Muloñadi Nzambi chamulejeleliyi Abarahama kulambula mwanindi?
Malwihu Ehulañawu Antañi . . .
Muloñadi Nzambi chamulejeleliyi Abarahama kulambula mwanindi?
▪ Kwesekeja nachasonekawu mumukanda wamuBayibolu waKutachika, Yehova Nzambi wamulejeli Abarahama kulambula mwanindi Isaka. (Kutachika 22:2) Atañi aBayibolu amakwawu chayikalilaña kutiyishisha iyi nsañu. Nkuluñaña wejina daCarol wahosheli nindi, “Chinatiyili iyi nsañu katachi hampinji yinadiñi kansi nahayamini nawa natiyili kutama. HiNzambi wamuchidinyi wukuleja muntu kwila chuma chamuchidiwu?” Hela chakwila kutoñojoka muniyi njila kwatama wanyi, chikutukwasha neyi twanuka iyi yikuma yiyedi.
Chatachi, shinshikenu chuma chabulili kwilayi Yehova. Wamwitejeli wanyi Abarahama kulambula mwanindi, hela chakwila Abarahama wadiloñesheli kumulambula, nawa Nzambi kanda yalejeñahu dehi cheñi muntu mukwawu kwila chumichi. Yehova wakeñaña akwakudifukula indi kushilahu nianyana nindi atwalekuhu kwikala namuzañalu muchihandilu.
Chamuchiyedi, Bayibolu yalumbulula nawu kwadiña chuma chadimena chamuleñeleli Yehova kumuleja Abarahama kulonda yamulambuli Isaka. Nzambi welukili nindi chimwakahita yaaka yayivulu nankashi, Wuketeja Mwanindi * Yesu kutufwila. (Matewu 20:28) Yehova wakeñeleña nindi twiluki chatiyili hakuhana iwu mulambu. Chuma chamulejeliyi Abarahama kwila chamwekesheli mulambu wasweja kutoha wakahanayi kumbidi. Munjilanyi?
Shinshikenu mazu amulejeluwu Abarahama kudi Yehova: “Tambulaku mwaneyi, weyi wumu hohu wakeña, yowu Isaka . . . wakamulambuli Nzambi akeli mulambu wakushita.” (Kutachika 22:2) Ilukenu nenu Yehova wamuteneni Isaka nindi mwana “wumu hohu wakeña.” Yehova welukili nindi Abarahama wamukeñeli chikupu Isaka. Nzambi welukili cheñi Chamukeñeliyi Mwanindi, Yesu. Yehova wamukeñeli chikupu Yesu chakwila wahosheleli mwiwulu kapampa kayedi nakumutena Yesu nindi “Mwanami nakeña.”—Maku 1:11; 9:7.
Ilukenu nenu mwidimi dadeni, chelili Yehova yamuleji Abarahama kumulambula Isaka, wazatishili izu dachiHeberu dakulomba nakalemesha. Muntu wumu wadiza jaBayibolu wahosheli nindi Nzambi hakuzatisha idi izu chamwekeshaña nawu “MWANTA welukili nindi chikumukata nankashi Abarahama kumuchima neyi yalambula mwanindi.” Tunateli kufwikija netu chumichi chamuneñesheli chikupu Abarahama; chochimu, hitunateli kufwikija chichamukatili chikupu Yehova hakumona Mwanindi wakeñayi nakukabakana nikufwaku. Chakadi nikujina ichi dichuma chamukatili nankashi Yehova nawa kwosi chuma chikwawu chikamukatisha kumuchimaku.
Mwamweni, hela chakwila tunateli kwiteja wanyi chuma chamulejeluwu Abarahama kwila kudi Yehova, chikuwaha neyi twanuka netu Yehova hamwitejeli nkakulula washinshika kulambula mwaninduku. Hamwitejeli Abarahama kumona chuma chinateli kumuyandisha chikupu nvwaluku; wamukiñili Isaka kulonda yabuli kufwa. Ilaña Yehova wamukiñili wanyi ‘Mwanindi yomweni, hakumuhana hansañu jetwetu ejima.’ (Aroma 8:32) Muloñadi Yehova chetejeleliyi kumona chuma chakala ñana? Welili mwenimu kulonda ‘tuheti wumi.’ (1 Yowanu 4:9) Chumichi chatwanukishaña chikupu nawu Nzambi watukeña. Nawa chatela kutuleñela kumukeña Nzambi. *
[Tumazu twaheshina]
^ Bayibolu hiyatañishaña nawu Nzambi wamuvweli Yesu namumbandaku. Ilaña Yehova waleñeli chileñaleña chakuspiritu chatemesheliyi hamaseki nakuvwalikila mudi Mariya wabulahu dehi kuhumañana neyala. Chineli Yesu Amuleñeli kudi Nzambi, nateli kumutena nindi Tata yindi.
^ Hakwila mudizi yuma yayivulu yahosha hamuloña wateleleliyi Yesu kufwa nichitwatela kumwekesha netu twalemesha kufwa kwindi, talenu kapetulu 5 kamukanda wunakwila nawu Chumanyi Chacheni Chatañishaña Bayibolu?
