Baibel i Save Senisim i Stap Bilong Man

OLSEM WANEM wanpela yangpela meri husat i bin karim bikpela hevi long taim em i liklik, nau i stap bilong em i gat as tru bilong en? Wanem samting i kirapim wanpela man i save bikhet long lain politik long kamap gutpela man bilong autim tok bilong God? Ritim stori bilong ol bilong kisim bekim.

“Mi gat laik tru bai wanpela i laikim mi na sori long mi.”—INNA LEZHNINA

YIA MI BON: 1981

KANTRI: RASIA

BIPO: KARIM BIKPELA HEVI TAIM MI LIKLIK

LAIP BILONG MI LONG BIPO: Mi yaupas taim mama i karim mi, na papamama bilong mi tu i yaupas. I kam inap long taim mi gat 6-pela krismas, laip bilong mi i gutpela tru. Tasol nau papamama bilong mi ol i divos. Maski mi liklik yet, mi kliagut long samting divos i save kamapim, na dispela i mekim mi bel hevi tru. Bihain long divos, papa na bikbrata bilong mi ol i stap bek long Troitsk, na mama i kisim mi na mipela i go sindaun long Chelyabinsk. Bihain em i marit gen. Waspapa bilong mi em i man bilong dring planti, na planti taim em i save paitim mama na mi.

Long 1993, bikbrata mi laikim tumas em i draun long wara. Famili bilong mipela i kirap nogut tru long dispela eksiden. Mama i kirap long dring oltaim, na em tu i mekim nogut long mi wankain olsem waspapa i save mekim. Mi kirap long mekim ol samting bilong painim gutpela sindaun. Mi gat laik tru bai wanpela i laikim mi na sori long mi. Mi stat long go long ol narapela narapela lotu bilong mekim gut bel bilong mi, tasol mi no painim wanpela.

BAIBEL I SENISIM I STAP BILONG MI: Taim mi gat 13 krismas, wanpela wanklas em i Witnes Bilong Jehova, em i tokim mi long sampela stori bilong Baibel. Mi amamas long kisim save long ol man bilong Baibel olsem Noa na Jop, em ol i bin mekim wok bilong God maski ol i karim planti hevi. I no longtaim na mi stadi long Baibel wantaim ol Witnes na mi go long ol miting bilong ol.

Taim mi stadi long Baibel mi kisim save long planti gutpela tok i tru. Mi pilim tru long bel taim mi kisim save olsem God i gat nem tru bilong em. (Song 83:18, NW) Mi kirap nogut taim mi lukim olsem Baibel i tokaut stret long ol samting bai kamap long “taim bilong las de.” (2 Timoti 3:1-5) Na mi amamas tru long kisim save olsem ol man i dai pinis ol bai kirap bek. Tingim—mi bai lukim gen brata bilong mi!—Jon 5:28, 29.

 Tasol i no olgeta man i amamas long nupela bilip bilong mi. Mama na waspapa bilong mi ol i birua long ol Witnes Bilong Jehova. Ol i traim long putim presa long mi bambai mi lusim Baibel stadi. Tasol mi laikim tru ol samting mi kisim skul long en, na mi no laik lusim.

Mi hatwok long karim hevi bilong famili i birua long mi. Narapela hevi gen i kamap taim liklik brata bilong mi husat i save go wantaim mi long ol miting bilong ol Witnes Bilong Jehova, em tu i draun. Tasol oltaim ol Witnes i stap redi bilong mekim gut bel bilong mi. Mi pilim tru olsem ol i laikim mi na sori long mi, em samting mi bin i gat laik tru long en. Mi save olsem dispela em i lotu i tru. Long 1996, mi kisim baptais na kamap wanpela Witnes Bilong Jehova.

GUTPELA SAMTING I PAINIM MI: Insait long 6-pela yia i go pinis mi marit long wanpela gutpela man, nem bilong em Dmitry. Mitupela wantaim i mekim wok long brens ofis bilong ol Witnes Bilong Jehova long St. Petersburg. Bihain, papamama bilong mi ol i orait long bilip bilong mi.

Mi tenkyu tru olsem mi save long Jehova! Mi mekim wok bilong em na dispela i mekim na i stap bilong mi i gat as tru bilong en.

“Mi gat planti askim tru long ol samting.”—RAUDEL RODRÍGUEZ RODRÍGUEZ

YIA MI BON: 1959

KANTRI: KUBA

BIPO: BIKHET LONG LAIN POLITIK

LAIP BILONG MI LONG BIPO: Mi bon long Havana, Kuba, na mi kamap bikpela long wanpela hap we planti taim ol man i save singaut bikmaus na pait nabaut long strit. Taim mi wok long kamap bikpela, mi gat laik long insait long spot judo na sampela narapela spot bilong pait.

Mi gutpela sumatin, na papamama i kirapim mi long go long yunivesiti. Taim mi stap long yunivesiti, mi pilim olsem i mas i gat senis long wok politik bilong kantri bilong mi. Mi kirap long bikhet. Mi na wanpela wanklas bilong mi i paitim wanpela polisman, long wanem, mipela i laik stilim gan bilong em. Dispela pait i mekim na polisman i kisim bikpela bagarap long het bilong em. Ol i kalabusim mi na wanklas bilong mi, na kot i tok ol  sutman bai sutim mipela long gan na kilim mipela i dai. Mi gat 20 krismas tasol, na klostu ol i kilim mi i dai!

Taim mi stap wanpis long rum kalabus, mi prektisim pasin mi bai mekim long ai bilong ol sutman. Mi no laik soim olsem mi pret. Long wankain taim, mi tingting planti long sampela askim. Mi tingting: ‘Bilong wanem pasin i no stret i pulap tru long graun? Yumi bilong i stap nau tasol?’

BAIBEL I SENISIM I STAP BILONG MI: Bihain kot i senisim strafe bilong mipela na tok mipela bai stap kalabus inap 30 yia. Long dispela taim stret mi bungim sampela Witnes Bilong Jehova em ol i stap long kalabus, long wanem, ol i bin holimpas bilip. Mi kirap nogut tru long pasin bilong ol Witnes long stap bel isi na i no pret. Maski ol i kalabusim ol nating, ol i no belhat o bel nogut, nogat.

Ol Witnes i skulim mi olsem God i tingting pinis long mekim gutpela samting bilong helpim ol man. Ol i soim mi long Baibel olsem God bai kamapim Paradais long graun na bai i no gat pasin raskol na pasin i no stret. Ol i skulim mi olsem graun bai pulap long ol gutpela manmeri na ol bai i gat gutpela sindaun tru na stap laip oltaim.—Song 37:29.

Mi amamas long samting ol Witnes i skulim mi long en, tasol pasin bilong mi i no wankain liklik long pasin bilong ol. Mi tingting olsem mi bai hatwok tru long stap longwe long wok politik. Olsem na mi yet i kirap long ritim Baibel. Taim mi pinis long ritim, mi luksave olsem ol Witnes Bilong Jehova tasol i bihainim pasin bilong ol Kristen bilong pastaim.

Mi stadi long Baibel na mi kisim save olsem mi mas mekim sampela bikpela senis long laip bilong mi. Olsem, mi mas senisim pasin bilong mi long toktok, long wanem, mi gat pasin bilong kolim ol tok swea long olgeta taim. Na tu, mi mas lusim pasin bilong smok. Na mi no ken insait liklik long wok politik. I hatwok long mekim ol dispela senis, tasol Jehova i helpim mi na isi isi mi senisim pasin bilong mi.

Wanpela samting i hatwok tru long mekim, em long bosim belhat bilong mi. Mi save beten yet bilong bosim gut bel bambai mi no ken belhat. Ol tok bilong Baibel olsem Sindaun 16:32 i helpim mi tru, em i tok: “Man i no save belhat kwik, em i mekim gutpela pasin. Dispela pasin i winim pasin bilong pait strong olsem gutpela soldia. Na man i bosim gut em yet, em i winim man i pait strong na kisim wanpela taun.”

Long 1991, mi kisim baptais na kamap wanpela Witnes Bilong Jehova. Ol i baptaisim mi insait long wanpela dram wara long haus kalabus. Long yia bihain, ol i rausim mipela sampela long kalabus na salim mipela i go long Spen, long wanem, mipela i gat sampela wanblut long hap. Taim mi go kamap long Spen, wantu mi go long ol miting bilong ol Witnes Bilong Jehova. Ol Witnes long Spen i welkamim mi na i olsem mi bin stap wantaim ol inap planti yia pinis. Ol i helpim mi long kirapim nupela sindaun long hap.

GUTPELA SAMTING I PAINIM MI: Mi amamas long mekim wok bilong God wantaim meri na tupela pikinini meri bilong mi. Em gutpela samting long mi inap lusim bikpela haptaim long helpim ol narapela long kisim save long tok bilong Baibel. Sampela taim mi save tingim bek dispela yangpela man klostu em i dai, na mi tenkyu tru long planti gutpela samting mi bin kisim. Mi stap laip, na tu, mi inap wetim gutpela samting bai kamap bihain. Mi wetim dispela Paradais em God i tok promis long en—em taim we stretpela pasin tasol bai stap na “i no gat dai moa.”—Revelesen 21:3, 4.

[Rait long pes 19]

“Mi pilim tru long bel taim mi kisim save olsem God i gat nem tru bilong em”

[Piksa long pes 20]

Mitupela man bilong mi i amamas long yusim wanpela program bilong skulim ol yaupas