Ngbangɔ ndo gbianyangbi dungɔ lɛ ngɛ̃́

Ngasia la palanga kɔi ti wali mɛndó ando hɛ̃ lo pɛnɛ na ngoi mɛndó lo dɛ nyingambi atindó na dungɔ lɛ ngɛ̃́ mɛ na tina nɛ? Ye mɛndó to zo kɔi ti politikɛ mɛndó wa zaga ya lo ti wakwa tɛ Nzapa nɛ? Di apandɛ mɛ ti nɛngɔ ya mɔ lua gbinya ti ahũnda olo mɛ.

“Mbi ndo gindó ndo mɛ alengbi ti fangɔ songo tɛrɛ mbi na nzɔ̃ bɛ.”​—INNA LEZHNINA

ADŨNDÓ LO NA BULU TI: 1981

KA KƆDƆRƆ TI: RUSSIE

DUNGƆ LƐ NGƐ̃́ TƐ LO TI GÃ: AHƐ̃NDÓ LO PƐNƆ GBA NA NGOI MƐNDÓ LO DƐ NYINGAMBI

SE MƐNDÓ MBI DA GÃ: Adũndó mbi bubulu wa awa dũngɔ mbi ngandó abubulu. Bulu mana ti uzu ti ya dungɔ lɛ ngɛ̃́ tɛ mbi adundó nzɔ̃ni nvɛ̃ni. Na gesi awa dũngɔ mbi hondó libala. Abɛse du ya, mbi dɛndó nyingambi yakere ko, mbi hĩngandó ya hongɔ libala adu siɔni wa ni hɛ̃ ngandó mbi pɛnɔ gba ge bɛ mbi. Na pɛ hongɔ libala ko, to mbi na to gbia mbi ti kɔli angbandó ka gbata ti Troitsk; wa ta mbi mundó mbi e diri ka Chelyabinsk. Na gesi mama dirindó du na kɔli mɛndɛ̃, lo ndo nyɔndó samba ɔ nyɔ kpɔ̃ni wa ngoi gba lo ndo sɔndó mbi na mama.

Na bulu ti 1993 to gbia mbi kpindó kaya ngu. kpengba lo niko hɛ̃ndó azi ti ndasewa tɛ e zu pɛnɔ. Mama tɛ mbi bandandó nyɔngɔ samba gba ti nɛngɔ ya ta ni du na sɔngɔ bɛ ma, wa lo banda ngandó hɛ̃ngɔ mbi pɛnɔ nga ma se mɛndó kɔ lo ndo li na ni tɛrɛ mbi. Mbi bandandó gingɔ se mɛ mbi lengbi ti singɔ ka gbɛ mbɛ niko. Mbi ndo gindó ndo mɛ alengbi ti fangɔ songo tɛrɛ mbi nga na nzɔ̃ bɛ. Mbi bandandó gwengɔ sambela ndɛ̃ ndɛ̃ ndɛ̃ ti nɛngɔ ya asa ngunu bɛ mbi kanda ta sambela kɔi mɛndó sa ngunu bɛ mbi da ma.

SE MƐNDÓ NGBANGƆ GBINYANGBI NA DUNGƆ LƐ NGƐ̃́ TƐ MBI: Na ngoi mɛndó mbi ti na bulu 13 ko, kwa mbi kɔi ti kalasi mɛndó Tɛmwɛ tɛ Yehova kambisandó hɛ̃ mbi ambanga pandɛ ti ya Ngbangɔ. Mbi sepalandó mandangɔ pandɛ tɛ azi nga mabere Noa na Yobo, mɛndó ala li kwa hɛ̃ Nzapa abɛse du ya ala tengbindó na kpengba kpale. Ta ningandó ma Atɛmwɛ tɛ Yehova bandandó mandangɔ mbi na Ngbangɔ, wa mbi banda ngandó gwengɔ bombi.

Mandangɔ Ngbangɔ zandó mbi ya mbi hĩnga ye ti nzɔ̃ni gba. Hĩngangɔ ya Nzapa na ila, a gbɔ̃ndó bɛ mbi nvɛ̃ni. (Nzembo 83:18) Mbi kamwandó na ndenge mɛ Ngbangɔ tɛnɛ tɛnɛ na lo ti aye mɛ na lingɔ tɛrɛ lo yangondo na “ndangba bí.” (2 Timɔte 3:1-5 NWT) Mbi mandó dengɔ bɛ gba na ngoi mɛndó mbi manda ya azi mɛ kpili na songɔ. Mbi tindó na dangɔ bɛ ya​—mbi na diringɔ hũngɔ to gbia mbi fãni mɛndɛ̃!​—Yoanɛ 5:28, 29.

Kanda bo mbi kɔi ndó la mbi hĩnga akpale niko ti nzɔ̃ni. Ta mama tɛ mbi na kɔ lo ndo yendó Atɛmwɛ tɛ Yehova ma. Ala ndo kpãndó ngala mbi ndozu ya mbi zia mandangɔ Ngbangɔ. Kanda mbi kɛ̃ndó ziangɔ ni na lo mɛ ya mbi ndo sepalandó na aye mɛndó mbi ndo manda.

Ta dundó woni ya mbi nwɔ̃ kpengba lo mɛndó ndo lo ka tɛ azi ti ndasewa tɛ mbi ma. Mbi mandó pɛnɔ nvɛ̃ni na ngoi mɛ ngambi mbi mɛndó e na lo e ndo gwe bombi tɛ Atɛmwɛ tɛ Yehova di kpi ngandó kaya ngu. Kanda ta Atɛmwɛ tɛ Yehova ziandó mbi na bɛ mbi ma. Mbi hũndó songo nga na nzɔ̃ bɛ mɛndó mbi ya gingɔ ni gã na ya dungɔ lɛ ngɛ̃́ tɛ mbi ka tɛ la. Mbi hũndó ya bo sambela tɛ Atɛmwɛ tɛ Yehova la du sambela ti mbilimbili. Na bulu ti 1996, mbi mundó batisimɔ wa mbi ti ngandó Tɛmwɛ tɛ Yehova.

ANZƆ̃ SULU MƐ MBI LUA: Ali ndɛ bulu mana bandandó la mbi na Dmitry e li libala, lo du kɔli kɔi mɛ nzɔ̃ zo nvɛ̃ni. Mbi na lo e ndo li kwa ndoni kɔi ka biro tɛ Atɛmwɛ tɛ Yehova ka gbata ti Saint. Petersburg. Na gesi, ta awa dũngɔ mbi di dɛndó kɛ̃ hangɔ lo ti sambela tɛ mbi ma.

Mbi ndo ma dengɔ bɛ nvɛ̃ni na ndenge mɛndó mbi hĩnga Yehova! Lingɔ kwa hɛ̃ lo li ya dungɔ lɛ ngɛ̃́ tɛ mbi ti na tina.

“Mbi ndó na ahũnda gba mɛndó mbi ndo gi gbinya ni.”​—RAUDEL RODRÍGUEZ RODRÍGUEZ

Adũndó lo na bulu ti: 1959

Ka kɔdɔrɔ ti: CUBA

Dungɔ lɛ ngɛ̃́ tɛ lo ti gã: ZO TI POLITIKƐ MƐNDÓ NDO TƆMBƆGƆ

SE MƐNDÓ MBI DA GÃ: Adundó mbi ka Havane, kɔdɔrɔ gbia ti Cuba, wa mbi maindó ka kartie kɔi tɛ awa yɛlɛ mɛndó azi ndo ye tiringɔ to gba ka talege. Ngoi mɛndó mbi ndo mai ko, mbi ndo sepalandó na wele ti judo nga na awele mɛndɛ̃ ti to.

Mbi ndó na kɔdɛ gba ka kalasi, ni la awa dũngɔ mbi ndo pandó hɛ̃ mbi ya mbi li inivɛrsite. Ngoi mɛndó mbi li inivɛrsite ko, mbi bandandó hũngɔ ya ayɔ ya akpale ti politikɛ ti kɔdɔrɔ tɛ e agbinyangbi. Mbi mundó ekateli ti tɔmbɔgɔngɔ. Mbi na kwa mbi ti kalasi e gbangbindó tɛrɛ e na gbia tɛ apolisi kɔi ti nɛngɔ ya e kpata ngombe ti lo. Na ngoi ti gbangbingɔ tɛrɛ niko ndó ko, gbia tɛ apolisi hɔ̃ndó kã gba ka li lo. Na lo ni la, abindó e ka bɔlɔkɔ wa ahɛ̃ndó e tumbu ti kwá. Mbi bondó na bulu 20, abɛse ngaso ko, dungɔ lɛ ngɛ̃́ tɛ mbi atindó na ya kwá!

Ngoi mɛndó mbi ka bɔlɔkɔ ko, mbi ndo mandandó ye mɛ mbi na lingɔ ka gbɛ lɛ asoda uzu ti nɛngɔ ya ala ho mbi. Ta mbi yendó ya ala hĩnga ya mbi ndo ma mbɛtɔ ma. Kanda na ngoi niko ndó ko, mbi ndó na ahũnda gba mɛndó mbi ndo gi gbinya ni. Mbi ndo hũndandó ndo ya: ‘Nda mɛ zangangɔ mbilimbili sĩ ge lɛ gigi so nɛ? Kɔtɛ dungɔ lɛ ngɛ̃́ bo lo mɛ?’

SE MƐNDÓ NGBANGƆ GBINYANGBI NA DUNGƆ LƐ NGƐ̃́ TƐ MBI: Ala hãndó tumbu ti kwá mɛndó a hɛ̃ e azi, wa na selɛni ala hɛ̃ndó e tumbu ti bulu 30 ka bɔlɔkɔ. Bo na ngoi niko ndó ko, mbi tengbindó na Atɛmwɛ tɛ Yehova mɛndɛ̃ mɛndó abi ala ka bɔlɔkɔ na lo ti sambela tɛ la. Mimi bɛ nga na siriri mɛndó Atɛmwɛ tɛ Yehova na ni ko, akamwisandó mbi gba. Abɛse du ya abindó la ka bɔlɔkɔ sãngasãnga ko, ta ala gbendó ngɔnzɔ bere ala tɔmbɔgɔndó ma.

Atɛmwɛ tɛ Yehova niko ahandó na mbi ya Nzapa na nzɔ̃ dangɔ bɛ na lo tɛ azi. Ala fandó na mbi kaya Ngbangɔ ya Nzapa na lingɔ ya sese ti Paradizo, wa ta mobulu nga na zangangɔ mbilimbili na dungɔ da ma. Ala handó na mbi ya lɛ sese na sĩngɔ na anzɔ̃ azi, wa ala na luangɔ dungɔ lɛ ngɛ̃́ ti nzɔ̃ni nga ti bwai na bwai.​—Nzembo 37:29.

Mbi ndo sepalandó gba na aye mɛ Atɛmwɛ tɛ Yehova ndo ha na mbi, kanda seliye tɛ mbi aɔngbindó madãma na tɛ la. Mbi ndo hũndó ya ta mbi na kokangɔ kɛ̃ngɔ lingɔ ya kpale ti politikɛ bere ziangɔ ya zo mɛndɛ̃ hũ mbi kpua ma. Na lo ni la mbi mũndó ekatɛli ti dingɔ Ngbangɔ mbi nvɛ̃ni. Na ngoi mɛndó mbi onzi dingɔ Ngbangɔ zu ko, mbi hũndó ya bo Atɛmwɛ tɛ Yehova la ndo landa selɛlo tɛ awakristo ti siɛklɛ ti uzu.

Na pɛ mandangɔ Ngbangɔ, mbi hũndó ya ayɔ ya mbi zia aye mɛndɛ̃ mɛndó mbi ndo li. Na ndakisa, ayɔndó ya mbi gbinyangbi sɛ tɛ mbi ti tɛnɛngɔ na tɛnɛ, na lo mɛ ya mbi mɛsɛnɛndó tɛnɛngɔ siɔ tɛnɛ. Ayɔ ngandó ya mbi zia nyɔngɔ manga. Wa adi yɔ ngandó ya mbi kɛ̃ yɔrɔngɔ tɛrɛ mbi na ya alo ti politikɛ. Ta adundó woni ya mbi zia aye niko ma, kanda Yehova zandó mbi wa mbi bandandó ziangɔ ni yɛkɛ yɛkɛ.

Ye kɔi mɛ ta ndo dundó woni ziangɔ ni ma adu gbengɔ bɛ mbi na ndo aye mɛ alengbi ti hɛ̃ngɔ mbi ngɔnzɔ. Tee ndɛ mbi ndo li sambela hɛ̃ Nzapa ya lo za mbi ti nɛngɔ ya mbi gbe bɛ mbi na ya akpale ti ngaso. Avɛrsɛ ti ya Ngbangɔ ngama Masese 16:32 azandó mbi gba. Ni tɛnɛ ya: “Zo ko la ta lo ndo ma ngɔnzɔ iɔ ma ko, lo du nzɔ̃ni ɔngɔ wa ngunu, wa zo ko la ta lo ndo zi lége ya ngɔnzɔ ko ndo lo ma ko, lo du nzɔ̃ni ɔngɔ zo mɛ mu gbata.”

Mbi mundó batisimɔ wa mbi ti ngandó Tɛmwɛ tɛ Yehova na bulu ti 1991. Mbi mundó batisimɔ kaya tuku kɔi mɛndó ka bɔlɔkɔ. Bulu kɔi na gesi asindó na mbi na akwa mbi mɛndɛ̃ ka bɔlɔkɔ, wa atondó e ka Espagne na lo mɛ ya ayata e ndo dundó kai. Na ngoi mɛndó mbi si ka Espagne ko, mbi bandandó gwengɔ bombi tɛ Atɛmwɛ tɛ Yehova. Na ngoi mɛndó mbi si kai ko, Atɛmwɛ tɛ Yehova ayambandó mbi mabere mbi ndó kai na ala gã, wa ala zandó mbi ya mbi banda dungɔ lɛ ngɛ̃́ tɛ mbi ti fãnani kai.

ANZƆ̃ SULU MƐ MBI LUA: Mbi ti zo ti dengɔ bɛ, wa mbi ndo vɔrɔ Nzapa ndoni kɔi na ya mbi nga na ayati e sɛ ti wali. Mbi na nzɔ̃ tangɔ ligɛrɛ ti hɛ̃ngɔ ngoi tɛ mbi gba ti zangɔ azi ya ala manda Ngbangɔ. Ngoi mɛndɛ̃, mbi ndo dandó bɛ mbi na se mɛ mbi lengbi ti kpingɔ na ngoi mɛndó mbi dɛ nyingambi, kanda mbi ndo ma dengɔ bɛ gba na lo ti nzɔ̃ lo mɛndó mbi lua bandangɔ na ngoi niko tee dɛ. Mbi na olo na dungɔ lɛ ngɛ̃́, wa mbi nga na nzɔ̃ dangɔ bɛ. Mbi ndo kũ na bɛ mbi kɔi Paradizo mɛ Nzapa ko kapa ni na ngoi mɛ mbilimbili na dungɔ da nvɛ̃ni “ta azi ti kpili gbanda ma.”​—Suma 21:3, 4.

[Tɛnɛ ti koko mbeti na ndo pajɛ 19]

“Hĩngangɔ ya Nzapa na ila a gbɔ̃ndó bɛ mbi nvɛ̃ni”

 [Limɔ ti pajɛ 20]

Mbi na kɔ mbi na dengɔ bɛ ti fangɔ na abubulu avideo mɛ asi na ni na lo tɛ la