▪ Go etša ge go begilwe pukung ya Beibele ya Genesi, Jehofa Modimo o kgopetše Aborahama gore a neele morwa wa gagwe Isaka bjalo ka sehlabelo. (Genesi 22:2) Babadi ba bangwe ba Beibele ba thatafalelwa ke go kwešiša pego yeo. Moprofesara yo a bitšwago Carol o re: “Ge ke be ke ekwa kanegelo ye la mathomo ge ke be ke sa le ngwana, ke ile ka kgopišega. Ke Modimo wa mohuta mang yo a ka kgopelago motho gore a dire selo se bjalo?” Le ge maikwelo a bjalo a kwagala, re dira gabotse ge re gopola dintlha tše mmalwa.

Ya pele, ela hloko seo Jehofa a sa kago a se dira. Modimo ga se a ka a dumelela Aborahama go feleletša a dirile sehlabelo, le ge Aborahama a be a ikemišeditše go dira bjalo, gomme le ka mohla ga se a ka a kgopela motho yo mongwe gape gore a dire selo se bjalo. Jehofa o nyaka gore barapedi ba gagwe ka moka go akaretša le bana, ba tšwele pele ba phela—ba phele bophelo bjo botelele le bjo bo kgotsofatšago.

Ya bobedi, Beibele e bontšha gore Jehofa o be a ena le lebaka le le kgethegilego la go kgopela Aborahama gore a dire sehlabelo ka Isaka. Modimo o be a tseba gore nywagakgolo e mentši ka morago, O be a tla dumelela Morwa * wa Gagwe ka noši, Jesu, gore a re hwele. (Mateo 20:28) Jehofa o be a nyaka go re bontšha kamoo sehlabelo se se bego se tla dira gore a lahlegelwe ka gona. O neile pontšho e matla ya sehlabelo seo sa nakong e tlago ka seo a se kgopetšego go Aborahama. Bjang?

Ela hloko mantšu a Jehofa go Aborahama: “Hle tšea morwa wa gago, morwa wa gago o tee feela yo o mo ratago Isaka, . . . o mo dire sebego sa go fišwa.” (Genesi 22:2) Hlokomela gore Jehofa o boletše ka Isaka gore ke morwa “yo o mo ratago.” Jehofa o be a tseba kamoo Isaka a bego a le bohlokwa ka gona go Aborahama. Modimo gape o be a tseba kamoo Yena a ikwago ka gona ka Morwa wa gagwe Jesu. Jehofa o be a rata Jesu kudu moo a ilego a bolela gabedi go tšwa legodimong, a bitša Jesu ka go lebanya gore ke “Morwa wa ka yo a rategago.”—Mareka 1:11; 9:7.

Gape ela hloko gore kgopelo ya Jehofa go Aborahama e be e akaretša lentšu “hle.” Seithuti se sengwe sa Beibele se šišinya gore go diriša ga Modimo lentšu le go bontšha gore “MORENA o kwešiša tahlegelo e kgolo yeo e tšweletšwago ke seo a se kgopelago.” Ka ge re ka akanya, kgopelo yeo e swanetše go ba e ile ya kweša Aborahama bohloko kudu; ka mo go swanago, re ka se kgone go akanya ka bohloko bjo bo tseneletšego bjoo Jehofa a swanetšego go ba a ile a bo kwa ge a lebeletše Morwa wa gagwe yo a rategago a tlaišega gomme a ehwa. Ka ntle le pelaelo, bjo e be e le bohloko bjo bogolo kudu bjoo Jehofa a kilego a bo kwa goba bjoo a ka se tsogego a bo kwele gape.

Ka gona, le ge re ka tširošwa ke go nagana ka seo Jehofa a kgopetšego Aborahama go se dira, re bontšha go ba le temogo ge re gopola gore Jehofa ga se a ka a dumelela mopatriareka yoo yo a botegago gore a feleletše a dirile sehlabelo seo. O ile a efoša Aborahama tahlegelo e kgolo kudu yeo motswadi a ka lebeletšanago le yona; o ile a hlakodiša Isaka lehung. Lega go le bjalo, Jehofa ga se a šireletša ‘Morwa wa gagwe eupša o ile a mo gafa bakeng sa rena ka moka.’ (Baroma 8:32) Ke ka baka la’ng Jehofa a ile a itumelela gore a be boemong bjo bohloko gakaakaa? O dirile se e le gore “re hwetše bophelo.” (1 Johane 4:9) A kgopotšo e matla gakaakang ya lerato la Modimo go rena! Na ga re tutueletšege gore le rena re bontšhe gore re a mo rata? *

[Mengwalo ya tlase]