Wupwony Kit Me Kiyo Piny Ki Bot Lukwena Pa Yecu
Wupwony Kit Me Kiyo Piny Ki Bot Lukwena Pa Yecu
“Wubed ka kiyo piny kacel kweda.”—MAT. 26:38.
NGO MA IPWONYO KI I:
Kiyo piny me niang ka ma myero kitit iye kwena?
Bedo ki wang ma twolo i lok kom lega?
Tito kwena kore ki kore kadi bed ariya tye?
1-3. Kiyo piny oloyo lukwena nining i dyewor me agikki me kwo pa Yecu i lobo, dok gin ango ma nyuto ni pe gunwoyo balgi-ni?
TAM kong i kom gin mutimme i dyewor me agikki me kwo pa Yecu i lobo. Yecu ocito i kabedo mo ma en maro mada, ma obedo poto me Gececemane ma tye tung kunyango me Jerucalem. En owoto kacel ki lukwenane ma lugen i kabedo meno. En onongo mito ka mo ma oling mot me lega pien par mapol onongo tye i cwinye.—Mat. 26:36; Jon 18:1, 2.
2 Lukwena adek—Petero, Yakobo, ki Jon—gucito kacel ki Yecu wa i dye poto. En owaco botgi ni “wubed ka kiyo piny kacel kweda,” ci onyiko anyim manok ocako lega. I kare ma odwogo, onongo lureme ducu gunino woko. En dok okwayogi ni: ‘Wuki piny.’ I nge man, gin gunino tyen aryo doki! Ingeye lacen i dyewor meno, lukwena pa Yecu ducu pe gubedo ka kiyo piny i yo me cwiny. Gin guringo guweko Yecu woko!—Mat. 26:38, 41, 56.
3 Lukwena magi gukoko ange pi bedo ma pe gikiyo piny. Dong jo ma lugen magi pe gutero kare malac me pwonye ki i balgi. Buk me Tic pa Lukwena nyutu lanengi maber me bedo ma gikiyo piny. Lanengi maber-ri nen calo okonyo Lukricitayo mukene me timo kumeno. I kare-ni, omyero wabedu ma wakiyo piny ma dong kato ducu. (Mat. 24:42) Kong dong wanyamu pwony adek madok i kom kiyo piny ma wapwonyo ki buk me Tic pa Lukwena.
GUKIYO PINY ME NIANG KA MA MYERO GITIT IYE KWENA
4, 5. Paulo gin ki luwot luwote-ni gunongo tira pa cwiny maleng nining?
4 Me cakone, lukwena pa Yecu gubedo ma wangi twolo me niang ka kwene ma myero gitit iye kwena. I Tic pa Lukwena cura 16, wabineno kit ma Yecu otiyo kwede ki cwiny maleng me tiro lakwena Paulo ki lureme i wotgi me pwony. (Tic. 2:33) Kong wanenu kit ma wotgi obedo kwede.—Kwan Tic pa Lukwena 16:6-10.
5 Paulo, Cira, ki Temceo gua ki i boma me Licitra ma tye tung kupiny me Galatia. I nge nino manok, guo i gudu madit pa Jo Roma ma cito i Acia ka ma dano pol iye adada. Onongo gimito ni gilub yo meno wek gicit gilim boma mogo ka ma dano alip mapol myero guwiny lok i kom Kricito. Ento, gin mo dok ogengogi i wotgi meno. Tyeng me 6 waco ni: “Ka guwoto gubaro i lobo Perugia ki Galatia, ci cwiny maleng ogengogi ni pe gulok lok pa Lubanga i Acia.” Cwiny maleng ogengo luwot magi me tito kwena i kabedo mapol i lobo Acia i yo mo ma pe kitito. Yecu onongo nen calo mito telo wi Paulo ki lureme me cito i kabedo mukene kun tiyo ki cwiny pa Lubanga.
6, 7. (a) I kare ma Paulo ki luwote guo cok ki Bitinia, ngo mutimme? (b) Lukwena magi gumoko tamgi me timo gin ango, dok adwogine obedo ningo?
6 Luwot magi ma komgi mit-ti gucito kwene? Tyeng me 7 tittiwa: “Ka guo ma gukemo Micia, ci gutemo dok tung Bitinia, ento cwiny pa Yecu pe oye ki gin.” Kare ma kijukogi pe me tito kwena i Acia, Paulo ki lureme gukwanyo yo ma cito tung kumalo ki tam me tito kwena i boma me Bitinia. Ento i kare ma guo cok ki Bitinia, Yecu dok otiyo ki cwiny maleng me jukogi woko. Co magi omyero obed ni gubedo ki ur mada. Gin onongo gingeyo gin ma myero gitit ki kit ma myero gitit kwede ento pe onongo gingeyo ka kwene ma myero gitit iye. Waromo ketone kit man: Gin gudwongo doggola me tito kwena i Acia—ento pe kiyabo botgi. Gudwongo doggola me tito kwena i Bitinia—pe dok kiyabo botgi. Tika gujuko dwongo doggola pi kabedo mukene? Lutit kwena man ma komgi mit-ti pe gujuko!
7 Lacen, co magi gumoko tam mo ma nen calo tam me atata. Tyeng me 8 wacciwa ni: “Mumiyo gukato ki i Micia, gucito piny i Teroa.” Co magi gulokke gudok tung poto ceng ci guwoto mairo 350, gukato boma mapol gucito nio wa i wang wat me Teroa, ma obedo ka ngolo nam me cito i Makedonia. Ki kunnu, Paulo ki luwote gudwongo doggola tyen me adekke, ci kiyabigi malac adada! I ngeye, tyeng me 9 tittiwa gin mutimme: “Paulo oneno gin mo i wang lek dyewor, laco mo me Makedonia nongo ocung i nyime, obako doge bote kun waco ni, ‘Kwang nam ibin i Makedonia ikonywa.’” Kakany dong, Paulo ongeyo ka kwene ma myero gitit iye kwena. Labongo galle, gin gukwango yeya gucito i Makedonia.
8, 9. Gin ango ma waromo pwonyone ki i wot pa Paulo?
8 Gin ango ma waromo pwonyone ki i wot pa jo magi? Nge ni i kare ma dong Paulo ocako wot me cito i Acia aye cwiny pa Lubanga ojuke. Nge bene ni, i kare ma Paulo dong tye cok ki Bitinia aye Yecu ojuke. I agikkine, nio wa i kare ma Paulo dong oo i Teroa aye Yecu otirre me cito i Makedonia. Macalo Latel wi kacokke, Yecu bene romo tic kwedwa i yo acel-lu i kare man. (Kol. 1:18) Me labolle, twero bedo ni imito cako tic calo painia nyo cito ka pwony ka ma can lutit kwena tye iye. Ento oromo bedo ni i kare ma nongo dong icako timo gin mo me cobo yubbi aye Yecu romo tic ki cwiny pa Lubanga me tirri. Me laporre: Ladwo mutoka twero tiro wi mutoka tung acuc nyo lacam keken ka mutoka ocako ngwec. I yo acel-lu, Yecu bene romo tirowa me dongo ticwa me pwony keken ka wacako timone—ka watye ka keto tek me cobo yubwa.
9 Ento ka tutewa pe onyako nyige cutcut kono? Myero wail cingwa woko, ki tam ni cwiny pa Lubanga pe tye ka tirowa? Wi myero opo ni Paulo bene orwatte ki ariya mapol. Kadi bed kit meno, en omedde ki yenyo ki dok dwongo doggola nio ka kiyabe. I yo acel-lu, ka watute matek me yenyo ‘doggola malac me tic’ ci wabilimo mot madwong.—1 Kor. 16:9.
GIN GUBEDO KI WANG MA TWOLO I LOK KOM LEGA
10. Ngo ma nyuto ni bedo ki wang ma twolo i lok kom lega pire tek ma lubbe ki kiyo piny?
10 Kong dong wanenu pwony me aryo madok i kom kiyo piny ma watwero pwonyone ki bot Lukricitayo me cencwari me acel: Gin gubedo ki wang ma twolo i lok kom lega. (1 Pet. 4:7) Diyo cwiny i lega pire tek pi bedo ma wakiyo piny. Wi opo ni ma peya kimako Yecu ki i poto me Gececemane, en owaco bot lukwenane adek ni: “Wuki wuleg Lubanga, wek pe wudony i abita mo.”—Mat. 26:41.
11, 12. Pingo dok i yo ma nining ma Kerode ouno kwede Lukricitayo, ma bene tye iye Petero?
11 Petero, ma onongo tye i nino meno, lacen omoko teko ma tye i diyo cwiny i lega. (Kwan Tic pa Lukwena 12:1-6.) I tyeng ma gukwongo, wakwano ni Kerode ocako keto aunauna i kom Lukricitayo pi nongo cwak pa Lujudaya. Nen calo Kerode ongeyo ni Yakobo obedo lakwena ma cok ki Yecu tutwal. Pi meno, Kerode oneko Yakobo “ki pala lucwan.” (Tyeng me 2) Kacokke orwenyo lakwena ma gimaro adada. Man obedo twon atematema madit bot omege!
12 Ngo mukene ma Kerode dok otimo? Tyeng me 3 tito ni: “Ka dong oneno ni oyomo cwiny Lujudaya, ci omako Petero bene.” Ento, Petero onongo obedo i kin lukwena mukene ma kigonyogi ki i buc i yo me tangu. (Tic. 5:17-20) Oromo bedo ni Kerode bene ongeyo lok man. Dong en onongo pe mito ni Petero olwi. En omako Petero ci omiye bot ‘lukur-piny ma gibedo gin angwen angwen dok kilokogi tyen angwen nino acel wek gukure, kun mito ni kipid lok i kome i nge nino madit me kato (paska).’ (Tyeng me 4) Tam kong i lok meno! Kerode otweyo Petero ki nyor i kin lukur piny 2, ka dok oketo lukurpiny 16 ma gilene aleya dye ceng ki dye wor me neno ni lakwena-ni pe olwi. Kerode onongo mito miyo Petero wek kinek woko i nge nino me Kato, wek tone obed calo mot me yomo cwiny lwak. Ngo ma Lukricitayo onongo gitwero timone i kit peko marac ma kit meno?
13, 14. (a) Gin ango ma kacokke otimo i kare ma kitweyo Petero i jela? (b) Ka odok i lok me lega, gin ango ma wapwonyo ki i lanen pa luwot Petero-ni?
13 Jo me kacokke onongo gingeyo ngo me atima. Tyeng me 5 kwanne ni: “Gibedo ka kuro Petero i ot mabuc kit meno; ento lwak jo muye Kricito gubedo ka lego Lubanga pire matek.” Adada, legagi pi omegigi me amara-ni obedo matek kun a ki i cwinygi. To pa Yakobo pe oturo cwinygi; nyo pe omiyo guneno lega calo gin ma konye peke. Ma ka meno, gin onongo gingeyo ni lega pa lugen pire tek tutwal bot Jehovah. Ka lega ma kit meno obedo ma lubbe ki mitine, ci en gamo.—Ibru 13:18, 19; Yak. 5:16.
14 Ngo ma watwero pwonyone ki i lanen pa luwot Petero-ni? Bedo ma wakiyo piny kwako lega pi omegiwa ki lumegiwa pe pi wan keken. (Ep. 6:18) In mono ingeyo ngat mo muye ma peko odiyo mada? Twero bedo ni jo mukene nongo gitye ka lweny ki aunauna, gigeng ma gamente oketo i komgi nyo peko ma poto atura. Pingo pe iket obed i legani ki cwinyi ducu? Oromo bedo ni ingeyo ngat ma tye ka lweny ki peko mo laling ling. Oromo bedo ni gitye ka lweny ki peko me i ot, tur cwiny, nyo two. Pingo pe itam pi jo mogo ma iromo lego pigi ki nyinggi bot Jehovah, ma obedo ‘Lawiny lega.’?—Jab. 65:2.
15, 16. (a) Tit kong kit ma lamalaika pa Jehovah ogonyo kwede Petero ki i buc. (Nen cal ma tye piny kanyi.) (b) Pingo kweyo cwinywa ka watamo i kom kit ma Jehovah ogonyo kwede Petero?
15 Ento gin ango mutimme i kom Petero? I dyewor me agikki pa Petero i buc, en obuto onino woko i kin lukur piny aryo, Petero okato ki i jami mogo me aura mada. (Kwan Tic pa Lukwena 12:7-11.) Go kong gin mutimme: I atura, dero ocaro i kicika me ot bucce. Lamalaika ocung kunu, ma nen calo lukur piny pe guneno, ocoyo Petero oyotoyot. Dong nyor ma onongo kitweyo ki cinge uony piny kene! Lamalaika-ni otelo wi Petero otere woko ki i buc kun gikato lukur piny aryo magi, ka dong me agikkine gukato dog cel madit me nyonyo ma “oyabbe kene.” I kare ma gukato woko ki i buc, lamalaika-ni orweny woko. Kigonyo Petero!
16 Lwodo lok i kom kero pa Jehovah mono pe jingo niyewa? Tye kono ni, wangeyo ni Jehovah pe gonyowa i kare-ni i yo me tangu. Ento, watye ki niye matek ni en tiyo ki tekone i kom luticce i kare-ni. (2 Tekwaro 16:9) En twero konyowa me lweny ki atematema mo keken ma warwatte kwede kun tiyo ki cwiny maleng. (2 Kor. 4:7; 2 Pet. 2:9) Jehovah dong cok tic ki Wode me gonyo dano milion mapol ma pe kwanne ki i buc marac loyo ma en aye to. (Jon 5:28, 29) Gen ma watye kwede twero miyowa tekcwiny madit ka watye i atematema i kare-ni.
GUMEDDE KI TITO KWENA KORE KI KORE KADI BED ARIYA TYE
17. Lanen maber ango ma Paulo oweko i nyuto mit kome ki tero tito kwena calo gin ma mitte oyot?
17 Man aye pwony me adek madok i kom kiyo piny ma watwero pwonyone ki bot lukwena: Gin gumede ki tito kwena kore ki kore kadi bed ariya obedo tye. Tito kwena ki mit kom dok me oyot pire tek mada me bedo ma wakiyo piny. Lakwena Paulo onyutu lanen maber mada i lok man. En otute matek ki mit kom, owoto i bor piny dok ocako kacokke mapol. Paulo okanyo jami maraco mapol, ento pe orwenyo mit kome kun tero ticce calo gin ma mitte me oyot.—2 Kor. 11:23-29.
18. Paulo omedde ki miyo caden nining i kare ma kitweye i buc i Roma?
18 Nen kong dong lokwa me agikki i kom Paulo i buk me Tic pa Lukwena cura 28. Lakwena Paulo oo i Roma, ka ma en myero ocung i nyim Nero. Kigwoko en i buc, oromo bedo ni kitweyo en ki nyor i kom acikari ma gwoke. Kadi bed kit meno, nyor-ri pe ojuke ki tito kwena! Paulo oyenyo yo me miyo caden. (Kwan Tic pa Lukwena 28:17, 23, 24.) I nge nino adek, en olwongo ludito pa Lujudaya wek etit botgi kwena. Ka dong, i nino mo ma gin guyero, Paulo otito lok me caden magwar. Tyeng me 23 waco ni: “[Lujudaya ma kunu] guciko nino ci gubino bote i ot ma en bedo iye, mapol makato tyen mukwongo ca. Ci oyeko lok ducu kikore cakke odiko nio wa otyeno kun tito lok kom ker pa Lubanga atyer ci otemo ywayo tamgi wek guye Yecu ki lok ma okwanyo ki i cik pa Moses ki buk pa lunebi.”
19, 20. (a) Gin ango ma oweko tito kwena pa Paulo obedo maber tutwal? (b) Ngo ma Paulo otimo i kare ma jo mukene pe guye kwena maber-ri?
19 Gin ango ma oweko tito kwena pa Paulo obedo maber tutwal? Tyeng me 23 ryeyo gin ma omiyo obedo maber. (1) En oloko i kom Ker pa Lubanga ki dong Yecu Kricito. (2) En otemme me gudu cwiny jo ma winye ki loko lok ma “ywayo tamgi.” (3) En oyeko lok ducu kikore kun tiyo ki Ginacoya. (4) En ojalle ki miyo caden “cakke odiko nio wa otyeno.” Paulo omiyo caden magwar adada, ento pe jo ducu gujolo lokke. Tyeng me 24 tito ni: “Jo mukene guye lok ma otito-ni ento jo mukene gukwero ye.” Laro lok otuge, ci dano guket woko.
20 Cwiny Paulo mono otur pien ni jo mukene pe guye kwena maber-ri? Pe! Tic pa Lukwena 28:30, 31, wacciwa ni: “Paulo obedo kunu pi mwaka aryo kun kwo ki limme kene ci jolo lwak jo ducu ma bino bote. Obedo ka tito lok me ker pa Lubanga, pwonyo bene lok kom Yecu Kricito atyer ma pe gijuko.” Buk me Tic pa Lukwena ogik ki lok ma mwonya man.
21. Ngo ma watwero pwonyone ki i lanen pa Paulo i kare ma kiye ni obed i ot keken?
21 Ngo ma watwero pwonyone ki i lanen pa Paulo-ni? I kare ma kiye ni obed i ode kene ki acikari ma gwoke, Paulo onongo pe tye agonya me tito kwena i ot ki ot. Ento, en obedo ki gen kun miyo caden bot jo ducu ma bino bote. I yo acel-lu, jo pa Lubanga i kare-ni pe girwenyo yomcwinygi ento gimedde ki tito kwena kadi bed kitweyogi labongo bal pi niyegi. Omegiwa ki lumege mukene gibedo gang keken, twero bedo ni nongo gikwo i ka gwoko lutiyo nyo lutwo. Gitito kwena bot ludaktar, welle, ki jo mukene ma bino botgi, kit ma kerogi twero kwede. Cwinygi nongo opong ki miti me tito kwena me Ker pa Lubanga. Pud dong watye ki pwoc madit pi lanen maber ma ginyutu ya!
22. (a) Ngo ma bikonyowa me nongo adwogi maber ki i buk me Tic pa Lukwena? (Nen bok ma malo-ni.) (b) Imoko tammi me timo gin ango ka nongo ikuro agikki me lobo man?
22 Ada, tye jami mapol ma wapwonyo ki bot lukwena ki Lukricitayo me cencwari me acel ka odok i lok me kiyo piny, kit ma kitito kwede i buk me Tic pa Lukwena. Ka nongo wakuro agikki me lobo man, wamoku tamwa me lubo lanen pa Lukricitayo me cencwari me acel i miyo caden ki tekcwiny ki dong mit kom. Pe tye mot mo maber ma watwero bedo kwede makato ‘miyo caden kore ki kore’ i kom Ker pa Lubanga!—Tic. 28:23.
[Peny me Kwan]
[Bok i pot karatac 17]
“ONONGO ATAMO NI ANGEYO BUK ME TIC PA LUKWENA MABER ADADA”
I nge kwano buk me “Bearing Thorough Witness” About God’s Kingdom, laneno mo acel ma woto awota owacci: “Onongo atamo ni angeyo buk me Tic pa Lukwena maber adada. Abedo ka kwano buk man tyen mapol ento abedo ka bwolle kekena ni aniang maber kun onongo pe aniang. Man dong awinyo ni anongo mot madit pien buk me “Bearing Thorough Witness” About God’s Kingdom okonya me niang buk me Tic pa Lukwena maber adada.”
[Cal ma tye i pot karatac 16]
Lamalaika otelo wi Petero kun gikato ki i dog cel madit me nyonyo
