Biblia okinpatili innemilis

¿TLEN okipaleui se ichpochtli mayolpaki maski sapanoua otlajyoui ijkuak okatka takotsin? ¿Tlen okipaleui se tlakatl akin omokajkalakiaya itech política uan sapanoua okualaniaya mamoyolseui? Matikitakan tlen kijtouaj.

“Oniknekiaya manechtlasojtlakan” (INNA LEZHNINA)

ONESKI ITECH XIUITL: 1981

UEYI ALTEPETL: RUSIA

OKSEKI TLAMANTLI: AMO OYOLPAKIAYA IJKUAK OKATKA TAKOTSIN

TLEN ONIKCHIUAYA: Notatajuan amo otlakakiayaj uan ne noijki ijkon onineski. Ijkuak onikpiaya chikuase xiuitl kuali otikatkaj pero satepan notatajuan omokajkajkej. Maski onikatka nitakotsin onikajsikamatiaya tlen opanouaya uan non sapanoua onechyolkoko. Notajtsin uan nokni omokajkej altepetl Troick uan ne iuan nonantsin otiajkej Cheliabinsk. Satepan nonantsin oksepa omonamikti uan inamik otlauanaya uan nochipa otechtlajyouiltiaya.

Itech xiuitl 1993, nokni tlen achto oneski omikik ijtik atl uan non sapanoua otechyolkoko. Nonantsin noijki opejki tlauana uan onechtlajyouiltiaya. Oniknekiaya niyolpakis uan manechtlasojtlakan, ik non, oniaya itech okseki religiones pero amikaj onechyolseui.

BIBLIA OKIPATLAK NONEMILIS: Ijkuak onikpiaya 13 xiuitl, se iTlaixpantijka Jehová tlen iuan onimomachtiaya onechtlapoui seki tlamantli. Onechpaktiaya nikkakis ken Noé uan Job okiueyichijkej toTajtsin Dios maski otlajyouijkej. Opejki nimomachtia inmiuan iTlaixpantijkauan Jehová uan inmiuan nimonechikoua.

Ijkuak onimomachti tlen kijtoua Biblia miak tlamantli onechpakti, ken ijkuak onikmatki toTajtsin Dios kipia itoka (Salmo 83:18). Onechtlajtlachialti ken Biblia yokijtojka ken miakej kipiaskiaj inyelis itlamian tonalmej (2 Timoteo 3:1-5). Oniyolpakik ijkuak onikmatki miakej kinyolitiskej porque uelis oksepa nikitas nokni (Juan 5:28, 29).

Ijkuak opejki nimomachtia Biblia amo nochtin okinpakti. Nonantsin uan inamik amo okinekiayaj manimomachti inmiuan iTlaixpantijkauan Jehová uan onechiluiayaj ayakmo ijkon manikchiua. Pero amo ijkon onikchi porque onechpaktiaya tlen onimomachtiaya itech Biblia.

Onechyolkoko tlen nofamilia onechiuiliaya. Nokni tlen xokoyotl nouan oyaya nechikolmej pero satepan noijki omikik ijtik atl. ITlaixpantijkauan Jehová sapanoua onechpaleuijkej. Oniknekiaya manechtlasojtlakan uan yejuan ijkon okichijkej. Onikajsik tlen melauak, ik non, itech xiuitl 1996 onimoapolakti uan opejki niktekichiuilia Jehová.

TLATEOCHIUALISTLI TLEN YONIKSELI: Yikipia chikuase xiuitl onimonamikti iuan Dmitry. Titlapaleuiaj Betel tlen kajki San Petersburgo. Niktekichiuilia Jehová uan notatajuan ayakmo itlaj nechiluiaj.

¡Niktlasojkamatilia Jehová porque ijkuak onikixmatki opejki niyolpaki!

“Oniknekiaya nikmatis miak tlamantli” (RAUDEL RODRÍGUEZ RODRÍGUEZ)

ONESKI ITECH XIUITL: 1959

UEYI ALTEPETL: CUBA

OKSEKI TLAMANTLI: OMOKAJKALAKIAYA ITECH POLÍTICA

TLEN ONIKCHIUAYA: Onineski ompa La Habana (Cuba), kanin onichantiaya nochipa omokualaniayaj uan omoteuiayaj. Ijkuak onikatka nitelpochtli onechpaktiaya yudo uan okseki tlamantli kanin moteuiaj.

Notatajuan onechiluijkej manimomachti universidad porque onechpaktiaya nimomachtis. Ompa opejki nikneltoka omonekiaya kinpatlaskej tekiuajkej, ik non, ayakmo onikintlakamatiaya. Ne uan akin iuan onimomachtiaya, otikkixtilijkej ipistola se policía uan otikkojkojkej itech itsonteko. Ik non, otechtsakej uan otechiluijkej techmiktiskiaj, ¡San onikpiaya 20 xiuitl ijkuak ijkon opanok!

Ijkuak onitsaktoka onimokuayejyekouaya tlen nikchiuaskia ijkuak nechmiktiskiaj, amo oniknekiaya makitakan onimomojtiaya. Pero noijki onimotlajtlaniaya, ¿tleka miakej kinchiuiliaj tlen amo kuali uan tlen techpanos satepan?

BIBLIA OKIPATLAK NONEMILIS: Satepan okijtojkej ayakmo techmiktiskiaj pero omonekiaya titsaktoskiaj 30 xiuitl. Ijkuakon onikinmixmatki sekimej iTlaixpantijkauan Jehová, yejuan okintsakej porque okse tlamantli okineltokayaj. Nochipa onikitaya okatkaj yolchikauakej uan amo okualaniayaj. Maski amitlaj okichijkej okintsakej pero amo san omoyolkokojtokaj.

ITlaixpantijkauan Jehová onechmachtijkej toTajtsin Dios kineki kuali matiyetokan. Ika Biblia onechititijkej tlaltikpak mokopas se xochitlali kanin ayakmo kichiuaskej tlen amo kuali, akinmej yolkualmej uelis nochipa ompa chantiskej (Salmo 37:29).

Onechpaktiaya tlen onimomachtiaya pero amo onikchiuaya ken yejuan. Onimokuayejyekouaya amo uelis nikkauaskia política nion nikinkauiliskia oksekimej itlaj manechchiuilikan, ik non, noselti opejki niktlajtoltia Biblia. Ijkuak otlanki oniktlajtolti, onikasijkamatki san iTlaixpantijkauan Jehová kichiuaj ken akinmej opejkej kichiuaj ken Cristo.

Ijkuak onimomachtiaya Biblia onikitak omonekiaya nikpatlas nonemilis. Nochipa onitlauijuikaltiaya, ik non, omonekiaya nikpatlas ken onitlajtouaya. Noijki omonekiaya ayakmo nitlachichinas uan ayakmo nimokajkalakis itech política. Onikitaya oui pero Jehová onechpaleui uan satepan ijkon onikchi.

Ok nikita oui amo san niman nikualanis, ik non, nochipa nikiluia toTajtsin Dios manechpaleui. Nechpaleuia tlen kijtoua Proverbios 16:32, ompa kijtoua: “Akin amo san niman kualani okachi kuali amo ken se tlakatl tlen kipia miak chikaualistli; uan akin moyolseuia, okachi kuali amo ken akin kimoaxkatia se altepetl”.

Itech xiuitl 1991 onimochi niiTlaixpantijka Jehová, Onimoapolakti kanin onitsaktoka itech se barril tlen okipiaya atl. Se xiuitl satepan, ne uan oksekimej otechkajkajkej uan otechtitlankej España porque ompa okatkaj tofamiliares. Ijkuak ompa oniajsito, opejki nimonechikoua inmiuan iTlaixpantijkauan Jehová, yejuan kuali onechselijkej yetoskia ken yiuejkika onechixmatiayaj uan onechpaleuijkej manikpatla nonemilis.

TLATEOCHIUALISTLI TLEN YONIKSELI: Axkan niyolpaki uan iuan nofamilia tiktekichiuiliaj toTajtsin Dios. Nikinmachtia oksekimej tlen melauak tlamachtia Biblia. Ualeua nikilnamiki tlen onechpanok ijkuak yinechmiktiskiaj uan nimotlasojkamati porque axkan kuali nimomachilia. Axkan nikmati tlen panos, nikneki nikitas tlaltikpak mochiuas se xochitlali ijkuak nochtin kinchiuiliskej tlen kuali uan “ayakmó yetos mikílistli” (Apocalipsis 21:3, 4).

[Tlen moijtoua]

“Onechpakti nikmatis toTajtsin Dios kipia itoka”

[Foto]

Ne uan nonamik techpaktia tikinmachtiskej tlen kijtoua Biblia akinmej amo tlakakij