La Biblia bitzaʼ mod bibanyibu

¿XIMOD bidudy cuent toib mbioxhlasien que noʼ xí portín noʼbu ló Gudxlio ná diti sacró bibanybu dzú gócbu mbioxien? ¿Xí buny que toib buñ político ni góc buñ mal bidxin góc toib ni goniʼ diitz sacró? Guisianno que láacayibu guiniʼyibu.

«Goniiny naʼ ñoʼ ni ñonladx né nagobioo naʼ» (INNA LEZHNINA)

ÍZ NI GOLBU: 1981

GUDX: RUSIA

TIPNÉS CÓS NI BUNYBU: DITI SACRÓ BIBANYBU DZÚ GÓCBU MBIOXIEN

NI BUNI LÓ DZÚ NI SEE: Bixiosa né xinaʼya gocyibu buñgüet, né naʼ scúca goola. Nigolú nakit bibani dada órni gopa xhoop íz, per par dzúcu bixiosa né xinaʼya bichílyibu xcaltzeelyibu. Ná mitiensa naʼ dzúcu, bidudi cuent xi ni cayac né bioʼobgoluni naʼ. Después de ngú bixiosa né bisan lagola biaʼanyibu lainy gudx Troick, né xinaʼya goyné naʼ lainy gudx Cheliabinsk. Bidxin midid xinaʼya buny galtzeʼel stoib. Tzeʼel xinaʼya nigolú gosoch né guirá ór godimbu guiropcado.

Ló íz 1993, bisan lagola goity. Ngú nigolú bisioʼob guirácado. Xinaʼya gosaló gosoch né láaca gosaló godimbu naʼ. Goniiny naʼ nabani sacró. Ni goniiny naʼ ngú ñoʼ ni ñonladx né nagobioo naʼ. Biyobi mod ñaldó xcalnabani lainy xidal iglesias, per ni toibni diti bisialdó xcalnabani.

¿XIMOD BITZAʼ LA BIBLIA MOD BIBANI?: Dzú gopa 13 íz, toib xcompañera ni goyee scuel toibsi né naʼ ni góc testigo xtuny Jehová góoch naʼ tipnés historias ni sieed ló la Biblia. Nigolú bioladxi mod bibany Noé né Job, portín layibu bunyibu ni ná Dios ná cualóyibu galnagan. Diti xidzú gosaló bisudi la Biblia né Testigos né goyaʼya xireuniónyibu.

Ló Xtiitz Dios bisudi xidal galnigolú sacróyen. Ni goona que noʼ laa Dios bidxinni lainy xcalnabani (Salmo 83:18). Bidziguiaʼya mod nayadit rabexa la Biblia xi guirá gac ló «dzú ni ma guidubylagaʼ» (2 Timoteo 3:1-5). Né nigolú bibaladxi ni goona que siás gueʼet stoib. Colgonysi pensary: ¡sabiʼya bisana stoib! (Juan 5:28, 29).

Per diti guirá buñ goyoʼ nakit né na’. Xinaʼya né tzeʼel diti bioladxyibu nadzakyibu testigos xtuny Jehová, por ngú gochyibu naʼ que ma diti nasudi la Biblia. Per naʼ la nigolú bioladxi ni casudi né diti goniiny naʼ nareʼgana.

Nagan gocni par naʼ portín xfamilquiya diti bioladx nasudi. Órcu goyoʼ stoib desgrasy: bisan lahuina, ni buny compañer naʼ ló xireunión testigos xtuny Jehová, láaca goity. Per Testigos dipa bisian naʼ. Ladyibu bidzela galnadxiʼ né ni godabioo naʼ ni biyobi dada dzú góca mbioxien. Órcu gondxichi que layibu ngú religión ni rasuidy xinésni, ló íz 1996 goyonisa xomod testigo xtuny Jehová.

¿XÍ GALNASÁC MA CUAʼYA?: Ma sanéya xhoop íz de goló buni galtzeʼel né toib buñtzay ni laa Dmitry. Guiropcado ronydo dxiin lainy sucursal de testigos xtuny Jehová ni noʼ lainy gudx San Petersburgo. Después xinaʼya né tzeʼel ma diti bianladxyibu naʼ por ni roni crer.

¡Radudi guixquix Jehová por ni ma rimbuya láabu! Ni cayoni xchiimbu ma diti nac nacsi nabani.

«Xidal galrranabdiitz goloʼ naʼ ló galrrasaʼ» (RAUDEL RODRÍGUEZ RODRÍGUEZ)

ÍZ NI GOLBU: 1959

GUDX: CUBA

TIPNÉS CÓS NI BUNYBU: TOIB BUÑ POLÍTICO NI GÓC BUÑ MAL

NI BUNI LÓ DZÚ NI SEE: Goola lainy toib lagary ni laa, Habana (Cuba) né goniʼsa lainy toib lagary pobre ro godiilgoluʼ buñ. Dzú góca mbioxhlas nigolú bioladxi nadíila, né láaca bioladxi stipnés galrraguit.

Nigolú naní góc guica órni goyaʼya scuel, por ngú bixiosa né xinaʼya buny animaryibu naʼ ñaʼya toib scuel xirop. Cu gosaló buni crer que mod rony políticos dxiin lainy xcudxi non natzaʼni né ma diti bisoba buñchiin. Toib compañer ni goyee scuel toibsi né naʼ cualódo toib policia par nabanndo xquipbu né golaʼdo guicbu. Né xtol ngú, goyoʼdo press né dada goniʼyibu nagaityibu lóodo. ¡Par ló dzúcu gál ízsa náapa né ma goniʼyibu gati!

Dzú ma noʼya lainy press buni pensary ximod ñoni órni ma sagaʼya nisló buñcu ni ma guigaity naʼ, par diti nadudyibu cuent que radzubi. Per láaca goyoʼya ló galrrasaʼ ximod rarexa xidal galrranabdiitz, ¿xigony diti rac xinésni ló Gudxlio né pal modreʼsi guibany buñ.

¿XIMOD BITZAʼ LA BIBLIA MOD BIBANI?: Bidxin midid goniʼyibu ma diti guigaitybu lóodo per ñeʼgdo cu por treint íz. Par ló dzúcu bimbuya tipnés testigos xtuny Jehová ni nayeg cu por guirá ni ronyibu crer. Nigolú bidziguiaʼya mod gopyibu balory, né mod gocyibu buñdzuu. Ná diti noʼ ni bunyibu ni nayegyibu cu, diti bidzuitzyibu nili goyoʼ nabanyibu.

Testigos gochyibu naʼ ni nainy Dios gony né buñgudxlio. Bíilbu la Biblia né naʼ ro rasetlani que Dios sony Gudxlio reʼ toib lagary móz ro ma diti sac cós mal né ro gac xinésni, nosi siaʼan buñtzay ni guibany tipzó ló Gudxlio (Salmo 37:29).

Nigolú bioladxi ni bisuidyibu naʼ, per naʼ diti góca xomod layibu. Buni pensary que diti labúu nasagaʼ galaya ló política, por ngú ma stipnaʼca biila la Biblia. Órni bidopy biila láani, bidudi cuent que nosi testigos xtuny Jehová nacyibu mod góc cristianos ni goyoʼ ló siglo primero.

Ni bisudi ló la Biblia bisienni naʼ que non natzaʼya mod naca. Que non natzaʼya mod goniya, portín guirá ór goniya diitznaa. Né láaca nasiana nagoba gues né ma diti ñoʼya lad partid. Nagan gocni par naʼ, per né xcalrracné Jehová, dxoga dxoga labúu buni láani.

Toib cós ni gosac nagana ngú nasiana galrradzuitz. Dada nigoreʼ ranaba Dios gacné naʼ par diti guidzuitzi. Nigolú racné naʼ ni sieed ló Proverbios 16:32: «Buñ paseins más galán nacbu que toib buñ ni nap xiroʼ galnadip; né toib ni diti nimaca radzuitz huaity, más galán nacbu que toib buñ ni rony gan toib gudx».

Íz 1991 goyonisa xomod testigo xtuny Jehová lainy press. Tobiz después, tipnés ni noʼ né naʼ bireʼdo né soʼdo España portín napdo xfamildo cu. Órni bidxina cu, gosalócaya goyaʼya xireunión testigos xtuny Jehová, layibu godabioyibu naʼ suusi ma nimbuyibu naʼ por xidal íz né gocnéyibu naʼ par nabani sacró.

¿XÍ GALNASÁC MA CUAʼYA?: Nigoreʼ goxtiguie nabani né cayoni xchiin Dios né tzeʼela né xiindzapa. Né napa privilegio nodieʼya casudi buñ ni ná la Biblia. Rioʼ ór, roni xpensari, né rasetnaladxi dzú góca mbioxhlas ro mersi ñati né radudi guixquix por guirá galnasác ni ma napa. Diti nosi nabani láaca napa esperanza. Nainy naʼ guidxin dzú ro ma gac Gudxlio toib lagary móz, ro ma gac xinésni né ro «ma diti sioʼ galgoity» (Apocalipsis 21:3, 4).

[Comentario]

«Gosaca sacró ni goona que noʼ laa Dios».

[Dibuj]

Tzeʼela né naʼ rioladxdo guisuidydo buñgüet ni ná la Biblia.