Ki kabakalañi Mulimu ha naa kupile Abrahama ku eza mwanaa hae sitabelo?
Ze Ba Buza Babali . . .
Ki kabakalañi Mulimu ha naa kupile Abrahama ku eza mwanaa hae sitabelo?
▪ Sina mo ku ñolezwi mwa buka ya mwa Bibele ya Genese, Jehova Mulimu naa kupile Abrahama kuli a eze mwanaa hae Isaka sitabelo. (Genese 22:2) Babali ba bañwi ba Bibele ba fumana taata ku utwisisa likande leo. Caziba yo muñwi ya bizwa Carol naa bulezi kuli: “Ha ne ni utwile likande leo lwa pili inze ni sa li mwanana, ne ni filikani hahulu. Ki Mulimu ya cwañi ya naa ka kupa mutu ku eza nto ye maswe cwalo?” Nihaike kuli maikuto ao a utwahala, neikaba hande ku beya mwa munahano lisupo ze ñwi li sikai.
Sapili, mu nyakisise za naa si ka eza Jehova. Naa si ka lumeleza Abrahama ku eza mwanaa hae sitabelo nihaike kuli Abrahama naa itukiselize ku eza cwalo, mi Mulimu ha si ka kutela hape ku kupa mutu yo muñwi ku eza cwalo. Jehova u bata kuli balapeli ba hae kaufela ku kopanyeleza cwalo ni banana, ba zwelepili ku ikola bupilo bwa tabo ka nako ye telele.
Sa bubeli, Bibele i bonisa kuli Jehova naa na ni libaka le li ipitezi la ku kupa Abrahama ku eza Isaka sitabelo. Mulimu naa ziba kuli lilimo ze mianda-nda ku zwa fo, naa ka tuhelela Mwanaa Hae Jesu, * ku to lu shwela. (Mateu 20:28) Jehova naa bata kuli lu utwisise mwa naa ka ikutwela ha naa ka fa Mwanaa Hae sina sitabelo. Seo Jehova naa kupile Abrahama ku eza ne li poniso ye maata ya sitabelo sa naa ka fa kwapili. Kamukwaufi?
Mu nyakisise manzwi a Jehova ku Abrahama a li: “U nge mwanaa hao wa libanda, yo lata hahulu, yena Isaka, . . . u yo mu eza sitabelo sa ku cisa.” (Genese 22:2) Mu lemuhe kuli Jehova naa bulelezi Abrahama kuli Isaka ki mwanaa hao “yo lata hahulu.” Jehova naa ziba kuli Abrahama naa lata hahulu Isaka. Mulimu hape naa ziba mwa naa ikutwezi ka za Mwanaa hae Jesu. Jehova naa lata hahulu Jesu kuli mane habeli naa bulezi ku zwelela kwa lihalimu kuli: “Mwanaka, ya latwa.”—Mareka 1:11; 9:7.
Mu lemuhe hape kuli, Jehova ha naa kupile Abrahama ku eza mwanaa hae sitabelo, naa itusisize linzwi la Siheberu le li talusa ku kupa ka likute. Caziba yo muñwi wa za mwa Bibele u bonisa kuli Mulimu ha itusisa linzwi leo, ku talusa kuli ‘MULENA naa utwisisize butuna bwa sinyehelo ya naa ka ba ni yona Abrahama ka ku eza mwanaa hae sitabelo.’ Sina ka mo lu kona ku nahanela, kupo yeo ne i ka utwisa Abrahama butuku bo butuna. Ka nzila ye swana, lwa kona ku nahana butuku bwa naa utwile Jehova ha naa boni Mwana Hae ya latwa inze a nyandiswa ni ku shwa. Ku si na ku kakanya, Jehova naa utwile butuku bo butuna hahulu bwa naa si ka utwa kale kamba bwa si ke a utwa hape.
Hakulicwalohe, ku si na taba ni kuli lu kana lwa komokiswa ki seo Jehova naa kupile Abrahama ku eza, ne lu ka eza hande ku hupula kuli Jehova naa si ka lumeleza ñulukundi ya sepahala yo ku eza mwanaa hae sitabelo. Naa silelelize Abrahama kwa ku utwa butuku bo mushemi a kona ku utwa ha shwelwa ki mwanaa hae; Mulimu naa silelelize Isaka kwa lifu. Niteñi, Jehova naa si ka katwa “Mwanaa hae tota kono a mu fana kabakala luna kaufela.” (Maroma 8:32) Ki kabakalañi Jehova ha naa ituhelezi ku ba mwa muinelo o maswe cwalo? Naa ezize cwalo kuli “lu kone ku fumana bupilo.” (1 Joani 4:9) Ye ki kupuliso ye nde ye bonisa lilato la Mulimu ku luna! Kana ni luna ha lu susuezwi ku bonisa lilato la luna ku Mulimu? *
[Litaluso za kwatasi]
^ para. 5 Bibele ha i luti kuli Mulimu naa pepile Jesu ni musali. Kono Jehova naa bupile sibupiwa sa moya ili seo hasamulaho ne si lumilwe fa lifasi ku to pepiwa ki mwalyanjo ya bizwa Maria. Kamukwaocwalo, ka ku ba yena ya naa bupile Jesu, Mulimu wa swanelwa ku bizwa kuli ki Ndataahe Jesu.
^ para. 8 Kuli mu zibe litaba ze ñata ka za libaka lifu la Jesu ha ne li tokwahala, ni ka mo mu kona ku boniseza buitebuho bwa mina kwa lifu la hae la sitabelo, mu bone kauhanyo 5 mwa buka ya Bibele I Lutañi Luli?
