▪ Olsem Buk Stat long Baibel i kamapim, God Jehova i tokim Abraham long givim pikinini bilong em Aisak olsem ofa. (Stat 22:2) Sampela man bilong ritim Baibel i hatwok long kliagut long dispela stori. Wanpela profesa nem bilong em Carol, i tok: “Taim mi stap pikinini yet na mi harim dispela stori long namba 1 taim, mi belhat stret. Wanem kain God bai mekim kain pasin olsem?” Tru, yumi inap pilim tingting bilong kain lain olsem, tasol i gat sampela samting yumi ken tingim.

Namba 1, tingim samting Jehova i no bin mekim. Em i no larim Abraham i mekim dispela ofa, maski Abraham i redi long mekim olsem. Na tu, bihain God i no bin askim wanpela long mekim kain ofa olsem. Jehova i laik bai olgeta man husat i lotuim em, na ol pikinini tu, ol i mas stap laip na stap amamas.

Namba 2, Baibel i kamapim olsem i gat as na Jehova i tokim Abraham long givim Aisak olsem ofa. God i save olsem planti handret yia bihain, Em bai larim Pikinini bilong em yet, a Jisas, long i dai bilong helpim yumi. (Matyu 20:28) Jehova i laik bai yumi pilim tru bikpela pasin laikim em i kamapim long rot bilong dispela ofa. Samting em i tokim Abraham long mekim i stap olsem piksa bilong dispela ofa. Olsem wanem Jehova i mekim dispela ofa?

Tingim tok Jehova i mekim long Abraham: “Yu gat wanpela pikinini tasol, Aisak, na yu laikim em tumas. [“Plis,” NW] yu mas kisim dispela pikinini na . . . givim [em] long mi olsem ofa bilong paia i kukim olgeta.” (Stat 22:2) Tingim, Jehova i tok long Aisak olsem pikinini “yu laikim em tumas.” Jehova i save olsem Aisak em i olsem samting i dia tumas long Abraham. God i save tu long samting em yet i pilim long Pikinini bilong em, Jisas. Jehova i laikim tumas Jisas, olsem na inap tupela taim nek bilong em i kamap long heven na i tok long Jisas olsem “Pikinini bilong mi, mi laikim yu tumas.”—Mak 1:11; 9:7.

Tingim tu olsem taim Jehova i toktok long Abraham, em i yusim dispela tok “plis.” Wanpela saveman bilong Baibel i tokaut olsem pasin bilong God long kolim dispela tok i makim olsem “BIKPELA i save olsem samting em i askim long en i dia tumas.” Yumi ken piksaim long tingting olsem dispela samting em God i askim long en i givim bikpela bel pen long Abraham; olsem tasol, yumi ken tingim bikpela pen Jehova i bin pilim taim em i lukim Pikinini bilong em i kisim pen na i dai. Tru tumas, em bikpela bel pen tru Jehova i pilim na em i no inap pilim gen kain bikpela pen olsem.

Olsem na maski yumi inap tingting planti long samting Jehova i tokim Abraham long mekim, i gutpela yumi tingim olsem Jehova i no larim dispela gutpela bilipman long mekim dispela ofa, nogat. Em i pasim Abraham long mekim samting we inap givim bikpela bel pen long em olsem wanpela papa; em i pasim Abraham long kilim i dai Aisak. Tasol Jehova “i larim Pikinini bilong em yet . . . i dai bilong helpim yumi olgeta.” (Rom 8:32) Bilong wanem Jehova i mekim samting we i givim bikpela bel pen long em yet? Em i mekim olsem bambai “yumi inap kisim laip.” (1 Jon 4:9) Dispela i kirapim yumi long tingim pasin bilong God long laikim tru yumi! Tru tumas, dispela i mas kirapim yumi tu long laikim em. b

[Ol Futnot]