E Biblia parhudias lengo traio

Sar iek terni kai lako traio nas vushoro arakhlias pala soste te trail? Sar parhudias iek manush kai chi lelaspe tela le amperetsii, te avel iek manush pachako? Aida dikhas so phenen amenge.

“Rodavas kamlimos” (INNA LEZHNINA)

KANA ARAKHADILI: 1981

THEM: RUSIA

PA LATE: DE TSINORHARA LAKO TRAIO NAS VUSHORO

SAR SAS MURHO TRAIO: Murhe dada sas kashuke ai me arakhadilem kashuki. Le pervo shou borsh anda murho traio simas veselime zhi kai murhe dada meklepe. Makar simas tsinorhi davas po gor so zhalaspe ai godo dukhalas man zurales. Kana meklepe murhe dada, murho dat ai murho phral mai baro beshle ando Troick, ai murhi dei ai me geliam ando Cheliabinsk. La vriamasa murhi dei ansurisaili pale. O rhom katar murhi dei sas makiarno ai marelas amen.

Ando 1993, murho phral mai baro kai kamavas but tasulo ando pai. Pala godo murhi dei astardias te pel but pimos ai te marel man. Kamavas iek traio mai lasho. Rodavas kamlimos. Gelem ande but khangeria numa chi iek chi azhutisardias man.

SAR E BIBLIA PARHUDIAS MURHO TRAIO: Kana sas man 13 borsh, iek terni anda e escuela kai sas marturo le Jehovasko dias duma mantsa pa e Biblia. Plachalas man but manush anda e Biblia sar o Noe ai o Job kai luvudisarde le Devles makar nas vushoro lenge. Ande tsirha vriama sikiuavas e Biblia le Marturentsa ai zhavas kai kidenpe.

Ande Biblia sikilem but prame shukar. Plachaias man defial zurales te zhanau ke ka o Del si les iek anau (Salmo 83:18). Nashtivas te pakiau sar e Biblia, but vriama mai anglal, phenelas sar sas te aven le palune giesa (2 Timote 3:1-5). Ai plachaias man but te zhanau ke le manush kai mule si te zhuvindin. Pale si te dikhau murhe phrales! (Iovano 5:28, 29).

Kana astardem te sikiuau pa e Biblia nas savorhe veselime. Murhi dei ai lako rhom nas lenge drago le marturia le Jehovaske ai phenenas mange te mekau te sikiuau pa e Biblia. Numa plachalas man but so sikiuavas ai chi kamavas te mekau.

Sar murha familiake nas drago le Marturia nas vushoro te rhevdiu. Ai na numa godo, murho phral mai tsinorho kai butivar zhalas mantsa kai kidenpe le Marturia tasulo ando pai, sar murho phral mai baro. Numa kana nakhlias godo, le Marturia sas mantsa. Von sikade o kamlimos kai rodem sa murho traio. Zhanavas ke le marturia le Jehovaske sas le chache kristianuria, pala godo ando 1996 boldilem.

SAVO LASHIMOS LEM: De shou borsh ke sim ansurime iekhe manushesa defial lasho kai bushelpe Dmitry. Le dui keras buki ando kher Betel katar le marturia le Jehovaske ando San Petersburgo. La vriamasa, murhe dada parhude pengo gindo karing le Marturia.

Naisiu defial zurales ka o Jehova ke shai prinzhardem les! Te kerau leski buki azhutisardias man te zhanau pala soste traiu.

“Jalas man e briga pala but prame kai pushavas man” (RAUDEL RODRÍGUEZ RODRÍGUEZ)

KANA ARAKADILO: 1959

THEM: CUBA

PA LESTE: CHI PAKIAVAS O MUI KATAR LE AMPERETSII

SAR SAS MURHO TRAIO: Arakhadilem ande La Habana (Cuba) ai barilem ande iek foro ke nas but love ai le manush marenaspe avri pe vulitsa. Kana simas terno plachalas man te khelau mange ando yudo ai aver deportes kai trobulas te marau man.

Sar ande escuela zhalas mange mishto, murhe dada azhutisarde man te zhau ande universidad. Kotse astardem te gindiu ke le manush kai amperetsinas murho them trobunas te parhudion, pala godia chi kamavas te pakiau lengo mui. Iek terno anda e escuela ai me, geliam te choras o pistolo katar iek krisako ai mardiam les defial zurales ando shero. Pala godia phandade amen ai phende amenge ke sas te ampushtin amen. Numa sas man 20 borsh ai sas te merau!

Sar chi kamavas te sikavau dar, kana simas korkorho davas man gogi sar sas te avel o gies kai sas te merau. Ai vi davas man gogi ai jalas man e briga pala but prame kai pushavas man sar, sostar si but prame kai nai vorta pe lumia ai pala soste trais.

SAR E BIBLIA PARHUDIAS MURHO TRAIO: La vriamasa alosarde amenge ke chi trobusas te meras ai ke trobusas te avas 30 borsh phandade. Kotse arakhlem uni marturia le Jehovaske kai sas phandade pala pengo pakiamos. Plachalas man te dikhau e zor ai e pacha kai sas len. Makar intaino sas phandade nas joliariko ai tristo.

Le Marturia sikade man ke o Del si les iek gindo le manushenge. Sikade man la Bibliasa ke o Del si te kerel anda e Phuv iek paraiso kai chi avela prame chorhe, kai traina manush lashe pe sa e vriama (Psalmo 37:29, E Nevi Viasta ai o Psalmo).

Chi simas sar lende numa plachalas man so sikavenas man. Chi gindivas ke shai beshavas rigate ai te na thau partia ka le amperetsii manushengi. Pala godo astardem te chitou e Biblia korkorho. Porme te chitou sa e Biblia dem po gor ke numa le marturia le Jehovaske kerenas sa iek fialo sar le pervo kristianuria.

Te sikiuau pa e Biblia azhutisardias man te dikhau ke trobuvas te parhuvau but dieli. Trobuvas te parhuvau sar davas duma ke phenavas but lashave. Vi trobuvas te mekau le tsigeri ai te na thau man ande le dieli katar le manush kai amperetsin. Makar nas mange vushoro, o Jehova azhutisardias man te parhuvau tsirha po tsirha.

Vareso kai nas mange vushoro te parhuvau sas, te na joliavau ande fuga ai te avel man pacha ando ilo. Ai vi agies mangau katar o Del te azhutil man. Uni verseturia sar Proverbios 16:32 azhutisarde man but. Kotse phenel: “Si mai zuralo o manush kai zhanel te azhukerel de sar o zuralo, ai godo kai inkerel peski joli, de sar godo kai lel iek foro tela pesko vast”.

Ando 1991 ande e rhobia boldilem sar marturo le Jehovasko. O borsh kai nakhlo ka uni phandade ai man ningerde amen ande España. Sar sas amen niamuria kotse, mekle amen ai anklistiam anda e rhobia. Astardem te zhau kai kidenpe le marturia le Jehovaske, von azhutisarde man te avel man iek nevo traio ai aliarenaspe veselime te avau lentsa.

SAVO LASHIMOS LEM: Akana sim iek manush veselime kai luvudil le Devles murha rhomniasa ai murhe sheantsa. Akana shai dau but anda murhi vriama te sikavau le manushen pa o chachimos la Bibliako. Univar dau man gogi kana simas terno ai sas te merau ai naisiu sa so nirisardem de kin anda godo gies. Agies traiu ai si man vareso pala soste te azhukerau. Azhukerau o gies kai avela o Paraiso kai shinelape kris vorta “ai chi mai avela martia” (Sicharimos [Apokalipsis] 21:3, 4).

[Suato anda e patrin]

“Plachaias man defial zurales te zhanau ke ka o Del si les iek anau”

[Patreto]

Murhe rhomes ai man plachal amen te sikavas so phenel e Biblia kal kashuke