Ja Biblia stukbʼes ja sakʼanile

¿JASTAL staʼa meran stojolil ja sakʼanil jun akʼix jel ajula sbʼaj ja bʼa xchʼinili? Sok jun kʼakʼal kaprechudo winik bʼa politika, ¿jasa aji tukbʼuk bʼa lamanxa oj ajyuk sok kʼot jun choluman ja bʼa lekil rasoni? La katikan a-xchole yeʼnle.

«Wani xkʼana yajalkʼujol sok jtalnajel» (INNA LEZHNINA)

JA JABʼIL POJKI: 1981

PAÍS BʼA POJKI: RUSIA

JA SAKʼANIL: AJULA SBʼAJ JA BʼA XCHʼINIL

JA JSAKʼANIL AJYI: Ja jnantati mi xyabʼye kʼinal sok ja keʼn jachni pojkiyon. Ja bʼajtan wake jabʼil jelni gusto ajyiyon sakʼan, pe tsaʼan ja jnantati skʼutsu ja snupanele. Anima jelto chʼinon, pe jnaʼa jas wa stojolan ja jaw sok jelni yaj kabʼi. Yajni skʼutsu ja snupanele, ja jtat sok ja jnuʼi ti kanye bʼa Troick, jaxa jnani ti yiʼajon bʼa Cheliabinsk. Mas tsaʼan cha nupani. Ja jmajan jtati jel xyuʼaj sok tikʼanxta wa smakʼawotikon soka jnani.

Ja bʼa 1993, ja kala nuʼi sjikʼa jaʼ. Ja jaw jelni yaj kabʼtikon jpetsaniltikon. Ja jnani kʼe yuʼe sok cha kʼe yixtalaʼukon. Ja keʼn wani xkʼana jun jsakʼanil bʼa mas lek. Wa xkʼana yajalkʼujol sok jtalnajel. Jleʼa jkoltajel bʼa jitsan iglesya, pe mini jtaʼa.

JA BIBLIA STUKBʼES JA JSAKʼANILI: Yajni ay kiʼoj 13 jabʼil, jun jmoj eskuela kʼotel testigo bʼa Jyoba xcholokabʼ jujuntik loʼil bʼa Biblia. Jelni tsamal xkabʼ ja loʼilik jastal bʼa Noé sok Job bʼa yaʼteltaye ja Dyos bʼa ekʼeleʼik jel wokol. Mini ekʼ mas tyempo kʼe jpaklay ja Biblia soka Testigoʼiki sok ochyon ja bʼa sreunione.

Ja bʼa Yabʼal ja Dyos jnebʼa jastik meran sok jel tsamalik. Jelni snikawon snajel ke ja Dyos ayni jun sbʼiʼil (Salmo 83:18). Jelni cham kabʼ ja jastal yalunejxakan tsʼikan lek ja Biblia ja jastal oj ajyuk «ja bʼa tsaʼanikxta kʼakʼu» (2 Timoteo 3:1-5). Sok jelni gustoʼaxiyon ja smajlajel ja bʼa sakʼwelali. ¡Cha ojni kil ja kermano! (Juan 5:28, 29).

Pe mini spetsaniluke gustoʼaxiye jmok. Ja jnan sok ja jmajan jtati wa skontraʼane ja testigoʼik bʼa Jyoba sok stʼenawone bʼa oj kakan spaklajel ja Biblia. Pe ja keʼn jelni tsamal xkabʼ ja jas wanon snebʼjeli sok mini xkʼana oj kakani.

Mini pasil kabʼ kuchelkuj ja jastal yilawone kontra ja jpamilya. Anto cha ekʼ pilan desgrasya: ja kijtsʼin maʼ smojtunejon ja bʼa reunionik bʼa testigoʼik bʼa Jyoba, cha sjikʼa jaʼ. Pe ja Testigoʼik tini ajyiye jmok. Tini bʼa yeʼnle jtaʼa ja yajtanel sok ja talnanel jleʼunej ja bʼa jsakʼanili. Jkʼuʼani lek jani ja relijyon smeranili, ja yuj ja bʼa 1996 kiʼaj jaʼ jastal testigo bʼa Jyoba.

JASTIK SLEKILAL KILUNEJ: Ayxa wake jabʼil nupanelonsok jun lekil winik sbʼiʼil Dmitry. Jchawaniltikon tini wala aʼtijitikon bʼa Naʼits Betel bʼa testigoʼik bʼa Jyoba bʼa San Petersburgo. Ekʼ ja tyempo, ja jnantati stukbʼes ja smodoʼe sbʼaja skʼuʼajelik kiʼoji.

¡Jelni xkaʼa tsʼakatal yuja jnaʼa sbʼaj ja Jyoba! Ja yaʼteltajel ja yeʼn yaʼunej staʼ meran stojol ja jsakʼanili.

«Wa xya cham jkʼujol jitsan sjobʼjel» (RAUDEL RODRÍGUEZ RODRÍGUEZ)

JA JABʼIL POJKI: 1959

PAÍS BʼA POJKI: CUBA

JA SAKʼANIL: JUN KAPRECHUDO BʼA POLITIKA

JA JSAKʼANIL AJYI: Ti pojkiyon bʼa La Habana (Cuba) sok ti kʼiyon bʼa jun barrio jel pobre bʼa tikʼanxta wa x-ajyi ja tiroʼanelik ja bʼa kaye. Man jkeremil jel jkʼana jun tikʼe tiroʼanel sbʼiʼil yudo sok pilan tajnelik bʼa tiroʼanel.

Yuja kʼotelon jun lekil estudiante, ja jnantati yalawekabʼ oj wajkon bʼa universidad. Ja tiw kʼe jkʼuʼuk ke ojni tukbʼuk ja politikaʼik ja bʼa jpaisi sok kʼe jkʼokyi ja smandar ja matik ay xcholi. Ja keʼn sok jun jmoj eskuela jmakʼatikon jun policía bʼa yelkʼajelyi ja yarmaʼi sok jelni jyajbʼestikonkan ja yolomi. Yuja jaw, lutjitikon sok aji orden bʼa oj miljukotikon. ¡Kechantoni 20 jabʼil kiʼoj sok ojxta chamkon!

Yajni jtuchʼil ayon ja bʼa preso jchapani jbʼa jastal oj jeʼ ja jmodo yajni xjak yiʼone och ja matik oj smiloneʼi, pes mini xkʼana oj jeʼ wala xiwyon. Pe cha wani xya cham jkʼujol jitsan sjobʼjelik, jastal, jas yuj jel ja bʼa mi tojuki ma ta jaʼita it ja sakʼanili.

JA BIBLIA STUKBʼES JA JSAKʼANILI: Ekʼ ja tyempo, alji mixa oj miljukotikon pe ojni ajyukotikon 30 jabʼil bʼa preso. Tini tiw jnaʼa sbʼaje jujuntik testigoʼik bʼa Jyoba, bʼa lutane yuja skʼuʼajelik yiʼoje. Jelni cham kabʼ ja jastal mi xiwye sok ja jastal lamanxta ayeʼi. Anima mey smule ja lutubʼale pe mini tajkel aye sok mini chʼinaj ayuke.

Ja Testigoʼik xcholowekabʼ ja Dyos ayni jas wa skʼana sbʼaja kristyanoʼiki. Sjeʼaweki bʼa Biblia ojni ya pax jun tsamal lugar ja luʼumi, mixa oj ajyuk ja chaʼanik mulal, ja bʼa mi tojuki, ojxa ajyuk kristyanoʼik leke bʼa oj ajyuke sakʼan tolabida sok jelxa tsamal oj ajyuke (Salmo 37:29).

Jelni xkʼulan gusto ja jas wa sjeʼawekiʼi, pe ja jmodo mini slaja sbʼajsok ja bʼa yeʼnleʼi. Jpensaraʼan mini oj bʼobʼkuj yajelkan ja politika, ja yuj jkʼana skʼumajel ja Biblia jach jtuchʼil. Yajni chʼakyoni, kabʼ stojolil kechanta ja testigoʼik bʼa Jyoba wa sjeʼa jun smodoʼe jastal ja bʼa bʼajtan snochumanik Kristo.

Skʼumajel ja Biblia ya kil jelni jitsan jas oj jtukbʼes jbʼaj. Tʼilani oj jtukbʼes ja jkʼumali, pes tikʼanxta jel yaj wala kʼumaniyon. Cha tʼilani oj kakan yabʼjel may sok mi oj jchʼik jbʼaj jastik bʼa politika. Mini pasil kabʼi, pe soka skoltanel ja Jyoba, takal takal kakani.

Jun jasunuk jel yaʼunej wokolanukon, jani yajelkan ja jmal jmodoʼi. Man wego, wanontoni skʼanjelyi ja Dyos a-koltayon bʼa skomjel jbʼaj. Jelni skoltunejon bersikuloʼik jastal ja bʼa Proverbios 16:32, bʼa wa xyala: «Ja winik ay spasensya mastoni lek yuja winik ay yipi, sok ja maʼ wa skomo ja mal smodo mastoni lek yuj june maʼ wa sbʼajinkan jun chonabʼ».

Ja bʼa 1991 kiʼaj jaʼ jastal testigo bʼa Jyoba bʼa jun tambo jaʼ ja bʼa preso. Jabʼil tsaʼan, jujuntik presoʼanumik eltikon libre sok jekjitikon bʼa España yuja ay jpamilyatikon ja tiwi. Yajni kʼotyoni, kʼe wajkon ja bʼa reunionik bʼa testigoʼik bʼa Jyoba, yaweki jun lekil julelal bʼa lajansok wanxa snaʼawe sbʼaj jitsanxa jabʼil sok skoltayone bʼa yajel ajyuk jun yajkʼachil jsakʼanil.

JASTIK SLEKILAL KILUNEJ: Ja wego jel gustoʼayon sok wanon yaʼteltajel ja Dyos soka jcheʼumi sok ja kakʼixuki. Ayni kiʼoj ja cholal bʼa yajel makunuk mas ja jtyempo bʼa sjejelyi ja smeranil bʼa Biblia ja kristyanoʼiki. Yajni wa xjul jkʼujol ja jas ekʼta, wa xpensaraʼan ja kolxa chamkon yajni keremonto sok jel xkaʼa tsʼakatal ja slekilalik kilunej man wego. Mi kechan sakʼan ayon, cha ayni kiʼoj jun smajlajel. Jelxani xkʼankʼunikuj a-kʼotuk ja Tsamal Lugar kʼapubʼali, ja tyempo bʼa jaxtani oj ajyuk ja bʼa toji sok «mixani oj ajyuk chamelal» (Apocalipsis 21:3, 4).

[Xcholjel]

«Jelni snikawon snajel ke ja Dyos ayni jun sbʼiʼil»

[Poto]

Ja jtatam sok ja keʼn jel xyakitikon gusto sjejelyi ja rasonik bʼa Biblia ja matik mi xyabʼ kʼinali