Kubayini UZimu Abawa U-Abrahama Bona Anikele NgeNdodanakhe?
Okubuzwa Bafundi Bakamagazini Lo . . .
Kubayini UZimu Abawa U-Abrahama Bona Anikele NgeNdodanakhe?
▪ Njengombana kutlolwe encwadini yeBhayibhili kaGenesisi, uJehova uZimu wabawa u-Abrahama bona anikele ngendodanakhe u-Isaka bona ibe mhlatjelo. (Genesisi 22:2) Abanye abafundi beBhayibhili kubabela budisi ukuzwisisa umlando lo. Omunye uphrofesa ibizo lakhe elinguCarol uthi, “Nengithoma ukuzwa indaba le ngisesemncani, ngasilingeka khulu. NguZimu onjani ongabawa umuntu bona enze into enje?” Ngitjho nanyana amazizo anjalo azwakala, senza kuhle ngokukhumbula amaphuzu ambalwa.
Kokuthoma, cabanga ngalokho uJehova angazange akwenze. Akhenge avumele u-Abrahama bona anikele ngendodanakhe, ngitjho nanyana u-Abrahama bekazimisele ukwenza njalo, ngitjho nokubawa omunye umuntu bonyana enze into enjalo. UJehova ufuna boke abakhulekeli bakhe kuhlanganise nabantwana, bona baragele phambili baphila—bathabele ukuphila isikhathi eside bathabile.
Kwesibili, iBhayibhili ilinganisa bona uJehova bekanebanga elikhethekileko lokubawa u-Abrahama bona anikele ngo-Isaka. UZimu bekazi bona emakhulwini weemnyaka alandelako, Bekazokuvumela iNdodakhe, * uJesu, bona isifele. (Matewu 20:28) UJehova bekafuna ukusitjengisa bona umhlatjelo lo bewuzokwenza alahlekelwe kangangani. Wasinikela isibonelo esinamandla somhlatjelo wesikhathi esizako loyo ngalokho akubawa ku-Abrahama. Wakwenza njani lokho?
Cabangela amezwi kaJehova ku-Abrahama: “Ngibawa uthathe indodanakho, okukuphela kwendodanakho oyithanda khulu, u-Isaka, begodu . . . unikele ngayo njengomhlatjelo wokutjhiswa.” (Genesisi 22:2) Tjheja bona uJehova waqalisa ku-Isaka njengendodana ‘ayithanda khulu.’ UJehova bekazi bona u-Isaka bekaligugu kangangani ku-Abrahama. Godu uZimu bekazi bona Bekazizwa njani ngeNdodanakhe, uJesu. UJehova bekamthanda khulu uJesu ngalokho kabili wakhuluma asezulwini, ngokunqophileko aqalisa kuJesu ‘njengeNdodana yakhe ethandekako.’—Markosi 1:11; 9:7
Godu tjheja, bona isibawo sakaJehova ku-Abrahama besihlanganisa ibizo “ngibawa.” Esinye isazi seBhayibhili silinganisa bona ukusebenzisa kwakaZimu ibizweli kutjengisa bonyana “iKOSI iyezwisisa bona bekuzokuba kulahlekelwa okungangani ngo-Abrahama ukunikela ngendodanakhe.” Njengombana singacabanga, isibaweso kufuze bona samzwisa ubuhlungu obukhulu u-Abrahama; ngendlela efanako, kungaba budisi ukucabanga ngobuhlungu uJehova abuzwako njengombana abukela iNdodanakhe itlhaga be ife. Ngokunganakuzaza bekubuhlungu obukhulu uJehova akhe aqalana nabo.
Kwamambala, nanyana kungathusa ukucabanga ngalokho uJehova abawa u-Abrahama bona akwenze, sizabe sihlakaniphile ukukhumbula bona uJehova akhenge avumele ihloko yembeleko ethembekileko leyo bona yenze umhlatjelo loyo. Wavikela u-Abrahama ekulahlekelweni okukhulu umbelethi angaqalana nakho; wavikela u-Isaka ekufeni. Nokho uJehova akhenge avikele, “iNdodana yakhe, kodwana wayinikela ngebanga lethu soke.” (KwebeRoma 8:32) Kubayini uJehova azivumela bona aqalane nobujamo obubudisi kangaka? Wenza lokhu “khona sizaphuluswa.” (1 KaJwanisi 4:9) Qala bona sikhumbuzo esinamandla kangangani sethando lakaZimu ngathi! Nathi kufanele sitjengise ithando lethu ngaye. *
[Imitlolo yaphasi]
^ isig. 5 IBhayibhili ayifundisi bona uZimu waba ngubaba kaJesu ongokwenyama ngomfazi. Kunalokho, uJehova wabumba isibunjwa somoya leso ngokukhamba kwesikhathi asithumela ephasini bona sizokubelethwa yintombi engakhenge ihlangane nendoda uMariya. Ngalokho, njengoMbumbi kaJesu, uZimu bekangabizwa kufanele bona nguYise.
^ isig. 8 Ukufunda okungeziweko bona kubayini ukufa kwakaJesu bekutlhogeka nokobana kubayini kufuze sitjengise ukuthokoza kwethu, qala isahluko 5 sencwadi ethi Khuyini Kwamambala Okufundiswa YiBhayibhili?
