Bayibolu Lisintha Ŵanthu

KUMBI ntchinthu wuli chinguchitika kuti msungwana munyaki yo wangukumana ndi masuzgu wachikuwa, wayambi kuja umoyu walikondwa? Ntchinthu wuli chinguchitiska kuti munthu munyaki yo wenga wakuyukiya boma wasinthi ndi kwamba kupharazga uthenga wamampha? Ŵerengani nkhani izi kuti musaniyi kwamuka.

“Ndakhumbisiskanga kusaniya ŵanthu akuti andiyanjengi.”—INNA LEZHNINA

NDIKUWA MU: 1981

CHARU CHO NDIKUWIYA: RUSSIA

MBIRI YANGU: NDINGUKUMANA NDI MASUZGU NDICHIKUWA

UMOYU WANGU WAKALI: Ndikuwa wambuwu ndipu apapi ŵangu nawu ŵenga ambuwu. Pakwamba vinthu venga umampha ukongwa mu banja lidu mpaka po ndingukwanisiya vyaka 6. Kweni pavuli paki, ama ndi ada nthengwa yingumala. Chinanga kuti pa nyengu iyi ndenga ndechemunamana, kweni ndinguwamu vo vinguchitika ndipu vingundipweteka ukongwa. Ivi vati vachitika, ada ndi mzichi wangu mura ajanga ku Troitsk kweni ama ndi ini tingusamiya ku Chelyabinsk. Pati pajumpha nyengu ama anguyirwa so. Ada amusaniyapu ŵenga aloŵevu, ndipu kanandi atipumanga tosi ndi ama.

Mu 1993 mzichi wangu mura wangubira mumaji. Banja lidu lenga ndi chitima ukongwa chifukwa cha ngozi iyi. Chifukwa cha venivi, ama angwamba kumwa moŵa kuti panyaki aluweku waka, ndipu nawu angwamba kundichitiya nkhaza nge ada amusaniyapu. Kukamba uneneska ndapenjanga pakututiya. Ndakhumbisiskanga kusaniya ŵanthu akuti andiyanjengi. Ndingwamba kuluta kumatchalitchi ngakupambanapambana kuti panyaki ndingasaniya ŵanthu aviyo, kweni kosi kwengavi chovyu.

MO BAYIBOLU LINGUSINTHIYA UMOYU WANGU: Pa nyengu yo ndenga ndi vyaka 13 munyangu munyaki kusukulu yo wenga Kaboni waku Yehova wandikambiyanga nkhani za mu Bayibolu. Ndinguchiskika ndi nkhani yaku Nowa kweniso yaku Yobu chifukwa yiwu ateŵetiyanga Chiuta chinanga kuti akumananga ndi masuzgu. Ndingwamba kusambira Bayibolu ndi Akaboni aku Yehova kweniso kuwungana nawu.

Kusambira Bayibolu kungundiwovya kuziŵa fundu zinandi zauneneska. Ndinguzizwa kusambira kuti Chiuta we ndi zina. (Salimo 83:18) Ndinguwona so kuti Bayibolu likukambiya limu mwakulondo vinthu vo vazamuchitika “mu mazuŵa ngakumaliya.” (2 Timote 3:1-5) Ndingukondwa so ukongwa kusambira kuti akufwa azamuyuka chifukwa vingundiwovya kuziŵa kuti ndazakumuwona so mzichi wangu!—Yohane 5:28, 29.

Kweni ndi wosi cha wo akondwanga kuti ndisambira Bayibolu. Ama kweniso ada amusaniyapu aŵatinkhanga ukongwa Akaboni aku Yehova. Yiwu anguyesesa kundichichizga kuti ndileki kusambira Bayibolu. Kweni ndaviyanjanga ukongwa vo ndasambiranga ndipu ndingusimikiza kuti ndilekengi cha.

Venga vipusu cha kuti ndifiski kukunthiyapu kususkika ndi ŵanthu a mu banja langu. Chinthu chinyaki chakuchitiska chitima ntchakuti mzichi wangu mumana yo wangundiperekeza ku maunganu nga Akaboni aku Yehova, nayu wangubira so mumaji. Kweni Akaboni aku Yehova angundileka ndija cha, yiwu ŵenga nani pafupi. Vawonekiyanga limu kuti ndasaniya ŵanthu wo andiyanjanga nge mo ndakhumbisiskiyanga pa umoyu wangu. Ndinguziŵa kuti ndasaniya chisopa chauneneska. Mu 1996 ndingubatizika ndi kuja Kaboni waku Yehova.

MO NDAYANDULIYA: Ndikutolana ndi munthulumi wamampha ukongwa zina laki Dmitry ndipu taja mu nthengwa kwa vyaka 6 sonu. Tosi taŵaŵi titeŵete paofesi ya Akaboni aku Yehova ku St. Petersburg. Pati pajumpha nyengu apapi ŵangu anguleka kususka vo ndigomezga.

Ndiwonga ukongwa kuti ndikumuziŵa Yehova! Sonu ndikondwa ukongwa chifukwa chakuti nditimuteŵete.

“Ndenga ndi mafumbu nganandi ukongwa.”—RAUDEL RODRÍGUEZ RODRÍGUEZ

NDIKUWA MU: 1959

CHARU CHO NDIKUWIYA: CUBA

MBIRI YANGU: NDENGA WAKUYUKIYA BOMA

UMOYU WANGU WAKALI: Ndikuwiya ku Havana, mucharu cha Cuba. Banja lidu lajanga kuchigaŵa ko kwajanga ŵanthu akavu ndipu kwenuku zuŵa lajumphangapu waka cha kwambula ndewu. Ndichikuwa ndingwamba kuchita masaza nga judo kweniso nganyaki ngakupumana.

Ndenga mwana wazeru ukongwa ndipu apapi ŵangu angundichiska kuti ndiluti kuyunivesite. Nde kuyunivesite, ndingwamba kuwona kuti boma litendesa umampha cha vinthu ndipu pakhumbika kusintha vinthu. Ndinguwona kuti ndije wakuyukiya boma. Ini ndi munyangu yo ndasambiranga nayu sukulu, tingulimbana ndi mpolisi munyaki chifukwa takhumbanga kumulonda futi. Mpolisi mwenuyu wangupwetekeka ukongwa pa ndewu yeniyi. Ini ndi munyangu angutiko ndipu angutiyeruzga kuti tikabayiki ndi asilikali. Pa nyengu iyi ndipu nde ndi vyaka 20 pe, kweni nyifwa yangu yingununkhira!

Pa nyengu yo ndenga ndija mujeri, ndayeseriyanga mo ndamuchitiya pa masu pa asilikali wo akundibaya. Ndakhumbanga kuti nkhaŵalongo kuti ndilivi mantha. Kweni pa nyengu yeniyi ndenga ndi mafumbu nganandi ukongwa. Ndajifumbanga kuti: ‘Ntchifukwa wuli pacharu palivi urunji? Kumbi umoyu ngwenuwu pe mbwenu?’

MO BAYIBOLU LINGUSINTHIYA UMOYU WANGU: Pati pajumpha nyengu cheruzgu cho angutipaska chingusintha, ndipu angutikambiya kuti tijengi mujeri vyaka 30. Penga pa nyengu yeniyo po ndingukumana ndi Akaboni aku Yehova wo angumangika chifukwa cha vo agomezganga. Ndingukondwa ukongwa ndi chiganga cho alongonga chinanga kuti achitanga vinthu mwachimangu. Ŵanthu yaŵa anguŵikika mujeri pa milandu yaboza kweni akondwanga.

Akaboni aku Yehova angundisambiza kuti pe chifukwa cho Chiuta wakulenge ŵanthu. Yiwu angundilongo kutuliya mu Bayibolu kuti Chiuta wazamusintha charu kuti chije so paradayisu ndipu pazamuŵavi vinthu viheni kweniso vambula urunji. Yiwu angundisambiza so kuti pacharu pazamuzaza ŵanthu amampha pe wo azamuja ndi umoyu wakukondwesa kwamuyaya.—Salimo 37:29.

Vo Akaboni aku Yehova andisambizanga vandikondwesanga ukongwa kweni ndawonanga kuti ini ndingasintha cha. Ndawonanga kuti ndingafiska cha kuleka kuselere mu ndali kweniso kuŵaleka waka ŵanthu wo atindichitiya vinthu viheni. So ndinguwona kuti ndiŵerengi waka Bayibolu pakundija. Ndati ndamaliza kuliŵerenga, ndinguwona kuti Akaboni aku Yehova pe ndiwu achita vinthu nge mo Akhristu akwambiriya achitiyanga.

Kusambira Bayibolu kungundiwovya kuwona kuti ndikhumbika kusintha vinthu vinyaki vikuluvikulu pa umoyu wangu. Mwakuyeruzgiyapu, ndakhumbikanga kuleka kutuka chifukwa ndalongoronga waka cha kwambula kutuka. Ndakhumbikanga so kuleka kukweŵa. Kweniso ndakhumbikanga kuleka kuchitaku ndali. Kuleka kuchita vinthu venivi kwenga kupusu cha, kweni Yehova wangundiwovya ndipu ndikuleka.

Kweni kusambira kuwuko mtima ndichu chenga chinthu cho chingundisuzga ukongwa. Ndipu mpaka sonu ndipempha kuti Chiuta wandiwovyengi. Ndawovyeka ukongwa ndi malemba nga mu Bayibolu nge la Nthanthi 16:32 lo likamba kuti: “Munthu yo waleka kukwiya liŵi ngwamampha kuluska munthu wanthazi, ndipu munthu yo walamuliya ukali waki waluska yo wathereska tawuni.”

Mu 1991 ndingubatizika ndi kuja Kaboni waku Yehova. Ndingubatizikiya mujeri mumaji ngo nganguŵikika mudilamu. Mu chaka chakulondopu, ini limoza ndi akayidi anyaki angutituza mujeri ndipu angutitumiza ku Spain pakuti tenga ndi achibali kweniko. Ndati ndafika waka ku Spain, ndinguluta ku maunganu nga Akaboni aku Yehova. Akaboni aku Yehova kwenuku angundilondere nge kuti tikuziŵana kali ukongwa ndipu angudiwovya kusaniya pakwambiya.

MO NDAYANDULIYA: Sonu ndikondwa ndipu nditeŵete Chiuta limoza ndi muwolu wangu kweniso ŵana ŵidu anthukazi. Ndiwona kuti ndi mwaŵi kumaliya nyengu yangu yinandi kusambiza ŵanthu fundu za mu Bayibolu. Nyengu zinyaki ndikumbuka kuti ndeche mnyamata ndenga pafupi kufwa, kweni sonu ndasaniya vitumbiku vikulu ukongwa. Sonu nde ndi umoyu pe cha, kweni nde so ndi chilindizga. Ndilindizga kuzija mu Paradayisu mo mwazamukuŵa urunji ndipu “nyifwa yazamuŵaku so cha.”—Chivumbuzi 21:3, 4.

[Fundu yikulu]

“Ndinguzizwa kusambira kuti Chiuta we ndi zina”

[Chithuzi]

Ini ndi mulumu wangu tikondwa kugaŵiya ŵanthu ambula kuvwa mabuku nga chineneru chamanja