Kat-oni ang Pagkamabinantayon sa mga Apostoles ni Jesus
“Magpadayon sa pagbantay kauban nako.”—MAT. 26:38.
1-3. Sa unsang paagi ang mga apostoles napakyas sa pagpadayon sa pagbantay sa kataposang gabii ni Jesus sa yuta? Unsay nagpakita nga nakakat-on sila sa ilang sayop?
HANDURAWA ang nahitabo sa kataposang gabii ni Jesus sa yuta. Si Jesus miadto sa usa niya ka paboritong dapit, ang tanaman sa Getsemane nga sidlakan lang sa Jerusalem. Kauban niya ang iyang matinumanong mga apostoles. Daghan siyag angayng hunahunaon, busa nangita siyag dapit aron inusarang makaampo.—Mat. 26:36; Juan 18:1, 2.
2 Si apostol Pedro, Santiago, ug Juan mikuyog kang Jesus sa sulod nga bahin sa tanaman. Iyang giingnan sila: “Magpabilin kamo dinhi ug magpadayon sa pagbantay kauban nako,” ug dayon siya mipalayo aron mag-ampo. Pagbalik niya, iyang naabtan nga natulog ang iyang mga higala. Iya na usab silang giingnan: “Magpadayon sa pagbantay.” Apan duha pa ka beses silang nakatulog! Sa ulahing bahin nianang gabhiona, ang tanang apostoles napakyas nga magmabinantayon sa espirituwal. Ila pa ganing gibiyaan si Jesus ug mikalagiw!—Mat. 26:38, 41, 56.
3 Seguradong nasubo ang mga apostoles nga wala sila makapadayon sa pagbantay. Hinuon sila nakakat-on dayon sa ilang sayop. Gipakita sa basahon sa Mga Buhat ang ilang talagsaong ehemplo sa pagkamabinantayon. Ang ilang ehemplo nakaimpluwensiya sa ubang Kristohanon sa pagsundog kanila. Karon, mas angay kitang magpadayon sa pagbantay. (Mat. 24:42) Atong hisgotan ang tulo ka leksiyon bahin sa pagkamabinantayon gikan sa basahon sa Mga Buhat.
MABINANTAYON SA PAGTULTOL KON ASA MOSANGYAW
4, 5. Sa unsang paagi nasinati ni Pablo ug sa iyang mga kauban ang pagtultol sa balaang espiritu?
4 Ang unang leksiyon mao nga ang mga apostoles mabinantayon sa pagtultol kon asa mosangyaw. Gipakita sa Bibliya kon giunsa paggamit ni Jesus ang espiritu sa Diyos sa paggiya kang apostol Pablo ug sa iyang mga kauban sa usa ka talagsaon kaayong panaw. (Buh. 2:33) Ato silang ubanan.—Basaha ang Buhat 16:6-10.
5 Si Pablo, Silas, ug Timoteo nakabiya na sa siyudad sa Listra sa habagatang Galacia. Pipila ka adlaw sa ulahi, nakaabot sila sa usa ka Romanhong dalan nga pakasadpan paingon sa kinadaghanag tawo nga rehiyon sa distrito sa Asia. Gusto nilang subayon kini aron maduaw ang mga siyudad diin libolibo pa ang kinahanglang makadungog bahin kang Kristo. Apan dunay mibabag kanila. Ang bersikulo 6 miingon: “Milibot sila sa Frigia ug sa yuta sa Galacia, tungod kay sila gidid-an sa balaang espiritu nga isulti ang pulong didto sa distrito sa Asia.” Walay gihisgotan kon sa unsang paagi sila gidid-an sa balaang espiritu, basta gibabagan sila niini sa pagsangyaw sa distrito sa Asia. Tin-aw nga gitultolan ni Jesus—pinaagi sa espiritu sa Diyos—si Pablo ug ang iyang mga kauban sa laing direksiyon.
6, 7. (a) Unsay nahitabo sa grupo ni Pablo duol sa Bitinia? (b) Unsay gihimong desisyon sa mga tinun-an, ug unsay resulta?
6 Asa miadto ang grupo ni Pablo? Ang bersikulo 7 miingon: “Labot pa, sa paghiabot nila dapit sa Misia naningkamot sila sa pag-adto sa Bitinia, apan ang espiritu ni Jesus wala motugot kanila.” Kay gidid-an sa pagsangyaw sa Asia, sila mipaamihanan aron sangyawan ang mga siyudad sa Bitinia. Apan dihang duol na sila sa Bitinia, gigamit na usab ni Jesus ang balaang espiritu sa pagbabag kanila. Niining higayona, lagmit nahibulong na sila. Nahibalo sila kon unsay isangyaw ug kon unsaon pagsangyaw, apan wala sila mahibalo kon asa mosangyaw. Samag nanuktok sila sa pultahan sa Asia—apan wala kini buksi. Nanuktok sila sa pultahan sa Bitinia—apan kini wala gihapon buksi. Mihunong ba sila sa pagpanuktok? Wala gayod!
7 Makapatingala ang sunod nilang desisyon. Ang bersikulo 8 miingon: “Sila milabay sa Misia ug milugsong ngadto sa Troas.” Busa sila mipaingon sa kasadpan ug mibaktas ug 563 kilometros. Ilang gilabyan ang daghang siyudad hangtod nakaabot sila sa dunggoanan sa Troas, nga nagsilbing pultahan paingon sa Macedonia. Ang bersikulo 9 miasoy sa sunod nga nahitabo: “Panahon sa kagabhion usa ka panan-awon ang nagpakita kang Pablo: dihay usa ka tawong Macedonianhon nga nagbarog ug nangaliyupo kaniya ug nag-ingon: ‘Dali ngari sa Macedonia ug tabangi kami.’” Sa kataposan, nahibalo na si Pablo kon asa mosangyaw. Sama silag nanuktok sa ikatulong higayon, ug sila gibuksan! Dihadiha sila milawig paingon sa Macedonia.
8, 9. Unsay atong makat-onan sa panaw ni Pablo?
8 Unsay atong makat-onan niini? Matikdi nga ayha pa mibabag ang espiritu sa Diyos dihang si Pablo mipaingon na sa Asia. Dayon, ayha pa mihatag si Jesus ug dugang instruksiyon dihang si Pablo duol na sa Bitinia. Ug sa kataposan, ayha pa gisugo ni Jesus si Pablo nga moadto sa Macedonia dihang nakaabot na siya sa Troas. Ingong Ulo sa kongregasyon, mahimong giyahan kita ni Jesus sa samang paagi. (Col. 1:18) Pananglitan, lagmit naghunahuna kang magpayunir o mobalhin sa dapit diin dako ang panginahanglan. Apan mahimong ayha pa ka tabangan ni Jesus, pinaagi sa espiritu sa Diyos, dihang makahimo ka nag lakang sa pagkab-ot sa imong tumong. Sa pag-ilustrar: Ayha lang mapaliko sa drayber ang iyang kotse, sa wala o tuo, kon kini nagdagan na. Sa susama, mahimong giyahan kita ni Jesus sa pagpauswag sa atong ministeryo kon kita milihok na—kon kita naningkamot na sa pagkab-ot sa atong tumong.
9 Apan komosta kon dili dayon mobunga ang imong mga paningkamot? Moundang ka na ba kay naghunahuna nga ang espiritu sa Diyos wala maggiya kanimo? Hinumdomi nga si Pablo nakasinati usab ug kahigawad. Apan padayon siyang nangita ug nanuktok hangtod nga may pultahan nga mibukas. Sa susama, kon mopadayon ka sa pagpangitag ‘dakong pultahan nga motultol sa kalihokan,’ magmabungahon ka usab.—1 Cor. 16:9.
MABINANTAYON LABOT SA MGA PAG-AMPO
10. Unsay nagpakita nga kinahanglang molahutay kita sa pag-ampo aron makapadayon sa pagbantay?
10 Tagda ang ikaduhang leksiyon bahin sa pagkamabinantayon nga atong makat-onan sa unang siglong mga Kristohanon: Sila mabinantayon labot sa mga pag-ampo. (1 Ped. 4:7) Aron makapadayon sa pagbantay, kinahanglang molahutay kita sa pag-ampo. Hinumdomi nga sa wala pa dakpa didto sa tanaman sa Getsemane, si Jesus miingon sa iyang tulo ka apostoles: “Magpadayon sa pagbantay ug mag-ampo nga mapinadayonon.”—Mat. 26:41.
11, 12. Nganong gilutos pag-ayo ni Herodes ang mga Kristohanon, lakip si Pedro? Unsay gihimo ni Herodes?
11 Si Pedro, nga presente niadtong higayona, sa ulahi nakasinati sa gahom sa tim-os nga mga pag-ampo. (Basaha ang Buhat 12:1-6.) Sa unang mga bersikulo sa Buhat kapitulo 12, gilutos ni Herodes ang mga Kristohanon aron paboran siya sa mga Hudiyo. Lagmit nahibalo siya nga si Santiago maoy apostol nga suod kaayo kang Jesus. Busa gipapatay ni Herodes si Santiago “pinaagi sa espada.” ((Bersikulo 2) Dako kadto nga pagsulay sa kongregasyon kay gimahal nila pag-ayo si Santiago.
12 Unsay sunod nga gihimo ni Herodes? Ang bersikulo 3 miingon: “Sa iyang nakita nga kini nakapahimuot sa mga Hudiyo, gidakop usab niya si Pedro.” Apan sa miagi, ang pipila ka apostoles milagrosong nakagawas sa bilanggoan, ug lakip kanila si Pedro. (Buh. 5:17-20) Tingali nahibalo si Herodes niana mao nga gitugyan niya si Pedro sa “upat ka relibo sa tinagup-at ka sundalo aron bantayan siya, kay maoy tuyo niya nga ipaatubang siya sa katawhan human sa paskuwa.” (Bersikulo 4) Hunahunaa kana! Aron maseguro nga dili makaikyas ang apostol, si Herodes mikuhag 16 ka guwardiya aron magrelibohay adlaw ug gabii—diin si Pedro gikadena tali sa 2 ka guwardiya. Plano ni Herodes nga pahimut-an ang katawhan pinaagi sa pagpatay kang Pedro human sa Paskuwa. Niining malisod nga situwasyon, unsay mahimo sa mga igsoon?
13, 14. (a) Unsay gihimo sa kongregasyon dihang nabilanggo si Pedro? (b) Unsay atong makat-onan bahin sa pag-ampo nga gihimo sa kongregasyon?
13 Nahibalo ang kongregasyon kon unsay angayng buhaton. Ang bersikulo 5 mabasa: “Si Pedro gitener didto sa bilanggoan; apan ang pag-ampo ngadto sa Diyos alang kaniya padayong gihimo nga mainiton sa kongregasyon.” Oo, tim-os gayod ang ilang mga pag-ampo alang sa ilang minahal nga igsoon. Busa dihang gipatay si Santiago wala sila mawad-ig paglaom; ni naghunahuna nga walay pulos ang ilang mga pag-ampo. Sila nahibalo nga bililhon kang Jehova ang pag-ampo sa iyang matinumanong mga magsisimba. Kon kana nahiuyon sa iyang kabubut-on, iyang tubagon kana.—Heb. 13:18, 19; Sant. 5:16.
14 Unsay atong makat-onan sa gihimo sa kongregasyon? Ang padayong pagbantay naglakip sa pag-ampo dili lang para sa kaugalingon kondili para usab sa atong mga igsoon. (Efe. 6:18) Duna ka bay nahibaloang mga igsoon nga nagsagubang ug mga pagsulay? Ang uban tingali nag-antos tungod sa paglutos, pagbando sa buluhaton, o kalamidad. Dili ba mas maayong ilakip sila sa imong mga pag-ampo? Lagmit may nahibaloan kang mga igsoon nga nakasinatig mga suliran nga dili kaayo mamatikdan sama sa problema sa pamilya, kahigawad, o sakit. May nahunahunaan ka bang indibiduwal nga mahimo nimong nganlan dihang mag-ampo ka kang Jehova, ang “Tigpatalinghog sa pag-ampo”?—Sal. 65:2.
15, 16. (a) Giunsa si Pedro pagluwas sa manulonda ni Jehova gikan sa bilanggoan? (Tan-awa ang hulagway sa ubos.) (b) Nganong makapalig-on ang pagpamalandong sa paagi sa pagluwas ni Jehova kang Pedro?
15 Unsay nahitabo kang Pedro? Sa kataposan niyang gabii sa bilanggoan, samtang natulog si Pedro taliwala sa duha ka guwardiya, dunay katingalahang nahitabo. (Basaha ang Buhat 12:7-11.) Handurawa kini: Kalit nga mihayag ang iyang selda. Usa ka manulonda ang mipukaw kang Pedro apan wala kini makita sa mga guwardiya. Ug ang mga kadena nangatangtang gikan sa iyang mga kamot! Dayon gipagawas sa manulonda si Pedro sa selda, gilabyan nila ang mga guwardiya sa gawas, ug miagi sa dakong puthaw nga ganghaan nga ‘naabli rag iya.’ Sa nakagawas na sila, ang manulonda nawala. Si Pedro gawasnon na!
16 Dili ba makapalig-on sa pagtuo ang pagpamalandong sa gahom ni Jehova sa pagluwas sa iyang mga alagad? Siyempre, dili nato dahomon karon nga luwason kita ni Jehova sa milagrosong paagi. Apan makasalig gayod kita nga gamiton niya ang iyang gahom sa pagtabang sa iyang katawhan. (2 Cron. 16:9) Pinaagi sa iyang balaang espiritu, mapalig-on niya kita sa pagsagubang sa bisan unsang pagsulay. (2 Cor. 4:7; 2 Ped. 2:9) Sa dili madugay hatagan ni Jehova si Jesus ug gahom sa pagbanhaw sa milyonmilyon nga samag mga binilanggo sa kamatayon. (Juan 5:28, 29) Ang atong pagtuo sa mga saad sa Diyos makahatag kanatog kaisog sa pag-atubang sa mga pagsulay karon.
BUG-OS NAGPAMATUOD BISAN SA MGA KABABAGAN
17. Sa unsang paagi si Pablo maayong ehemplo sa pagsangyaw uban ang kasibot ug pagkadinalian?
17 Kini ang ikatulong leksiyon bahin sa pagkamabinantayon nga makat-onan nato gikan sa mga apostoles: Sila kanunayng bug-os nagpamatuod bisan sa mga kababagan. Aron makapadayon sa pagbantay, kinahanglang mosangyaw kita uban ang kasibot ug pagkadinalian. Usa ka talagsaong ehemplo niini si apostol Pablo. Siya masibotong nagsangyaw, mipanaw sa daghang dapit, ug nagtukod ug daghang kongregasyon. Bisag nagsagubang ug daghang kalisdanan, padayon siyang nagsangyaw uban ang kasibot ug pagkadinalian.—2 Cor. 11:23-29.
18. Sa unsang paagi si Pablo padayong nagpamatuod samtang gibilanggo sa Roma?
18 Tagda ang kataposang paghisgot kang Pablo sa basahon sa Mga Buhat diha sa Buh kapitulo 28. Si Pablo miabot sa Roma, diin siya moatubang kang Nero. Siya binilanggo ug lagmit gikadena ngadto sa iyang guwardiya. Apan wala kini makapugong sa kasibot ni Pablo sa pagsangyaw! (Basaha ang Buhat 28:17, 23, 24.) Human sa tulo ka adlaw, gipatawag ni Pablo ang kadagkoan sa mga Hudiyo aron magpamatuod kanila. Dayon ang mga Hudiyo mipilig laing adlaw aron makigkita pag-usab kang Pablo, ug niining higayona mihatag siyag mas dakong pamatuod. Ang bersikulo 23 nag-ingon: “Naggahin sila karon ug usa ka adlaw alang kaniya, ug sa tinagdaghan sila nangadto kaniya sa iyang giabtan. Ug iyang gipatin-aw kanila ang mga butang pinaagi sa paghatag ug bug-os nga pagpamatuod mahitungod sa gingharian sa Diyos ug pinaagi sa pagkombinsir kanila mahitungod kang Jesus pinasukad sa balaod ni Moises ug ingon man sa mga Manalagna, sukad sa buntag hangtod sa gabii.”
19, 20. (a) Nganong epektibo ang pagpamatuod ni Pablo? (b) Unsay reaksiyon ni Pablo dihang dili tanan ang midawat sa maayong balita?
19 Nganong epektibo kaayo ang pagpamatuod ni Pablo? Gipakita sa bersikulo 23 ang pipila ka rason. (1) Gipasiugda niya ang Gingharian sa Diyos ug si Jesu-Kristo. (2) Gidani niya ang mamiminaw “pinaagi sa pagkombinsir” kanila. (3) Nangatarongan siya base sa Kasulatan. (4) Giuna niya ang mga tawo kay sa kaugalingon, nga nagpamatuod kanila “sukad sa buntag hangtod sa gabii.” Si Pablo naghatag ug kusganong pamatuod, apan dili tanan ang misanong. “Dihay pipila nga mituo sa mga butang nga iyang gisulti; ang uban wala motuo,” nag-ingon ang bersikulo 24. Kay wala magkauyonay, ang mga tawo namahawa.
20 Nahigawad ba si Pablo kay dili tanan ang midawat sa maayong balita? Wala gayod! Ang Buhat 28:30, 31 nagtug-an kanato: “Siya nagpabilin sulod sa tibuok duha ka tuig sa iyang giabangan nga balay, ug iyang ginadawat nga maluloton ang tanan nga mangadto kaniya, nga nagwali sa gingharian sa Diyos ngadto kanila ug nagtudlo sa mga butang mahitungod sa Ginoong Jesu-Kristo uban ang labing dakong kagawasan sa pagsulti, nga walay babag.” Niining makapadasig nga mga pulong, ang inspiradong basahon sa Mga Buhat natapos.
21. Unsay atong makat-onan kang Pablo samtang binilanggo sa balay?
21 Unsay atong makat-onan sa ehemplo ni Pablo? Samtang binilanggo sa iyang giabangang balay, si Pablo dili makasangyaw sa balaybalay. Apan siya positibo gihapon, nga nagsangyaw sa tanang miduaw kaniya. Daghang alagad sa Diyos usab karon ang padayong nagmalipayon ug nagsangyaw bisag gibilanggo tungod sa ilang pagtuo. Ang uban natong minahal nga mga igsoon dili makabiya sa balay o nagpuyo sa mga nursing home tungod sa katigulangon o sakit. Apan naningkamot silang makasangyaw sa mga doktor, nars, bisita, ug uban pa. Gusto gayod nilang bug-os nga magpamatuod bahin sa Gingharian sa Diyos. Ato gayong gipabilhan ang ilang ehemplo!
22. (a) Unsay gitagana aron makabenepisyo kita sa basahon sa Mga Buhat? (Tan-awa ang kahon sa ibabaw.) (b) Unsay imong buhaton samtang nagpaabot sa kataposan niining daotang sistema?
22 Dayag nga daghan kitag makat-onan sa pagkamabinantayon sa mga apostoles ug sa ubang Kristohanon sa unang siglo diha sa basahon sa Mga Buhat. Buot gayod nato silang sundogon pinaagi sa pagsangyaw nga maisogon ug masiboton samtang nagpaabot sa kataposan niining daotang sistema. Ang kinadak-ang pribilehiyo nga atong mabatonan mao ang “bug-os nga pagpamatuod” bahin sa Gingharian sa Diyos!—Buh. 28:23.
[Mga Pangutana sa Pagtuon]
[Kahon sa panid 13]
“NABAG-O ANG AKONG PANGLANTAW SA BASAHON SA MGA BUHAT”
Human mabasa ang librong “Bug-os nga Pagpamatuod” sa Gingharian sa Diyos, usa ka nagapanawng magtatan-aw ang miingon: “Nabag-o ang akong panglantaw sa basahon sa Mga Buhat. Kadaghan na nako ni nabasa, apan sama lang kog nag-iwag ug kandila ug nag-antiyohos ug lubog. Karon nakita ko na ang himaya niini sa kahayag sa adlaw.”
[Hulagway sa panid 12]
Si Pedro gipagawas sa manulonda agi sa dakong puthaw nga ganghaan
