Biblia kalakgpalinilh xlatamatkan

¿TUKU makgtayalh chatum tsumat nakgalhi xaxlikana tapaxuwan? ¿Tuku makgtayalh chatum xaluku político nalichuwinan xatlan tamakatsinin? Kaʼakxilhti tuku kamakgtayalh.

«Lu xaklakaskin pi xkilimasiyanika tapaxkit» (INNA LEZHNINA)

KATA AKXNI LAKACHILH: 1981

PAÍS: RUSIA

ATANU: NI XPAXUWA AKXNI AKTSUJKU XWANIT

LA XAKLAMA: Kinatlatni akgatapa xwankgonit chu akit na akgatapa klakachilh. Xapulana akgchaxan kata xakpaxuwa, pero alistalh kintlat chu kintse lakxtlawakgolh xtamakgaxtokgatkan. Maski lu aktsujku xakwanit, xakʼakgatekgsa tuku xlama chu lu klilipuwa. Akxni lakxtlawakgolh xtamakgaxtokgatkan, kintlat chu xapuxku kintala tamakgxtakgkgolh kTroick chu kintse kililh kCheliabinsk. Alistalh kintse tamakgaxtokgpa. Kintutlat xakgotni xwanit chu lu xkinkakgaxiyan.

Kkata 1993, xapuxku kintala muxtulh. Uma lu kinkamakgalipuwan. Kintse na tsukulh kgota chu na lu nitlan tsukulh kilikatsini. Akit ktsukulh putsa tlakg xatlan latamat. Lu xaklakaskin pi xkilimasiyanika tapaxkit. Ktsukulh putsa tamakgtay kmakgapitsi takanajla, pero ni ktekgsli.

BIBLIA LAKGPALILH KILATAMAT: Akxni xakkgalhi 13 kata, chatum kincompañera xalak escuela tiku xtatayana Jehová xwanit kilitachuwinalh makgapitsi tuku lichuwinan Biblia. Xaklakgati tuku xlichuwinan xlakata Noé chu Job, tiku skujnanikgolh Dios maski tuwa tuku titaxtukgolh. Ni makgas kilhtamaku titaxtulh ktsukulh klikgalhtawakga Biblia chu ktsukulh katatamakxtumi xtatayananin Jehová.

Anta kxTachuwin Dios lhuwa tuku xaxlikana kkatsinilh nema lu klakgatilh. Lu klipaxuwalh akxni kkatsilh pi Dios kgalhi xtukuwani (Salmo 83:18). Kaks klilakawa pi Biblia lu liwana xlichuwinan la xʼama wan «xaʼawatiya kilhtamaku» (2 Timoteo 3:1-5). Lu klipaxuwalh akxni kkatsilh pi tiku nikgonita nalakastakwanamparakgo. Kalilakpuwanti: ¡tlan nakakxilhpara kintala! (Juan 5:28, 29).

Pero ni putum lipaxuwakgolh tuku xakkatsinima. Kintse chu kintutlat ni xkaʼakxilhputunkgo xtatayananin Jehová chu xkimafuerzajnimakgo xlakata nialh xaklikgalhtawakgalh Biblia. Pero akit lu xaklakgati tuku xakkatsinima chu ni xakama makgxtakga.

Lu tuwa kmakgkatsilh xlakata kifamilia ni xlakaskinkgo pi xakkgalhtawakgalh. Atanu tuku nitlan ktitaxtuw wa pi kintala tiku tlakg xaʼaktsujku xwanit, tiku na xaktaʼan ktamakxtumit, na muxtulh. Pero xtatayananin Jehová ankgalhin kimakgtayakgolh. Xlakan kilimasiyanikgolh tapaxkit chu tlan kimamakgkatsinikgolh, wa uma tuku ankgalhin xakputsanit. Liwana kkatsilh pi wa uma xaxlikana takanajla xwanit, wa xlakata, ktamunulh kkata 1996 chu xtatayana Jehová klitaxtulh.

TUKU TLAN KINKITAXTUNINIT: Titaxtunita akgchaxan kata lata ktatamakgaxtokgnit Dmitry, chatum chixku tiku lu tlan likatsi. Kmakgtayanamaw ksucursal xla xtatayananin Jehová xalak San Petersburgo. Titaxtulh kilhtamaku, kinatlatni nialh lu lisitsikgolh xlakata tuku xakkanajla.

¡Lu kpaxtikatsini xlakata klakgapasli Jehová! Lu kimakgapaxuwa xlakata kskujnanima.

«Lhuwa takgalhskinin xakkgalhi» (RAUDEL RODRÍGUEZ RODRÍGUEZ)

KATA AKXNI LAKACHILH: 1959

PAÍS: CUBA

ATANU: XALUKU POLÍTICO

LA XAKLAMA: Kstakli kLa Habana (Cuba), kʼakgtum kachikin niku lu xlatalachipakan kkatijinin. Akxni kgawasaku xakwanit lu xaklakgati yudo chu atanu takgaman niku na lakgaxikan.

Xlakata lu tlan xkinkitaxtunima kʼescuela, kinatlanti kiwanikgolh pi xakalh kʼuniversidad. Anta ktsukulh lakpuwan pi política xalak kimpaís xlitalakgpalit xwanit chu ktsukulh katalalakataki mapakgsinanin. Akit chu chatum kincompañero xalak escuela ktalachipaw chatum policía xlakata xakmakglhtiw xlikan chu kmasipaniw kxʼakgxakga. Wa xlakata kinkatamaknukan kpulachin chu wanka pi xʼamaka kinkamakgnikanan. ¡Kajku 20 kata xakkgalhi chu xakamaja niy!

Anta niku kiʼakstu xkilakgachinukanit xakmakgatawakga la nakkalimasiyani tiku xʼamakgo kimakgnikgo pi ni xakpekuan. Pero nachuna xakkatsiputun tuku xlakata anan tuku ni xaʼakgstitum kkakilhtamaku o komo tlan natekgsaw xaxlikana tapaxuwan.

BIBLIA LAKGPALILH KILATAMAT:Alistalh kinkawanikan pi nialh xʼamaka kinkamakgnikanan, pero xakamaw tanuyaw puxamakaw kata kpulachin. Ama kilhtamaku kkalakgapasli xtatayananin Jehová tiku xkatamaknukanit kpulachin kaj xlakata xtakanajlakan. Lu kaks kimalakawanilh pi ni xpekuankgo chu ni xtaʼakglhuwikgo. Maski ni xlilat tuku xkalitamaknukanit kpulachin ni ksitsikgo.

Xtatayananin Jehová kiwanikgolh pi Dios wi tuku lakpuwanit natlawa xpalakata latamanin. Kilimasiyanikgolh Biblia pi Dios akgtum paraíso natlawa katiyatni niku nialh naʼanan tuku nitlan chu tiku tlan likatsikgo, anta nalatamakgo putum kilhtamaku chu nialh katikgalhikgolh talakgalhin (Salmo 37:29).

Xaklakgati tuku xkimasiyanimakgo, pero akit nichuna xaklikatsi la xlakan. Xaklakpuwan pi akit nila xakama makgxtakga política chu pi ni xakama masta talakaskin pi xkintlawanika tuku nitlan Wa xlakata kiʼakstu ktsukulh klikgalhtawakga Biblia. Akxni klikgalhtawakgakgolh, kʼakgatekgsli pi kajwatiya xtatayananin Jehová xlikatsikgo la xapulana kstalaninanin Cristo.

Takgalhtawakga xalak Biblia kimasiyanilh pi xtalakaskin lu naktalakgpali. Xtalakaskin nialh xakwa laklixkajni tachuwin. Na xtalakaskin nialh xakxkulilh chu nialh xakmakgtanulh kpolítica. Tuwa kmakgkatsilh pero Jehová kimakgtayalh tsinu tsinu xaklakgmakgalh uma tayat.

Pulaktum tuku lu tuwa kmakgkatsinit wa pi ni lu xasitsin nakwan. Chuntiyaku kskini Dios pi kakimakgtayalh nialh lu naksitsi. Lu kimakgtayanit texto chuna la Proverbios 16:32, anta wan: «Tiku ni lakapala sitsi tlakg tlan nixawa xatliwakga chixku; chu tiku makaksa xtasitsi tlakg tlan nixawa tiku akgchipa lanka kachikin».

Kkata 1991 kimunuka kʼakgtum barril niku xtajuma chuchut anta kpulachin chu xtatayana Jehová klitaxtulh. Akgtum kata alistalh, makgapitsi tachin kinkamakgxtakgkan chu kinkamalakgachakan kʼEspaña, xlakata anta xakkgalhiyaw makgapitsi kintalilakgapasnikan. Akxni kchalh tunkun ktsukulh katatamakxtumi xtatayananin Jehová, xlakan lu tlan kimakgamakglhtinankgolh xtachuna la komo makgasa xkilakgapaskgo chu kimakgtayakgolh naklin xatlan latamat.

TUKU TLAN KINKITAXTUNINIT: La uku lu kpaxuwa chu akxtum kkataskujnanima Dios kimpuskat chu kilaktsuman. Kkgalhi talakgalhaman naklimaxtu lhuwa kilhtamaku xlakata nakkamasiyani amakgapitsin tuku xaxlikana masiya Biblia. Min kilhtamaku klilakpuwan akxni kgawasaku xakwanit chu xakamaja niy, lu kpaxtikatsini tasikulunalin nema kmakglhtinanit. Ni kajwatiya ni knilh, wata kkgalhi akgtum takgalhkgalhin. Lu kkgalhkgalhima akxni katiyatni akgtum Paraíso nawan chuna la malaknukanit, akxni nialh naʼanan tuku nitlan chu «nialhti katinilh» (Apocalipsis 21:3, 4).

[Tuku lichuwinan]

«Lu klipaxuwalh akxni kkatsilh pi Dios kgalhi xtukuwani»

[Dibujo]

Kinchixku chu akit lu klakgatiyaw kkamasiyaniyaw tuku wan Biblia tiku akgatapa