ. Dya ngextrjo ri pɇsʼi vida, xo ri pɇsʼi dʼa esperanza. Me ri negø ke ra cumple ne promesa ke nⱥdʼⱥ ne Paraíso, ñe ke ra sⱥjⱥ kʼo paa ma ra bʼꞹbʼꞹ justicia ñe “dyakja kjo ra nrru̱u̱” (Revelación [Apocalipsis] 21:3, 4).
[Yo jñaa]
“Me go zichʼi i mꞹbʼꞹ ro pa̱rgø ke e Diosi pɇsʼi o trju̱u̱”
[Yo jñaa]
Mi xiragø ñezgø me ri mⱥkjøbʼe ri jichkʼøbʼe yo ngoʼogo yo mama ne Biblia