Ua Fesili Mai le ʻAufaitau . . .

Aiseā na poloaʻi ai le Atua iā Aperaamo e Ofo Atu Lona Atalii e Fai ai le taulaga?

▪ E pei ona faamauina i le Tusi Paia i le tusi o Kenese, na poloaʻi Ieova le Atua iā Aperaamo e ofo atu lona atalii e fai ai le taulaga. (Kenese 22:2) Sa faigatā ona malamalama nisi tagata faitau o le Tusi Paia i lenā faamatalaga. Ua faapea mai se polofesa e igoa iā Carol: “Ina ua ou faatoʻā faalogo i lenei tala a o oʻu laʻitiiti, sa ou matuā ita lava.” Sa ou faapea ifo: “O le ā lenei ituaiga o Atua ua poloaʻi mai e fai se mea faapea?” Ina ia fesoasoani e malamalama i na faalogona, e lelei ona tatou manatua ni manatu se lua.

Muamua, manatu i le mea e leʻi faia e Ieova. E ui lava sa sauniuni Aperaamo e fai le taulaga, ae e leʻi faatagaina o ia e le Atua e faia faapea, ma e leʻi toe faia lava e le Atua se talosaga faapena i se tasi. E finagalo Ieova i ona tagata tapuaʻi uma, e aofia ai tamaiti, ina ia umi ona ola ma faamalieina o latou olaga.

Lua, ua taʻua i le Tusi Paia se māfuaaga faapitoa na poloaʻi ai Ieova iā Aperaamo e ofo atu Isaako e osi ai le taulaga. Na silafia lelei e le Atua, i le tele o senituri mulimuli ane, o le a Ia faataga ai Lona lava Alo * o Iesu e maliu mo i tatou. (Mataio 20:28) E finagalo Ieova e faailoa mai iā i tatou le aafiaga tele e oo iā te ia ona o lenei taulaga. O lana poloaʻiga iā Aperaamo, ua aumaia ai se faataʻitaʻiga malosi o le taulaga o le a ia faia i le lumanaʻi. E faapefea?

Manatu i fetalaiga a Ieova iā Aperaamo: “Faamolemole, ia ave lou atalii, o lou atalii e toʻatasi, o lē e te faapelepele i ai o Isaako, ma . . . ofo mai o ia e fai ma taulaga mū.” (Kenese 22:2) Ia mātau, na taʻua e Ieova Isaako o le atalii, “o lē e te faapelepele i ai.” Na silafia e Ieova e pele Isaako iā Aperaamo. Sa silafia foʻi e le Atua ona faalogona e uiga i lona Alo o Iesu. Sa matuā alofa Ieova iā Iesu, o lea, e faalua ona ia fetalai tuusaʻo mai i le lagi e taʻua ai Iesu “O loʻu Atalii pele.”—Mareko 1:11; 9:7.

Mātau foʻi, i le faatonuga a Ieova iā Aperaamo, na ia faaaogā le upu “faamolemole.” Ua taʻua e se tasi tagata aʻoga o le Tusi Paia, o le faaaogāina e le Atua o lenei upu, ua faaalia ai e talisapaia e “le ALII le taugatā o le mea ua ia poloaʻi atu ai.” E pei ona tatou iloa, na matuā tigā Aperaamo ona o lenā talosaga, e mafai foʻi ona tatou mafaufau i le tigā o faalogona o Ieova, a o silasila mai o mafatia ma maliu lona Alo pele. E mautinoa o le tigā aupito sili lea ua oo iā Ieova.

O le mea moni, e ui e faateʻia i tatou pe a manatu i le mea na poloaʻi Ieova iā Aperaamo e fai, ae e lelei ona tatou manatua, e leʻi faataga e Ieova le augātamā faamaoni e faia lenā taulaga. Sa ia taofia Aperaamo mai i le oo i se tulaga e sili ona tigā mo se matua, ma sa ia puipuia Isaako mai i le oti. Peitaʻi, e leʻi puipuia e Ieova “lona lava Alo, a ua foaʻiina mai o ia mo i tatou uma.” (Roma 8:32) Aiseā na faataga ai e Ieova o ia lava e oo i lenei mea e sili ona faigatā? Na ia faia faapea ina ia “tatou maua ai le ola.” (1 Ioane 4:9) Maʻeu se faamaoniga malosi o le alofa o Ieova iā i tatou! Pe e lē uunaʻia ai foʻi i tatou e faaali atu lenā alofa iā te ia? *

[Faaopoopoga i lalo]