Leejkuna yachayta munanku
¿Imaraykú Dios, Abrahamman wawanta qʼolachinanta nerqa?
▪ Génesis libro nin jina Diosqa, Abrahamta churin Isaacta qʼolachinanta nerqa (Génesis 22:2). Bibliata wakin leejkuna, kayta mana entiendeyta atillankuchu. Universidadmanta uj profesora Carol sutiyoj nin: “Wawa kashajtiy chayta uyarispa phutikoj kani. ¿Imayná rijchʼaj Diostaj jinata ninmanri?”, nispa. Jinata yuyay allillan kajtinpis, imaraykuchus Jehová, Abrahamman nisqanta iskaynejmanta qhawarina.
Uj kaj, Jehová imatachus mana ruwasqanta qhawarina. Jehovaqa, Abraham churinta qʼolachinanta mana saqerqachu, qʼolachiyta munajtinpis. Chantapis ni jaykʼaj ni pita kikinta ruwananta ninñachu. Jehovaqa, Payta yupaychajkuna, wawas ima, kusisqas wiñaypaj kausakunankuta munan.
Iskay kaj, Bibliaqa Jehová imaraykuchus Abrahamta churin Isaacta qʼolachinanta nisqanta niwanchej. Diosqa, aswan qhepaman Churin, * Jesusta noqanchejrayku wañunanta saqenanta yacharqa (Mateo 20:28). Ajinamanta Jehovaqa, chay jinatapuni munakuwasqanchejta yachananchejta munarqa. Jehová, Abrahamman churinta qʼolachinanta nisqanqa, aswan qhepaman tʼukunapaj jina uj jaywanata qonanta rikucherqa. ¿Imaynatá?
Jehová, Abrahamman nerqa: “Munasqa kʼata churiyki Isaacta pusarikuspa, [...] payta qʼolachipuwanki”, nispa (Génesis 22:2). Diosqa, Abraham Isaacta mayta munakusqanta yachasqanrayku, “munasqa kʼata churiyki” nerqa. Jehovapis Churin Jesusta mayta munakusqanrayku, iskay kutita janaj pachamantapacha “kaymin munasqa Chureyqa” nerqa (Marcos 1:11; 9:7).
Imaynatachus Jehová, Abrahamman nisqanta qhawarina. Bibliamanta yachaj runa nisqanman jina, kay cheqapi oqharikusqan rimayqa, imatapis kʼachamanta Abrahamman nisqanta rikuchiwanchej. Arí, “SEÑORQA may valorniyoj imata mañashasqanta yacharqa”. Abrahampa sonqon maytachá nanarqa. Jinallatatajchá Jehovaj sonqon mayta nanarqa, munasqa Churin Jesusta ñakʼarejta, wañojta ima rikuspa, chaywanpis imaynatapunichus nanasqanta mana yachasunmanchu. Diosqa, chay kutipi jina ni jaykʼaj sonqonta nanachikonqañachu.
Ichapis Abrahamman, Jehová nisqanta mana allinpajchu qhawanchej, chaywanpis Diosqa, cheqa sonqo Abrahamta, wawanta wañuchinanta mana saqerqachu. Ajinamanta Abrahamqa wawanta wañuypi chinkachispa mana ñakʼarerqachu. Jehová, Isaacta wañunanta mana saqespapis, Churin Jesusta “qorqa, tukuyninchejrayku” (Romanos 8:32). ¿Imaraykú Churin wañunanta saqespa ñakʼariyta munarqa? “Paynejta kawsayniyoj kananchej[paj].” (1 Juan 4:9.) Mayta munakuwasqanchejrayku, ¿manachu munakuyninchejta noqanchejpis rikuchisunman? *
[Sutʼinchaykunasnin]
^ párr. 5 Bibliaqa mana yachachinchu Dios uj warmiwan puñuykusqanrayku Jesús nacekusqanta. Manaqa Jehová, Jesusta cielopi espirituta jina ruwasqanta, kausaynintataj uj mana qharej chayasqan sipaspa wijsanman María sutiyojpaman churasqanta yachachin. Chayrayku Jehová, Jesuspa Tatan kasqanta nisunman.
^ párr. 8 Imaraykuchus Jesús wañunanpuni kasqanmanta, imaynatachus chaymanta agradecesqa kasqanchejta rikuchinamanta ima, astawan yachakuyta munaspaqa, ¿Imatapunitaq Biblia yachachin?, libromanta 5 yachaqananta leey.
