ESTERQA, Susa llajtamanta reypa kamachina wasinman may mancharisqa qayllaykusharqa. Chay wasipeqa, Esterpa purisqallan uyarikorqa. Jatuchaj sayantasninta, chayri Libanomanta maderawan may sumaj ruwasqa techosninta mana qhawarillarqapischu. Astawanqa rey imatachus ninanpi tʼukusharqa, kausaynin makinpi kashasqanrayku.

Reyqa, Esterta rikuytawan, qorimanta kamachina tojnunta aysarerqa. Chayta ruwaspa Esterta salvarqa, mana wajyasqalla yaykusqanmantataj perdonarqa. Estertaj may agradecesqa, qayllaykuspa tojnoj puntanta llojcherqa (Ester 5:1, 2). *

Kamachej Asueroqa, may qhapaj, atiyniyoj ima karqa. Yachayniyoj runas nisqankuman jinataj, chay tiempomanta kamachejkunaj pʼachasninku may chhika dólares valej. Ajina qhapaj kaspapis, reyqa, Esterta munakorqa, chayrayku nerqa: “Imataj tiyan, reina Ester? Imatataj munankiri? Noqaqa imatachus munasqaykita, khuskan reinoytawampis qosqayki”, nispa (Ester 5:3).

Esterqa may creeyniyoj, mana manchachikuyniyoj ima kasqanta, judiosta yanapananpaj reypaman rispa rikucherqa. Chay kutikamaqa, tukuy imapis allillan kasharqa, chaywanpis qhepaman chʼampaykunapi rikukorqa. Esterqa reyman, yuyaychajnin, sajra runa kasqanta, llulleriosninwan llajtanta wañuchinanpaj leyesta orqhosqanta rikuchinanraj karqa. ¿Imaynatá qosanman willanqa, imatá may creeyniyoj warmimanta yachakunchej?

Maychus “tiempo[npi] parla[rqa]”

Esterqa chʼampayninta, mana tukuypa ñaupaqenpichu reyman willarqa, imaraykuchus chayta ruwaspaqa reyta pisipaj rikuchinman karqa. Chantapis Amanman, tiempota qonman karqa, paywan churanakunanpaj. ¿Imatá Ester ruwarqa? Ashkha wata ñaupajta, Dios yuyaychasqanman jina Salomón nerqa: “Kay pachapeqa tukuy imapis tiempoyojlla. [...] Uj tiempoqa tiyan chʼinyanapaj, uj tiempotaj parlanapaj”, nispa (Eclesiastés 3:1, 7). Cheqa sonqo Mardoqueoqa, Esterman kay jina yuyaychaykunasta wiñasqanman jina yachacherqachá. Chayrayku Esterqa, maykʼajchus “parlana[nta]” yacharqa.

Ester nerqa: “Sichus reyníy, qampaj allin rijchʼasunki chayqa, munani qampaj jatun mikhuyta wakichisqayman jamunaykita Amanwan khuska”, nispa (Ester 5:4). Reyqa rinanta nin, Amantataj wajyachin. ¿Ester may yachayniyoj kasqanta reparankichu? Payqa, qosanta jatunpaj qhawarqa, llakiyninmantataj maykʼajchus willananta yacharqa.

Esterqa, qosan miskʼichikunanpaj jina tukuy sonqo mikhunata wakicherqa, kusirikunankupaj sumaj vinotapis churarqa (Salmo 104:15). Rey, chay kutipi mayta kusikusqanrayku,  reina Esterta “imatataj mañakuyta munanki?”, nispa watejmanta taporqa. ¿Imatachus mañakuyta munasqanta Ester parlarqachu?

Mana, astawanpis maykʼajchus parlananta suyarqa. Chayrayku qʼayantinpaj reyta, Amantawan wajyarillarqataj (Ester 5:7, 8). ¿Imaraykú Ester mana parlarqachu? Judíos wañuchisqas kanankupaj, uj ley llojsisqanrayku. May chhika judíos mana wañuchisqa kanankupaj, maykʼajchus parlayta yachanan karqa. Chayrayku watejmanta mikhunata wakicherqa, qosanta allinpaj qhawasqanta rikuchinanpaj.

Pacienciayoj kayqa, may sumaj, chaywanpis pisi runaslla chay kʼacha kayta rikuchinku. Ester llakiyninmanta willayta munaspapis, maykʼajchus willananta suyarqa. Noqanchejpis, uj sajra ruwaymanta yachaspa, Ester jina pacienciawan allinchakunanta suyananchej tiyan. Uj atiyniyoj runata uj chʼampayta allinchananta nejtinchej, ichá Ester jina pacienciata rikuchina kanqa. Proverbios 25:15 nin: “Pacienciaqa kamachejpa phiñakuyninta thasnun; llampʼu palabrasqa rumi sonqota llampʼuyachin”, nispa. Ester jina, tiemponpi kʼachamanta parlasunchej chayqa, pi rumi sonqotapis “llampʼuyachi[sunchej]”. Esterta pacienciata, yachayniyoj kayta ima rikuchisqanrayku, ¿Jehová bendecerqachu?

Pacienciawan justicia kananta suyan

Esterqa, pacienciayoj kasqanrayku, waj imasta sutʼinchakojta rikorqa. Amanqa, rey, reina ima ñaupaj kutirayku mikhoj wajyarisqankumanta “may kusisqa, sonqo juntʼasqataj” kasharqa. Chaywanpis reypa kamachinan wasej punkunpi Mardoqueota payman mana kʼumuykukojta rikorqa. Mardoqueoqa, mana manachu machu kasqanraykuchu mana kʼumuykukorqa, manaqa conciencianrayku, Dioswan allinpi kayta munasqanrayku ima. Chayrayku Amanqa, “maytapuni paypaj phiñarikorqa” (Ester 5:9).

Warminman, amigosninman ima willajtintaj, paykunaqa, sayayninman 22 metrosniyoj sipinata ruwachinanta, Mardoqueota warkhunanpaj reymanta permisota mañakunanta ima yuyaycharqanku. Amanpajqa, chay yuyaychay may sumaj karqa, chayraykutaj sipinata ruwacherqapacha (Ester 5:12-14).

 Biblia nisqanman jina “reyqa [chay chʼisi] mana puñuyta aterqachu”. Chayraykutaj kamachisninta, imatachus kamachishaspa ruwasqasninmanta willaj librota leenankuta nerqa. Chaypitaj kamachina wasejpa punkunta qhawajkuna, reyta wañuchinankupaj wakichikushasqankuta, Mardoqueo willasqanta qhelqasqata tarerqanku. Reytaj chay runas wañuchisqas kasqankuta yuyarerqa. Chaywanpis, ¿imataj Mardoqueomanta karqarí? Reyqa jinallapi, kamachisninta taporqa: “Ima tʼinkata qospa payta jatuncharqanchejri?”, nispa. Paykunataj ni “imatapis paypajqa ruwapunchejchu”, nispa nerqanku (Ester 6:1-3).

Rey Asueroqa chayta allinchayta munaspa, kamachisninmanta mayqenchus yanapananpaj chaypi kashasqanta yachayta munarqa. Amantaj chaypachapuni kamachina wasi patiopi kasharqa. Payqa, tempranosina chayarqa, reymanta permisota mañakunanpaj, Mardoqueota warkhunanpaj. Chaywanpis niraj mañakushajtin, reyqa payta taporqa: “Imatataj ruwana kanman, pi runatachus reyqa pataman oqhariyta munashan, chaypajri?”, nispa. Amanqa, payta pataman oqharinanta yuyasqanrayku, chay runata reypa pʼachasninwan pʼachallichinanta, caballonpi sinchʼita qhaparispa, reypa kuraj kamachin plazata muyurichimunanta nerqa. Amanqa, Mardoqueota jatunchanan kasqanta yachaspa maytachá tʼukorqa. ¿Pitataj takiykunawan Mardoqueota jatunchananpaj rey kamachin? ¡Amanllatataj! (Ester 6:4-10.)

Mayta phiñakuspapis, payqa, reypa nisqanta kasorqa. Chantá may llakisqa usqhayllata wasinman kuterqa. Warmin, amigosnin ima nerqanku: “Mardoqueoj ñawpaqempi[chus] urmayta qallarinki chayqa, manapuni atipawajchu, manachayqa urmallankipuni chay runaj ñawpaqempi”, nispa (Ester 6:12, 13).

Esterqa, pacienciayoj kasqanrayku, reyman llakiyninmanta willananpaj uj pʼunchaytawan suyarqa, Amanpajqa, reypa kamachin manaña kananpaj tiempo tukukapusharqa. Chantá ichá Jehová reyta mana puñojta saqerqachu (Proverbios 21:1). Chayraykuchá Bibliaqa, “suyaku[yniyoj]” kananchejta niwanchej (Miqueas 7:7). Diospa makinpi chʼampaykunata saqejtinchejqa, ichapis Pay sumajta allinchanqa, noqanchejmanta nisqaqa.

Mana manchachikuspa parlarqa

Esterqa manaña qosanta astawan suyachiyta munanchu, chayrayku iskay kaj kutipi mikhunapaj wajyarejtin willananta kasqanta yachan. ¿Imaynatá chayta ruwarqa? Reyllataj, payta imatachus munasqanta watejmanta taporqa (Ester 7:2). Reyman willananpaj “tiempotaj” chayamorqa.

Esterqa, ichapis Diosmanta mañakorqa, manaraj reyman kayta nishaspa: “Sichus qan allimpaj qhawawanki, allintaj qanman rijchʼasunkiman chayqa, mañakuyki ama wañuchichinawaykita, jinallataj yawar masisniytapis ama wañurachichinaykita”, nispa (Ester 7:3). Chantapis reyta, imatachus ruwayta munasqanta jatunpaj qhawananta nin. ¡Esterqa, mana Vasti jinachu karqa, pichus reyta pisipaj qhawacherqa! (Ester 1:10-12.) Esterqa, Amanpi, qosan atienekusqanmanta  mana phiñakorqachu. Astawanpis wañuymanta salvananta mañakorqa.

Reyqa, chayta uyarispa sonqonpi llakikorqa, tʼukurerqa ima. ¿Pitaj reinata wañuchiyta munanri? Ester nerqa: “Noqawan, yawar masisniywanqa vendesqa kayku wañurachinawaykupaj, ni uj puchuyojta chinkachinawaykupajtaj. Sichus wiñaypaj wata runas kanaykupaj vendesqa kaykuman karqa chayqa, chʼinlla kakuyman karqa. Chaywampis, sichus ajinata wañurachiwasqayku chayqa reyníy, qampajqa manapuni allinchu kanqa”, nispa (Ester 7:4). Esterqa mana manchachikuspa llakiyninta willarqa, chantapis pay, llajtan ima wata runas jina vendesqa kankuman karqa chayqa, chʼinlla kakunanta ima nerqa. Judiosta wañucheyqa, reypaj mana allinchu kanman karqa, chayrayku Esterqa mana chʼinllachu qhepakorqa.

Esterpa ruwasqanqa, runaj sonqonman chayanapaj jina parlanata yachachiwanchej. Maykʼajllapis uj chʼampayninchejmanta familiawan chayri uj autoridadwan parlana kajtin, pacienciawan, jatunpaj qhawaspa, sonqomantapacha parlayqa, yanapawasunman (Proverbios 16:21, 23).

Rey, Esterta uyariytawan, “pitaj chantá chay runari? Maypitaj kashan chay sajra sonqo runari?”, nispa nerqa. Estertaj nerqa: “Chay sajra sonqo [...] runaqa kay Aman”, nispa. Chayta uyarispa, Amanqa mana imanakuyta atispa kharkatiterqapacha. Rey Asuerotaj mayta phiñakorqa, munasqa warminta, kuraj yuyaychajnin llulleriosninwan wañuchinanpaj leyta orqhonanta saqesqanta reparaspa. Chantá reyqa, huertanman usqhayllata llojserqa, rabian thasnukunanpaj (Ester 7:5-7).

Llulleriosnin sutʼita yachakojtintaj, Amanqa, reinaj ñaupaqenman qonqorikorqa ama wañuchichinanta mañakunanpaj. Rey chayta rikuspa, mayta phiñakorqa, nerqataj: “Kikin wasiypichu reinaj honranta tʼakayta munanki?”, nispa. Rey nejtinkamataj, kamachisnin Amanpa umanta qhataykorqanku. Jinapi reypa ujnin kamachin, Aman, Mardoqueota sipichinanpaj, uj sipinata ruwachisqanta nerqa. Reytaj Amanta chayman warkhumunankuta nerqa (Ester 7:8-10).

Kay sajra pachapi, ni jaykʼaj justicia kananta yuyasunman, ¿icharí? Esterqa ni jaykʼaj llakiyninwan atipachikorqachu, nitaj ni jaykʼaj creeyninta, suyakuyninta ima chinkacherqachu. Manaqa tiemponpi, cheqan kaj ruwakunanpaj mana manchachikuspa parlarqa, Jehová allinchananpitaj atienekorqa. Noqanchejpis pay jina ruwanachej, imaraykuchus Diosqa, kasqan jinallapuni. Chayrayku  Amanman jina, sajra runasman, sajra ruwaykunasnillankutataj umankuman urmachimonqa (Salmo 7:11-16).

Jehovata, llajtanta ima yanaparqa

Reyqa, payta wañuymanta Mardoqueo jarkʼasqanta, Esterta wawanta jina uywakusqanta ima yachan. Chayrayku Amanpa cuentanmanta, payta kuraj kamachin kananpaj churarqa. Estermantaj Amanpa wasinta, kapuyninta ima qorqa, Estertaj Mardoqueota, tukuy kapuyninta qhawananpaj churarqa (Ester 8:1, 2).

Aman wañojtinñapis, Esterqa, llakisqallapuni kasharqa. Imaraykuchus judíos wañuchisqas kananku willayqa, Persiaj tukuy kʼuchusninman chayasharqa. Amanqa, Pur nisqa suerteta choqarqa, ima diachus judiosta wañuchinanpaj allin kasqanta yachananpaj (Ester 9:24-27). Chay pʼunchaypaj killasraj kajtinpis, usqhayllata qayllaykamusharqa. ¿Imaynatá judiosta wañuymanta salvakunqarí?

Esterqa, wajpa allinninta maskʼasqanrayku, kausayninta wañuypataman churaspa, reywan ujtawan parlaj rerqa. Judíos wañuchisqa kananku leyta pʼakinanta mañakoj. Chaywanpis Persiamanta kamachejkunaj sutinpi leyesta orqhokusqanqa mana pʼakikuyta atikorqachu (Daniel 6:12, 15). Chayrayku reyqa,  Esterman, Mardoqueoman ima atiyta qorqa, waj leyesta orqhonankupaj. Paykunataj judiosman uj leyta apacherqanku, enemigosninku paykunaj contrankupi jamojtinku maqanakunankupaj. Chay willaytaj, Persiaj tukuynin kʼuchusninkama chayarqa. Chayta uyarispa judiosqa mayta kusikorqanku (Ester 8:3-16). Judiosqa, tukuyninkuchá maqanakunankupaj wakichikusharqanku, mosoj ley mana llojsimunmanchu karqa chayqa, ni jaykʼaj jarkʼakunankupaj wakichikuyta atinkumanchu karqa. Chaywanpis “Tukuy Atiyniyoj” Jehová, ¿llajtanta yanaparqachu? (1 Samuel 17:45.)

Judíos wañuchisqas kanankupaj pʼunchay chayamojtenqa, Diospa llajtan maqanakunanpaj wakichisqa kasharqa. Reypa kamachisninpis, Mardoqueota yanaparqanku, suyuntinpi Mardoqueota, rey, kuraj kaj kamachin kananpaj churasqanta uyarikusqanrayku. Jehová llajtanta yanaparqa atipananpaj. Chayrayku llajtawan manaña japʼinakunankupaj enemigosninkuta wañuracherqa (Ester 9:1-6). *

Amanpa 10 wawasnintapis wañuchillarqankutaj, Mardoqueo paykunaj wasinkuta mana manchachikuspa qhawananpaj (Ester 9:7-10). Jinamanta Diosqa, llajtanpa sinchʼi enemigosnin amalecitasta chinkachinanta nisqanta juntʼarqa (Deuteronomio 25:17-19). Chinkananpaj juchachasqa llajtamantaqa, ichá Amanpa wawasnillanña karqanku.

Esterqa, ashkha ruwanasniyoj karqa, chaykunamanta wakenqa leyesta orqhoy karqa chʼajwasta chinkachinapaj, runasta wañuchinanpaj ima. Jehovaqa, Israel llajta chinkananta mana munarqachu, imaraykuchus chay llajtamanta Mesías rikhurinan karqa, paynejllata tukuy bendecisqa kananku karqa (Génesis 22:18). Kay tiempomanta Diospa kamachisnenqa, Jesús, discipulosninman espadaswan mana maqanakunankuta nisqanmanta mayta kusikunku (Mateo 26:52).

Chaywanpis, Satanaswan maqanakunanchej tiyan, Jehovapi creesqanchejta tukuchiyta munasqanrayku (2 Corintios 10:3, 4). Estermanta yachakusqanchejqa, ¡may sumaj! Pay jina creeyninchejta allin yuyaywan, pacienciawan, mana manchachikuspa, Diospa llajtanta tukuy sonqo yanapaspa rikuchina.

[Sutʼinchaykunasnin]

[30 paginapi recuadro]

Estermanta tapuykuna

¿Imaraykú Mardoqueo, Esterta, Diosta mana yupaychajwan casarananta saqerqa?

Wakin yachayniyoj runasqa, Mardoqueo may rejsisqa kayta munasqanrayku, Esterta reywan casarachiyta munasqanta ninku, chay cheqa kasqanta ni imapis rikuchinchu. Mardoqueo cheqa sonqo judío kasqanrayku, chay jina matrimoniosta mana allinpajchu qhawaj (Deuteronomio 7:3). Chantapis judiospa ususninman jina, Ester, reywan casarakunanta mana munarqachu. Chaywanpis mana casarakunanpaj ni imata ruwayta aterqachu, ni Esterpis. Imaraykuchus paykuna chay suyupi forasteroslla karqanku, maypichus rey dios jina kasqanta yuyaj. Tiemponmanqa, Jehová Dios llajtanta jarkʼananpaj, Esterta reywan casarakunanta saqesqan rikukorqa (Ester 4:14).

¿Imaraykú Ester libropi, Jehová suti mana rikhurinchu?

Mardoqueosina Ester librota qhelqarqa, Dios yuyaychasqanman jina. Chay libroqa, Jerusalenman niraj apasqa kashajtin, Persiamanta reyes kamachishaspa ruwasqasninkumanta willaj libroswan jallchʼasqa kasharqa. Ester libropi Diospa sutin rikhurinman karqa chayqa, ichapis Persiamanta lantista yupaychajkunaqa chinkachinkuman karqa. Chay libro qhelqakunanpaj, Jehová yanapasqanqa sutʼi rikukun. Chantá hebreo qallupi Diospa sutin rikhurin, sutinpa letrasnintaj mana ujchasqachu kashan. Diospa sutin rikhurinanpaj, ichá sapa palabraj qallariyninpi, chayri tukukuyninpi sutinmanta uj letrata qhelqakorqa (Ester 1:20).

¿Ester libro historiamanta cheqatachu nin?

Wakin yachayniyoj runas, historiamanta parlaspa mana cheqachu kasqanta ninku. Chaywanpis waj runas, Ester librota qhelqajqa, kamachina wasimanta, imaynachus ruwasqa kasqanmanta, persaspa ususninkumanta ima sumajta yachasqanta ninku. Chay tiempomanta documentospeqa, Esterpa sutin mana rikhurinchu, chaywanpis mana paypa sutillantachu chay documentosmanta orqhorqanku. Chantá chay documentospeqa, Mardukâ —persia qallupi Mardoqueo ninayan— sutiyoj uj runa, Susa llajtamanta kamachina wasipi, Esterpa tiemponpi llankʼasqanta nin.

[31 paginapi dibujo/foto]

Waj profecía juntʼakun

Esterwan Mardoqueowan, Bibliamanta waj profeciata juntʼallarqankutaj Diospa llajtanta yanapanankupaj. Jehovaqa, 1.200 watas aswan ñaupajtaña, Jacobta ujnin churinmanta kayta ninanpaj yuyaycharqa: “Benjaminqa uj suwa atoj jina, tutamanta mikhun imatachus wañuchisqanta, chʼisiyaykuytataj puchuchisqasninta mikhun”, nispa (Génesis 49:27). “Tutamanta” chayri Israelta reyes kamachiyta qallarisqankumantapacha, wapu maqanakoj runas karqanku —rey Saúl, wajkuna ima—Benjaminpa mirayninmanta, Diospa llajtantataj yanaparqanku. “Chʼisiyaykuytataj” nisuman manaña Israelpi reyes kamachishajtinku, Benjaminpa mirayninmanta Ester, Mardoqueo ima, Jehovaj enemigosninta atiparqanku. Amanpa tukuy kapuynintataj iskayninku rakʼinakorqanku.

[27 paginapi dibujo/foto]

Esterqa, rey tojnunta aysarisqanmanta mayta agradecerqa

[28, 29 paginaspi dibujo/foto]

Esterqa, Aman sajra runa kasqanta mana manchachikuspa willaykorqa

[30, 31 paginaspi dibujo/foto]

Ester, Mardoqueo ima, Persiapi kaj tukuy judiosman leyesta apacherqanku