▪ Sugad han nakarekord ha libro nga Genesis ha Biblia, ginhangyo ni Jehova nga Dios hi Abraham nga ighalad an iya anak nga hi Isaak. (Genesis 22:2) An iba nga magbarasa han Biblia nakurian pagsabot hito nga asoy. “Han hinbatian ko ini nga istorya han bata pa ako, nasina gud ako,” siring han propesor nga hi Carol. “Ano nga klase hin Dios an maghahangyo hin sugad?” Bisan kon natural la ito nga pagbati, angay naton hinumdoman inin duha nga punto.

Siyahan, tagda kon ano an waray buhata ni Jehova. Waray niya tuguti hi Abraham nga ipadayon an paghalad, bisan kon andam unta hi Abraham ha pagbuhat hito, ngan waray na hiya maghangyo hin sugad ha bisan hin-o. Karuyag niya nga an iya magsiringba, pati an kabataan, padayon nga mabuhi—magpahimulos hin hilawig ngan malipayon nga kinabuhi.

Ikaduha, iginpapakita han Biblia nga may importante nga rason hi Jehova ha paghangyo kan Abraham nga ihalad hi Isaak. Maaram an Dios nga paglabay hin damu ka siglo, Iya tutugotan an Iya Anak, * hi Jesus, nga mamatay para ha aton. (Mateo 20:28) Karuyag Niya masayod kita kon mationan-o kadaku ito nga sakripisyo nga iya bubuhaton. An iya hangyo kan Abraham nagpapakita han daku nga pagsakripisyo ha paghalad han Iya anak. Ha ano nga paagi?

Tagda an ginsiring ni Jehova kan Abraham: “Alayon, kuhaa an imo anak, an imo bugtong nga anak nga imo gud hinigugma, hi Isaak, ngan . . . ihalad hiya sugad nga halad nga sinunog.” (Genesis 22:2, NW) Tigamni nga gintawag ni Jehova hi Isaak sugad nga anak “nga imo gud hinigugma.” Maaram hiya nga importante hi Isaak kan Abraham. Maaram liwat Hiya han Iya inaabat para kan Jesus. Tungod han daku nga gugma kan Jesus, duha ka beses nga Iya direkta nga gintawag hi Jesus tikang ha langit sugad nga “akon Anak nga hinigugma.”—Markos 1:11; 9:7.

Tigamni liwat nga naggamit hi Jehova han pulong nga “alayon” han hiya naghangyo kan Abraham. Usa nga eskolar ha Biblia an nasiring nga an paggamit han Dios hito nga pulong nagpapasabot nga “maaram an GINOO nga daku gud nga sakripisyo an iya gin-aaro.” Mahahanduraw naton nga nakapasubo gud kan Abraham an hangyo; ha pariho nga paagi, haros diri naton mahanduraw an kasakit nga gin-abat ni Jehova samtang nakikita niya an iya hinigugma nga Anak nga nag-aantos ngan namatay. Sigurado nga para kan Jehova, waray kasakit nga labaw pa hini.

Oo, bisan kon bangin diri kita nauyon ha hangyo han Dios kan Abraham, angay naton hinumdoman nga waray niya tuguti nga igpadayon ni Abraham an paghalad ngan maeksperyensyahan an pinakamasakit nga pagbati nga mahimo antuson han usa nga kag-anak; gintalwas niya hi Isaak tikang ha kamatayon. Bisan pa hito, waray panalipdi ni Jehova “an iya kalugaringon nga Anak . . . kondi igintubyan niya hiya tungod ha aton ngatanan.” (Roma 8:32) Kay ano nga gintugotan ni Jehova an iya kalugaringon nga mag-antos hinduro? Basi “mabuhi kita.” (1 Juan 4:9) Nagpapahinumdom gud ini han daku nga gugma han Dios ha aton! Diri ba kita napapagios nga magpakita liwat hin gugma ha iya? *

[Mga footnote]