Ekuma Nzambi Kalombela Abarayama Kavana Mwan’andi se Kimenga?
Yuvu Y’atangi Eto . . .
Ekuma Nzambi Kalombela Abarayama Kavana Mwan’andi se Kimenga?
▪ Nze una wasonama muna Nkand’a Nzambi mun’Etuku, Yave wa Nzambi walomba kwa Abarayama kavana mwan’andi Isaki se kimenga. (Etuku 22:2) Atangi akaka a Nkand’a Nzambi ke bebakulanga lusansu lwalu ko. Nlongi mosi una ye nkumbu Carol wavova vo: “Vava yakala mwan’akete, e nkumbu antete yatanga lusansu lwalu yafunga kikilu makasi. Nkia mpila Nzambi olenda lomba diambu dia mpila yayi?” Kana una vo ke diambi ko mu yindula mpila yayi, vena ye mambu mole mamfunu ke tufwete vilakana ko.
Diantete, badika dina Yave kavanga ko. Kayambula ko vo Abarayama kavana mwan’andi se kimenga, kana una vo Abarayama wakubama kakala mu vanga wo. Nzambi kalomba diaka diambu diadi kwa muntu akaka ko. Yave ozolanga vo selo yandi yawonso, kumosi yo wana bakwamanana zinga ye kiese.
Diazole, Nkand’a Nzambi usonganga vo Yave kuma kiasikila kakala kiau mu lomba vo Abarayama kavana Isaki se kimenga. Nzambi wazaya wo vo muna mvu milanda, oyambula vo Mwan’andi * Yesu kafwa muna wete dieto. (Matai 20:28) Yave wazola kutusonga una kadi mona muna tambika kimenga kiaki. Dina Yave kalomba kwa Abarayama disonganga dina kadi vanga mu vana kimenga kiaki. Mu nkia mpila?
Badika mvovo mia Yave kwa Abarayama: ‘Bong’owau o mwan’aku, ona wamosi, on’ozolele, una vo i Isaki, . . . umfutumwina se lukau.’ (Etuku 22:2) Tumwene vo Yave wayikila Isaki vo mwana “on’ozolele.” Yave wazaya wo vo Isaki wantalu kakala vana meso ma Abarayama. I wau mpe Nzambi kebadikilanga Mwan’andi Yesu. Yave otoma zolanga Yesu, mu kuma kiaki, nkumbu miole kayikila Yesu tuka kun’ezulu vo “Mwan’ame anzolwa.”—Maku 1:11; 9:7.
Muna ndinga Kiyibere, e mvovo kasadila Yave vava kalomba kwa Abarayama vo kavana Isaki se kimenga, ndomba ya luzitu misonganga. Nkwa ngangu mosi ofimpanga Nkand’a Nzambi wavova vo e mvovo kasadila Nzambi misonganga vo “MFUMU ozeye ntalu a lekwa kelombanga.” E ndomba yayi yakendeleka kikilu Abarayama; diau adimosi mpe, tulenda yindula e mpasi kamona o Yave vava Mwan’andi kamonang’e mpasi yo fwa. Kieleka, ezazi i mpasi zisundidi kamona kala o Yave ye kesinga zo mona diaka ko.
Kana una vo tulenda funga makasi avo tutangidi dina Yave kalomba kwa Abarayama, diangangu mu sungamena vo Yave kayambula ko vo selo kiandi kia kwikizi kavana mwan’andi se kimenga. Kayambula ko vo Abarayama kabaka mfwilu usundidi mfwilu miawonso mina mase balenda baka; watanina Isaki mu lembi fwa. Kansi, Yave kavûkisa ‘Mwan’andi ko, wanyekwela kaka muna diambu dia yeto awonso.’ (Roma 8:32) Ekuma Yave katambulwila vo kamona e mpasi zazi? Wavanga wo kimana ‘twavw’o moyo.’ (1 Yoane 4:9) Ekwe mpil’a zola katusonga Nzambi! Nga ediadi ke difwete kutufila ko mu kunsonga mpe o zola? *
[Mvovo Vana Yand’a lukaya]
^ tini. 5 Nkand’a Nzambi ke ulonganga ko vo Nzambi yo nkento kawuta yandi Yesu. Kansi, Yave vangwa kia mwanda kasema, i bosi wayambula vo kawutuka ova ntoto muna vumu kia Maria wa mwenze. Wau vo yandi wasema Yesu, Nzambi wafwana yikilwa vo S’andi.
^ tini. 8 Muna zaya ekuma lufwa lwa Yesu lwakadila o mfunu ye una tulenda songela luyangalalu lweto, tala kapu kia 5 kia nkanda O Nkand’a Nzambi Adieyi Kieleka Kelonganga?
