Mulandu Nshi Lesa Aebele Abrahamu Ukutuula Umwana Wakwe Ilambo?
Ababelenga Ino Magazini Balepusha Ukuti . . .
Mulandu Nshi Lesa Aebele Abrahamu Ukutuula Umwana Wakwe Ilambo?
▪ Ukulingana na mashiwi yalembwa mwi buuku lya mu Baibolo ilya Ukutendeka, Yehova Lesa aebele Abrahamu ukutuula umwana wakwe Isaki ilambo. (Ukutendeka 22:2) Ababelenga Baibolo bamo balafilwa ukumfwikisha ili lyashi. Profesa Carol atile: “Lintu nabelengele ili lyashi umuku wa kubalilapo ilyo nali umwaice, nalikalipe sana. Ni Lesa wa musango nshi uwingeba umuntu ukucita icintu icabipa ifi?” Kwena ca cine ukuti abantu kuti bakalipa, nomba kuli ifishinka fimo ifyo tushifwile ukulaba.
Ica kubalilapo, natulande pa co Yehova ashacitile. Tasuminishe Abrahamu ukutuula umwana wakwe ilambo, nangu ca kutila Abrahamu aliiteyenye ukucite ci, kabili tatala ebapo umuntu na umbi ukutuula umwana wakwe. Yehova afwaya bonse abamupepa, ukubikako fye na baice, ukuti baleipakisha ubumi no kutwalilila aba mweo.
Ica bubili, Baibolo ilangilila ukuti kwali umulandu uukalamba uwalengele ukuti Yehova ebe Abrahamu ukuti atuule umwana wakwe Isaki. Lesa alishibe ukuti pa numa ya myaka iingi, aali no kuleka Umwana wakwe, * Yesu, ukutufwila. (Mateo 20:28) Yehova alefwaya ukuti twishibe ifyo ali no kumfwa pa kupeela Umwana wakwe ilambo. Pa kweba Abrahamu ukuti atuule ilambo, alelangilila ifyo ilambo ilyo Yesu ali no kwisatuula lyali no kuba. Mulandu nshi twalandila ifi?
Tontonkanyeni pa mashiwi Yehova aebele Abrahamu ukuti: “Buula umwana obe umwaume, umwana obe umo fye mpo uo watemwisha, Isaki, . . . umutuule ngo mutuulo wa koca.” (Ukutendeka 22:2) Nga mwamona, Yehova alandile pali Isaki ukuti umwana “uo watemwisha.” Yehova alishibe ifyo Abrahamu atemenwe Isaki. Lesa na o alitemwa Umwana wakwe, Yesu. Yehova alitemwa nga nshi Yesu ica kuti imiku ibili alandile pali ena ukuti, “Umwana wandi, uo natemwa.”—Marko 1:11; 9:7.
Na kabili, ilyo Yehova ale-eba Abrahamu ukutuula Isaki ilambo, alimucindike. Umuntu umo uwasoma Baibolo atile “SHIKULU alishibe ifyo Abrahamu ali no kubipilwa sana pa kutuula umwana wakwe ilambo.” Nge fyo twingenekela, ifi Yehova aebele Abrahamu fyali no kulenga Abrahamu ukumfwa sana ubulanda; e fyo cali na kuli Yehova, te kuti twelenganye no kwelenganya ifyo aumfwile sana ubulanda ilyo alemona Umwana wakwe uo atemwa alecula mpaka afwa. Ukwabula no kutwishika, imfwa ya kwa Yesu e cintu icaleteele sana Yehova ubulanda kabili takwakabe na cimbi icikamuletela sana ubulanda nge ci.
Kanshi, nangu ca kutila kuti twaumfwa ububi pa fyo Yehova aebele Abrahamu ukucita, kuti cawama ukulaibukisha ukuti Yehova tasuminishe uyu mwaume wa citetekelo ukutuula umwana wakwe ilambo. Talekele Abrahamu ukuba no bulanda ubukalamba ubo ali no kukwata atuula umwana wakwe; alicingilile Isaki ku mfwa. Nomba Yehova ena takeenye “Umwana wakwe lelo alimupeele pa mulandu wa ifwe bonse.” (Abena Roma 8:32) Mulandu nshi Yehova alekele ukuti icintu cabipa ifi cicitike? Ni pa kuti ‘tukwate umweo.’ (1 Yohane 4:9) Ala mwandini ici Lesa acitile cilenga twaishiba ukuti alitutemwa nga nshi! Kanshi na ifwe tufwile ukumutemwa! *
[Amafutunoti]
^ para. 5 Baibolo taisambilisha ukuti Lesa alikwete umukashi pa kuti afyale Yesu. Lelo, Yehova abumbile malaika uwaishilefyalwa pano calo muli nacisungu Maria. Apo Lesa e wabumbile Yesu, calilinga ukumwita ukuti Wishi wa kwa Yesu.
^ para. 8 Nga mulefwaya ukwishibilapo na fimbi pa mulandu Yesu alingiile ukufwa ne fyo twingalanga ukuti tulatasha pa mfwa yakwe, belengeni icipandwa 5 mu citabo citila Bushe Cinshi Baibolo Isambilisha?
