“Keda lanta hunto cu mi.”​—MAT. 26:38.

1-3. (a) Den ki sentido e apostelnan di Hesus no a keda alerta e ultimo anochi cu Hesus tabata na tera? (b) Kico ta indica cu nan a siña di nan fout?

TABATA e ultimo anochi di Hesus su bida aki riba tera. Hesus a yega un di su luganan preferi: e hofi di Getsemani, cu a keda oost di Jerusalem. Su apostelnan fiel tambe tabata hunto cu ne. Hesus su mente y curason tabata asina carga cu e tabatin mester di un luga keto p’e haci oracion.​—Mat. 26:36; Juan 18:1, 2.

² Tres di su apostelnan—Pedro, Santiago y Juan—a compañ’e bay mas paden di e hofi. Eynan, Hesus a bisa nan: “Keda akinan y keda lanta hunto cu mi.” Anto el a bay un poco mas leu pa haci oracion. Ma ora el a bin bek, el a haya su amigonan morto na soño. Pesey el a bolbe suplica nan: “Keda vigila.” Pero despues di esey, dos biaha mas el a bin haya nan na soño. Anto mas despues, riba e mesun anochi ey, ni un di su apostelnan no a keda alerta den sentido spiritual. Es mas, nan a asta bandona Hesus y huy bay!​—Mat. 26:38, 41, 56.

³ Sin duda, e apostelnan a sinti duele cu nan no a keda alerta. Pero no a tarda mucho cu e hombernan fiel aki a siña di nan fout. Dicon nos ta bisa esey? Wel, e buki di Echonan ta mustra cu despues nan a pone un ehempel excelente di personanan cu a keda alerta den sentido spiritual. Sin duda, nan ehempel a motiva nan compañeronan cristian pa haci mescos. Nos tambe tin cu keda vigila, y awe mas cu nunca. (Mat. 24:42) Pesey, laga nos trata tres les encuanto con pa keda alerta cu nos por siña for di e buki di Echonan.

NAN A KEDA ALERTA PA HAYA SA UNDA PA PREDICA

4, 5. Con spirito santo a guia Pablo y su compañeronan durante nan biahe?

⁴ E prome les cu nos por siña for di e buki di Echonan ta cu e apostelnan a keda alerta pa nan por a haya  sa unda pa predica. Por ehempel, tin un relato cu ta mustra con Hesus a uza spirito santo pa guia apostel Pablo y su compañeronan durante un biahe masha peculiar. (Echo. 2:33) Laga nos ban wak con a bay cu e biahe ey.​—Lesa Echonan 16:6-10.

⁵ Pablo, Silas y Timoteo a bandona Listra, un stad cu tabata keda den zuid di Galacia. Un par di dia despues, nan a yega un caya principal Romano, cu den direccion west ta hiba na e region mas pobla di e districto di Asia, y nan kier a sigui e ruta ey. Dicon? Pasobra esey lo a hiba nan na algun stad caminda tabatin miles di hende cu mester a tende tocante Cristo. Sinembargo, algo a stroba nan di sigui. Versiculo 6 ta bisa: “Nan a pasa door di Frigia y e region di Galacia, pasobra spirito santo a prohibi nan di papia e palabra di Dios na Asia.” Si, Bijbel no ta bisa con, pero spirito santo a stroba e biaheronan aki di bay predica den e provincia di Asia. Evidentemente, pa medio di Dios su spirito, Hesus kier a manda Pablo y su compañeronan den un otro direccion.

6, 7. (a) Kico a pasa ora Pablo y su compañeronan tabata cerca di yega Bitinia? (b) Ki decision nan a tuma e ora ey, y kico tabata e resultado?

⁶ Unda Pablo y su compañeronan a bay? Versiculo 7 ta bisa: “Anto ora nan a yega e region di Misia, nan a purba di drenta e provincia di Bitinia, ma Hesus, pa medio di spirito santo, no a permiti nan.” Pues, como cu spirito santo no a laga nan predica na Asia, Pablo y su compañeronan a bira bay noord cu intencion di bay predica den e stadnan di Bitinia. Sinembargo, ora nan tabata cerca di yega Bitinia, Hesus a bolbe uza spirito santo pa evita cu nan ta bay eynan. Nan lo mester a sinti nan confundi. Nan tabata sa kico pa predica, con pa predica, pero nan no tabatin niun idea unda pa predica. Ta comosifuera nan a yega te na porta di Asia y a bati, pero nada. Nan a bati na porta di Bitinia—y atrobe nada. Nan a stop di bati? No, e predicadornan celoso aki a sigui bati!

⁷ Awor, nan a tuma un decision cu por parce un poco straño. Versiculo 8 ta bisa: “Nan a crusa Misia y a sigui bay abou te na e stad Troas.” Pues, nan a bira bay west, cana 563 kilometer, pasa varios stad te ora nan a yega e haf di Troas, caminda nan por a subi barco bay Macedonia. Versiculo 9 ta bisa nos kico a sosode eynan: “Anochi Pablo a haya un vision: Tabatin un homber di Macedonia para su dilanti ta suplic’e: ‘Crusa bin Macedonia, bin yuda nos.’ ” Porfin Pablo tabata sa unda pa predica. Si, ta comosifuera Pablo y su compañeronan a bati na porta pa di tres biaha, y awor si e porta a habri hancho hancho pa nan! Pesey, nan a subi barco bay Macedonia di biaha.

8, 9. Ki les nos por saca for di e relato di Pablo su biahe?

⁸ Kico nos por siña for di e relato aki? Ripara cu ta despues cu Pablo tabata riba caminda pa Asia, e spirito di Dios a interveni. Y ta te despues cu Pablo tabata cerca di yega Bitinia, Hesus a tuma accion. Anto finalmente, ta despues cu Pablo a yega Troas, Hesus a mand’e Macedonia. Pues, como Cabes di e congregacion cristian, Hesus lo por trata nos na un manera similar. (Col. 1:18) Ban bisa cu bo ta pensando pa traha pionero of muda bay biba den un area caminda tin mas necesidad. Probablemente, ta despues cu bo dal paso definitivo pa logra bo meta, Hesus lo guia bo pa medio di Dios su spirito. Nos por ilustra esey asin’aki: Pa un chauffeur por pone su auto lora na man drechi of na man robes, e auto mester ta coriendo. Mescos tambe, ta solamente si nos ta moviendo caba, esta, ta haciendo esfuerso pa logra nos meta, Hesus lo por yuda nos haci mas den sirbishi.

⁹ Pero awor, kico si bo esfuersonan no  duna fruta mesora? Bo mester entrega, pensando cu e spirito di Dios no ta guia bo? Wel, corda cu Pablo tambe a hay’e cu contratiempo. Pero el a sigui busca y bati te ora un porta a habri. Awe ta mescos: Si bo sigui haci esfuerso pa busca “un porta grandi cu ta hiba na actividad”, bo tambe lo haya bon resultado.​—1 Cor. 16:9.

NAN A KEDA ALERTA PA NO NEGLISHA ORACION

10. Kico ta mustra cu nos mester sigui haci oracion pa nos por keda alerta?

¹⁰ E di dos les encuanto keda alerta cu nos por siña for di nos rumannan cristian di prome siglo ta esaki: Nan a keda alerta pa no neglisha oracion. (1 Ped. 4:7) Si, pa nos por keda alerta, nos mester sigui haci oracion. Bo ta corda kico Hesus a bisa tres di su apostelnan den hofi di Getsemani net prome cu nan a bin arest’e? El a bisa nan: “Keda vigila y haci oracion continuamente.”​—Mat. 26:41.

11, 12. Dicon Herodes a maltrata Pedro y e otro cristiannan, y con el a haci esaki?

¹¹ Pedro, kende tabata presente na e ocasion ey, a experencia despues cuanto poder oracion ferviente tin. (Lesa Echonan 12:1-6.) E prome versiculonan di Echonan 12 ta conta con Herodes a maltrata e cristiannan pa e keda bon mira den bista di e Hudiunan. Probablemente e tabata sa cu Santiago tabata un apostel y bon amigo di Hesus. Pesey, el a laga mata Santiago “cu spada.” (Versiculo 2) Asina e congregacion a perde un apostel stima. Esey tabata un prueba duro pa e rumannan.

¹² Kico Herodes a haci despues? Versiculo 3 ta bisa: “Ora el a mira cu esey a cay na agrado di e Hudiunan, el a laga aresta Pedro tambe.” Pero nan a yega di cera Pedro y algun otro apostel caba den prizon, ma esey no a yuda. (Echo. 5:17-20) Probablemente, Herodes tabata sa esey, y pesey mes e politico astuto aki no kier a core ningun riesgo. El a entrega Pedro na ‘cuater grupo di cuater solda pa tuma turno pa vigil’e, pasobra e tabatin intencion di present’e na e pueblo despues di e Fiesta di Pasco.’ (Versiculo 4) Imagina bo! Herodes a laga nan mara Pedro na cadena na dos wardado di preso. Pues, un total di 16 wardado di preso tabata cambia warda di dia y anochi pa haci sigur pa e apostel no huy. Herodes su intencion tabata pa presenta Pedro na e pueblo despues di Pasco Hudiu y sentenci’e na morto pa complace e multitud. Kico Pedro su compañeronan cristian por a haci den un situacion asina dificil?

13, 14. (a) Con e congregacion a reacciona ora Herodes a laga cera Pedro den prizon? (b) Kico nos por siña tocante oracion for di e ehempel di Pedro su compañeronan cristian?

¹³ E congregacion tabata sa precies kico pa haci. Na versiculo 5 nos ta lesa: “Pedro tabata cera den prizon, ma e congregacion tabata roga Dios fervientemente p’e.” Si, nan tabata haci oracion y suplica sincero pa nan ruman stima. Pues, e morto di Santiago no a pone nan desespera y perde animo ni pensa cu oracion no ta yuda. Al contrario, nan tabata sa cu oracion di adoradonan fiel ta masha importante pa Jehova y cu e ta contesta oracion cu ta na harmonia cu su boluntad.​—Heb. 13:18, 19; Sant. 5:16.

¹⁴ Pues, ki les nos por saca for di e manera cu Pedro su compañeronan cristian a reacciona? Wel, keda alerta ta encera haci oracion, no pa nos so, ma pa nos rumannan tambe. (Efe. 6:18) Abo sa di rumannan den fe cu ta pasando den hopi prueba? Algun di nan kisas ta enfrenta persecucion, prohibicion di gobierno of desaster natural. Pakico no haci oracion ferviente pa nan? Kisas bo sa di otronan cu ta pasa den dificultadnan cu otro hende no ta haltura di dje. Kisas nan ta lucha cu problema di famia, desanimacion of cu nan salud. Pakico no pensa  riba cierto rumannan cu bo por menciona specificamente ora bo ta papia cu Jehova, Esun “cu ta scucha oracion”?​—Sal. 65:2.

15, 16. (a) Describi con e angel di Jehova a libra Pedro for di prizon. (Wak e plachi akibou.) (b) Dicon e manera cu Jehova a libra Pedro ta un consuelo pa nos?

¹⁵ Pero con a para cu Pedro? Riba su ultimo anochi den prizon, mientras e tabata morto na soño, meymey di dos wardado, algo asombroso a sosode. (Lesa Echonan 12:7-11.) Visualisa e escena: Diripiente, un luz skerpi a lusa henter e cel. Un angel a aparece y a lanta Pedro cu urgencia for di soño. Obviamente, e wardadonan si no a mira e angel. Anto e cadenanan cu tabata mara na Pedro su mannan a kita cay gewoon asina! E angel a sali cu Pedro for di e cel, cana pasa dilanti di e dos wardadonan para pafo, y finalmente nan a pasa door di e porta grandi di hero cu “a habri di su mes.” Unabes pafo, e angel a disparce. Pedro tabata liber!

¹⁶ Ora nos pensa riba Jehova su poder ilimita pa rescata su sirbidornan, esaki ta haci nos fe mas fuerte. Ta claro cu nos no ta spera cu Jehova ta libra nos milagrosamente den e tempo aki. Pero nos tin pleno confianza si cu Jehova ta uza su poder pa yuda su pueblo. (2 Cro. 16:9) Mediante su spirito santo poderoso, e ta duna nos forsa pa soporta cualkier prueba. (2 Cor. 4:7; 2 Ped. 2:9) Y pronto Jehova lo duna su Yiu poder pa saca miyones di hende for di e prizon cu niun hende no por scapa for di dje, esta, morto. (Juan 5:28, 29) Si, nos fe den Dios su promesanan por duna nos mas curashi pa enfrenta prueba awe.

NAN A DUNA TESTIMONIO CABAL A PESAR DI PRUEBA

17. Dicon Pablo tabata un ehempel excelente den e trabou di predica?

¹⁷ Ata aki un di tres les encuanto keda alerta cu nos por siña for di e apostelnan: Nan a sigui duna testimonio cabal a pesar di prueba. Si, pa nos keda alerta, nos mester sigui predica cu celo y cu un sentido di urgencia. Apostel Pablo tabata un excelente ehempel den esaki. El a haci hopi den e trabou di predica; el a biaha bay hopi luga y a lanta hopi congregacion. Aunke el a hay’e cu hopi dificultad, nunca el a perde su celo pa sirbishi ni su sentido di urgencia.​—2 Cor. 11:23-29.

18. Con bini Pablo por a sigui duna testimonio cabal asta ora e tabata preso na Roma?

¹⁸ Laga nos analisa e ultimo biaha cu e buki di Echonan ta haci mencion di Pablo. Esey ta na capitulo 28. Segun e relato, Pablo a caba di yega Roma pa presenta dilanti di Nero. Nan a ten’e bou di vigilancia, kisas mara na cadena na e solda cu tabata vigil’e. Pero cadena no por a cera boca di e apostel celoso aki! El a sigui busca maneranan pa duna testimonio. (Lesa Echonan 28:17, 23 y 24.) Despues di tres dia, Pablo a manda yama e lidernan Hudiu pa duna nan  testimonio. Anto riba un otro dia cu nan a cumbini, Pablo a duna nan un testimonio mucho mas extenso. Versiculo 23 ta bisa nos: “Anto nan [esta, e Hudiunan cu tabata biba na Roma] a palabra un dia cu Pablo pa tend’e, y un grupo mas grandi ainda a bini cerca dje caminda e tabata keda. Y for di mainta te atardi, el a splica nan e asunto, dunando testimonio cabal tocante e Reino di Dios, tanto for di Lei di Moises como for di buki di e Profetanan, a fin di convence nan tocante Hesus.”

19, 20. (a) Dicon Pablo por a duna testimonio na un manera asina eficaz? (b) Con Pablo a reacciona ora algun hende no a acepta e bon noticia?

¹⁹ Con bini Pablo por a duna testimonio na un manera asina eficaz? Ripara cu versiculo 23 ta hala atencion na diferente cos cu a contribui na esey. (1) El a enfoca riba e Reino di Dios y riba Hesucristo. (2) El a papia na un manera convencente cu su oyentenan pa yega na nan curason. (3) El a rasona cu nan uzando e Scritura. (4) E no a wak su propio interes; el a duna testimonio “di mainta te atardi.” Si, Pablo a duna un excelente testimonio, pero no ta tur hende a acepta e bon noticia. Versiculo 24 ta bisa: “Algun di nan a kere loke el a bisa; ma otronan no kier a kere.” Y esey a pone cu a surgi un discusion entre e hendenan, y nan a lanta bay.

²⁰ Pablo a desanima pasobra no ta tur hende a acepta e bon noticia? Claro cu no! Echonan 28:30 y 31 ta bisa: “Pablo a keda eynan dos aña largo den un cas cu e mes a huur. Y tur hende cu tabata bini cerca dje e tabata ricibi na un manera amabel. Cu masha curashi y sin ningun strobanza e tabata predica e Reino di Dios na e hendenan aki y siña nan tocante Señor Hesucristo.” Cu e palabranan di animacion aki, e buki inspira di Echonan ta termina.

21. Ki ehempel Pablo a pone ora e tabata bou di aresto den su mes cas?

²¹ Kico nos por siña for di e ehempel di Pablo? Durante e tempo cu Pablo tabata bou di aresto den su mes cas, e no por a bay predica di cas pa cas. Toch el a keda cu un actitud positivo y a duna testimonio na tur hende cu tabata bini cerca dje. Awe tambe, hopi sirbidor di Jehova ta mantene nan goso y ta sigui predica a pesar cu nan ta cera inhustamente pa motibo di nan fe. Algun di nos rumannan stima no por sali bay predica pasobra edad avansa of malesa ta obliga nan keda cas of asta biba den un cas di cuido. Pesey, segun nan por, nan ta predica na dokter, na trahado, bishitante y otro hende cu nan haya contacto cu ne. Di henter nan curason nan ta desea di duna testimonio cabal tocante e Reino di Dios. Esta un bunita ehempel nan ta pa nos!

22. (a) Ki publicacion ta yuda nos beneficia mas di e buki di Echonan? (Wak e cuadro ariba.) (b) Kico bo ta determina pa haci segun bo ta warda riba e fin di e era malbado aki?

²² Ta obvio cu e apostelnan y otro cristiannan di prome siglo cu e buki di Echonan ta papia di dje por siña nos hopi encuanto con pa keda alerta. Segun cu nos ta warda e fin di e era malbado aki, laga nos ta determina pa imita nan y duna testimonio cu celo y curashi. No tin un privilegio mas grandi cu esun di por ‘duna testimonio cabal’ di Dios su Reino!​—Echo. 28:23.

[Preguntanan di Estudio]

[Cuadro na pagina 17]

“NUNCA MAS E BUKI DI ECHONAN LO TA MESCOS PA MI”

Despues cu un superintendente biahero a lesa e buki “Duna Testimonio Cabal” di e Reino di Dios, el a expresa su sintimentonan asin’aki: “Nunca mas e buki di Echonan lo ta mescos pa mi. Mi a yega di lesa e buki di Echonan varios biaha. Pero ta manera cos cu mi tabata lesa cu un bril sushi bisti y cu luz di bela. Ma awor ta comosifuera mi a ser bendiciona cu luz di solo, pasobra awor mi por mira e buki di Echonan den tur su gloria.”

[Plachi na pagina 16]

Un angel a yuda Pedro sali via di e porta di hero