Kristiannan Berdadero Ta Respetá e Palabra di Dios
“Bo palabra ta e bèrdat.”—HUAN 17:17.
1. Den bo promé kòmbersashon ku Testigunan di Yehova, kiko a laga bo mira ku nan ta distinto for di otro religion?
BO TA kòrda e promé biaha ku bo tabatin un bon kòmbersashon ku un Testigu di Yehova? Kiko bo ta kòrda di e kòmbersashon ei? Hopi hende lo bisa: ‘Un kos ku a impreshoná mi ta e manera ku e Testigu a usa Beibel pa kontestá tur mi preguntanan.’ Sin duda, nos a keda masha kontentu ora nos a haña sa kiko ta Dios su propósito pa planeta Tera, kiko ta pasa ku nos ora nos muri i ki speransa tin pa nos sernan kerí ku a fayesé.
2. Menshoná algun motibu pakiko Beibel ta un buki masha balioso pa bo.
2 Pero segun ku nos a sigui studia Beibel, nos a bin realisá ku Beibel ta bai mas leu ku djis kontestá nos preguntanan tokante bida, morto i futuro. Nos a mira ku Beibel ta di gran balor, e mihó buki na mundu. Su konsehonan semper ta práktiko, i esnan ku hasi kaso di nan lo ta felis i lo tin éksito den bida. (Lesa Salmo 1:1-3.) Kristiannan berdadero semper a aseptá Beibel “no komo palabra di hende sino, manera loke e ta di bèrdat, komo e palabra di Dios.” (1 Tes. 2:13) Un análisis breve di historia ta yuda nos mira e kontraste entre hende ku di kurason ta respetá e Palabra di Dios i esnan ku no ta hasi esei.
UN PROBLEMA DIFÍSIL TA HAÑA SOLUSHON
3. Ki problema a pone e union di e kongregashon kristian den promé siglo na peliger, i dikon e problema akí tabata difísil pa solushoná?
3 Pa diestres aña largu, despues ku Kornelio—e promé persona ku no tabata hudiu ni sirkunsidá—a bira un kristian ungí, tabatin un problema ku a pone e union di e kongregashon kristian na peliger. Kiko tabata e problema? Wèl, mas i mas hende di e nashonnan a bira kristian i a lanta e pregunta: Mester a sirkunsidá e hende hòmbernan segun tradishon hudiu pa nan por a batisá? Esei no tabata un pregunta fásil pa un hudiu kontestá. Dikon? Pasobra hudiunan ku a obedesé e Lei di Moises no tabata ni drenta kas di hende ku no tabata hudiu, te pa nan trata nan manera ruman. Ya kaba e hudiunan ku a bira kristian tabata ser persiguí severamente pasobra nan a bandoná nan kreensianan di ántes. Awor, si nan a kuminsá aseptá personanan ku no tabata sirkunsidá komo nan ruman, nan lo a haña nan ku mas persekushon, i esei lo a kousa mas desunion entre e hudiunan i e kristiannan.—Gal. 2:11-14.
4. (a) Ken a reuní huntu pa solushoná e problema? (b) Ki preguntanan e reunion ei lo por a lanta den mente di un persona?
4 Na aña 49 di promé siglo, e apòstel- i ansianonan na Herúsalèm, kendenan tabata hudiu sirkunsidá, “a reuní pa konsiderá e asuntu.” (Echo. 15:6) Nan reunion no tabata un konsiderashon laf di detayenan religioso sin importansia; e tabata mas bien un deliberashon emoshonante tokante siñansanan bíbliko. Tantu esnan ku tabata na fabor di sirkunsishon komo esnan ku tabata kontra a duna nan opinion. Awor, kon nan a solushoná e problema? Akaso nan a laga ideanan personal òf prehuisio influensiá nan desishon? Òf e ansianonan responsabel ei a warda te ora ku e situashon di e kristiannan na Israel a drecha pa tuma un desishon? Òf nan a tuma un desishon djis pa yega na un konsenso aunke nan tabata sa ku e desishon no tabata korekto?
5. Den ki manera e reunion ku a tuma lugá na Herúsalèm na aña 49 di promé siglo ta distinto for di e konsilionan di iglesia ku a tuma lugá siglonan despues?
5 Awendia, ta masha normal pa lidernan religioso bini huntu na nan konsilio- òf reunionnan di iglesia i aseptá ideanan ku nan no ta di akuerdo kuné djis pa yega na un konsenso. Tin biaha, algun lider ta asta purba persuadí otro miembro pa apoyá nan ideanan. Pero, niun di e kosnan ei no a tuma lugá durante e reunion na Herúsalèm. I loke ta mas importante, e apòstelnan i e ansianonan a yega na un akuerdo unánime. Kon esei tabata posibel? Wèl, maske nan kada un por tabata masha konvensí di nan opinion, nan tur a respetá e Palabra di Dios i a usa esaki komo base pa solushoná e problema.—Lesa Salmo 119:97-101.
6, 7. Kon e apòstel- i ansianonan a usa e Skritura pa resolvé e problema tokante sirkunsishon?
6 E tekstonan di Beibel ku a yuda e apòstel- i ansianonan solushoná e problema tabata Ámos 9:11 i 12. Nos por komprondé esei for di Echonan 15:16 i 17 ku a sita e palabranan di Ámos. E ta bisa: “Lo mi bini bèk i rekonstruí e kas di David ku a basha abou; lo mi rekonstruí su ruinanan i restor’é, pa e hendenan ku resta, huntu ku hende di tur nashon, esta, hende ku ta karga mi nòmber, por hasi esfuerso pa buska Yehova.”
7 Algun hende por protestá i bisa: ‘Pero wanta: E tekstonan ei no ta bisa ku un persona ku no tabata hudiu por a bira kristian sin sirkunsidá promé.’ I nan tin rason. No opstante, e hudiunan ku a bira kristian sí lo a komprondé e punto. Dikon nos ta bisa esei? Wèl, pa kuminsá, nan a konsiderá e personanan no-hudiu sirkunsidá komo ruman i no komo ‘hende di e nashonnan.’ (Éks. 12:48, 49) Por ehèmpel, Bagster su vershon di e Septuaginta ta bisa na Èster 8:17: “Hopi hende di e nashonnan a sirkunsidá i bira hudiu.” Pues, ‘e hendenan ku a resta’ di e kas di Israel tabata hudiu i hende ku a sirkunsidá, kombertí i bira hudiu. I segun e profesia, nan lo a karga Dios su nòmber huntu ku “hende di tur nashon,” esta, personanan no-hudiu i insirkunsidá. Pues, e mensahe di e Skritura tabata kla i komprendibel: Hende ku kier a bira kristian no tabatin nodi di sirkunsidá.
8. Dikon e kristiannan hudiu mester tabatin kurashi pa tuma e desishon korekto?
8 Ta e Palabra di Dios i spiritu santu a yuda e kristiannan sinsero ei yega na un “desishon unánime.” (Echo. 15:25) I maske e desishon ei kisas lo a pone ku e kristiannan hudiu a haña nan ku mas persekushon, tòg esnan fiel a kooperá plenamente ku e desishon basá riba Beibel.—Echo. 16:4, 5.
UN DIFERENSIA REMARKABEL
9. (a) Ki faktor determinante a hiba na kontaminashon di adorashon berdadero? (b) Kua kreensia kristian importante nan a kontaminá?
9 Apòstel Pablo a profetisá ku despues di morto di e apòstelnan siñansa falsu lo a kontaminá adorashon berdadero. (Lesa 2 Tesalonisensenan 2:3 i 7.) Asta algun ruman ku responsabilidat den kongregashon lo a rechasá “siñansa sano.” (2 Tim. 4:3) P’esei Pablo a atvertí e ansianonan di su tempu: “For di meimei di boso mes lo lanta hòmbernan ku lo trose e bèrdat pa pone e disipelnan bai nan tras.” (Echo. 20:30) Segun The New Encyclopædia Britannica, un faktor determinante ku a hiba na siñansa falsu tabata e echo ku algun kristian a sigui kurso di filosofia griego i a kuminsá splika nan kreensianan kristian a base di e filosofia ei. Nan a sinti un plaser den esei i a pensa ku di e manera ei nan lo por a yuda paganonan eduká aseptá kristianismo. Un kreensia kristian importante ku nan a bisti un bachi pagano tabata e doktrina tokante e identidat di Hesukristu. Beibel ta bisa ku Hesus ta Yu di Dios, miéntras ku hende ku ta stima filosofia griego a insistí ku e ta Dios.
10. Kon lidernan religioso lo por a resolvé e kuestion enkuanto e identidat di Kristu?
10 Diferente konsilio di iglesia a debatí riba e kuestion akí. E representantenan di iglesia por a resolvé e asuntu ei fásilmente si nan a duna balor na loke e Skritura ta bisa, pero mayoria di nan no a hasi esei. De echo, promé ku e konsilionan a kuminsá, mayoria di nan ya kaba tabatin nan mes punto di bista enkuanto e identidat di Kristu, i nada no por a kambia nan opinion. Ningun di e dekretonan ku nan a establesé i e desishonnan ku nan a tuma na e reunionnan akí no tabata basá riba e Skritura.
11. Ki balor lidernan di iglesia a duna e asina yamá Tatanan di Iglesia, i dikon?
11 Dikon esnan ku tabata kere ku Hesus ta Dios no a analisá e Skritura mas a fondo? E historiadó Charles Freeman a splika ku “tabata difísil pa [e hendenan ei] ignorá e echo ku vários biaha Hesus a indiká ku e Tata ta mas kuné.” Pues, en bes di analisá e Skritura i hasi kaso di loke e Evangelionan ta bisa, nan a preferá di sigui tradishon di iglesia i opinion di hende. I te na dia djawe, hopi klero ta preferá di bai tras di loke e asina yamá Tatanan di Iglesia a bisa i no e Palabra di Dios. Si bo a yega di papia tokante e doktrina di Trinidat ku un teólogo, lo bo a ripará esei.
12. Ki influensia e emperador tabatin?
12 Algu masha notabel di e debatenan durante e konsilionan ei tabata e influensia di emperadornan romano. Por ehèmpel, relashoná ku e Konsilio di Nisea, profèser Richard E. Rubenstein a skirbi: ‘Constantino a faboresé e obispunan i a hasi nan masha riku. Den ménos ku un aña, e emperador nobo akí a rekonstruí práktikamente tur misa i a debolbé esakinan na e obispunan huntu ku tur otro kos ku a ser kitá for di nan, manera por ehèmpel nan trabou i títulonan. Ademas, e tabata duna e obispunan privilegionan ku anteriormente saserdotenan pagano tabata risibí.’ P’esei mes “Constantino por tabatin hopi di bisa na e Konsilio di Nisea, i kisas asta determiná ki desishon mester a tuma na e reunion ei.” Charles Freeman a bisa ku ‘despues di e konsilio ei, e emperador a sigui intervení den asuntunan di Iglesia. Di un banda, el a duna Iglesia mas outoridat, i di otro banda, e tabata interferí den nan doktrinanan.’—Lesa Santiago 4:4.
13. Segun bo, dikon e lidernan di iglesia no a aseptá bèrdatnan bíbliko ku ta asina kla?
13 E lidernan di iglesia no kier a aseptá ku Hesukristu ta e Yu di Dios; pero hopi hende komun sí no tabatin problema ku esei. Nan no tabata interesá den plaka di emperador ni karera den Iglesia. Nan a mira kosnan na un manera mas ophetivo i a komprondé loke e Skritura ta bisa. Wak kiko Gregorio di Nisa, un lider religioso di e tempu ei, a remarká enkuanto hende komun. Hasiendo mofa di nan, el a bisa: “Tantu bendedó di paña, kambiadó di plaka komo doño di toko a bira teólogo. Si bo puntra nan kuantu bo plaka ta bal, nan ta splika bo dikon e Tata i e Yu no ta igual. Si bo puntra nan kuantu un pan ta kosta, nan ta kontestá ku e Tata ta mas ku e Yu. Si bo puntra si awa di baño ta kla, nan ta bisa bo ku e Yu a ser kreá.” Sí, distinto for di e lidernan di iglesia, e pueblo tabata usa Beibel pa splika loke nan tabata kere. P’esei, lo tabata bon si Gregorio di Nisa i su kompinchinan a skucha di e pueblo.
“TRIGU” I “MAL YERBA” TA KRESE HUNTU
14. Kon nos por sa ku for di e promé siglo padilanti semper lo tabatin algun kristian ungí riba tera?
14 Den un di Hesus su ilustrashonnan, el a indiká ku for di promé siglo padilanti semper lo tabatin kristian ungí riba tera. El a kompará e kristiannan akí ku “trigu” ku ta krese huntu ku “mal yerba.” (Mat. 13:30) Ta klaru ku nos no por bisa ku tur siguransa ta ken ta e hendenan ku tabata ungí. Loke sí nos por konfirmá ta ku semper tabatin hende ku a defendé e Palabra di Dios ku kurashi i ku a refutá e siñansanan falsu di iglesia. Laga nos wak algun ehèmpel.
15, 16. Menshoná algun hende ku a defendé e Palabra di Dios.
15 Arsobispu Agobard di Lyons, Fransia (779-840 E.K.), tabata kontra di adorashon di imágen, sakrifisio di misa pa santu i otro práktika- i seremonianan religioso ku Beibel ta desaprobá. Un di su kontemporáneonan, Obispu Claudio, tambe a rechasá tradishon di iglesia i tabata kontra di resamentu na santu i venerashon di relikia. Den siglo 11, nan a ekspulsá e diákono prinsipal Berengarius di Tours, Fransia, pasobra el a rechasá e siñansa katóliko ku ta bisa ku e pan i e biña ku Hesus a duna su disipelnan durante e último sena ta kambia bira kurpa i sanger di Kristu. Ademas, e tabata siña hende ku Beibel su outoridat ta superior; pues ku nan mester a sigui Beibel i no tradishon di iglesia.
16 Pedro di Bruys i Henry di Lausanne, kendenan a biba durante siglo 12, tambe tabata stima e bèrdat di Beibel. Pedro di Bruys, por ehèmpel, a stòp di sirbi komo pastor pasobra el a ripará ku e siñansanan katóliko, manera boutismo di mucha, orashon pa defuntu, adorashon di krus i ku e pan i biña ta kambia i bira kurpa i sanger di Kristu, no tabata kuadra ku loke e Skritura ta bisa. Na aña 1140, Pedro di Bruys su kreensianan a kost’é su bida. Henry, kende tabata un mònik, tabata abiertamente kontra e práktikanan korupto i adorashon falsu di iglesia. Nan a arest’é na 1148 i a enkarsel’é pa restu di su bida.
17. Ki pasonan importante Waldo i su siguidónan a dal?
17 Alrededor di e tempu ku nan a kima Pedro di Bruys na bida pasobra el a tribi di kritiká Iglesia a nase un otro persona ku despues tabatin masha influensia riba plamamentu di bèrdatnan bíbliko. Su fam tabata Valdès, òf Waldo. Distinto for di Pedro di Bruys i Henry di Lausanne, e tabata un laiko. Pero el a balorá e Palabra di Dios mashá; el a asta deshasí di su poseshonnan material i a laga tradusí partinan di Beibel den e idioma ku mayoria di hende na parti zùitost di Fransia tabata papia. Algun hende a keda asina kontentu ku nan a haña e mensahe bíbliko den nan mes idioma ku nan tambe a repartí nan kosnan material i a dediká nan bida na kompartí bèrdatnan bíbliko ku otro hende. E lidernan di iglesia no a gusta esaki niun tiki. Na 1184, e papa di e tempu ei a ekspulsá e hòmber- i muhénan zeloso akí, ku despues nan a yama e waldensenan, i a kore ku nan for di nan kasnan. Pero esaki en realidat a yuda plama e mensahe di Beibel den otro áreanan. P’esei ku tempu, na hopi parti di Europa tabatin siguidó di Waldo, di Pedro di Bruys, di Henry di Lausanne i di otronan ku tambe a bandoná Iglesia Katóliko. Siglonan despues, a lanta otro personanan ku tambe a defendé bèrdatnan bíbliko. Nan tabata: John Wycliffe (ca. 1330-1384), William Tyndale (ca. 1494-1536), Henry Grew (1781-1862) i George Storrs (1796-1879).
‘E PALABRA DI DIOS NO TA NA KADENA’
18. Splika ki método studiantenan di Beibel di siglo 19 a usa pa studia e Skritura i dikon e tabata un bon método.
18 Maske kuantu enemigunan di Beibel a trata di stroba bèrdatnan bíbliko di plama, nan no a logra. Na 2 Timoteo 2:9, nos ta lesa: “E palabra di Dios sí no ta na kadena.” Por ehèmpel, na 1870 un grupo di studiante di Beibel sinsero a kuminsá buska e bèrdat. Ki método nan a usa? Wèl, un hende tabata hasi un pregunta tokante un sierto tópiko. Nan tabata analisá e pregunta huntu, kaba nan tabata buska i lesa tur teksto bíbliko ku tabatin di haber ku e tópiko ei. Ora nan a saka afó ki relashon e tekstonan ei tabatin ku otro i tabata di akuerdo ku esaki, nan tabata disidí kiko ta e kontesta i tabata hasi un anotashon di esaki. Pues, e hòmbernan fiel akí, esta, nos antesesornan spiritual di siglo 19, a basa nan kreensianan kompletamente riba e Palabra di Dios, meskos ku e apòstel- i ansianonan di promé siglo a hasi. Esei no ta un animashon pa nos awe?
19. Kiko ta e teksto di aña pa 2012, i dikon e ta na su lugá?
19 Awe tambe nos ta basa nos kreensianan riba Beibel. I ku esei na mente, e Kuerpo Gobernante di Testigunan di Yehova a skohe komo teksto di aña pa 2012 e deklarashon konvinsente akí di Hesus: “Bo palabra ta e bèrdat.” (Huan 17:17) Ken ku ke haña e aprobashon di Dios mester biba na armonia ku e bèrdat. P’esei, laga nos tur sigui hasi esfuerso pa laga e Palabra di Dios guia nos.
[Preguntanan di Estudio]
[Komentario na página 12]
Teksto di aña pa 2012: “Bo palabra ta e bèrdat.”—Huan 17:17.
[Plachi na página 11]
Waldo
[Plachi na página 11]
Wycliffe
[Plachi na página 11]
Tyndale
[Plachi na página 11]
Grew
[Plachi na página 11]
Storrs
