Ombimbiliya Ipilulula Omwenyo Wovanthu

OMUHIKWENA umwe watekulilwe onya, pahe ukahi nawa una ehambu. Omukwendye umwe ankho wahahande ovatumini, pahe omunthu omuwa, uundapela Huku. Onthele ei ipopia etyi tyevekwatesako.

“Ankho Nahanda-vo Ñgeno Ndyivasa Ovanthu Venthyole.” — INNA LEZHNINA

ENIMA ATYITWA: 1981

OTYILONGO ATYITILWA: RUSSIA

EHIPULULO: WATEKULILWE ONYA

OMWENYO WANGE KOHALE: Ovo tate na mee onompholo, na ame natyitwa ndyimpholo. Potete meumbo ankho tukahi umwe nawa, mahi ovo tate avelihenge etyi ndyina omanima epandu. Nkhele ankho ndyimututu vala, mahi otyipuka tyina tyandyihamene unene. Onthwe na mee atuiluka meumbo atukakala ko Chelyabinsk, ovo tate nomukulu wange avesala meumbo. Etyi pakala mee anepwa vali, mahi omulume watyo ankho onkholwa. Tyina amanu tuvetelwa vala kumwe na mee.

Mo 1993 akumoneka otyipuka tyimwe tyetuihamene unene atuho mombunga yetu: omukulu wange ankhila momeva. Me atyimuihama unene, nae pahe ahimbika vala okunwa unene, nokunthekula onya. Otyipuka tyina pahe ankho hetyihandele vali, ankho nahanda-vo ñgeno ndyivasa ovanthu venthyole. Pahe ankho ndyiti vala andyiende mokapela aka, andyiende mokapela aka, mahi nii vala ankho tyitupu-ale.

OÑGENI OMBIMBILIYA YAPILULULA OMWENYO WANGE:Pwetyi ndyina omanima 13, omukainthu umwe Ombangi ya Siovaa ankho tulongeswa nae kosikola amphopila vimwe vili mo Mbimbiliya. Etyi amphopila ovanthu vamwe, ovo Nowe, na Sombe vafendele Huku naapa ankho vena ovitateka, andyihambukwa unene. Na ame pahe andyihimbika okulilongesa Ombimbiliya, nokuenda komaliongiyo.

Okulilongesa Ombimbiliya tyankhuatesako andyinoñgonoka ovipuka ovinyingi ankho nehei. Netyimona okuti Huku naina una umwe enyina liae mwene atumbulwa. (Salmo 83:18) Etyi netyimona okuti ovipuka evi tuli nokumona mononthiki mbetu Ombimbiliya yevipopia-le kohale, andyihuvu. (2 Timotiu 3:1-5) Otyipuka tyimwe tyanthyambukisilwe umwe unene, okuanoñgonoka okuti vokuankhia mavakatutiliswa. Nahambukilwe umwe unene mokonda matukelivasa vali nomukulu wange. — Suau 5:28, 29.

Mee nomulume wae ankho kavahande Onombangi. Avati ngaliti pano una okuyekapo okulilongesa, ame anehetavela. Ovipuka ankho ndyili nokulilongesa oviwa unene!

Okukalela vala okupopilwa uyekepo okulilongesa ankho katyapepukile. Mahi pahe atutokelwa vali notyitateka otyikwavo: omphange yange ankho ulandula ku ame, nae ankhila ñgoo momaande. Mahi Onombangi mba Siovaa avamphameka unene! Andyivasi umwe etyi ankho ndyili nokuovola: ovanthu venthyole, nelongeso liotyotyili. Andyimbatisalwa mo 1996.

OUWA PATYI NAPOLA-KO: Katutu-katutu ovo tate avahankhuluminya vali ndyiyekepo okulilongesa. Pahe nanepwa, omulume wange utiwa o Dmitry. Omulume wange ukahi nawa, omunthu omuwa, tuundapa mondyuo imwe Yonombangi itiwa o Mbetele. Ndyipandula umwe unene Siovaa etyi andongesa otyili. Pahe ndyikahi nawa, ndyina ehambu.

Ndyipandula umwe unene Siovaa etyi andongesa otyili. Pahe ndyikahi nawa, ndyina ehambu.

“Ankho Ndyilipula Ovipuka Ovinyingi.” — RAUDEL RODRÍGUEZ RODRÍGUEZ

ENIMA ATYITWA: 1959

OTYILONGO ATYITILWA: KUBA

EHIPULULO: ANKHO KAHANDE OVATUMINI

OMWENYO WANGE KOHALE: Natyitilwa ko Kuba mepunda-umbo lyo Havana. Mokonda apa ankho tukala paluwa unene na ame andyililongesa okulwa.

Ame mokonda ankho naneñgena omutwe ovo tate ankho vahanda ndyitange unene. Kosikola oko, andyityimono okuti naina ovatumini valinga ovanthu onya. Andyilipe-vo okuviukisa ovipuka. Nthiki imwe atyiti umwe na ame na umwe ankho tulongeswa nae, atulwisi opulisa, ankho tuahanda okumupola outa wae. Atumuvete unene, atukwatwa, atyitiwa matuipwa. Sokako ankho ndyina vala omanima 20 atyitiwa mandyiipawa!

Mokaleya oko napakwa andyike, ankho ndyisoka unene etyi mandyilingi tyina nameya poola yokuipawa. Ankho hihande ovanthu vetyimone okuti natila owoma. Mahi tupu otyo ankho ndyilipula vala ovipuka ovinyingi. Pamwe ankho ndyilipula okuti: ‘Oityi ovanthu vamonena emone? Kouye tweya okulingako-tyi?’

OÑGENI OMBIMBILIYA YAPILULULA OMWENYO WANGE: Etyi pakala atyitiwa kamatuipawa vali, mokaleya matukala-mo vala omanima 30. Opo, opo yatyo twelivasa Nonombangi mba Siovaa. Navo ankho veli mokaleya mahi ngwe ankho vetupu etyi valinga. Tyina ankho uvetala ñgaa, vahambukwa nawa, vekahi nawa, kuti-ale vakwatwa onya.

Onombangi mba Siovaa avandongesa okuti Huku mwene una etyi atungila ovanthu, avamphopila okuti Huku makamanako ononkhumbi. Avandongesa vali okuti apa katutu ouye mauviuku, aukala umwe ngetyi Huku euhandelele potete. — Salmo 37:29.

Etyi ankho veli nokundongesa ankho ndyityihole umwe, mahi pahe omokonda ovipuka ankho valinga, kavielifwile neevi ndyilinga. Ku ame ngoti ankho himetyivili-ale okutala ñgaa ovatumini valinga onya ovanthu otyo nehelipake-po. Etyi natanga Ombimbiliya aiho, andyityimono umwe okuti Onombangi mba Siovaa, ovo vala vahetekela umwe nawa Ovakilisitau vo tete.

Pana ankho ndyisipa, ndyitukana ovanthu, ndyiyele ovatumini. Mahi Onombangi mba Siovaa avandongesa okuti ovipuka ovio Huku uviyele, ndyina okuviyekapo. Okuviyekapo tyepwiyile unene, mahi Siovaa ankhuatesako umwe andyityivili.

Otyipuka tyimwe tyemphuiyile umwe unene okutyiyekapo, okunumana unene. Na hono nkhele ndyilikuambela Siovaa ankhuateseko. Omukanda umwe uhole okunkhuatesako, o wa Provérbios 16:32 wokuati: “Una wahanumana liwa hahe vali komulume wononkhono, wokulikondola omutima hahe vali tyipona una uteya-po epunda-umbo.”

Mo 1991 andyimbatisalelwa mokayela. Menima lialandula-ko, atuyovoka-mo mokaleya, atutumwa kotyilongo tyo Espanya ankho kuna vetu. Etyi twehika oko andyihimbika okuenda komaliongiyo. Onombangi vo oko avanthambula nawa, avankhuatesako, uti vala hamwe ankho tulii-ale.

OUWA PATYI NAPOLA-KO: Pahe nanepa, ndyina ovana vange, ndyikahi nawa, ndyifenda Huku, ndyilongesa vakuetu Ombimbiliya. Tyina ndyisoka umwe okuti ñgeno nankhia-le kohale, ndyipandula umwe unene Siovaa Huku. Pahe nati umwe, ame ndyina omwenyo, ame ndyina ehambu mokonda ndyityii okuti apa katutu matukakala mouye omupe mwahamakakala vali ononkhia, novanthu valinga onya vakuavo.

[Onondaka Mbavilapo]

“Nahambukilwe unene etyi nanoñgonoka okuti Huku una enyina”

[Olutalatu]

Ame nomulume wange tutyihole unene tyokulongesa onompholo Ombimbiliya