De Schreft haft äa Läwen veendat

WOO haft eene junge Fru, waut eene schwoare Kjintheit haud, een scheenet Läwen jefungen? Woo kjeem daut, daut een grausoma Jung aunfunk, de goode Norecht to prädjen? Daut kaust du die hia noläsen.

“Ekj socht opp iernst no Leew un Metjefeel” (INNA LEZHNINA)

WANEA JEBUAREN: 1981

VON WOON LAUNT: RUSSLAUNT

WAUT EKJ EA WIA: EKJ HAUD EENE SCHWOARE KJINTHEIT

MIENE VEGONENHEIT: Ekj wort doof jebuaren un miene Elren wieren uk doof. En miene ieeschte sas Joa jinkj mie daut scheen. Oba dan leeten miene Elren sikj scheeden. Wan ekj uk noch ernoa junk wia, kunn ekj daut oba aul bejriepen, waut de Scheedunk wia, un mie jinkj daut sea schlajcht. Aus dee sikj ieescht hauden scheeden loten, trock miene Mame no Tscheljabinsk un neem mie met ar met. Oba mien Voda un mien elra Brooda bleewen en Troizk. Met de Tiet befried miene Mame sikj fresch. Mien Steefvoda wia een Supa un vekjield miene Mame un mie foaken.

Aune 1993 vedrunk mien leewa elra Brooda. Wäajen dit Ojjlekj wia miene Famielje sea vebleft un dee haud doa nich met jeräakjent. Un dan funk miene Mame aun to drinkjen. Un no daut wort ekj dan von mienen Steefvoda un miene Mame beid schlajcht behaundelt. Ekj socht no een bätret Läwen; ekj socht opp iernst no Leew un Metjefeel. Ekj funk aun, veschiedne Kjoakjen to proowen, wiels ekj wull Troost haben, oba ekj funk dän nich.

WOO MIEN LÄWEN SIKJ DERCH DE SCHREFT JEENDAT HAFT: Aus ekj 13 Joa wia, vetald een Schoolpoatna mie Jeschichten von de Bibel. See wia eent von Jehova siene Zeijen. Ekj jleicht daut, wan ekj kunn von Menschen lieren, waut Gott uk en schwoare Tieden jedeent hauden, soo aus Noah un Hiob. Daut dieed goanich lang, dan studieed ekj met Jehova siene Zeijen toop de Bibel un wankt no dee äare Toopkomes.

Aus ekj de Bibel studieed, lieed ekj de Woarheit äwa veschiedne Sachen kjanen, waut ekj sea jleicht. Mie jinkj daut to Hoaten, aus ekj lieed, daut Gott eenen Nomen haud (Psalm 83:18, NW). Ekj wia uk vewundat, woo krakjt de Bibel aules verutsäd, waut en “de latste Doag” aules wudd passieren (2. Timotäus 3:1-5, PB). Waut ekj grulich sea jleicht, wia, aus ekj lieed, daut dee, waut jestorwen sent, woaren oppstonen. Denkj bloos mol han: Ekj woa mienen Brooda noch mol wada seenen kjennen! (Johanes 5:28-29).

Oba nich aule freiden sikj met mie met. Miene Mame un mien Steefvoda wieren sea vehaust äwa Jehova siene Zeijen. Dee wullen mie bemotten, daut ekj opphieren sull met de Bibel studieren. Oba ekj jleicht daut, waut ekj lieed, un doawäajen hieed ekj sea lang nich opp.

Daut wia nich leicht, wäajens miene Famielje soo jäajenaun wia. Oba dan kjeem doa noch waut sea schwoaret opp. Mien jinjra Brooda, waut met mie toop no de Toopkomes von Jehova siene Zeijen kjeem, vedrunk lota dan uk. Oba de Zeijen wieren emma doa fa mie. Mank dee späad ekj de Leew un Metjefeel, wua ekj mien gaunzet Läwen no jesocht haud. Ekj wist daut: Dit es de woara Gloowen. Aune 1996 leet ekj mie dan deepen un wort eent von Jehova siene Zeijen.

WOO MIE DAUT TOGOOD KJEEM: Ekj sie nu aul sas Joa befriet met eenen feinen Maun, waut Dmitri heet. Wie deenen beid en daut Betel von Jehova siene Zeijen en St. Petersburg. Un miene Elren sent uk nich mea soo jäajen mie.

Ekj sie Jehova soo sea dankboa, daut ekj am hab kjanen jelieet! Wäajen ekj am deenen kaun, hab ekj nu een scheenet Läwen.

“Ekj haud äwa väl Sachen Twiewel” (RAUDEL RODRÍGUEZ RODRÍGUEZ)

WANEA JEBUAREN: 1959

VON WOON LAUNT: CUBA

WAUT EKJ EA WIA: EKJ WIA JÄAJEN DE POLITIKJ

MIENE VEGONENHEIT: Ekj wia en Havana, Cuba, jebuaren un ekj woss en eene oame Jäajent opp, wua se leicht mol oppe Gauss jachten. Met de Tiet jankad mie daut, mie utlieren to loten toom feiten.

Wäajens ekj wieekjlierich wia, wullen miene Elren haben, ekj sull no de Uniwersität gonen. Aus ekj doa dan wia, funk sikj mie daut aun soo to späaren, daut de Politikj en daut Launt, von wua ekj wia, sikj endren must. Un doawäajen wort ekj jäajenaun. Ekj un een Schoolpoatna pakten eenen Poliez en un wullen dän siene Flint fuatnämen. Un wäajen daut haud wie dän ernoa sea aum Kopp velazt. Mien Schoolpoatna un ekj worden dan enjestopt un sullen de Doodesstrof kjrieen. Soo, ekj wia noch mau jroz 20 Joa un mien Läwen wia meist derch!

Doa en de kjliene Stow, wua ekj enjestopt wia, eewd ekj dan, woo ekj mie wudd oppstalen, wan se mie ieescht wudden wellen dootmoaken. Ekj wull nich wiesen, daut ekj een kjlien bät Angst haud. Un doch twieweld ekj äwa väl Sachen. Ekj docht soo: “Woosoo jeft daut enne Welt soo väl ojjerajchtet? Es dit aules, waut daut Läwen enhelt?”

WOO MIEN LÄWEN SIKJ DERCH DE SCHREFT JEENDAT HAFT: Schlieslich wort de Doodesstrof vetuscht fa 30 Joa Jefenkjnis. To dee Tiet troff ekj dan waut von Jehova siene Zeijen, waut uk enjestopt wieren wäajen äaren Gloowen. De Zeijen wieren sea äwanäment, oba doch stalden dee sikj gaunz frädlich opp. Wan dee uk musten fa Dommheit ensetten, wieren dee oba nich doll un uk nich fuchtich.

De Zeijen lieeden mie, daut Gott sikj waut fa de Menschen väajenomen haft. Dee weesen mie uk von de Bibel, daut Gott de Ieed woat to een Paradies moaken, wua daut nich woat Jewault ooda ojjerajchtet jäwen. Dee lieeden mie uk, daut de Welt noch mol wudd voll goode Menschen sennen, waut aula wudden fa emma läwen, un aules wudd bloos noch scheen sennen (Psalm 37:29).

Ekj jleicht daut sea, waut ekj von de Zeijen lieed. Oba no miene Meenunk no wudd ekj kjeenmol kjennen soon Mensch woaren, aus dee wieren. Ekj docht soo, daut ekj mie nich wudd kjennen von de polietische Sachen oppoat hoolen ooda soo to sajen noch de aundre Bak hanhoolen. Doawäajen wort ekj mie eenich, daut ekj de Bibel mol wudd fa mie selfst läsen. Aus ekj dee ieescht derchjeläst haud, wort mie daut gaunz kloa, daut bloos Jehova siene Zeijen soon Läwen fieeden, aus de ieeschte Christen deeden.

Wäajens ekj de Schreft studieed, wort ekj en, daut ekj sea välet en mien Läwen endren must. Ekj must daut endren, woo ekj räd, wiels ekj haud mie daut soo sea aunjewant, emma to flieekjen. Ekj must uk opphieren met schmieekjen. Un dan uk noch: Ekj kunn mie uk nich mea opp eene Sied stalen enne Politikj. Aul dit to endren wia mie nich leicht. Oba Jehova holp mie. Soo bie sacht kunn ekj daut.

Daut schwanste wia mie, daut to endren, daut ekj emma soo kortnatuarich wia. Ekj doo noch emma doarom bäden, daut ekj mie beoabeiden kaun. Oba soone Bibelvarzhen aus Spricha 16:32 (NTR) haben mie sea jeholpen. Doa sajcht daut: “En Mensch dee langsam es oajalijch to woare es bäta aus dee Majchtja; un wäa sien Jeist beharscht aus soona dee ne Staut enn nemt.”

Aune 1991 leet ekj mie aus eent von Jehova siene Zeijen deepen. Ekj wort doa em Jefenkjnis en eene Tonn jedeept. Daut näakjste Joa kunnen eenje von ons utem Jefenkjnis rut un dan wort ons no Spaunien jeschekjt, wiels wie doa Frintschoft hauden. Aus wie doa aunkjeemen, wankt ekj fuaz no de Toopkomes von Jehova siene Zeijen. De Zeijen neemen mie sea fein opp; aus wudden dee mie aul fa Joaren jekjant haben. Dee holpen mie uk, daut ekj doa kunn mien nieet Läwen wada enne go kjrieen.

WOO MIE DAUT TOGOOD KJEEM: Nu hab ekj Freid aum Läwen, wiels ekj Gott deenen kaun, toop met miene Fru un onse beid Mejalen. Ekj kaun uk meist aul miene Tiet brucken toom aundre von de Bibel lieren. Eenjemol denkj ekj trigj, aus ekj een junga Benjel wia un dän Doot gaunz ver mie haud. Ekj sie soo dankboa fa daut, waut ekj nu hab. Buta daut ekj verheipts aum Läwen sie, hab ekj noch eene Hopninj. Un ekj frei mie aul to daut Paradies, waut ons vesproaken es, wua daut woat Jerajchtichkjeit jäwen un wua doa “kjeen Doot … mea sennen” woat (Openboarunk 21:3-4, PB).

[Takjst]

“Mie jinkj daut to Hoaten, aus ekj lieed, daut Gott eenen Nomen haud”

[Bilt]

Ekj un mien Maun jleichen daut, de Doowe opp de Finjasproak waut to wiesen