Kaiela o Phangu ia Jipoxolo ja Jezú ia Lungu ni ku Dilanga
Kaiela o Phangu ia Jipoxolo ja Jezú ia Lungu ni ku Dilanga
“Mu dilange n’eme.”—MAT. 26:38, NW.
1-3. Kiebhi o Jipoxolo ka dilangele mu usuku ua sukina ua Jezú mu ixi, ni ihi ilondekesa kuila ene a di longo ku iluezu iâ?
XINGANEKA ia bhiti ni Jezú mu usuku uê ua sukina mu ixi. Jezú uendele bhu kididi kiê, kia mu uabhele kiavulu, mu jaludim ia Ngetesemane, mu honga ia Kidrone mu Jeluzaleme. Muéne uendele koko kumoxi ni jipoxolo jê. Ni malamba avulu ku muxima, Jezú ua soto kididi kia ubheka, phala ku samba.—Mat. 26:36; Nzu. 18:1, 2.
2 Ni jipoxolo jê jitatu—Phetele, Tiiaku, ni Nzuá—endele ni Jezú katé mu jaludim ia Ngetesemane. “Xalenu bhabha, mu dilange n’eme,” muéne kia zubha ku a zuela kiki, uia mu samba. Kioso kia vutuka, ua sange makamba mê a zeka. Muéne ua a bhinga dingi: “Langidilenu.” Né muene kiki, ene a zeka dingi mu veji ia kaiiadi! Mu usuku uenió, o jipoxolo joso a lueza mu ku dilanga mu nzumbi. Mukonda ene oso a xisa Jezú, ia a lenge!—Mat. 26:38, 41, 56.
3 Mu kidi, o jipoxolo ja vutuka, ia a diele o ku kamba ku dilanga. Ene a di longo mu kithangana kieniókio, kuila a luezele mu ku dilanga. Kiebhi ki tua kijiia? O Bibidia mu divulu dia Ikalakalu, di tu tangela o maka enhá. Kála kia ki tange mu divulu didi, o jipoxolo ja Jezú a tu xisa phangu ia ku dilanga, mba ku aluka mu nzumbi. O phangu iâ, ia bhangesa o Jikidistá ku hama ia dianga ku kaiela o phangu iâ. Lelu, etu ué, tua tokala ku kolokota mu ku dilanga. (Mat. 24:42) Ndoko tu di longe phangu jitatu mu divulu dia Ikalakalu ji tu longa kiebhi ki tu tena ku dilanga.
AKEXILE MU DILANGA KIOSO KIA KEXILE MÚIA MU BOKA
4, 5. Kiebhi Phaulu ni makamba mê, kia monene o kikuatekesu kia nzumbi ikôla?
4 O jipoxolo ene a diangele ku dilanga kioso kia kexile muia mu boka. Tua-nda di longa se kiebhi Jezú kia bhangesa o nzumbi ikôla ia Jihova kuendesa kiambote poxolo Phaulu, ni athu akexile mu kuenda nê mu njila ia bhonzo. (Ika. 2:33) Tu di longe kiebhi kia mateka.—Tanga Ikalakalu 16:6-10.
5 Phaulu ni Sila, ni Timote, a xisa o mbanza ia Listra, mu Ngalásia. Mu ku bhita tu izuua, ene a sange njila mu Loma iia katé mu mbanza ia Azia. Athu enhá a kuata o njila íii phala kuia mu kunda athu mu mbanza muenhomo, a mesenene kuívua maka alungu ni Kristu. Saí kima kia a fidisa kuia ku pholo. Mu velusu 6, tua tange: “Ene anga a bhita m’oxi ia Filija, ni mu Ngalata, Nzumbi ikôla anga [ia] a kidika kulônga maka mu Ázia.” O nzumbi ikôla ia a fidisa ku boka mu mbanza ia Azia. Nange Jezú uendesa Phaulu ni akuâ mu njila iéngi mu—kaxi ka nzumbi ikôla—ieji kuendesa Phaulu ni makamba mê mu njila iéngi.
6, 7. (a) Ihi ia bhiti ni Phaulu ni makamba mê kia zukamene ku bokona mu Bitinha? (b) Ihi ia solo ku bhanga o maxibulu ni ihi ia bhiti?
6 Kuebhi kua a tumina kuia? O velusu 7, iexi: “O kia bhixila bhu mbambe ia Mixa, [a bhange ioso phala ku bokona] mu Bitinha, maji o nzumbi ia Jezú ka ehela.” Ua a kidika ku boka mu Azia, kienhiki Phaulu uendela njila iéngi ku thunda, phala ku boka ku mbanza ia Bitinha. Kienhiki-phe, ene kioso kia zukama mu Bitinha, Jezú ua bhangesa o nzumbi ikôla ku a fidisa. Ene kejidile se ihi ieji bhanga. Maji ejidile se ihi ieji boka ni kiebhi kieji boka, maji kejidile se kuebhi kua tokalele ku boka. Etu tua tokala ku bhanga ué kiki: Ene a boko mu Azia—maji ka di tundu kiambote. Ene a vutuka dingi ku Bitinha phala ku boka—maji ka di tundu kiambote. Maji o kuila ene a lembua o ku boka? Ki bhua kexile kima kia a fidisa ku boka!
7 Kienhiki ene a solo ku bhanga kima. O velusu 8, ixi: “Anga a somboka mu Mixa, hé a kulumuka ku ditabhu dia Tolouade.” O mala a vutuka ku tundila-kumbi, ende 350 a kilometu, aia mbanza ni mbanza katé kia sange o njila iia bhu ditabhu dia Tolouade, phala kuia ku Masedonha. Koko, mu veji ia katatu, Phaulu ua boko—a ehela ku boka mu mbanza ienioió. Mu velusu 9, tua tange: “Phaulu anga u mona kisuma mu’suku uen’ió. Ua mono kua mu tulukila diiala mukua Masedonha, uemana ni ku mu dionda, uixi: ‘Zauka kunu ku Masedonha, u tu kuatekese’tu.’ ” Kienhiki-phe, Phaulu uejidile kiá, kuebhi kueji boka. Phaulu ua sangulukile mukonda ka vutukile mu njila! Kienhiki, Phaulu uejidile kuebhi kua tokalele o ku boka. Mu kithangana kieniókio, o mala akexile mu kuendesa o baluku, a endesa katé mu Masedonha.
8, 9. Ihi i tu tena ku di longa ia lungu ni njila iende Phaulu?
8 Ihi i tua tokala ku di longa ku musoso iú? Tua mono kuma Nzambi ua bhangesa ngó o nzumbi ikôla ku fidisa Phaulu, kioso kiai mu Azia. Jezú ua bhana ngó o milongi kua Phaulu, kioso kia zukamene mu Bitinha. Mu kusukáku, Jezú ua bhana ngó milongi kua Phaulu kioso kia bhixila mu Tolouade, iu ua mu londekesa o njila ia kuia ku Masedonha. Mukonda dia ku kala mutuameni ua kilunga, Jezú u tena ué ku tu bhana milongi lelu. (Kol. 1:18) Mu kifika, eie u tena ku banza ku kalakala kála muboki ua thembu ioso, mba ku kalakala mu ididi mua kambe aboki. Maji kioso ki u mateka ku bhanga kiki phala ku suua o mbambe iê, Jezú ni nzumbi ikôla ia Nzambi, a-nda ku kuatekesa. Kiebhi-phe? Xinganeka o kifika kiki: O muendexi ua dikalu u tena kuia ni dikalu ku mbandu ia kiasu mba ia kadilu, se o dikalu dia mu kuenda. Kiene kimoxi ué, Jezú u tena ku tu kuatekesa, se tu bhanga dingi mu ukunji uetu, maji tua tokala ku bhanga kima—se mu kidi tua mu suína mu ku bhanga o kikalakalu.
9 Ihi i ua tokala o ku bhanga, se kua mu di tunda kiambote ku ukunji uê? Ueji banza kuila o nzumbi ikôla ia Nzambi, ki ia mu ku kuatekesa? Ua tokala ku lembalala kuila Phaulu ua di bhanene ué ni ibhidi íii. Né kiki, muéne ua kolokota mu ku sota ni ku boka, katé kia sange muthu ua mu bhana mátui. Kiene kimoxi ué, se u kolokota mu ku sota “muelu ua dikota ua nguzu ua kubhanga kikalakalu kiambote,” ua-nda tambula ué mabesá.—1 Kol. 16:9.
A DILANGELE MU MISAMBU IÂ
10. Ihi ilondekesa kuila o ku samba kima kia bhingi phala ku dilanga?
10 Tu di longe o disá dia kaiiadi dia lungu ni ku dilanga, ni kiebhi ki tu tena ku kaiela o phangu ia Jiphange jetu ja hâma ia dianga: Ene a dilangele mu misambu iâ. (1 Phe. 4:7) Phala ku dilanga, tua tokala ku kolokota o ku samba. Lembalala kuila, kioso kia kexile mu Jaludim ia Ngetesemane, ande dia ku mu kuta, Jezú uambela o maxibulu mê, uixi: ‘Langidilenu, mu sambe izuua ioso.’—Mat. 26:41.
11, 12. Mukonda diahi, ni kiebhi Helode kia zukutisa o Jikidistá kumoxi ni Phetele?
11 Mu ku bhita kithangana, kua bhiti kima kia bhangesa Phetele ku samba ni ku suína kuoso. (Tanga Ikalakalu 12:1-6.) Mu velusu ia dianga, tua di longo o musambu ua bhange mu veji ia kaiiadi phala ku bhingila akua Judé, Helode ua mateka ku tatesa o Jikidistá. Helode uejidile kuila o poxolo Tiiaku, a mu zolele kua Jezú. O velusu 2, iambe kuila Helode u tuma ku jibha Tiiaku, “ku xibhata.” Kienhiki, o kilunga kia xala sé o phange iâ, o poxolo ia kazola. Kiki kiexile polova ia dikota phala o jiphange!
12 Ihi ia bhange Helode? O velusu 3, ijimbulula: “Kia mono kuma kia uabhela Jijudé, u tona ku kuata Phetele.” Maji ka tenene ku kuata o jipoxolo joso phala ku ji ta mu kaleia. (Ika. 5:17-20) Helode, nange uejidile kuila, Phetele keji tena ku lenga. O velusu 4, iamba kuila Helode ua vutuka kua Phetele, u mu bhakula ku ibuka “iuana ia masoladi ia kiuana-kiuana, phala ku mu inga. Helode ua fika kuila ki zubha o Phasu kubhita, u mu katula n’a mu bheke bhu pholo ia mundu.” Xinganeka ngó! Helode ua kutu Phetele, ua te masoladi 2 phala ku mu langa, ua bandekesa-ku dengi 16 a masoladi ku kilangidilu suku ni muanha phala o poxolo íii ka lenge. Helode ua mesene kulondekesa Phetele ku mundu, kioso kieji zubha o Phasu, muéne ueji jibha Phetele phala ku bhanga o vondadi ia mundu. Ihi ieji bhanga Phetele ni Jikidistá ja mukuá?
13, 14. (a) Kiebhi kia divu o jiphange mu kilunga, kioso kia kutu Phetele? (b) Ihi i tu tena ku di longa ku phangu ia jiphange ja Phetele ia lungu ku samba?
13 O kilunga kiejidile ihi ieji bhanga. Kála ki tua tange mu velusu 5: “Kien’iki Phetele a mu jikila mu’aleia, ni ku mu langa ku masoladi. Maji o [kilunga] a mu sambela kua Ngana ni [muanhu].” Kienhiki a kolokotele mu samba phala o jiphange jâ. O kufuá kua Tiiaku, ki ku a bhangesa ku di muanga; ki kua a fidisa ué ku samba. Mu veji dia kiki, ene ejidile kuila o ku sambela o jiphange jâ, kima kia beta-kota phala Jihova. Se o misambu íii ia lungu ni vondadi iê, muéne ueji ku i tambuijila.—Jihe. 13:18, 19; Tiia. 5:16.
14 Ihi i tua tokala ku di longa ku itambuijilu ia Phetele ni Jikidistá ja mukuá? O ku dilanga, ki ku bhingi ngó ku bhinga o ima i tua mesena, tua tokala ué ku bhingila o jiphange jetu. (Efe. 6:18) O kuila eie uejiia phange ua mu bhita ni ibhidi? Saí a mukuá a tena ku kolokota mu ibhidi, ni mu kizukutisu kia jinguvulu, mba ku mavuua. Mukonda diahi ki u a tumbula mu misambu iê? Nange eie uejiia kuila saí jiphange jetu jene mu bhita ni ibhidi ioso íii. Ene nange ene mu bhita ni maka ku muiji, mba jipolova mu kixikinu kiâ mba a dibhana ni mauhaxi. Se u xinganeka ande dia ku samba, Mukonda diahi ki u banze athu u ua tokala ku a tumbula o dijina mu musambu, ni ku bhinga kua Jihova, o ‘mukua kuívua o misambu?’—Jisá. 65:2.
15, 16. (a) Jimbulula kiebhi o anju ia Jihova ia bhulula Phetele mu kaleia. (Tala o foto ku luiji.) (b) Mukonda diahi o kuijiia kiebhi Jihova kia bhulula Phetele, ki tu suínisa?
15 Ihi ia bhiti ni Phetele? Mu usuku uê ua sukina mu kaleia, Phetele ua ile ku kilu kia zongo kioso kia kexile ku mu langa ku alangidi a iiadi, Phetele ua mono isunji ni madiuanu. (Tanga Ikalakalu 12:7-11.) Xinganeka ihi ia bhiti: Mu kithangana kieniókio mukengeji ua bhenha mu kaleia mua kexile muéne. Kua moneka anju, o masoladi ka i mono, iene ia balumuna Phetele. O jingoji ku maku mê ja jituka. Kienhiki, o anju ia tubhula Phetele bhu kanga, maji o masoladi akexile muene bhu muelu, o dibhitu dia jikuka, “kála kiene mu di jikula.” Ua mu kuata mu lukuaku, kiki kiexile kisunji kia dikota—o anju ia lengela né bhu kanga! Kioso kia kexile kiá bhu kanga, o anju ia tumina Phetele ku lenga. Phetele ua bhuluka!
16 Kiki, ki ki kolesa o kixikinu kietu mu kuijiia kuila Jihova u bhulula o jiselevende jê? Etu ki tu kingila kuila Jihova u tu bhangela madiuanu phala ku tu bhulula lelu. (2 Mal. 16:9) Mu ku tena kua nzumbi iê ikôla, muéne u tena ku tu kuatekesa ku dibhana ni hadi ioso i tu bhita na-iu. (2 Kol. 4:7; 2 Phe. 2:9) Etu tuala ni kixikinu kuma Jihova ua-nda tumina o Mon’ê phala ku tu bhulula mu hadi ioso i tuene mu bhita na-iu, mu ituxi ni kufuá. (Nzu. 5:28, 29) O kixikanu kietu mu kikanenu kia Jihova, ki tu suínisa kioso ki tu kala ni ibhidi.
A KOLOKOTA MU KU BOKA, SUMBALA NI IBHIDI
17. Kiebhi Phaulu kia bhana phangu iambote ia lungu ni ku boka ni ku suína kuoso?
17 Saí hanji disá dia katatu, di tu longa o jipoxolo ia lungu ni ku dilanga: Ene a kolokota mu ku boka, sumbala ni ibhidi. O ku kolokota mu ku boka ni lusolo, kima kia bhingi phala ku dilanga. O poxolo Phaulu uexile o phangu ia dikota. Muéne ua kolokotele mu ku boka ni ku mateka ilunga iavulu. Muéne ua dibhanene ni ibhidi iavulu, né kiki, muéne ua kolokotele mu ku boka ni ku kala ku mesu azele.—2 Kol. 11:23-29.
18. Kiebhi Phaulu kia kolokotele o ku boka, sumbala ua kexile mu kaleia mu Loma?
18 Xinganeka ia bhiti ni Phaulu, kála kia tange mu divulu dia Ikalakalu mu kibatulu 28. Kioso Phaulu kia tula mu mbanza ia Loma, uai katé kua Nero. O masoladi a mu tula mu kaleia. Kienhiki, né muene o kaleia ki keji fidisa o poxolo ku boka! Phaulu ua kolokota mu ku sota kithangana phala ku boka. (Tanga Ikalakalu 28:17, 23, 24.) Mu ku bhita izuua itatu, Phaulu ua kenga maiala, akua Jijudé phala ku a bokela o njimbu. Kienhiki, kioso kia bhixila o kizuua kiki, Phaulu ua a bokela. O velusu 23, iambe: “Kia mu bhana kizuua kia tokala o kudimona dingi, [o Jijudé] a mu sanga m’onzo mua tula. Muène anga u a lomboluela maka, u bhana umbangi ua utuminu ua Nzambi. U sota ku a xikanesa ni maka ma tundu mu Kitumu kia Mozé ni mu madivulu ma Jipolofeta, tundé kimene katé ngoloxi, kuila Jezú muene Kristu.”
19, 20. (a) Mukonda diahi Phaulu ua di tundu kiambote mu ku boka? (b) Kiebhi Phaulu kia divu kioso kia mono kuila saí athu ka kexile mu xikina o njimbu iambote?
19 Mukonda diahi Phaulu ua suínine mu boka? O velusu 23 ilondekesa se mukonda diahi. (1) Phaulu ua diangele kuta ku pholo o Utuminu ua Nzambi. (2) Muéne ua soto ku “xikanesa o jingivuidi jê.” (3) Muéne ua kexile mu katula o milongi iê mu Mikanda Ikôla. (4) Muéne ua kexile mu boka ni henda ioso, tundé “kimene katé ngoloxi.” Phaulu ua bokele kiavulu, maji saí athu ka mu bhanene mátui. O velusu 24, iambe: “Amoxi anga a xikana ima ia tange Phaulu, amoxi-phe a xibhaka.” Athu a lembua ku di tendela mudiâ, ene oso a muangana.
20 O kuila Phaulu ua bhuila mukonda athu oso ka xikinine o njimbu ia tudila? Kana! Mu divulu dia Ikalakalu 28:30, 31, tua tange: “Muène anga u xala mivu iiadi mu dibhata diê-muène dia mu lukalesa, u kala mu tambulula oso a mu kane. Anga muène u boka o njimbu ia utuminu ua Nzambi, u longa ni ku bhua o uôma ima ioso ia tokala kua Ngana Jezú Kristu, kana muthu ua mu [fidisa].” O divulu dia Ikalakalu di tu suínisa ku kolokota.
21. Ihi i tu di longa ku phangu ia Phaulu kioso kia mu kutu?
21 Ihi i tu tena ku di longa ku phangu ia Phaulu? Kioso Phaulu kia mu kutu, muéne ka lembua o ku boka o njimbu nzo ni inzo. Né kiki, muéne ua kolokotele mu bokela athu oso a mu kundile. Kiene kimoxi ué, lelu o mundu ua Nzambi ene mu kolokota ku boka, sumbala ene mu ku a tatela mukonda dia kixikanu kiâ. Saí jiphange jetu ja mala ni ja ahatu, ene mu kolokota, sumbala ni ku kuka mba ku kata. Né kiki, o henda iâ kua Nzambi iavulu hanji. Ene mu bokela o ji dotolo, oso eza ku a kunda, ni a mukuá ala kumoxi. Ene ala ni vondadi ia ku bhana umbangi ua lungu ni Utuminu ua Nzambi. Etu tua zolo kiavulu o phangu iâ!
22. (a) Ihi i tu kuatekesa ku katula mbote ku divulu dia Ikalakalu? (Tala o kaxa ku thandu ku mbandu ia kadilu.) (b) Ihi i ua mu banza o ku bhanga kioso ki ua mu kingila o dizubhilu dia mundu iú ua iibha?
22 Mu kidi, tuejiia kuila saí ima iavulu i tu tena ku di longa ku phangu ia jipoxolo ia lungu ni ku dilanga ni ku Jikidistá ja mukuá ja hama ia dianga a a tange mu Bibidia mu divulu dia Ikalakalu. Kioso ki tuia ni ku kingila o dizubhilu dia mundu iú ua iibha, tu kolokote o ku kaiela o phangu ia Jikidistá ja hama ia dianga, mu ku bhana umbangi ni ku suína kuoso. Se-ku dingi ujitu ua mukuá u tu tena ku tambula u sokela ni iú, ua ku “bhana umbangi” ua Utuminu ua Nzambi.—Ika. 28:23.
IHI I U TENA KU DI LONGA IA LUNGU NI:
․․․․․
Ku dilanga kioso ki tuia mu boka?
․․․․․
Ku dilanga mu ku samba?
․․․․․
Ku kolokota mu ku boka, sumbala ni ibhidi?
[Ibhuidisu ia ku Dilonga]
[Kidikisu ku mbandu]
“O DIVULU DIA IKALAKALU NGA MU DI TENDELA DINGI KIAMBOTE M’UKULU NDENGE”
Kioso kia zubha ku tanga o divulu, ‘Dê Testemunho Cabal’ sobre o Reino de Deus, o kafunga ka ilunga ua londekesa kiki o kisangusangu kiê: “O divulu dia ikalakalu nga mu di tendela dingi kiambote m’ukulu ndenge. Ngene mu ‘tanga’ o misoso ia divulu dia Ikalakalu mu ithangana iavulu, maji kexile kála nga mu muika ni nvela, mu italelu ia vundu. Maji lelu ngi divua kala a ngi besoala phala ku i tendela kiambote ku muanha uatu.”
[Foto ku mbandu 16]
O anju iendesa Phetele katé bhu dibhitu
