Magtuon sa Pagkamabinantayon sang mga Apostoles ni Jesus
“Padayon nga magbantay upod sa akon.”—MAT. 26:38.
1-3. Ngaa wala makapadayon sa pagbantay ang mga apostoles sang katapusan nga gab-i ni Jesus subong tawo, kag ano ang nagapakita nga nakatuon sila sing leksion?
HANDURAWA ang hitabo sang katapusan nga gab-i ni Jesus subong tawo. Nagkadto sia sa hardin sang Getsemane, nga isa sa iya mga paborito nga duog, sa sidlangan nayon sang Jerusalem. Upod niya ang iya matutom nga mga apostoles. Madamo si Jesus sing ginakabalak-an, gani kinahanglan niya mag-isahanon agod makapangamuyo.—Mat. 26:36; Juan 18:1, 2.
2 Ang tatlo sang iya mga apostoles, sanday Pedro, Santiago, kag Juan, nag-upod kay Jesus sa tunga sang hardin. “Pabilin kamo diri kag padayon nga magbantay upod sa akon,” siling niya sa ila, kag naglakat sia agod mangamuyo. Pagbalik niya, nagakatulog na sila. Ginpangabay niya sila liwat: “Magpadayon kamo sa pagbantay.” Apang duha pa ka beses nga natulugan sila! Sang ulihi sina man nga gab-i, wala makapabilin nga nagabantay sa espirituwal ang tanan nga apostoles. Ginbiyaan pa gani nila si Jesus kag nagpalalagyo!—Mat. 26:38, 41, 56.
3 Pat-od gid nga naghinulsol ang mga apostoles nga wala sila magpadayon sa pagbantay. Pero, nakatuon sila sing leksion sa ila sayop. Ginapakita sang tulun-an sang Binuhatan sa Biblia nga sang ulihi nangin maayo sila nga halimbawa sa pagpabilin nga nagabantay. Ang ila katutom nakaimpluwensia sa ila mga masigka-Cristiano. Sa karon, mas kinahanglan naton nga magpadayon sa pagbantay. (Mat. 24:42) Binagbinagon naton ang tatlo ka leksion nga matun-an naton sa Binuhatan parte sa pagpabilin nga nagabantay.
PAGKAMABINANTAYON SA PANUYTOY KON DIIN MABANTALA
4, 5. Paano naeksperiensiahan nanday Pablo kag sang iya mga kaupod ang panuytoy sang balaan nga espiritu?
4 Ang una nga matun-an naton sa mga apostoles amo ang ila pagkamabinantayon sa panuytoy kon diin mabantala. Mabasa naton sa Biblia kon paano gingamit ni Jesus ang espiritu sang Dios sa pagtuytoy kay apostol Pablo kag sa iya mga kaupod sa ila pinasahi nga paglakbay. (Binu. 2:33) Updan naton sila.—Basaha ang Binuhatan 16:6-10.
5 Nagbiya sa siudad sang Listra sa nabagatnan sang Galacia sanday Pablo, Silas, kag Timoteo. Pila ka adlaw sang ulihi nakalab-ot sila sa isa ka haywey sang Roma nga nagapakadto sa katundan sa duog nga may pinakamadamo nga pumuluyo sa distrito sang Asia. Luyag nila nga mag-agi didto agod makadtuan ang mga siudad nga may linibo ka tawo nga dapat makabati parte kay Cristo. Apang may nagpugong sa ila. Ang bersikulo 6 nagasiling: “Naglibot sila sa Frigia kag sa kadutaan sang Galacia, bangod gindumilian sila sang balaan nga espiritu nga magsugid sang pulong sa distrito sang Asia.” Wala mahibaluan kon paano sila ginpunggan sang balaan nga espiritu nga magbantala sa probinsia sang Asia. Pero maathag nga paagi sa balaan nga espiritu, luyag ni Jesus nga pakadtuon sila sa iban nga lugar.
6, 7. (a) Ano ang natabo kanday Pablo kag sa iya mga kaupod sang malapit na sila sa Bitinia? (b) Ano ang desisyon sang mga disipulo, kag ano ang resulta?
6 Diin sila nagkadto? Ang bersikulo 7 nagapaathag: “Kag sang nagdulhog sila sa Misia nagtinguha sila nga magkadto sa Bitinia, apang wala sila gintugutan sang espiritu ni Jesus.” Bangod ginpunggan sanday Pablo kag ang iya mga kaupod sa pagbantala sa Asia, nagpaaminhan sila para magbantala sa mga siudad sa Bitinia. Pero sang malapit na sila, gingamit liwat ni Jesus ang balaan nga espiritu agod punggan sila. Posible nga nagapalibog na sila. Nahibaluan nila kon ano ang ibantala kag kon paano, pero wala sila makahibalo kon diin. Daw pareho lang nga nanuktok sila sa ganhaan sang Asia apang wala sila ginpasulod. Nanuktok pa gid sila sa Bitinia, apang wala man sila ginpasulod. Nag-untat bala sila sa pagpanuktok? Wala mag-untat ining makugi nga mga manugbantala!
7 Sa sini nga kahimtangan, naghimo sila sing desisyon nga daw indi rasonable. Ang bersikulo 8 nagasugid sa aton: “Nag-agi sila sa Misia kag nagdulhog sa Troas.” Nagpakatundan sila kag naglakat sing 563 kilometros, nga nagalabay sa mga siudad asta nga nakalab-ot sila sa pantalan sang Troas, ang alagyan pa Macedonia. Didto, sa ikatlo nga tion, si Pablo kag ang iya mga kaupod nanuktok, kag daku nga ganhaan ang nagbukas! Ang bersikulo 9 nagsugid sang masunod nga natabo: “Sang gab-i nakakita si Pablo sang isa ka palanan-awon: may isa ka lalaki nga taga-Macedonia nga nagatindog kag nagahingyo sa iya kag nagasiling: ‘Magtabok ka sa Macedonia kag buligi kami.’” Sa katapusan, nahibaluan na gid man ni Pablo kon diin mabantala. Gilayon nga nagpanakayon sila pa Macedonia.
8, 9. Ano ang matun-an naton sa paglakbay ni Pablo?
8 Ano ang matun-an naton sa sini nga kasaysayan? Talupangda nga pagkatapos lamang nga nagkadto si Pablo sa Asia nga nagpasilabot ang espiritu sang Dios. Dayon, pagkatapos lamang nga malapit na sa Bitinia si Pablo nga nagpasilabot si Jesus. Kag pagkatapos lamang nga nakalab-ot si Pablo sa Troas nga gintuytuyan sia ni Jesus pa Macedonia. Si Jesus gihapon ang Ulo sang kongregasyon, gani mahimo nga amo man sini ang himuon niya sa aton. (Col. 1:18) Halimbawa, mahimo nagaplano ka nga magpayunir ukon magsaylo sa lugar nga nagakinahanglan sing manugbantala. Pero, mahimo nga tuytuyan ka lang ni Jesus paagi sa espiritu sang Dios pagkatapos nga nakahimo ka sing mga tikang nga malab-ot ang imo tulumuron. Sa pag-ilustrar: Mapaliko lamang sang drayber ang iya salakyan kon nagadalagan na ini. Sing kaanggid, tuytuyan lamang kita ni Jesus sa pagpasangkad sang aton ministeryo kon nagapanikasog kita nga lab-uton ang aton tulumuron.
9 Apang, kamusta kon indi mo dayon makita ang resulta sang imo panikasog? Mauntat ka na bala kay daw wala ka man ginatuytuyan sang espiritu sang Dios? Dumduma nga may naagihan man nga mga balagbag si Pablo. Pero, padayon sia nga nangita kag nagpanuktok asta nga nakakita sia sing bukas nga ganhaan. Kon magpadayon ka sa pagpangita sang “isa ka daku nga ganhaan nga nagadul-ong sa hilikuton,” pakamaayuhon ka man.—1 Cor. 16:9.
PAGKAMABINANTAYON MAY KAANGTANAN SA MGA PANGAMUYO
10. Ano ang nagapakita nga importante ang magpangamuyo sing padayon agod makapabilin nga nagabantay?
10 Ang ikaduha nga matun-an naton sa aton unang siglo nga mga kauturan amo ang pagkamabinantayon may kaangtanan sa pangamuyo. (1 Ped. 4:7) Importante nga magpangamuyo sing padayon agod makapabilin nga nagabantay. Dumduma nga antes sia dakpon sa hardin sang Getsemane, si Jesus nagsiling sa iya tatlo ka apostoles: “Magpadayon kamo sa pagbantay kag magpangamuyo sing padayon.”—Mat. 26:41.
11, 12. Ngaa kag paano ginhingabot ni Herodes ang mga Cristiano, lakip si Pedro?
11 Sang ulihi, naeksperiensiahan ni Pedro, isa sa nakasaksi sini nga hitabo, ang gahom sang pangamuyo. (Basaha ang Binuhatan 12:1-6.) Sa una nga mga bersikulo sang Binuhatan kapitulo 12, natun-an naton nga ginmaltratar ni Herodes ang mga Cristiano para kahamut-an sia sang mga Judiyo. Mahimo nahibaluan niya nga si Santiago isa ka apostoles nga suod kay Jesus. Gani, ginpapatay niya si Santiago “paagi sa espada.” (Bersikulo 2) Sa amo, nadulaan ang kongregasyon sing isa ka pinalangga nga apostol. Daku gid ini nga pagtilaw sa mga kauturan!
12 Ano dayon ang ginhimo ni Herodes? Ang bersikulo 3 nagpaathag: “Sang nakita niya nga nagpahamuot ini sa mga Judiyo, gindakop man niya si Pedro.” Apang mahimo nahibaluan ni Herodes nga sang nagligad, milagruso nga nahilway ang mga apostoles, lakip si Pedro. (Binu. 5:17-20) Gani agod makasiguro, “apat ka grupo sang mga soldado ang bulosbulos nga nagbantay sa iya nga ang tagsa ka grupo may apat ka soldado, kay ginabuko niya nga dalhon sia sa atubangan sang katawhan pagkatapos sang paskua.” (Bersikulo 4) Handurawa ini! Ginkadenahan si Pedro sa tunga sang duha ka guardia. May 16 ka guardia nga nagabuslanay sa adlaw kag gab-i agod indi sia makapalagyo. Tuyo ni Herodes nga ipresentar sia sa katawhan pagkatapos sang Paskua, kag pamatbatan sing kamatayon agod malipay ang kadam-an. Sa sining mabudlay nga kahimtangan, ano ang mahimo sang mga kauturan sa kongregasyon?
13, 14. (a) Ano ang ginhimo sang kongregasyon sang nabilanggo si Pedro? (b) Ano ang matun-an naton sa ila parte sa pangamuyo?
13 Nahibaluan sang kongregasyon kon ano ang dapat nila himuon. Ang bersikulo 5 nagasiling: “Gani ginhunong si Pedro sa bilangguan; apang ang kongregasyon hanuot nga nagapangamuyo sa Dios para sa iya.” Huo, hanuot gid ang ila mga pangamuyo para sa ila pinalangga nga utod. Ang kamatayon ni Santiago wala nagpaluya sang ila buot ukon nagpabag-o sang ila pagtamod sa pangamuyo. Sa baylo, nahibaluan nila nga ginapabaloran gid ni Jehova ang pangamuyo sang matutom niya nga mga sumilimba. Kon ang ila pangamuyo nahisuno sa iya kabubut-on, sabton niya ini.—Heb. 13:18, 19; Sant. 5:16.
14 Ano ang matun-an naton sa ginhimo sang mga kauturan para kay Pedro? Nalakip sa pagpadayon sa pagbantay ang pagpangamuyo indi lamang para sa aton kaugalingon kundi para man sa aton mga kauturan. (Efe. 6:18) May kilala ka bala nga mga kauturan nga nagaatubang sing pagtilaw? Mahimo nga nagabatas sila sing paghingabot, pagdumili sang gobierno, ukon mga kalamidad. Puede mo sila ilakip sa imo mga pangamuyo. Ayhan may kilala ka man nga nagaatubang sang indi hilmunon nga mga kabudlayan subong sang problema sa pamilya, pagluya sang buot, ukon pagbalatian. Panumduma ang mga tawo nga puede mo ilakip ang ngalan sa imo pagpakighambal kay Jehova, ang “Manugpamati sang mga pangamuyo.”—Sal. 65:2, NW.
15, 16. (a) Ilaragway kon paano ginluwas sang anghel ni Jehova si Pedro sa bilangguan. (Tan-awa ang laragway sa idalom.) (b) Ngaa makapalig-on ang paghanduraw sang pagluwas ni Jehova kay Pedro?
15 Apang ano ang natabo kay Pedro? Sang katapusan nga gab-i niya sa bilangguan may makatilingala nga natabo. (Basaha ang Binuhatan 12:7-11.) Handurawa ini: Samtang nagakatulog sia sa tunga sang duha niya ka guardia, hinali nga nagsilak ang kapawa sa iya selda. May isa ka anghel nga nagtindog, nga wala gid makita sang mga guardia, kag ginpukaw sini si Pedro. Kag ang mga kadena sa iya mga kamot nahulog! Dayon, ginpagua sang anghel si Pedro sa selda, kag naglabay sila sa mga guardia sa gua, kag sa daku nga gawang nga salsalon, nga nagbukas “sing kinaugalingon.” Sang sa gua na sila, nadula ang anghel. Hilway na si Pedro!
16 Indi bala makapalig-on gid kon dumdumon naton nga may gahom si Jehova sa pagluwas sang iya mga alagad? Siempre, wala naton ginapaabot nga luwason kita ni Jehova paagi sa milagro. Pero nagatuo kita nga ginagamit niya ang iya gahom para sa iya katawhan subong. (2 Cron. 16:9) Paagi sa iya balaan nga espiritu, mahatagan niya kita sing kusog agod mabatas ang bisan ano nga pagtilaw. (2 Cor. 4:7; 2 Ped. 2:9) Sa dili madugay hatagan man niya sing gahom ang iya Anak nga hilwayon ang minilyon sa indi mapalagyuhan nga bilangguan, ang kamatayon. (Juan 5:28, 29) Ang aton pagtuo sa mga saad sang Dios makahatag sa aton sing daku nga kaisog agod maatubang ang mga pagtilaw subong.
PAGPANAKSI SING MAID-ID BISAN MAY MGA BALAGBAG
17. Paano nangin maayo nga halimbawa si Pablo sa pagbantala sing makugi kag pagbatyag sing pagkahilingagawon?
17 Ang ikatlo nga leksion nga matun-an naton sa mga apostoles amo: Padayon sila nga nagpanaksi sing maid-id bisan may mga balagbag. Agod makapadayon sa pagbantay, dapat kita magbantala sing makugi kag dumdumon nga hilingagawon ang aton hilikuton. Si Pablo maayo gid nga halimbawa. Makugi sia sa pagbantala kag sa paglakbay sa lainlain nga lugar agod sugdan ang madamo nga kongregasyon. Nagbatas sia sing mga kabudlayan, pero wala madula ang iya kakugi kag pagbatyag sing pagkahilingagawon.—2 Cor. 11:23-29.
18. Paano nakapadayon sa pagpanaksi si Pablo sang ginbilanggo sia sa Roma?
18 Binagbinagon naton ang katapusan nga pagsambit kay Pablo sa Binuhatan kapitulo 28. Nag-abot sia sa Roma agod mag-atubang kay Nero. Bilanggo si Pablo kag ayhan nakadenahan angot sa iya guardia. Apang indi mapahipos sang kadena ining makugi nga apostoles! Padayon sia nga nangita sing paagi nga makapanaksi. (Basaha ang Binuhatan 28:17, 23, 24.) Pagkatapos sang tatlo ka adlaw, ginpatawag niya ang bantog nga mga lalaki sang mga Judiyo agod mapanaksihan. Nian, sa pinili nga adlaw, nanaksi pa gid sia. Ang bersikulo 23 nagasiling: “Nagtalana sila [ang mga Judiyo didto] karon sing isa ka adlaw upod sa iya, kag madamo sila nga nagkadto sa iya ginadayunan. Kag ginpaathag niya sa ila ini nga butang paagi sa pagpanaksi sing maid-id tuhoy sa ginharian sang Dios kag paagi sa paggamit sing makabuluyok nga pangatarungan sa ila tuhoy kay Jesus gikan sa kasuguan ni Moises kag sa sinulatan sang mga manalagna, halin sa aga tubtob sa gab-i.”
19, 20. (a) Ngaa maayo manaksi si Pablo? (b) Ano ang reaksion ni Pablo sang indi tanan nagbaton sang maayong balita?
19 Ngaa epektibo ang pagpanaksi ni Pablo? Makita naton sa bersikulo 23 ang pila ka rason. (1) Nagpukos sia sa Ginharian sang Dios kag kay Jesucristo. (2) Gintinguhaan niya nga ganyaton ang iya mga tagpalamati ‘paagi sa pagbuyok.’ (3) Nagpangatarungan sia suno sa Kasulatan. (4) Nagpakita sia sing pagkamasinakripisyuhon, nga nagpanaksi “halin sa aga tubtob sa gab-i.” Nanaksi sing maayo si Pablo, apang indi tanan naghulag. “Ang pila nagpati sa mga butang nga ginsiling; ang iban indi magpati,” siling sang bersikulo 24. Nag-utwas ang binangig, kag nagpalauli sila.
20 Nagluya bala ang buot ni Pablo bangod indi tanan nagbaton sang maayong balita? Wala! Ang Binuhatan 28:30, 31 nagasiling: “Nagpuyo sia sa bug-os nga duha ka tuig sa balay nga iya gin-arkilahan, kag ginbaton niya sing mainayuhon ang tanan nga nagduaw sa iya, nga nagabantala sa ila sang ginharian sang Dios kag nagapanudlo nahanungod kay Ginuong Jesucristo nga may daku gid nga kahilwayan sa paghambal, nga wala sing upang.” Natapos ang tulun-an sang Binuhatan sa sining makapalig-on nga report.
21. Ano ang matun-an naton sa halimbawa ni Pablo sang ginbilanggo sia sa isa ka balay?
21 Ano ang matun-an naton sa halimbawa ni Pablo? Samtang ginabilanggo sia sa isa ka balay, indi sia makapanaksi sa pamalay. Apang positibo gihapon sia kag nagapanaksi sa tanan nga nagakadto sa iya. Madamo man sa katawhan sang Dios karon ang nakapabilin nga malipayon kag nakapadayon sa pagbantala bisan ginpriso sila bangod sang ila pagtuo. Ang pila sang aton pinalangga nga kauturan indi makahalin sa ila ginapuy-an, ayhan sa mga nursing home bangod tigulang na ukon may balatian. Kon posible, nagapanaksi sila sa mga doktor, nars, bisita, kag sa iban pa nga nagaduaw sa ila. Gusto gid nila nga makapanaksi sing maid-id parte sa Ginharian sang Dios. Ginaapresyar gid naton ang ila halimbawa!
22. (a) Ano nga aman ang makabulig sa aton agod makabenepisyo kita sa tulun-an sang Binuhatan? (Tan-awa ang kahon sa ibabaw.) (b) Ano ang imo determinasyon samtang ginahulat mo ang katapusan sining daan nga sistema sang mga butang?
22 Maathag nga madamo kita sing matun-an sa pagkamabinantayon sang mga apostoles kag sang unang siglo nga mga Cristiano nga ginsambit sa tulun-an sang Binuhatan. Samtang ginahulat naton ang katapusan sining daan nga sistema sang mga butang, kabay nga mangin determinado kita nga ilugon ang kaisog kag kakugi sa pagbantala sang unang siglo nga mga Cristiano. Wala na sing mas daku pa nga pribilehiyo sangsa “pagpanaksi sing maid-id” tuhoy sa Ginharian sang Dios!—Binu. 28:23.
[Mga Pamangkot sa Pagtinuon]
[Kahon sa pahina 13]
“NAGBAG-O GID ANG AKON PAGTAMOD SA TULUN-AN SANG BINUHATAN”
Sang mabasa niya ang libro nga “Pagpanaksi sing Maid-id Tuhoy sa Ginharian sang Dios,” ang isa ka nagalakbay nga manugtatap nagsiling: “Nagbag-o gid ang akon pagtamod sa tulun-an sang Binuhatan. Kapila ko na nabasa ang mga kasaysayan sa sini nga tulun-an, pero daw pareho lang nga nagabasa ako nga kandila ang suga kag buron ang antipara. Subong, nahangpan ko na ini pareho kasanag sa silak sang adlaw.”
[Retrato sa pahina 12]
Gintuytuyan sang anghel si Pedro pakadto sa gawang nga salsalon
