Bíblia troka ema nia moris

OINSÁ mak feto-klosan ida neʼebé moris susar husi tempu kiʼik sente katak agora nia moris iha folin? Saida mak book ema ida neʼebé uza violénsia hodi kontra ukun-naʼin sira ikusmai sai laran-maus no ajuda ema seluk aprende kona-ba Bíblia? Lee toʼok esperiénsia sira-neʼe atu buka-hatene.

“Haʼu hakarak tebes atu hetan domin.”​—INNA LEZHNINA

TINAN MORIS: 1981

HUSI RAI: RÚSIA

MORIS ULUK NIAN: MORIS SUSAR HUSI TEMPU KIʼIK

HAʼU-NIA MORIS ULUK: Kuandu haʼu moris mai, haʼu tilun-diuk ona. Haʼu-nia inan-aman mós tilun-diuk. Haʼu kontente iha haʼu-nia moris toʼo haʼu tinan neen deʼit, depois neʼe haʼu-nia inan-aman soe malu. Maski haʼu sei tinan kiʼik maibé haʼu komprende ona kona-ba soe-malu, no ida-neʼe halo haʼu laran-kanek loos. Depois neʼe, haʼu-nia aman no haʼu-nia maun hela nafatin iha Troitsk, maibé haʼu-nia inan no haʼu muda ba Chelya-binsk. Haʼu-nia inan kaben fali, no ninia laʼen foun toman atu hemu tua demais, nia baku beibeik haʼu no haʼu-nia inan.

Iha tinan 1993 haʼu-nia maun neʼebé haʼu hadomi tebes, mout iha mota no mate. Neʼe halo ami hotu sai triste tebes. Haʼu-nia inan komesa hemu tua atu bele haluha kona-ba neʼe, no depois neʼe nia mós trata haʼu la diʼak hanesan ho haʼu-nia aman-kiʼik. Tan neʼe, haʼu komesa atu buka moris neʼebé diʼak liu. Haʼu hakarak tebes atu hetan domin iha haʼu-nia moris. Haʼu komesa atu tuir igreja oioin atu hetan kmaan, maibé haʼu la hetan.

OINSÁ BÍBLIA TROKA HAʼU-NIA MORIS: Kuandu haʼu tinan 13, haʼu-nia kolega eskola neʼebé Testemuña ba Jeová, konta kona-ba istória sira husi Bíblia. Haʼu gosta aprende kona-ba ema husi Bíblia hanesan Noé no Job, neʼebé serbí Maromak maski hetan susar. Lakleur depois neʼe, haʼu komesa estuda Bíblia ho Testemuña sira no tuir sira-nia reuniaun.

Hodi estuda Bíblia, haʼu aprende lia-loos sira neʼebé furak no neʼe halo haʼu-nia matan nakloke. Porezemplu, kuandu haʼu aprende katak Maromak iha naran rasik, neʼe kona loos haʼu-nia laran. (Salmo [Mazmur] 83:18) Haʼu hakfodak atu haree katak buat hotu neʼebé Bíblia fó-hatene nanis kona-ba “loron ikus sira” akontese duni ohin loron. (2 Timoteo 3:1-5) No haʼu kontente tebes atu aprende kona-ba esperansa moris-hiʼas nian. Hanoin toʼok! Aban-bainrua haʼu hasoru malu fali ho haʼu-nia maun!—Joao 5:28, 29.

 Maibé ema balu la kontente kona-ba buat neʼebé haʼu aprende. Haʼu-nia inan no aman-kiʼik la gosta Testemuña ba Jeová. Sira koko obriga haʼu atu para estuda Bíblia. Maibé haʼu gosta tebes buat neʼebé haʼu aprende no haʼu lakohi para.

La fasil atu tahan susar husi haʼu-nia família. Liután neʼe, haʼu hasoru susar ida tan kuandu haʼu-nia alin-mane, neʼebé uluk tuir Testemuña sira-nia reuniaun hamutuk ho haʼu, nia mós mout iha mota no mate. Maibé Testemuña sira sempre iha haʼu-nia sorin atu ajuda haʼu. Haʼu hetan iha sira leet, domin neʼebé haʼu buka iha haʼu-nia moris tomak. Haʼu hatene duni katak ida-neʼe mak relijiaun neʼebé loos. Nuneʼe, iha tinan 1996 haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN: Lakleur haʼu kaben ho mane diʼak ida naran Dmitry, ami kaben ba tinan neen ona. Ami serbí hamutuk iha sukursál husi Testemuña ba Jeová iha St. Petersburg. Ikusmai, haʼu-nia inan-aman la kontra ona haʼu.

Haʼu kontente tebes atu hatene kona-ba Maromak Jeová! Hodi serbí nia haʼu sente katak haʼu-nia moris iha folin duni.

‘Haʼu iha pergunta sira neʼebé halo haʼu hanoin barak.’​—RAUDEL RODRÍGUEZ RODRÍGUEZ

TINAN MORIS: 1959

HUSI RAI: KUBA

MORIS ULUK NIAN: KONTRA UKUN-NAʼIN SIRA

HAʼU-NIA MORIS ULUK: Haʼu moris iha sidade Havana iha rai-Kuba no sai boot iha fatin neʼebé kiak no ema sempre baku malu iha dalan. Nuʼudar haʼu sai boot, haʼu komesa tuir arte marsiais oioin.

Tanba haʼu matenek iha eskola, haʼu-nia inan-aman fó laran-manas ba haʼu atu bá universidade. Durante haʼu eskola iha universidade, haʼu sente katak situasaun polítiku nian iha haʼu-nia rai presiza troka, tan neʼe haʼu deside atu kontra hasoru  ukun-naʼin sira. Haʼu no haʼu-nia kolega eskola ataka polísia ida tanba ami hakarak atu hadau ninia kilat. Ida-neʼe halo polísia hetan kanek boot iha nia ulun. Tanba buat neʼebé ami halo, ema hatama haʼu no haʼu-nia kolega ba komarka no ami-nia kastigu mak ema sei tiru mate ami. Maski haʼu tinan 20 deʼit, maibé haʼu atu mate ona!

Haʼu sente mesamesak iha komarka laran, no haʼu hanoin kona-ba saida mak haʼu sei halo kuandu sira atu tiru mate haʼu. Haʼu lakohi atu hatudu katak haʼu taʼuk. Maibé, haʼu mós iha pergunta sira neʼebé halo haʼu hanoin barak. Haʼu hanoin: ‘Tansá mak la iha justisa iha mundu neʼe? Ita-nia moris hanesan neʼe deʼit ka lae?’

OINSÁ BÍBLIA TROKA HAʼU-NIA MORIS: Ikusmai ami-nia kastigu troka fali atu iha komarka laran ba tinan 30. Iha tempu neʼe mak haʼu hasoru ema balu husi Testemuña ba Jeová neʼebé tama komarka tanba sira-nia fiar. Haʼu hakfodak atu haree Testemuña sira-nia aten-brani no nafatin buka dame ho ema seluk. Maski sira la halo sala ida, maibé ema hatama sira ba komarka. Maski nuneʼe sira la hirus no la rai odi.

Testemuña sira hanorin haʼu kona-ba Maromak nia hakarak ba ema. Sira hatudu mai haʼu husi Bíblia katak Maromak sei halo mundu neʼe sai jardín furak tebes, iha tempu neʼebá sei la iha tan krime, no justisa sei hela ba nafatin. Sira hanorin haʼu katak mundu neʼe sei nakonu ho ema diʼak, neʼebé iha oportunidade atu moris ba nafatin.—Salmo 37:29.

Haʼu gosta tebes buat neʼebé haʼu aprende husi Testemuña sira. Maibé haʼu-nia hahalok la hanesan duni ho sira-nian. Haʼu hanoin katak haʼu la bele sai neutrál iha buat polítiku nian hanesan sira, no haʼu la bele taka matan deʼit kuandu ema halo aat mai haʼu. Nuneʼe, haʼu deside atu lee Bíblia mesak. Kuandu haʼu lee Bíblia hotu tiha, haʼu rekoñese katak Testemuña ba Jeová sira deʼit mak ema neʼebé halo tuir ema kristaun sira iha tempu uluk.

Husi buat neʼebé haʼu aprende husi Bíblia, haʼu hatene katak haʼu presiza halo mudansa boot iha haʼu-nia moris. Porezemplu, haʼu presiza hadiʼa dalan neʼebé haʼu koʼalia tanba haʼu toman atu tolok beibeik. Haʼu mós presiza atu para fuma, no haʼu presiza sai neutrál iha buat polítiku. La fasil atu troka hahalok sira-neʼe, maibé ho Maromak Jeová nia ajuda, neineik-neineik haʼu konsege troka.

Buat neʼebé susar liu ba haʼu atu troka mak kontrola haʼu-nia hirus. Toʼo agora, haʼu nafatin halo orasaun atu hetan ajuda kona-ba neʼe. Eskritura sira hanesan Provérbios (Amsal) 16:32 ajuda haʼu tebes, eskritura neʼe hatete: “Nia neʼebé la hirus lalais diʼak liu fali mane ida neʼebé forsa, no nia neʼebé kontrola nia espíritu diʼak liu fali ema neʼebé hadau sidade.”

Iha tinan 1991 haʼu hetan batizmu nuʼudar Testemuña ba Jeová iha bidón ida iha komarka laran. Tinan tuirmai, ami balu husi komarka sai livre no sira haruka ami ba rai-España tanba ami iha família iha neʼebá. Toʼo tiha España, haʼu komesa kedas tuir reuniaun sira husi Testemuña ba Jeová. Testemuña sira iha neʼebá simu haʼu hanesan haʼu hamutuk ho sira ba tinan barak ona, no sira ajuda haʼu nuʼudar haʼu komesa haʼu-nia moris foun.

BUAT DIʼAK NEʼEBÉ HAʼU HETAN: Haʼu kontente loos iha haʼu-nia moris hodi serbí Maromak hamutuk ho haʼu-nia feen no oan-feto sira. Haʼu uza haʼu-nia tempu barak liu atu ajuda ema seluk aprende kona-ba Bíblia. Dala ruma haʼu hanoin fila fali kona-ba tempu neʼebé haʼu sei joven no besik atu mate, maibé agora haʼu sente agradese tanba haʼu hetan buat diʼak barak. La’ós deʼit katak haʼu moris hela maibé haʼu mós iha esperansa. Haʼu hein mundu foun neʼebé Maromak promete ona, bainhira justisa sei iha ba nafatin no “mate sei la iha tan”.—Apokalipse 21:3, 4.

[Liafuan neʼebé foti husi pájina 19]

“Kuandu haʼu aprende katak Maromak iha naran rasik, neʼe kona loos haʼu-nia laran”

[Dezeñu iha pájina 20]

Haʼu ho haʼu-nia laʼen gosta atu hatudu DVD ba ema tilun-diuk