Tin Riyul’ e Kristiano e Yad Ma Tayfan e Thin rok Got

“Mu fil ngorad e tin nib riyul’, ni er e thin rom.”​—JOHN 17:17.

MU GAY E FULWEG KO PI DEER NEY:

Uw rogon nib thil fare muulung nni tay u Jerusalem ko duw ni 49 C.E. ko pi muulung ni i tay e pi tayugang’ ko galesiya nga tomuren?

Mini’ e piin ni ur ayuweged e Thin rok Got u tomuren e pi apostal?

Uw rogon e fol Bible ni i tay e piin ni ur filed e Bible ko bin 19 e chibog, ma mang fan nib fel’ e n’en ni ur rin’ed?

1. Mang reb e ban’en nim guy nib thil ko Pi Mich Rok Jehovah u nap’an e yay nsom’on nim nonad?

 AM LEMNAG e yay nsom’on nim nonad e Pi Mich Rok Jehovah. Mang e ka ga manang u murung’agrad? Boor e girdi’ nra lungurad, ‘Kug ngat nga rogon nra fanayed e Bible ni ngar pied e fulweg ko deer rog.’ Kad felfelan’gad u nap’an ni kad nanged e n’en nib m’agan’ Got ngay ni fan ko fayleng, nge n’en ni ma buch rodad u nap’an ni kad m’ad, nge athap rok e piin ni yad ba t’uf rodad ni kar m’ad.

2. Mang boch i fan ni ke ga’ fan e Bible u wan’um?

² Machane, nap’an nda ululgad i fil e Bible ma gad nang ni Bible e gathi kemus ni ma pi’ e fulweg ko pi deer rodad u murung’agen e yafas rodad, nge yam’, nge pi n’en ni bay ko gabul nge langlath, ya ki ga’ fan u wan’dad ni bochan e kad nanged ni kari mus e re ke babyor ni bay nrayog ni nge ayuwegdad. Fonow riy e gubin ngiyal’ nrayog ni nge ayuweg e girdi’, ma piin ni yad ra fol riy e yad ra felfelan’ me fel’ e par rorad. (Mu beeg e Psalm 1:1-3.) Tin riyul’ e Kristiano e gubin ngiyal’ nib mich e Bible u wan’rad, ma ‘darur lemniged ni thin rok e girdi’, ya yad ma lemnag ni thin rok Got.’ (1 Thess. 2:13) Gad ra sul ngad yaliyed rogon ni un fanay e Bible kakrom nge rogon ni un darifannag, ma be tamilangnag e n’en nib thil u thilin e piin ni yad ma tayfan e Thin rok Got nge piin danga’.

KAN PITHIG REB E MAGAWON NIB GA’

3. (a) Mang magawon e kirebnag e taareban’ u lan e ulung ni Kristiano ko bin som’on e chibog? (b) Mang fan nib mo’maw’ ni ngan pithig e re magawon nem?

³ U lan 13 e duw nga tomuren nni dugliy Kornelius ni gathi be’ nu Israel ni nge mang reb e Kristiano, ma aram me sum reb e magawon ni kirebnag e taareban’ u lan e ulung ni Kristiano. Ngiyal’ nem e boor e girdi’ ni gathi yad e Jew ni yad be mang Kristiano. Ere deer ni sum e, Ba t’uf  ni ngan fol ko yalen rok piyu Jew ni ngan maad’adnag e pi pumoon ni gathi yad e Jew u m’on ni ngar uned ko taufe, fa? Re deer ney e ba mo’maw’ ni nge fulweg be’ nu Jew. Pi Jew ni yad ma fol ko Motochiyel e darur uned nga tafen be’ ni gathi ir reb e Jew, maku darur chaggad ngorad. Pi Jew ni yad e Kristiano e un gafgownagrad nib gel ni bochan e kar digeyed e teliw rorad. Ere, faan yad ra chag ngak e piin ni gathi yad e Jew ndawor ni maad’adnagrad ma ngari gel boch e gafgow ni ngan tay ngorad, me palognag thilin e pi Kristiano nge piin ni yad ma un ko teliw rok piyu Jew.​—Gal. 2:11-14.

4. (a) Mini’ e piin nra bad nga taabang ni ngar pithiged e re magawon ney? (b) Mang deer e rayog ni nge sum u wan’ e girdi’ ni ur moyed e ngiyal’ nem?

⁴ Nap’an e duw ni 49 C.E., me muulung e pi apostal nge piin piilal u Jerusalem ni “ngar puruy’niged murung’agen e re bugithin ney.” Pi girdi’ ney e yad boch e Jew ni kan maad’adnagrad. (Acts 15:6) Muulung nra ted e gathi ur weliyed riy boch ban’en nde ga’ fan nra k’aring e chalban, ya ur weliyed murung’agen e machib u Bible. Gubin e girdi’ nib l’ag ko re magawon nem e ra weliyed lanin’rad. Uw rogon ni yad ra pithig e re magawon nem? Yad ra pag e laniyan’ nge pi n’en ni baadag be’ ni nge gagiyegnag e n’en ni yad ra dugliy, fa? Ra son e pi piilal nem nge mada’ ko ngiyal’ ni ke war e togopuluw ni yibe tay ko pi Kristiano u Israel mfin ra dugliyed ban’en, fa yad ra dugliy ban’en ni yugu aram rogon nde m’agan’rad ngay ni bochan e nge yog ni mudugil e n’en ni ngan rin’?

5. Mang boch e kanawo’ nib thil fare muulung nni tay u Jerusalem riy ko duw ni 49 C.E. ko pi muulung ko galesiya ni un tay boch e chibog nga tomuren?

⁵ Pi muulung ni ma tay girdien e galesiya e ba ga’ ni yad ma dugliy boch ban’en riy ni yugu aram rogon ndawori taareban’ urngin e girdi’ ngay ni kemus ni bochan e nge mudugil ko mang e ngan rin’. Machane, gathi aray rogon fare muulung nni tay u Jerusalem ya kar dugliyed ban’en ni yad gubin nib m’agan’rad ngay. Uw rogon ni yog ni ngar rin’ed e re n’em? Bochan ni yugu aram rogon nib thilthil lanin’rad, ma yad gubin nra ted fan e Thin rok Got mi yad fanay ni ngar pithiged fare magawon ni ke sum.​—Mu beeg e Psalm 119:97-101.

6, 7. Uw rogon nni fanay e Thin nu Bible ni ngan pithig fare magawon ni sum u murung’agen e maad’adnagey?

⁶ Fare thin ni bay ko Amos 9:11, 12 e ir e ayuweg e re magawon ney ni nge puf. Pi thin ney e bay ko Acts 15:16, 17 ni gaar: “Tomren e biney e bay gu sul, nggu toy e naun rok David ni ke puth; ma tin ni ke kireb riy e bay gu fulweg nga rogon mu ku gu toy bayay. Ma aram e urngin e tin ni ka bay e girdi’ e bay ur gayed Somol, ni urngin e pi nam ni kug piningrad ni ngar manged girdieg.”

⁷ Machane sana ra yog be’ nre thin nu Bible ney e der yog nde t’uf ni ngan maad’adnag e piin gathi yad e Jew ni fin ra manged Kristiano. Riyul’ e re n’ey; machane, pi Kristiano ni yad e Jew e yad ra nang fan e re n’ey. Mang fan? Bochan nda ur sapgad ngak e piin gathi yad e Jew ni fin ra manged Kristiano ni yad e ‘piin nu bang,’ ya ur sapgad ngorad ni yad boch pi walagrad. (Ex. 12:48, 49) Bod ni rogon ni yog fare Bible ni Bagster Version of the Septuagint, ko Esther 8:17 e gaar: “Boor e girdi’ ni gathi yad e Jew nni maad’adnagrad mar manged boch e Jew.” Aram fan nnap’an ni yog e Bible ni tin ni ka bay e girdi’ nu Israel (piyu Jew nge piin nni maad’adnagrad ngar manged boch e Jew) ngki chag ko ‘piin nu bang’ (girdi’ ni gathi yad e Jew ndawor ni maad’adnagrad) e yad ra mang boch e girdi’ ni yad be fek fithingan Got, mab tamilang e n’en ni be yog. De t’uf ni ngan maad’adnag e piin gathi yad e Jew ni yad baadag ni ngar manged Kristiano.

8. Mang fan nib t’uf ni nge dabi rus e pi Jew ni yad e Kristiano ni ngar dugliyed e n’en ni ngan rin’?

⁸ Thin rok Got nge gelngin nib thothup e pow’iy e pi Kristiano nem ni ngar dugliyed ban’en nib ‘taareban’rad’ ngay. (Acts 15:25)  Yugu aram rogon nra mun daken e gafgow ni yira tay ngak e pi Jew ni yad e Kristiano, machane piin ni yad ba yul’yul’ e ra folgad ko n’en ni kan dugliy nib puluw ko Bible.​—Acts 16:4, 5.

KE GAGIYEL E N’EN NIB THIL

9. (a) Mang reb i fan ni kirebnag e machib ni googsur e bin riyul’ e liyor? (b) Mang reb e machib nib ga’ fan nni thilyeg ngan weliy nde puluw?

⁹ I yog apostal Paul u m’on riy ni tomuren nra yim’ e pi apostal ma ra kirebnag e machib ni googsur e bin riyul’ e liyor. (Mu beeg e 2 Thessalonika 2:3, 7.) Mus ngak e piin ni u rogned e thin u lan e ulung nda kur filed e “bin nib riyul’ e machib.” (2 Tim. 4:3) I fonownag Paul e piin piilal e ngiyal’ nem ni gaar: “Bayi taw nga ba ngiyal’ me ban boch e girdi’ ko biromed e ulung nga rogned e tin nde riyul’ ngar pow’iyed e piin ni ke mich Jesus u wan’rad nga bang ngar uned ngorad.” (Acts 20:30) I weliy reb e babyor reb i fan ni maathuk e machib ni googsur nga fithik’ e tin riyul’ ni gaar: “Boch e Kristiano ni kar filed e llowan’ nu Greece e ra tababgad i fanay e pi llowan’ nem u nap’an ni yad be weliy murung’agen e michan’ rorad ni bochan e yad be uf ko n’en ni yad manang, mu kur lemnaged nrayog ni nge ayuweg e piin ni yad ma liyor nga boch e got ni googsur ni ngar manged Kristiano.” (The New Encyclopædia Britannica) Reb e machib nib ga’ fan nni thilyeg ngan weliy nde puluw e aram fare machib u murung’agen Jesus Kristus. Be yog e Bible ni ir Fak Got; machane piin nib mich u wan’rad e llowan’ nu Greece e ur machibnaged ni ir Got.

10. Susun ni uw rogon ni ngan pirieg e fulweg ko fare deer ni ke sum u murung’agen Kristus?

¹⁰ Re deer ney e un luag e thin riy u boor e muulung ni i tay girdien e galesiya. Susun ni yad ra pirieg e fulweg ko re deer nem ni faan gomanga ra folgad ko thin nu Bible, machane boor i yad e de rin’. Bin riyul’ riy e yooren i yad e yib ko re muulung nem ni ke turguy u wan’ ndabi thilyeg e lem rok. Pi n’en nni dugliy ko pi muulung ney e dariy reb nib puluw ko Bible.

11. Mini’ e piin ni ma fol e pi tayugang’ ko teliw rok u nap’an ni yad ra dugliy ban’en e ngiyal’ ney, ma mang fan?

¹¹ Mang fan nda i dugliy e pi tayugang’ ko teliw ban’en nrogon nib puluw ko Bible? Rogon ni yog Charles Freeman ni be’ nib llowan’ e bochan ni piin nib mich u wan’rad ni Jesus e Got e “ba mo’maw’ ni nga rogned nde riyul’ e pi n’en ni i yog Jesus ni Got e kab ga’ ngak.” Ere, n’en ni ke buch e ni ga’nag fan e machib ko galesiya nge lem ko girdi’ ko Gospel nu Bible. Ki mada’ ko ngiyal’ ney, ma boor e tayugang’ ko galesiya ni yad ma lemnag ni kab ga’ fan e n’en ni yog e pi Tayugang’ ko Galesiya kakrom ko n’en ni be yog e Thin rok Got! Faanra kam weliyew be’ ni ke fil murung’agen e teliw murung’agen fare machib ni Trinitas, ma sana kam nang e re n’ey.

12. Uw rogon ni suruy e pilung nu Roma laniyan’ e pi tayugang’ ko galesiya?

¹² Pi n’en ni i rin’ e pi pilung nu Roma e ki magawonnag e pi muulung ney. Reb e Sensey u reb e skul nib tolang ni ka nog Richard E. Rubenstein ngak e weliy murung’agen fare Muulung nu Nicaea ni gaar: “Constantine ni ir e bin nib beech e pilung e ke flaabnag e pi bishof. De gaman reb e duw ni gagiyeg, me sulweg ngorad urngin ban’en ni kan fek rorad, ni bod rogon e galesiya rorad, nge maruwel rorad, nge liw rorad . . . Ke pi’ ngak e pi bishof e tow’ath ni un pi’ ngak e pi padrey ni yad ma meybil nga boch e got ni googsur.” Ere, bochan e re n’ey, ma aram fan ni “rayog ni nge dugliy Constantine e n’en ni ngan rin’ u nap’an fare Muulung nu Nicaea ara thilyeg e n’en ni kan dugliy.” Ki yog Charles Freeman ni gaar: “Bochan e n’en ni ke buch ma aram fan nrayog ni nge pi’ e re pilung nem gelngin e galesiya ara thilyeg boch e machib.”​—Mu beeg e James 4:4.

13. Ga be lemnag ma mang fan nde fol e pi tayugang’ ko galesiya ko thin nu Bible?

¹³ Yugu aram rogon nde mich u wan’ e pi  tayugang’ ko galesiya ni Jesus Kristus e Fak Got, machane tin ka bay e girdi’ e ba thil e lem rorad ni bochan e ur nanged fan ma i mich u wan’rad e n’en ni ur beeged u Bible. Machane, pi tayugang’ ko galesiya e yad baadag e salpiy ni be pi’ e pilung ngorad nge mat’awrad, ere aram fan nda ur folgad ko thin nu Bible. Gregory nu Nyssa ni ir reb e tayugang’ ko teliw e ngiyal’ nem e gathibthibnag rogon ni ma weliy e pi ta siyobay, nge piin ni ma thilyeg e salpiy, nge piin ni ma maruwel u kantin, nge pi tapigpig murung’agen e teliw. Dabun Gregory ni boor ko pi girdi’ nem e yad be yog nib thil e en Chitamangiy ko en Fak, ma en Chitamangiy e kab ga’ ko en Fak, ma en Fak e dariy ban’en nni sunmiy riy. Ere ke yog ko yug girdi’ ni ngar weliyed e pi n’ey ni yad be fanay e Bible, ni aram ban’en nda i rin’ Gregory nu Nyssa nge pi tayugang’ ko galesiya. Ba fel’ ni faan gomanga ra motoyilgad ko girdi’!

KE ILAL E “WHEAT” NGE “PAN” U TAABANG

14. Mang fan nrayog ni nga dogned ni ka nap’an e bin som’on e chibog ma immoy boch e Kristiano ni kan dugliyrad u fayleng?

¹⁴ I tamilangnag Jesus u lan reb e fanathin rok nra moy boch e Kristiano ni kan dugliyrad u fayleng ni ka nap’an e bin som’on e chibog. I taareb rogonnagrad ko “wheat” ni be tugul u fithik’ e “pan.” (Matt. 13:30) Riyul’ ndabiyog ni nga dogned ko mini’ e piin ni yad ba muun ko re ulung nem ni kan dugliyrad. Machane rayog ni ngad micheged ni immoy boch i yad ni ur ayuweged e Thin rok Got mu ur togopuluwgad ko pi machib ni googsur ko galesiya. Ngad weliyed murung’agen e pi girdi’ nem.

15, 16. Mog fithingan boch e girdi’ ni ur ted fan e Thin rok Got.

¹⁵ Agobard ni be’ nib tolang ko Bishof u Lyons, France (779-840 C.E.), e i togopuluw ko meybil ni yima tay ko liyos, nge galesiya ni yibe tay fithingan e pi thothup ngay, nge rogon e liyor ni yima tay u galesiya. Ku reb e Bishof ni immoy e ngiyal’ nem ni ka nog Claudius ngak e siyeg boch e yalen ko galesiya maku da i m’agan’ ko meybil ni yima tay ngak e pi thothup nge liyos. Nap’an e bin 11 e chibog, min chuweg Berengarius ni ir e ba Tolang ko Deacon ko galesiya ni bochan e siyeg fare machib ko Katolik u murung’agen e flowa nge wain ni ma pig nge ngal’ ni downgin Jesus nge rachaen. Ki machibnag ni Bible e kab ga’ fan ko yalen ko galesiya.

¹⁶ Peter nu Bruys nge Henry nu Lausanne ni ur moyew ko bin 12 e chibog e ku aram l’agruw ni’ ni yow baadag e tin riyul’ nu Bible. Peter e tal ko padrey ni bochan e ke nang nde puluw fare n’en ni ngan taufenag e bitir ni kabran, nge fare machib u murung’agen e flowa nge wain ni ma pig nga ngal’ ni downgin Jesus nge rachaen, nge meybil ko kuruth. Nap’an e duw ni 1140, min urfeg nge yim’ ni bochan e michan’ rok. Ma Henry e i  togopuluw ko ngongol nib kireb nge liyor nde puluw ni un tay u galesiya. Nap’an e duw ni 1148, min kol nga nin’ nga kalbus me par u rom nge mada’ ko ngiyal’ ni ke yim’.

17. Mang boch ban’en nib ga’ fan ni i rin’ Waldo nge piin ni yad ba mang ngak?

¹⁷ Ba ngiyal’ u nap’an nli’ Peter nu Bruys nge yim’ ni bochan e be gathibthibnag e galesiya, ma aram min gargeleg be’ ni ayuweg ni nge garer e tin riyul’ nu Bible. Cha’nem e yima yog Valdès ara Waldo ngak. * Cha’ney e ba thil ngak Peter nu Bruys nge Henry nu Lausanne, ya de un ko skul ko teliw, machane rib ga’ fan e thin rok Got u wan’, ma aram me pi’ urngin e chugum rok ni chuway’, me yarmiy ni ngan pilyeg yu yang ko Bible ko thin rok e piin ni yad ma par u yimuch ni ngek u France. Boch e girdi’ ko ngi n’em e ra felfelan’gad u nap’an nrung’aged e thin nu Bible ni kan pilyeg ko thin rorad ma aram mar pied e chugum rorad ni chuway’, mar fanayed e yafas rorad ni ngar weliyed e tin riyul’ nu Bible ko girdi’. Dabun e pi tayugang’ ko galesiya e re n’ey. Ere nap’an e duw ni 1184 ma aram me chuweg e pope e pi girdi’ ney ni munmun mu un pining e Waldenses ngorad ko galesiya ngemu’ miki chuwegrad e bishof u taferad ma da ki pagrad ni ngar sulod ngay. Re n’ey e ayuweg e tin riyul’ ni ngki garer nga yugu boch e binaw. Faani munmun, ma rayog ni ngan pirieg e piin ni yad ma folwok rok Waldo, nge Peter nu Bruys, nge Henry nu Lausanne u boor e nam u Europe. Ku immoy boch e girdi’ u boch e chibog nga tomuren ni ur ayuweged e thin rok Got. Pi girdi’ ney e: John Wycliffe (c. 1330-1384), nge William Tyndale (c. 1494-1536), nge Henry Grew (1781-1862), nge George Storrs (1796-1879).

“THIN ROK GOT E GATHI KAN M’AG E CHEN NGAY”

18. (a) Mu weliy rogon e fol Bible ni i tay e piin ni ur filed e Bible ko bin 19 e chibog. (b) Mang fan nib fel’ e n’en ni ur rin’ed?

¹⁸ Yugu aram rogon ni i athamgil boch e girdi’ ni ngar taleged ndabi garer e tin riyul’ u Bible, machane de yog rorad. Be gaar e 2 Timothy 2:9: “Thin rok Got e gathi kan m’ag e chen ngay.” Nap’an e duw ni 1870 me tabab boch e girdi’ ni yad ma fil e Bible i gay e tin riyul’. Uw rogon ni ur rin’ed e re n’ey? Som’on e ra fith bagayad reb e deer. Ngemu’ mi yad weliy u taabang, mi yad yaliy boch e thin nu Bible ni bay rogon ngay. Ma nap’an nra m’agan’rad ngay mi yad dugliy e fulweg ko fare deer mi yad yoloy nga but’. Rib fel’ e n’en ni ur rin’ed ni bochan e ur folwokgad ko pi apostal nge piin piilal ko bin som’on e chibog. Ra yib e athamgil nga lanin’dad u nap’an ni gad ra nang ni pi girdi’ ney ni yad e tin som’on e Mich Rok Jehovah e ur guyed rogon ni nge puluw e michan’ rorad ko Thin rok Got.

19. Mang e thin nu Bible ni fan ko duw ni 2012, ma mang fan nib puluw e re n’ey?

¹⁹ Michan’ rodad e ngiyal’ ney e ku be tor nga daken e Bible. Aram fan ni ke mel’eg fare Ulung ni Ma Pow’iyey ko Pi Mich Rok Jehovah fapi thin ni yog Jesus ni bay ko John 17:17 ni nge mang thin nu Bible ni fan ko duw ni 2012 ni gaar: “Mu fil ngorad e tin nib riyul’, ni er e thin rom.” Gubin e piin ni yad baadag ni ngar fel’gad u wan’ Got e thingar u ranod u kanawoen e tin riyul’. Ere gad gubin ni ngad athamgilgad ni nga i pow’iydad e Thin rok Got.

[Footnote]

[Study Questions]

[Blurb on page 12]

Thin nu Bible ni fan ko duw ni 2012 e: “Mu fil ngorad e tin nib riyul’, ni er e thin rom.”​—John 17:17

[Picture on page 11]

Waldo

[Picture on page 11]

Wycliffe

[Picture on page 11]

Tyndale

[Picture on page 11]

Grew

[Picture on page 11]

Storrs